Pathian Pêk Hausakna Chu

PATHIAN laka i rinawm chuan, hausakna a pe che ang em? Pe mai thei; mahse, i beisei ang hausakna chu a ni kher lo mai thei a ni. Isua nu, Mari hi han ngaihtuah teh. Vântirhkoh Gabriela chu a hnênah rawn inlârin, Pathian “vohbîk” a nihzia leh Pathian Fapa a hrin tûr thu a rawn hrilh a. (Luka 1:28, 30-32) Mahse, Mari chu mi hausa a ni hauh lo. Isua a pian hnua inthâwina a hlan pawh khân, Mari chuan mi retheite tâna Pathian Jehova hnêna hlan tûra ruahman “ṭhuro tuak khat emaw, pârva no pahnih emaw” a hlân a ni.—Luka 2:22-24; Leviticus 12:8.

Mari retheihna chu Pathian malsâwmna a dawn lohzia hriltu a ni em? A nih lohzia chu a laizâwnnu Elizabeti a tlawh ṭuma, “Elizabeti chu thlarau thianghlimin a lo khat ta a; tin, aw ring takin a au va, ‘Nang chu hmeichhia azawnga engthâwl i ni, i rîla rah pawh a engthâwl a ni,’” tia a sawi chhuah aṭang khân a hriat theih a ni. (Luka 1:41, 42) Mari chuan Pathian Fapa duh tak lei lam nu nihna chanvo ropui tak chu a chang a ni.

Isua ngei pawh mi hausa a ni lo. Mi rethei tak chhûngkua aṭanga piang leh seilian a nih mai bâkah, a dam chhûng zawngin a rethei tluan zak a ni. Ṭum khat pawh a zirtîr nih duh pa pakhat hnênah: “Sihalten kua an nei a, chungleng savate pawhin bu an nei a, Mihring Fapa erawh hi chuan a lu nghahna a nei lo,” tiin a hrilh a ni. (Luka 9:57, 58) Nimahsela, leia a lo kal laia Isua Krista thiltih chuan a zirtîrte chu hausakna namên lo a neihtîr thei a. Tirhkoh Paula chuan heti hian a ziak a ni: “A retheihna avânga in lo hausak theihna tûrin hausa mah sela nangmahni avâng ngeiin a lo retheih tâk kha,” tiin. (2 Korinth 8:9) Isua chuan eng ang hausakna nge a zirtîrte hnênah a pek? Tûn laiah hian eng ang hausakna nge kan neih?

Eng Ang Hausakna Nge?

Mi hausa chuan Pathian aia a sum a rinchhan zâwk theih avângin, sum leh pai lama hausakna hi rinna kawnga min dâltu a ni fo. Isua chuan: “Sum ngahte chu Pathian rama luh a va harsa dâwn êm!” tiin a sawi a. (Marka 10:23) Chuvângin, Isua’n a hnungzuite hnêna a tiam hausakna chu sum leh pai lama hausakna a ni lo tih a chiang hle.

A nihna takah chuan, kum zabi khatnaa Kristian a tam zâwkte chu mi rethei tê tê an ni a. Pian tirh ata kebai pakhatin pawisa a dîl pawh khân Petera chuan: “Tangka leh rangkachak engmah ka nei lo; nimahsela ka neih chhun ka pe ang che: Nazaret Isua Krista hmingin kein kal tawh rawh,” tiin a chhâng a nih kha.—Tirhkohte 3:6.

 Zirtîr Jakoba ṭawngkam pawh hian Kristian kohhran chu mi rethei tê tê awmkhâwmna a nih thu a târ lang bawk. Heti hian a ziak a ni: “Ka unau duh takte u, ngai teh u, Pathianin he khawvêl thila retheite hi rinnaa hausa tûr leh, amah hmangaihtute hnêna a tiam ram chu luahtu tûrahte a ruat lo vem ni?” tiin. (Jakoba 2:5) Chu bâkah, tirhkoh Paula pawhin “tisa lama mi fing tam tak te, mi chak tam tak te, mi ṭha tam tak te” Kristian kohhran mi ni tûra koh an nih loh thu a sawi bawk a ni.—1 Korinth 1:26.

