“Ka Ṭhiante In Ni”
“Ka Ṭhiante In Ni”
“Thu ka pêk apiang che u in tih chuan ka ṭhiante in ni ang.”—JOH. 15:14.
1, 2. (a) Isua ṭhiante kha eng anga ṭo bul inang lo tak aṭanga lo kal khâwm nge an nih? (b) Engvângin nge Isua ṭhian nih chu thil pawimawh tak a nih?
ISUA nêna pindan chungnunga ṭhute chu ṭo bul inang lo tak tak an ni hlawm a. Petera leh Andria te unau chu sangha mantu an ni a. Matthaia chu tûn hma chuan Judate hmuhsit tak chhiahkhawntu a ni. Jakoba leh Johana te ang mi ṭhenkhat chuan Isua chu a naupan lai aṭanga an hriat a rinawm hle a. Nathanaela ang mi dangte chuan Isua an hriatna chu a la rei lo hle pawh a ni thei bawk. (Joh. 1:43-50) Mahse, Jerusalem khuaa chu Kalhlên Kût zân pawimawh taka tel zawng zawngte chuan Isua chu Messia, Pathian nung Fapa a ni tih an ring vek a ni. (Joh. 6:68, 69) An hnêna Isua’n: “Ṭhiante ka ti . . . ang che u; Pa hnêna thil ka hriat zawng zawng in hnênah ka puang tawh si a,” tia a sawi an han hriat chuan hmangaihna dawng nia inhriatna an nei ngei ang.—Joh. 15:15.
2 A tirhkoh rinawmte hnêna chûng a thusawite chu tûn laia hriak thih Kristian zawng zawngte leh an ṭhian “berâm dang” zawng zawngte tân pawh a ni a tih theih ngei ang. (Joh. 10:16) Kan lo chhuahna ṭo bul chu engpawh ni se, Isua ṭhian nih theihna chanvo ka nei ṭheuh va. Chu chu thil pawimawh ber a ni; amah nêna inṭhianna chuan Pathian Jehova ṭhian pawh min nihtîr avângin. A nihna takah chuan, Krista kan hnaih phawt loh chuan Pathian Jehova kan hnaih thei lo. (Johana 14:6, 21 chhiar rawh.) Chuti chu, Isua ṭhian ni tûr leh ni reng tûrin eng nge kan tih tâk ang? Chu thil pawimawh tak kan sawiho hmain, ṭhian ṭha nihna kawnga Isua entawn tûr siam chu bih chiangin, an inṭhianna avânga a zirtîrte thusawi leh thiltihte chu i lo en hmasa ang u.
Thian Ṭha Nihna Kawnga Isua Entawn Tûr Siam
3. Eng thilah nge Isua chuan hriat a hlawh?
3 “Mi hausa . . . chuan ṭhian tam an nei,” tiin Lal fing Solomona chuan a ziak a. (Thuf. 14:20) Chu thu chuan an hlâwkpui tûrte chauh ṭhiana siam duh ṭhîn mi ṭha famkim lote rilru âwnzâwng chu a hril chiang hle. Isua chuan chutiang rilru chu a lantîr ve lo va. A tân chuan hausakna emaw, nihna emaw chuan awmzia a nei ve lo. Isua chuan rorêltu tlangvâl hausa tak chu a hmangaih a, a hnungzui tûrin a sâwm ngei mai. Amaherawhchu, Isua chuan chu pa chu a thil neihte hralh a, mi retheite hnêna pe tûrin a hrilh a ni. (Mk. 10:17-22; Lk. 18:18, 23) Isua chuan mi hausate leh mi challangte a kawm vâng ni lovin, mi hnuaihnungte leh mi hmuhsitte ṭhian a nih vâng zâwkin hriat a hlawh a ni.—Mt. 11:19.
