Pathianin Hausakna A Tiam Che Em?

‘Pathianin hausa tûrin a duh che—motor dahna hmuna car hûn thluah tûr te, sumdâwnna hlawhtling tak nei tûr tein. Amah chu ringin, i theih ang tâwka tam han pe phawt mai teh.’

HENG thute hi Brazil rama sakhaw pâwl ṭhenkhatin a vawrh lâr hle tih an chanchinbu pakhat chuan a târ lang a. Chu chu mi tam takin an la thutak hle. United States-a Kristian nia inchhâlte zînga ngaih dân lâk khâwmna chungchângah Time magazine chuan heti hian a sawi: “Mi zaa 61 lai chuan Pathianin mite chu hausa tûrin a duh tih an ring a. Zaa 31 chuan . . . Pathian hnênah i sum i pêk phawt chuan a aia tam a pe dâwn che tih an ring thung a ni,” tiin.

Hetiang chi rinna, Pathian avânga hausakna tia an koh fo thurin pawmtu an pung chak hle a, a bîk takin Latin-America ram, Brazil angah te chuan Pathian pêk neihnunna tiamtu kohhrante chu a pung chak hle a ni. Mahse, Pathian chuan a rawngbâwltute hnênah hausakna a tiam tak zet em? Hmân laia Pathian chhiahhlawhte kha an hausa vek em?

Hebrai Pathian Lehkha Thu, Thuthlung Hlui-ah chuan Pathian malsâwmna dawngtute chu an hausa hle ṭhîn ngei mai a. Entîr nân, Deuteronomy 8:18-ah chuan: “LALPA in Pathian chu hre reng rawh u, sum leh pai deh chhuah theihna petu che u chu amah chu a ni,” tiin kan chhiar a. Chu thu chuan Israel mite chu Pathian thu an âwih phawt chuan hnam hausa takah a siam ang tih a rinnghehtîr a ni.

A nih leh, Pathian chhiahhlawh mi mal tinte chungchângah eng nge ni ve? Mi rinawm Joba chu a hausa hle a, Setana’n a hausakna zawng zawng a lâksak hnuah Pathian Jehova chuan “a hmaa a neih lêt hnih” a pe a ni. (Joba 1:3; 42:10) Abrahama chu mi hausa tak a ni ve bawk a. Genesis 13:2 chuan ani chu “ran te, tangka te, rangkachak tein a hausa êm êm” tih a sawi. Khawchhak lam lal palite sipai ṭangrualin a unaupa fapa Lota chu sala hruai a ni tih a hriat chuan, Abrahama chuan “a ina piang, ama mi, zir thiam sa tawh, 318 a hruai chhuak” a ni. (Genesis 14:14) Hriamhrei chelek thei “zir thiam sa tawh” mi 318 lai awmna Abrahama chhûngkua chu a lian tham hle a ni. Chutiang khawpa chhûngkaw hung a enkawl theih dânah chuan  mi hausa tak, berâm rual leh rân rual ngah tak a ni tih a lang a ni.

Ni e, hmân laia Pathian chhiahhlawh rinawm tam tak chu an hausa hle a, chûng zînga ṭhenkhat chu Abrahama te, Isaaka te, Jakoba te, Davida te, Solomona te an ni. Chuti chu, Pathianin a rawngbâwltu apiangte a tihausa tihna a ni em? Kawng leh lamah chuan, mi rethei chuan Pathian malsâwmna a dawng lo tihna a ni em? A chhânna chu a dawta thuziakah kan hmu ang. (w09 9/1)