Kohhrana I Hmun Chan Chu Hlut Rawh
Kohhrana I Hmun Chan Chu Hlut Rawh
“Pathianin pêng tinrêngte hi taksaah hian a duhna apiangah a awmtîr ṭheuh tawh a ni.”—1 KOR. 12:18.
1, 2. (a) Kohhrana mi tinte hian hlut tûr hmun chan an nei ṭheuh tih engin nge târ lang? (b) He thuziakah hian eng zawhnate nge kan ngaihtuah ang?
HMAN LAI Israelte hun lai aṭang tawh khân, Pathian Jehova chuan a mite thlarau lama châwmna leh kaihhruaina pêk nân ruahmanna a nei a. Entîr nân, Israelte’n Ai khawpui an hneh hnu khân, Josua chuan “dân thu zawng zawng, malsâwmna thu leh ânchhe dawn thu chu a chhiar a, dân lehkhabua chuang zawng zawng ang kha . . . Israel-ho pungkhâwm zawng zawng . . . hriatah chuan” a chhiar a ni.—Jos. 8:34, 35.
2 C.E. kum zabi khatnaah, tirhkoh Paula chuan Kristian upa Timothea hnênah Pathian ruahmanna Kristian kohhran chu “Pathian chhûngte” leh “thutak ban leh innghahna” a nih thu a hrilh a. (1 Tim. 3:15) Tûn laia Pathian “chhûngte” chu khawvêl pum puia unau anga awm Kristian dikte hi an ni. Paula chuan Korinth mite hnêna thlarauva thâwk khum a lehkha thawn hmasa zâwk bung 12-naah kohhran chu mihring taksa nên a tehkhin a. Ani chuan taksa bung tinte hnathawh chu in ang lo ṭheuh mah se, an vaiin an pawimawh vek tih a sawi a ni. Hetiang hian a ziak a: “Pathianin pêng tinrêngte hi taksaah hian a duhna apiangah a awmtîr ṭheuh tawh a ni,” tiin. Tin, “taksa pêng chawimawi tlâk loh zâwka kan ruat ṭhinte hi, chûng ngei chu kan chawimawi nasa zâwk ṭhîn,” tih pawh a sawi hial bawk. (1 Kor. 12:18, 23) Chuvângin, Pathian chhûngkaw zînga mi fel pakhat hmun chan chu mi dang chan aiin a ṭha zâwk chuang lo va, a chhe zâwk chuang hek lo. A in ang lo mai zâwk a ni. A nih chuan, engtin nge Pathian ruahmannaa kan hmun chan chu kan hlut, a nih loh leh kan roh hle theih ang? Kohhrana kan hmun chan chu eng thil azir nge ni thei ang? Tin, engtin nge ‘mi zawng zawng hnêna kan sâwtna’ kan lantîr theih?—1 Tim. 4:15.
Engtin Nge Kan Hmun Chan Chu Kan Hlut Ang?
3. Kohhrana kan hmun chan hmuh chhuah theih dân leh chu mi kan hlutzia kan lantîr theih dân kawng khat chu eng nge ni?
3 Kohhrana kan hmun chan hmuh chhuah theih dân leh chu mi kan hlutzia kan lantîr theih dân kawng khat chu, “bawi rinawm, fing tak” leh a aiawh Governing Body thlâwp tlat hi a ni a. (Matthaia 24:45-47 chhiar rawh.) Bâwih pâwl hnên aṭanga kaihhruaina kan dawnte kan zawm dân chu kan bih chian a ngai a ni. Entîr nân, kum kaltaahte khân silhfên leh inchei dân te, intihhlimna te, leh Internet hman dân dik lo te chungchângah kaihhruaina chiang tak kan dawng a. Chûng fuihna thu ṭha takte chu thlarau lama vênhim kan nih theih nân kan ngai pawimawh em? Chhûngkuaa Pathian biakna nei ziah tûra fuihna chu engtin nge kan ngaih? Chu fuihna chu ngai pawimawhin chu mi atân chuan hun kan dah hrang em? Nupui pasal nei lo kan nih chuan, mahnia Bible zirna atân hun kan insiam em? Bawih pâwl kaihhruaina kan zawm chuan, a mi mal ang leh a chhûngkua angin Pathian Jehova’n mal min sâwm ang.
