Pathian Hnaih Rawh

Dik Taka Rorêltu Pathian Chu

Number 20:2-13

MIHRING rorêltute chuan dik lo tak emaw, âwm lo taka nasain emaw ro an rêl mai thei a; mahse, ‘rorêlna fel ngainatu’ Pathian Jehova chu chutiang a ni ve lo. (Sâm 37:28) Dawhthei hle mah se, sualna a ngaizam mai lo va. Dikna atân a ding nghet tlat a ni. Number bung 20-a chhinchhiah inhnialna leh helna chunga a rorêl dân hi han ngaihtuah teh.

Thlalêra an zin tâwp dâwn lamah, Israelte chuan tui an thlachham a. * Mipuite chuan Mosia leh Arona hnênah: “Engati nge LALPA mipuihote hi thi tûra thlalêrah hian i hruai luh ni, keimahni leh kan rante nên?” tia sawiin an hnial ṭan ta mai a. (Châng 4) Mipuite chuan chu thlalêr chu a hma kum engemaw zâta Israel enthlatute’n Ram Tiam aṭanga an rawn hawn “theipui te, grêp kûng te, pawmgranet te” awm lohna ‘ram ṭha lo tak’ leh “tui in tûr” pawh awm lohna hmun nia sawiin an phunnawi a. (Châng 5; Number 13:23) A nihna takah chuan, thlalêr chu anmahni thlahtu phunnawi chîngte luh duh tâk loh ram ṭha tak ang a nih loh avângin, Mosia leh Arona te chu thiam loh an chantîr ta ngawt mai a nih chu!

Pathian Jehova chuan phunnawite chu a hnâwl lo va. Mosia chu thil pathum ti tûrin a hrilh ta zâwk a: a tiang la a, mipuite chu awm khâwmtîr tûr, leh ‘an mithmuhah lungpui chu a tui tichhuak tûra hrilh tûrin’ a tîr a. (Châng 8) Mosia chuan kaihhruaina pahnihte chu a zâwm a; mahse, a pathumna erawh chu a zâwm lo. Rinna nei chunga lungpui hnêna tui tichhuak tûra hrilh ai chuan, mipuite chunga thinur takin: “Helhmanghote u, ngai teh u, he lungpui ata hi tui kan lâk chhuahsak dâwn che u em ni?” tiin a sawi a. (Châng 10; Sâm 106:32, 33) Tichuan, Mosia chuan lungpui chu vawi hnih a vua a, “tichuan tui a lo chhuak ta dur dur mai” a ni.—Châng 11.

Chutiang chuan Mosia leh Arona chuan nasa takin thil an tisual a. Pathian chuan an hnênah: ‘Ka thu dodâlin in hel,’ tiin a sawi a ni. (Number 20:24) Chu mi ṭuma Pathian thupêk anga thil an tih loh avângin, Mosia leh Arona chu mipuite an puhna ang ngeiin helhmang an lo ni a. Pathian rorêlna chu a chiang hle: Mosia leh Arona chuan Israelte chu Ram Tiam-ah an hruai lût lo vang, tih chu. Chu hremna chu a na lutuk em? Chhan engemaw zât a neih avângin a hrem na lutuk tih theih a ni lo.

A hmasain, Pathian chuan Mosia chu mipuite be tûr leh helhmang anga an chung thu rêlsak tûrin a hrilh lo va. A pahnihnaah chuan, Mosia leh Arona chuan Pathian an chawimawi lo a ni. Pathian chuan: ‘Mi chawimawi lo,’ tiin a sawi. (Châng 12) Mosia chuan “tui kan lâk chhuahsak dâwn che u” tia sawiin, Mosia chuan Pathian ni lovin amah leh Arona chu mak taka tui la chhuaktu angah an inchan a ni. A pathumnaah chuan, a hremna chu a hmaa a rorêl dân nên a thuhmun a ni. Pathian chuan a hmaa helhmang chhuante chu Kanaan rama an luh a phal lo va, chutiang bawkin Mosia leh Arona te an luh pawh a phal bîk lo a ni. (Number 14:22, 23) A palinaah chuan, Mosia leh Arona chu Israelte hruaitu an ni a. Mawhphurhna lian chelhtute chuan Pathian hmaah mawhphurhna lian zâwk an nei a ni.—Luka 12:48.

Pathian Jehova chu dikna atân a ding nghet tlat a. Rorêlna dik a ngainat avângin, dik lo takin ro a rêl thei lo. Chutiang rorêltu chuan kan rinchhan leh kan zah a phu a ni tih a chiang hle. (w09 9/1)

[Footnote]