4. Engvângin nge Isua ṭhiante kha mi ṭha famkim an ni lo tih kan sawi theih?
4 Isua ṭhiante chu ṭha famkim an ni lo ngei mai. Ṭum khat phei chu Petera’n Pathian thil thlîr dân angin thil a thlîr lo va. (Mt. 16:21-23) Jakoba leh Johana’n Isua hnênah a Lalrama nihna sâng pe tûra dîlin, ropuina an ûmzia an lantîr a ni. An thiltih chuan tirhkoh dangte chu a tithinur a, challan duhna chu inhnialna tichhuaktu a ni fo a ni. Mahse, Isua chuan a ṭhiante thil ngaihtuah dân chu dawhthei takin siam ṭhat a tum a, an chungah a thinrim mai lo.—Mt. 20:20-28.
5, 6. (a) Engvângin nge Isua chuan a tirhkoh a tam zâwkte nêna an inṭhianna chu a vawn reng? (b) Engvângin nge Isua chuan Juda nêna an inṭhianna chu a tihtâwp?
5 Isua’n hêng mi ṭha famkim lote ṭhiana a neih reng chhan chu, an ṭhat famkim lohna a pawmzam vâng emaw, a hmuh loh vâng emaw a ni lo. Chu ai mah chuan, an rilru put hmang ṭha leh mize ṭhate a en zâwk vâng a ni. Entîr nân, Petera, Jakoba, leh Johana te chuan a hun tawn khirh ber chhûngin Isua chu an ṭanpui lo va, an muthilhsan zâwk a ni. Isua an laka a beidawng deuh pawh hi hriatthiam awm tak a ni a. Chuti chung pawh chuan, an rilru put hmang ṭha chu hmuin: “Thlarau zawngin a peih a, tisa erawh chu a chak lo a ni,” tiin a sawi a ni.—Mt. 26:41.
6 Chu mi nêna inkalh takin, Isua chuan Juda Iskariota nêna an inṭhianna chu a titâwp a. Juda chuan a pâwn lângin an inṭhianna chu vawng reng mah se, Isua chuan tûn hmaa he a ṭhian ṭha tak chuan a thinlung a tikhawlo tih a hria a ni. Juda chu khawvêl ṭhian a lo nih tâk avângin, Pathian hmêlmaah a insiam ta a ni. (Jak. 4:4) Chuvângin, Isua’n a tirhkoh rinawm la bâng 11-te nêna an inṭhianna A puan khân, Juda chu a hnawt chhuak daih tawh a ni.—Joh. 13:21-35.
7, 8. Engtin nge Isua’n a ṭhiante a hmangaihna chu a târ lan?
7 Isua chuan a ṭhian rinawmte ṭhat lohna lai chu en lovin, an tâna thil ṭha ber tûr chu a ti a. Entîr nân, fiahna an tawh chhûnga humhim tûrin a Pa hnênah a ṭawngṭaisak a. (Johana 17:11 chhiar rawh.) Isua chuan an taksa tlin tâwk chu a ngaihtuah tel bawk a. (Mk. 6:30-32) Tin, Isua ngaihven chu a ṭhiante hnêna a ngaih dân hrilh chauh ni lovin, a ṭhiante’n an ngaih dân leh rilru veizâwng an sawite ngaihthlâksak leh hriatthiam pawh a ni tel bawk a ni.—Mt. 16:13-16; 17:24-26.
8 Isua chu a ṭhiante tân a nungin, a thi bawk. Ani chuan a Pa rorêlna dik tehna tihlungawi nân a nun a pêk a ngai tih a hre ngei mai. (Mt. 26:27, 28; Heb. 9:22, 28) Mahse, Isua chuan a nun chu a hmangaihna lantîr nân a pe a ni: “Mihringin a ṭhian aia a nun a paih aliama hmangaihna nasa zâwk tuman an nei lo,” tiin a sawi si a.—Joh. 15:13.
Engtin Nge Zirtîrte Chuan Isua’n Ṭhiana A Siamna Chu An Chhân Lêt?
9, 10. Engtin nge mite chuan Isua thil phalna chu a chhân lêt?