4. Mi mal thu tlûkna kan siamin eng thil nge kan ngaihtuah tel ang?
4 Ṭhenkhat chuan intihhlimna leh silhfên leh inchei dânte chu mi mal duhthlanna ni maiah an ngai mai thei. Mahse, kohhrana mahni hmun chan hluttu Kristian inpumpêk tawh tân chuan thutlûkna siam rêng rêngah mahni duh dân chu ngaih pawimawh ber tûr a ni lo. Chu mi chungchânga Pathian Jehova thlîr dân Bible-a târ lan chu ngaih pawimawh ber tûr a ni a. A thu chu ‘kan ke atânte hian khâwnvâr a ni a, kan kawng atân êng’ a ni tûr a ni. (Sâm 119:105) Kan mi mal thutlûkna siamin kan rawngbâwlna leh kohhran chhûng leh pâwna mite a nghawng dân ngaihtuah tel chu a finthlâk bawk.—2 Korinth 6:3, 4 chhiar rawh.
5. Engvângin nge inlâkhran duhna rilru laka kan invên ang?
5 “Tûna âwih lo fate chhûnga thawk mêktu thlarau” chu a darhzau êm êm a, kan boruak hîp luh ang mai a ni. (Eph. 2:2) Chu thlarau chuan Pathian Jehova inawpna pâwl min pêk kaihhruaina kan mamawh lo tih ngaih dân min neihtîr thei a. ‘Tirhkoh Johana lâwm lotu’ Diotrepha ang nih chu kan duh lo ngei ang. (3 Joh. 9, 10) Chuvângin, inlâkhran duhna rilru nei lo tûrin kan invên tlat a ngai a ni. Tûn laia Pathian Jehova min biak pawhna hmanrua kan zah lohzia chu ṭawngkamin emaw, thiltihin emaw i lantîr ngai lo vang u. (Num. 16:1-3) Sawi chhiat ahnêkin, bâwih pâwl thlâwp theihna chanvo kan neih chu kan hlut hle zâwk tûr a ni. Kan kohhrana hma hruaitute thu âwih leh an laka intukluh chu kan tum tûr a ni lâwm ni?—Hebrai 13:7, 17 chhiar rawh.
6. Engvângin nge kan mi mal dinhmun kan enfiah ang?
6 Kohhrana kan hmun chan kan hlutzia kan lantîr theih dân kawng dang leh chu kan mi mal dinhmun ngun taka enfiah a, ‘kan rawngbâwlna chawimawi’ tûra theih tâwp chhuah hi a ni. (Rom 11:13, 14) Ṭhenkhat chuan regular pioneer an thawk thei a. Ṭhenkhat chuan missionary te, bial kantu te, leh khawvêl puma Bethel chhûngkaw zînga mite angin rawng an bâwl bawk. Tin, unau tam tak chuan Kingdom Hall sakna an pui bawk a ni. Pathian Jehova mi a tam zâwkte chuan an chhûngte thlarau lam mamawh chu theih tâwp chhuahin an enkawl a, chawlhkâr tinin rawngbâwlnaah an tel ziah bawk. (Kolossa 3:23, 24 chhiar rawh.) Pathian rawngbâwlnaah inhuam taka kan inpêk a, thinlung zawng zawnga a rawng bâwl tûra theih tâwp kan chhuah hian, a kohhranah kan tân hmun chan tûr a awm reng tih kan chiang thei a ni.