Isua’n a hnungzuitute hnêna a pêk hausakna chu sum leh pai lama hausakna a nih si loh chuan, eng ang hausakna nge ni ta ang le? Ani chuan Smurna kohhran hnêna a lehkha thawnah heti hian a ziak a ni: “I hrehawmzia te, i pachhiatzia te (nimahsela i hausa si a) . . . ka hria,” tiin. (Thu Puan 2:8, 9) Smurna khuaa Kristiante chu rethei hle mah se, tangka leh rangkachak aia hlu daih zâwk hausakna chu an nei a. An rinna avâng leh Pathian laka an rinawmna avângin an hausa a ni. Rinna chu ‘mi zawng zawng neih vek loh’ thil a nih avângin a hlu êm êm a. (2 Thessalonika 3:1, 2) Rinna nei lo mite chu Pathian mithmuhah chuan mi rethei tak an ni.—Thu Puan 3:17, 18.

Rinna Avânga Hausakna

Mahse, eng kawngin nge rinna chu thil hlu tak a nih? Pathiana rinna neitute chuan “a ṭhatna ngahzia leh, a entheihzia leh a dawhtheihzia te” chu an hlâwkpui ṭhîn. (Rom 2:4) Isua tlanna inthawina an rin avângin, an “bawhchhiatnate ngaihdamna” chu an chang bawk. (Ephesi 1:7) Chu mai a ni lo, rinna neitute chuan ‘Krista thuin’ a pêk finna chu an nei bawk a ni. (Kolossa 3:16) Rinna nei chunga Pathian hnêna an ṭawngṭai hian, “Pathian  thlamuanna rilru rêng rênga hriat sên loh” chuan an thinlung leh ngaihtuahnate chu vênsakin, lungawina leh hlimna an nei ṭhîn.—Philippi 4:7.

Hêng hlâwkna zawng zawngte bâkah hian, a Fapa, Isua Krista kal tlanga Pathian ringtute chuan chatuana nun beiseina ropui tak chu an nei bawk a. He Isua Krista thusawi: “Pathianin khawvêl a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân,” tih hian hriat a hlawh hle a ni. (Johana 3:16) Miin Pa leh Fapa hriatna a neih chuan chu beiseina hlu tak chu a nghet lehzual ṭhîn, Isua’n: “Hei hi chatuana nunna a ni, nang Pathian tak chauh leh i tirh Isua Krista hriat hi,” tia a sawi avângin.—Johana 17:3.

Pathian malsâwmna chu thlarau lam thilah ni deuh ber ṭhîn mah se, rilru lam leh tisa lamah pawh hlâwkna a nei a ni. Entîr nân, Brazil rama mi Dalídio-a hi lo ngaihtuah ta ila. Pathian thiltum hriatna dik a neih hma chuan zu ngawl a vei a. Chu chuan a chhûngte nêna an inlaichînna a tichhe hle a ni. Chu bâkah, a sum leh pai lam dinhmun pawh a chhe hle bawk. Chutah, Jehova Thuhretute nên Bible an zir ṭan a, nasa takin a inthlâk danglam ta a ni.

Dalídio-a chuan a hriatna chhar thar avângin a thil chîn ṭha lo pawh a bânsan a. Thlarau lama hma a sâwn chak êm avângin, “Tûn hma chuan zu dâwr tinah ka kal ṭhîn a, tûnah chuan in tinah ka kal tawh zâwk a ni,” a ti hial a. Tûnah chuan hunbi kima Pathian rawngbâwltu a ni tawh a ni. Chutianga a inthlâk danglamna chuan a hrisêlna mai ni lo, a sum leh pai dinhmun pawh a tiṭha sawt a. Dalídio-a chuan: “Zu in nâna ka lo hman ṭhîn pawisate chu tûnah chuan mi dangte ṭanpui nân emaw, ka thil mamawhte lei nân emaw ka hmang tawh zâwk a ni,” a ti. Tin, Pathian thlîr dân ṭâwmpuitute a kawmna aṭangin ṭhian ṭha tam tak a siam tawh bawk. Dalídio-a chuan Pathian a hriat hmaa a suangtuah phâk bâkin rilru thlamuanna leh lungawina a nei tawh a ni.