9 Isua chuan a ṭhiante tân a hun te, a hmangaihna te, leh a thil neihte chu a pe phal hle a. Chu mi avâng chuan mite chu a lama hîpin an awm a, lâwm takin an thil neihte chu an pe lêt a ni. (Lk. 8:1-3) Isua chuan ama thiltawn aṭangin: “Pe rawh u, chutichuan pêkin in awm ang, ṭhahnemngai taka teh a, beng muk a, sawi muk a, liam zawih zawihin, in mal chungah an pe ang chu u. In tehna ngai bawkin an tehsak leh dâwn si che u,” tiin a sawi thei a ni.—Lk. 6:38.
10 Ṭhenkhat chuan Isua hnên aṭanga an thil dawn tûr avâng chauhvin, Isua kawm chu an tum ngei mai. Chûng ṭhian dik lote chuan Isua thusawi engemaw an hriatthiam loh khân an kalsan a. Isua thusawi an hriatthiam loh chu dik tûra pawmsak ai chuan, thu tâwp dik lo tak siamin, an hnu chhawn ta zâwk a ni. Chu mi nêna inkalh takin, tirhkohte chu an rinawm a. Krista nêna an inṭhianna chu fiah a ni fo va; mahse, hun nuamah leh hrehawmah pawh amah thlâwp tûrin theih tâwp an chhuah a ni. (Johana 6:26, 56, 60, 66-68 chhiar rawh.) Leia mihring anga a nun tâwp zân khân, Isua chuan: “Thlêmna ka tawh chhûng zawng nangni mi awmpuitu in ni,” tia sawiin, a ṭhiante a hmangaihzia chu a târ lang a ni.—Lk. 22:28.
11, 12. Engtin nge Isua’n zirtîrte chu a thlamuan a, engtin nge an chhân lêt?
11 Isua’n a zirtîrte chu an rinawmna avânga a fak hnu lawkah, anni chuan an kalsan leh a. Krista an hmangaihna chu mihring an hlauhna chuan rei lo te chhûng a chîmbuai a ni. Isua chuan anni chu a ngaidam leh a. A thih a, a thawhleh hnu chuan, an hnênah inlârin, ṭhiana a pawm reng thu hriattîrin a thlamuan a ni. Chu bâkah, rawngbâwlna thianghlim—“hnam tina mi” zirtîra siam leh “kâwlkil thleng” pawha a thuhretute nihna—chu a kawltîr a ni. (Mt. 28:19; Tirh. 1:8) Engtin nge a zirtîrte’n an chhân lêt?
12 Zirtîrte chuan Lalram thuchah thehdarh nân theih tâwp an chhuah a. Pathian Jehova thlarau thianghlim ṭanpuina nên chuan an thu zirtîrin Jerusalem khua chu an tikhat thuai a ni. (Tirh. 5:27-29) Thi tûra vauna meuh pawhin zirtîra siam tûra Isua thupêk a zawm lohtîr lo. Isua thupêk an dawn hnu kum sâwmbi engemaw zât lekah, tirhkoh Paula chuan ram chanchin ṭha chu “vân hnuaia thil siam zawng zawngte zînga tlângaupui” a nih tawh thu a ziak thei a ni. (Kol. 1:23) Chûng zirtîrte chuan Isua nêna an inṭhianna an hlut a ni tih a chiang hle!
13. Isua zirtîrte chuan a zirtîrna chu eng kawngin nge an inthununtîr?
13 Zirtîr lo ni tate chuan Isua zirtîrna chu an nunpui bawk a. Mi tam takte tân chuan, nungchang leh mizia lamah nasa taka inthlâkthlengna an neih a ngai a ni. Zirtîr thar ṭhenkhat chu tûn hmaa mawngkawhur te, uirê te, zui ruih hmang te, a nih loh leh rûk hmang te an ni a. (1 Kor. 6:9-11) Mi dangte tân chuan hnam dangte chunga an rilru put hmang chu an thlâkthleng a ngai a ni. (Tirh. 10:25-28) Chuti chung pawh chuan, Isua thu chu an zâwm a. An mihring hlui chu hlîp thlain, mihring tharin an inthuam a ni. (Eph. 4:20-24) “Krista rilru” chu an hre chiang a, a thil ngaihtuah dân leh a thiltih dân hre thiamin, an entawn a ni.—1 Kor. 2:16.