Kohhrana Kan Hmun Chan Tidanglamtu Thilte
7. Kohhrana kan hmun chan hi kan dinhmun azir zêl a nih theih dân hrilhfiah rawh.
7 Kohhrana kan hmun chan chu engemaw chenah chuan kan tih theih leh ti thei tûr dinhmuna kan din dân a zir a nih avângin, kan dinhmun kan enfiah chu a pawimawh hle. Entîr nân, kohhrana unaupa hmun chan chu unaunu chan nên chuan kawng ṭhenkhatah a inang lo va. Kum te, hrilsêlna te, leh thil dangte chuan Pathian Jehova rawngbâwlnaa kan tih theih chin chu a thunun thei a ni. “Tlangvâlte ropuina chu an chakna a ni, putarte mawina chu an lu ṭuak a ni,” tiin Thufingte 20:29 chuan a sawi. Kohhrana tlangvâlte chuan an la chak ṭhat avângin tharum hman ngai lam hnate an thawk thei zâwk ang a, tarte finna leh thiltawn te chu kohhranin a hlâwkpui thei thung a ni. Tin, Pathian Jehova inawpna pâwla kan thil tihtheih rêng rêng hi Pathian ngilneihna avâng chauh a ni tih kan hre reng tûr a ni bawk.—Tirh. 14:26; Rom 12:6-8.
8. Kohhrana kan thiltih chu kan châkzâwng hian eng ang khawpin nge a nghawng?
8 Pianghmun unaunu pahnihte entîrna pawh hian kohhrana kan hmun chan tûr hriltu thil dang a târ lang bawk. An pahnih chuan high school an zir zo ve ve a. An dinhmun pawh a inang ve ve a ni. Tin, an nu leh pate pawhin an zir chhuah hnua regular pioneer thawk tûrin theih tâwpin an fuih ve ve bawk. Mahse, an zir chhuah hnuah, pakhat chuan pioneer a thawk a, pakhat erawh chuan hunbi kimin pâwn lam hna a thawk daih thung a ni. Eng nge an danglamna? An châkzâwng hi a ni. A tâwpah chuan, an duhzâwng ve ve an thawk a ni. Chutiang chu kan ni deuh vek lâwm ni? Chuvângin, Pathian rawngbâwlnaa kan tih duh chu ngun taka kan ngaihtuah a ngai a ni. Kan dinhmun siamrem ngai pawh ni se, tûn ai hian kan inhmang nasa lehzual thei ang em?—2 Kor. 9:7.
9, 10. Pathian Jehova rawngbâwlnaa inhman lehzual châkna kan neih loh chuan eng nge kan tih ang?
9 Pathian Jehova rawngbâwlnaa inhman lehzual châkna rêng nei lovin, a ṭûl chin chauh tih mai chu duh tâwk ta ila, engtin nge ni ang? Philippi khuaa mite hnêna a lehkha thawnah, Paula chuan: “Ama lâwmzâwng atâna tih tum tûr leh bei tûra nangmahnia thawktu chu Pathian a ni si a,” tiin a sawi a ni. Ni e, Pathian Jehova chuan chhûngrilah hna a thawk theiin, kan duhzâwng, a nih loh leh châkzâwng chu a thlâk danglam thei a ni.—Phil. 2:13; 4:13.
10 Chuti a nih chuan, Pathian Jehova hnênah a duhzâwng tih duhna min neihtîr tûrin kan dîl tûr a ni dâwn lâwm ni? Hmân lai Israel Lal Davida khân chutiang chuan a dîl a ni: “Aw LALPA, i kawngte chu mi hriattîr la; i kalkawng chanchinte mi zirtîr ang che. I thutakah chuan mi hruai la, mi zirtîr ang che, nang chu mi chhandamtu Pathian i ni si a; nilênga ka nghah reng che hi,” tiin. (Sâm 25:4, 5) Keini pawh, Pathian Jehova hnênah amah lâwmzâwng thil tih duhna min neihtîr tûrin kan dîl ve thei a ni. Pathian Jehova leh a Fapain an rawng kan bâwlna an ngaihhlutzia kan ngaihtuah chuan, an chunga lâwmnain kan khat ṭhîn. (Mt. 26:6-10; Lk. 21:1-4) Chutianga lâwmna chuan thlarau lama hmasâwn duhna min neihtîr tûra Pathian Jehova ngên tûrin min chêttîr thei a ni. Zâwlnei Isaia chuan rilru put hmang kan neih ṭheuh tûr chungchângah entawn tûr ṭha tak a siam a. “Tunge ka tirh ang a, tunge kan tân kal ang?” tia Pathian Jehova zawhna a hriat chuan: “Kei heta hi ka awm, mi tîr ta che” tiin a chhâng a ni.—Is. 6:8.