Pathian Jehova chunga rinna rawn neitute’n nun ṭha zâwk an neihzia entîrna dang atân, Renato-a chanchin hi lo ngaihtuah ta bawk ila. Tûna a hlim hmêl han hmuh hi chuan, tûn hmain thil râpthlâk tak a tawng tih ring pha an awm hauh lo vang. Nausên piang hlim a nih lai chuan a nuin bag-a dahin, kawngsîra ṭhutthlêngsei hnuaiah chuan a kalsan a. Chutih lai chuan a khem niam nuam bâkah, a duk thliah thluah bawk a, a lai hrui pawh a la invuah reng a ni. Kawnga kal hmeichhe pahnih chuan ṭhutthlêngsei hnuaia bag awm chu a chê tih an hmu a. Tuemawin zawhtê an kalsan a nih an ring a. Nausên piang hlim a ni tih an hriat veleh, damdawi in hnai ber an panpui ta nghâl a ni.

Chûng hmeichhe pahnihte zînga pakhat zâwk chu Jehova Thuhretu a ni a, ani chuan Thuhretu dang, Rita-i hnênah thil awm dân a hriattîr a. Rita-i chuan vawi tam tak nausên thi sain a hrin ṭhîn avângin fanu pakhat chauh a nei a. Fapa a duh êm avângin Renato-a faa pawm chu a titlu ta a ni.

Rita-i chuan Renato-a a la puitlin hmain a nu dik tak a nih loh thu a hrilh a. Mahse, hmangaih tak leh duat taka a enkawl bâkah, Bible thu bulte chu zirtîr a tum ngat ngat a ni. Renato-a a lo ṭhan chhoh chuan, Bible lam thu a ngaihven ṭan ta a. Kawng  âwihawm lo tak hmanga chhan chhuah a nih avânga a lâwmna chu a pung chho bawk a. Fakna hla phuahtu thu: “Ka nu leh ka pa chuan mi kalsan ta si a, nimahsela LALPA chuan mi la pawm ang,” tih a chhiar apiangin a mittui a tling ṭeuh ṭhîn a ni.—Sâm 27:10.

Pathian Jehova’n a tâna a thiltihsak zawng zawngte chunga a lâwmzia lantîr nân, Renato-a chuan kum 2002 khân baptisma a chang a, a kum lehah hunbi kima Kristian rawngbâwltu a lo ni a. Ani chuan a nu leh pa dik tak chu tûn thlengin a la hre lo, hriat chhuah nî pawh a nei lo mai thei. Amaherawhchu, Renato-a tân chuan thilpêk a dawnte zînga hlu ber chu amah hmangaih leh ngaihsaktu Pa ber anga Pathian Jehova a hriatna leh rinna a neih hi a ni.

Nang pawhin i nun tihausa tak zet thei Pathian nêna inlaichînna ṭha leh duhawm tak neih chu i lo châk hle pawh a ni thei a. Pathian Jehova leh a Fapa, Isua Krista nêna chutiang inlaichînna ṭha neih theihna chu mi zawng zawng—a rethei leh a hausa—tân a inhawng a ni. Chu chuan sum leh pai lama hausakna chu a thlen lo mai thei; mahse, khawvêl puma sum leh pai pawhin a lei theih loh chhûngrila thlamuanna leh lungawina a pe thung ang. Thufingte 10:22 thu: “LALPA malsâwmna chuan a tihausa ṭhîn a, lungngaihna a belhchhah ṭhîn lo,” tih chu a dik tak zet a ni.

Pathian Jehova chuan amah pantute chu a ngaihsak hle a, heti hian a sawi a ni: “Aw nangni hian ka thupêkte chu lo ngaithla ta ula chu aw! in chunga remna chu lui ang maia awmin, in felna chu tuifinriat fâwnte ang maiin a awm tûr,” tiin. (Isaia 48:18) Ani chuan rilru leh thinlung dik tak pu chunga amah rawn pantute chu nasa taka malsâwm a tiam a ni: “Inngaihtlâwmna leh LALPA ṭih man chu sum te, chawimawina te, nunna te a ni,” a ti si a.—Thufingte 22:4. (w09 9/1)

[Phêk 5-naa thu lâk chhuah]

Lei lama Isua chhûngte chu sum leh pai lamah hausa lo mah se, Pathianin nasa takin mal a sâwm

[Phêk 6-naa milem]

Pathian rinna chuan thlamuanna te, lungawina te, leh hlimna a thlen