Tûn Laia Krista Nêna Kan Inṭhianna
14. Isua chuan “khawvêl tâwpna” hun chhûng hian eng tih nge min tiam?
14 Kum zabi khatnaa mi tam takte chuan Isua chu a mi mal takin an hria emaw, a thawhleh hnuah an hmu emaw a. Chutiang chanvo ṭha nei kan awm lo tih a chiang hle. A nih chuan, engtin nge Krista ṭhian kan nih theih ang? Kan nih theih dân kawng khat chu Isua hriak thih unau leia la damte hmanga din, bâwih rinawm leh fing tak pâwl min pêk kaihhruainate zawm hi a ni a. Isua chuan “khawvêl tâwpna” hun chhûng hian, he bâwih hi “a neih zawng zawng chungah” hotuah a siam ang tih a tiam a ni. (Mt. 24:3, 45-47) Tûn laiah, Krista ṭhian nih tumtu mi a tam zâwkte chu, chu bâwih pâwla mi an ni lo va. Bâwih rinawm pâwl hnêna aṭanga an dawn kaihhruaina an chhân lêt dân chuan Krista nêna an inṭhianna chu engtin nge a nghawng?
15. Mi chu berâm emaw, kêl emaw a ni tih engin nge hril?
15 Matthaia 25:31-40 chhiar rawh. Isua chuan bâwih rinawm pâwla mite chu ka unaute tiin a ko va. Kêl leh berâm hlîrna chungchânga a tehkhin thu sawiah, Isua chuan a unaute kan cheibâwl dân chu amah kan cheibâwl dân niin a ngai tih chiang takin a sawi a ni. A nihna takah chuan, kêl leh berâm hlîrna chu miin a “unau tê berte” a cheibâwl dân a zira thu tlûkna siam a ni ang tih a sawi a ni. Chuvâng chuan, lei lam beiseina neite’n Krista ṭhian nih an duhzia an lantîr dân ber chu bâwih rinawm pâwl thlâwp hi a ni.
16, 17. Krista unaute ṭhianah kan siam tih engtin nge kan lantîr theih?
16 Pathian Ram rorêlna hnuaia leia nun i beiseina chuan, Krista unaute ṭhianah i siam tih engtin nge i târ lan theih? Târ lan theih dân kawng thum chauh i lo ngaihtuah ang u. A hmasa ber chu, thu hrilhnaa tih tak zeta tel a ni a. Krista chuan a unaute chu khawvêl puma chanchin ṭha hril tûrin thu a pe a ni. (Mt. 24:14) Amaherawhchu, tûn laia Krista unau leia a la bângte chuan an ṭhian berâm dangte ṭanpuina tel lo chuan chu mawhphurhna hlen chhuah chu harsa an ti hle dâwn a. A nihna takah chuan, berâm dang zînga mite’n thu hrilhnaa an tel a piang hian, Krista unaute chu an rawngbâwlna thianghlim hlen chhuak tûrin an ṭanpui tihna a ni a. Krista ang bawkin, bâwih rinawm leh fing tak pâwl chuan he inṭhianna thiltih hi an hlut hle a ni.
17 Berâm dangte’n Krista unaute an ṭanpui theih dân kawng hnihna chu thu hrilh rawngbâwlna sum leh paia ṭanpui hi a ni a. Isua chuan a hnungzuitute chu ‘sum lema’ ṭhian siam tûrin a fuih a ni. (Lk. 16:9) Isua emaw, Pathian Jehova emaw nêna inṭhianna chu kan lei thei tihna erawh a ni lo. Chu ai mah chuan, kan sum leh paite chu Lalram tihhmasâwn nâna kan hman chuan, kan inṭhianna leh kan hmangaihna chu ṭawngkam chauh ni lovin, “thiltih leh tih tak zetin” kan lantîr zâwk tihna a ni. (1 Joh. 3:16-18) Chutianga sum leh paia ṭanpuina chu thu hrilhnaa tel nâna kan insên hunah te, kan inkhâwmna inte sakna tûr leh a vawn ṭhatna tûra thawhlâwm kan thawh hunah te, leh khawvêl pum huap thu hrilh rawngbâwlna atâna thawhlâwm kan thawh hunah te kan pe a ni. Kan thawhlâwm thawh zât chu a tlêm emaw, a tam emaw pawh ni se, Pathian Jehova leh Isua chuan hlim taka kan pêk chu an hlut a ni.—2 Kor. 9:7.