Hmasâwn Rawh—Engtin Nge?
11. (a) Inawpna pâwlah hian mawhphurhna la thei tûr unaupate eng anga mamawh nge an nih? (b) Engtin nge unaupa chuan rawngbâwlna chanvo hlu a chan theih?
11 Kum 2008 rawngbâwl kum chhûngin khawvêl pum puiah mi 2,89,678 te chuan baptisma an chang a, hma hruaitu tûr unaupate mamawhna a nasa hle tih a lang a ni. Engtin nge unaupa chuan chu mamawh chu a chhân lêt ang? A awlsam zâwnga sawi chuan, kohhranho rawngbâwltu leh upa ni tûrte tâna thil phût, Pathian Lehkha Thua târ lante tlin tum tlatin a chhâng lêt thei a ni. (1 Tim. 3:1-10, 12, 13; Tit. 1:5-9) Engtin nge unaupa chuan chutiang Pathian Lehkha Thua thil phûtte chu tlin a tum theih? Taima taka rawngbâwlnaa telin, kohhrana a a chanvo dawnte taima taka hlen chhuakin, Kristian inkhâwmnaa chhânna ṭha zâwk pêk tumin, leh rinpuite chunga mi mal taka ngaihsakna lantîrin tlin a tum thei a ni. Chutiang chuan kohhrana a hmun chan a hlutzia chu a târ lang a ni.
12. Engtin nge ṭhalaite chuan thutak tâna ṭhahnem an ngaihzia an lantîr theih?
12 Unaupa la naupang deuhte, a bîk takin tleirâwlte chuan engtin nge kohhranah hma an sâwn theih? Pathian Lehkha Thu hriatna neih belhin “thlarau lam finna leh hriat theihna” lama ṭhang chho tûrin ṭan an la thei a ni. (Kol. 1:9) Chutianga ti tûr chuan, Pathian Thu taima taka zirna leh inkhâwmnaa chhânnate pea inhmanna chuan kawngro a su ngei ang. Ṭhalaite pawhin hunbi kima rawngbâwlna kawng hrang hrang, ‘kawngka zau tak leh sâwt taka’ lût tlâk ni tûrin ṭan an la thei bawk. (1 Kor. 16:9) Pathian Jehova rawngbâwlnaa inhman pumhlûm chu nun kawng lungawithlâk tak leh malsâwmna nasa tak thlen thei nun kawng a ni tak zet a ni.—Thuhriltu 12:1 chhiar rawh.
13, 14. Eng kawngtein nge unaunute’n kohhrana an hmun chan an hlutzia an târ lan theih?
13 Unaunute pawhin Sâm 68:11 thu thlen famkimnaa mahnia telin an hmun chan an hlutzia chu an lantîr ve thei a ni. Chu Bible chângah chuan, heti hian kan chhiar a ni: “Lalpan thu a pe a, chanchin hriltu hmeichhe tam takin an hril darh a,” tiin. Unaunute’n kohhrana an hmun chan an hlutzia an lantîr theih dân kawng ṭha ber chu zirtîr siam rawngbâwlnaa tel hi a ni. (Mt. 28:19, 20) Chuvângin, rawngbâwlnaa tel ziahna leh chu rawngbâwlna atâna chân ngai engpawh chân inhuamin, unaunute chuan kohhrana an hmun chan an hlutzia an lantîr a ni.
14 Tita hnêna a lehkha thawnah, Paula chuan: “Pitarte pawhin Pathian Thu chu sawichhiatin a awm loh nân, la nula deuhte chu an pasalte hmangaih tûr te, an fate hmangaih tûr te, rilru fel taka awm tûr te, thianghlim taka awm tûr te, mahni ina thawktua awm tûr te, ngilneia awm tûr te, anmahni pasalte thu thua awm tûr tea an thunun theihna tûrin an awm dân rênga Pathian zah mite niin, . . . ṭha lam zirtîrtute ni tûrin fuih bawk rawh,” tiin a ziak a ni. (Tit. 2:3-5) Unaunu puitling takte chuan kohhranah nghawng ṭha an va nei tak êm! Anni chuan kohhrana hma hruaitute zahna leh silhfên leh inchei dân te, leh intihhlimna chungchâng tea thutlûkna fing siamin, mi dangte tân entawn tûr ṭha an siam a, kohhrana an hmun chan an hlutzia an lantîr a ni.
