Bible Zir Nân Hun I Insiam Em?

NI KUM khân, Governing Body chuan chhûngkuaa Bible zirna leh sawihona min neihtîr theitu tûr kohhran inkhâwm dân siamremna chu a puang a. Chhûngkaw lû i nih chuan, i nupui leh i fate chu chhûngkuaa Bible zirna awmze nei tak neihpui ziah ang che. Fa nei lo nupa tuakte chuan chu hun chu Bible zir dun nân an hmang duh ngei ang a. Chhûngkaw mawhphurhna nei lo unau nula leh tlangvâl te chuan he hun ṭha tak hi mahnia Bible zir nân an hmang thei ngei bawk ang.

Mi tam tak chuan Chhûngkuaa Pathian Biakna neih zân ruahmanna avângin lâwmthu an sawi a. Entîr nân, kohhran upa Kevin-a chuan heti hian a ziak a ni: “‘Kan lâwm e,’ tih ṭawngkam hian kohhran chhûnga mite lâwmzia chu a phawk zo lo. Governing Body min tihtîr ang ngeia kan âwl zân chu chhûngkuaa Bible zirna neih nâna kan hman dân upaho zîngah kan sawiho a ni,” tiin.

Upa pakhat nupui Jodi-i chuan heti hian a ziak a ni: “Fanu pathum, kum 15, 11, leh kum 2 mi kan nei a. Tûn hnai mai khân sign-language hmanna kohhranah kan in sawn a ni. Inkhâwm zawng zawng atâna inpuahchah nân hun tam tak sên leh thawhrim a ngai a. Tûnah chuan, he siamremna avângin chhûngkuaa Pathian biakna min neihtîr thei zân dang kan neih belh ta!” tiin.

Regular pioneer thawh nupa tuak khat John-a leh JoAnn-i chuan heti hian an ziak bawk: “Chhûngkuaa Bible kan zirna chu kohhran thiltih chi hrang hrang kâra kan zeh tel ṭhin avângin kan nei mumal thei ṭhîn lo va. He ruahmanna thar hi—a nih tûr anga kan hman chuan—thlarau lama min tuaithartu Pathian Jehova hnên aṭanga thilpêk a ni,” tiin.

Kum 25 vêl mi unaupa tlangvâl Tony-a chuan Thawhlehni zân chu mahnia inzirna hun atân  a dah hrang a. Chawlhkâr khat chhûnga hun dangte chu kohhran inkhâwmte atâna inpuahchah nân a hmang a ni. Amaherawhchu, Tony-a chuan, “A bîk takin, Thawhlehni chu ka nghâkhlel ṭhîn,” a ti. Engvângin nge? “Chu mi zân chu Pathian Jehova nêna hun kan hman zân a ni a. Dârkâr hnih vêl chu Pathian Jehova nêna kan inlaichînna tinghet zualtu tûr thute ka zir a. Zirna atâna hun tam lehzual neihna chuan Bible châng ka chhiarte chhût ngunna hun min pe a ni,” tiin a chhan a hrilhfiah a ni. Chu chuan eng nge a rah chhuah? “Tûn hma zawng aiin, Pathian Jehova zilhna thute ka thinlungah a intuh nghet zual a ni,” a ti. Entîrna a pe thei em? “Insight bu-ah chuan Davida leh Jonathana te inkâra awm inṭhianna chungchâng ka chhiar a. Jonathana neih mahni hmasial lo rilru put hmang aṭangin thil tam tak ka zir a ni. A entawn tûr siam chuan ṭhian dik tak nih awmzia hre thiam lehzual tûrin min ṭanpui a. Chutiang thil hlu tak tak hmuh zêl nân, Thawhlehni zân chu ka nghâkhlel tak zet thîn!” a ti.

Pathian Jehova chhiahhlawh zawng zawngte chuan Bible zirna awmze nei tak leh chhûngkuaa Pathian biak nâna hun kan neih belh chu ṭha taka kan hman chuan, chu chu nasa takin kan hlâwkpui ngei ang tih rinhlelh rual a ni lo. (w09 10/15)