18. Engvângin nge kohhran upate’n Bible ṭanchhan kaihhruaina min pêkte chu kan zawm ang?
18 Krista ṭhian kan nihzia kan târ lan ṭheuh theih dân kawng thumna chu kohhran upate pêk kaihhruainate zawm hi a ni a. Hêng mite hi Krista kaihhruaina hnuaia thlarau thianghlim hmanga ruat an ni. (Eph. 5:23) “In hotute thu âwih ula, an thu thuin awm rawh u,” tiin tirhkoh Paula chuan a ziak a. (Heb. 13:17) Tualchhûng upate’n Bible ṭanchhana kaihhruaina min pêkte zawm harsa tih châng kan nei mai thei. An ṭhat famkim lohna chu kan hre mai thei a, chu chuan an pêk kaihhruaina chu a dik lozâwngin min thlîrtîr mai thei a ni. Chuti chung pawh chuan, kohhranho Lû, Krista chuan hêng mi ṭha famkim lote hi lâwm takin a hmang tho va. Chuvâng chuan, an thu neihna kan chhân lêt dân chuan Krista nêna kan inṭhianna chu a nghawng a ni. Upate dik lohnate en reng lo va, hlim taka an kaihhruaina pêkte kan zawm hian, Krista kan hmangaihna kan lantîr tihna a ni.
Ṭhian Ṭha Kan Hmuh Theihna Hmun
19, 20. Kohhran chhûngah eng nge kan hmuh theih a, a dawta thuziakah eng nge kan ngaihtuah dâwn?
19 Isua chuan hmangaih taka berâm vêngtute enkawlna kal tlang chauh ni lovin, kohhran chhûngah thlarau lama nute leh unaute hmang pawhin min la enkawl zêl a ni. (Marka 10:29, 30 chhiar rawh.) Jehova inawpna pâwla i belh tirh lai chuan engtin nge i chhûngte’n an tih che? Pathian leh Krista hnaih tuma ṭan i lâkna kawnga an thlâwp tlat che chu kan beisei a. Mahse, Isua chuan a châng chuan “mi a hmêlmate chu ama chhûngte zînga mi ngei an ni ang” a ti. (Mt. 10:36) Kohhran chhûngah hian kan pianpui unaute aia nghet zâwk ṭhian kan nei thei tih hriat chu a va thlamuanthlâk tak êm!—Thuf. 18:24.
20 Rom khuaa kohhran hnêna a lehkha thawn thlipnaa Paula mi mal chibai bûknain a târ lan angin, ani chuan ṭhian ṭha tam tak a siam a ni. (Rom 16:8-16) Tirhkoh Johana chuan a lehkha thawn pathumna chu: “An hming lam ṭheuhvin ṭhiante chu chibai mi bûksak ang che,” tiin a thlip bawk. (3 Joh. 14) Ani pawhin ṭhian nghet tam tak a siam tih a chiang hle. Thlarau lama kan unaute nêna inṭhianna ṭha siamin leh vawng rengin, engtin nge Isua leh zirtîr hmasate entawn tûr siam chu kan zui theih? A dawta thuziak chuan he zawhna hi a rawn chhâng ang. (w09 10/15)
Engtin Nge Kan Chhân Ang?
• Ṭhian ṭha nihna kawngah Isua’n entawn tûr eng nge a siam?
• Engtin nge zirtîrte chuan Isua’n ṭhiana a siamna chu an chhân lêt?
• Engtin nge Krista ṭhian kan nihzia kan târ lan theih?
[Zirlai Atâna Zawhnate]
[Phêk 25-naa milem]
Isua chuan a ṭhiante ngaih dân leh rilru veizâwng chu a ngaihven
[Phêk 27-naa milemte]
Krista ṭhian nih kan duhzia chu engtin nge kan lantîr theih?