15. Khawharna tuar thei tûrin unaunu pasal nei lovin eng nge a tih theih?
15 Unaunu pasal nei lo tân kohhrana a hmun chan hmuh chhuah chu a harsa mai thei a. Chutiang thil tawngtu unaunu pakhat chuan: “Kawppui han neih loh chu khawhar deuh châng a awm ṭhîn,” tiin a sawi. Chu mi a hmachhawn dân an zawh chuan: “Ṭawngṭaina leh zir ngunna chuan kohhrana ka hmun chan min hmuhtîr leh a ni. Pathian Jehova min thlîr dân te ka zir a. Tichuan, kohhrana mi dangte tâna mi ṭangkai nih ka tum a. Chu chuan mahni inngaihtuah lutuk lo tûrin min ṭanpui a ni,” tiin a sawi. Sâm 32:8 sawi dânin, Pathian Jehova chuan Davida hnênah: “Ka mita en reng chung chein rem ka ruatsak zêl ang che,” tiin a hrilh a ni. Ni e, Pathian Jehova chuan unaunu pasal nei lote pawh tiamin, a chhiahhlawh zawng zawngte chu a mi mal takin a ngaihsak vek a, an vaiin kohhrana an hmun chan hmu chhuak tûrin a ṭanpui ṭheuh vang.
I Hmun Chan Chu Luah Reng Rawh!
16, 17. (a) Engvângin nge a inawpna pâwl zînga mi ni tûra Pathian Jehova sâwmna pawm chu thutlûkna kan siam theih zînga ṭha ber a nih? (b) Engtin nge Pathian Jehova inawpna pâwla kan hmun chan chu kan luah reng theih ang?
16 Pathian Jehova chuan a chhiahhlawh tinte chu amah nêna inlaichînna nei tûrin hmangaihnain a hîp khâwm a. Isua chuan: “Pa mi tîrtuin a hîp loh chuan tumah ka hnênah an lo kal thei lo vang,” tiin a sawi. (Joh. 6:44) He khawvêla mi vaibêlchhe tam tak zîngah hian Pathian Jehova chuan a kohhran zînga mi ni tûrin min sâwm ṭheuh va. Chu sâwmna lo pawm chu thutlûkna kan siam tawh azawnga ṭha ber a ni. Chu chuan kan nun chu awmzia a neihtîr si a. Tin, kohhrana kan hmun chan avânga kan neih hlimna leh lungawina chu a va nasa tak êm!
17 Fakna hla phuahtu chuan: “LALPA, i awmna in chu ka ngaina,” a ti a. “Ka ke hi hmun zâwl takah a ding a; inkhâwmnaahte chuan LALPA chu ka fak ang,” tiin a zai bawk a ni. (Sâm 26:8, 12) Pathian dik chuan a inawpna pâwlah hian kan zaa tân hmun chan tûr a nei a. Theocratic kaihhruaina zâwmin leh Pathian rawngbâwlnaa buai rengin, Pathian Jehova ruahmannaa kan hmun chan hlu tak chu kan luah reng thei a ni. (w09 11/15)
Kan Hre Chhuak Thei Em?
• Engvângin nge Kristian zawng zawngte’n kohhranah hmun chan tûr an nei ṭheuh tih ngaih dân neih chu thil inâwm tak a nih?
• Engtin nge Pathian inawpna pâwla kan hmun chan kan hlutzia kan târ lan?
• Eng thilte hian nge kohhrana kan hmun chan a nghawng theih?
• Engtin nge Kristian ṭhalaite leh puitlingte chuan Pathian ruahmannaa an hmun chan an hlutzia an târ lan theih?
[Zirlai Atâna Zawhnate]
[Phêk 21-naa milemte]
Engtin nge unaupate’n kohhranah chanvo ṭha an chelh theih?