Thlarau Thianghlim Chu Eng Nge Ni?
Thlarau Thianghlim Chu Eng Nge Ni?
ṬUM khat chu Isua’n a zirtîrte hnênah: “Nangniho zînga pa hi, a fapain chhangpêr dîl sela, tunge lung pe ang? a nih leh, sangha dîl sela, tunge sangha aiah rûl pe ang? A nih leh, artui dîl sela, khawmualkaikuang a pe ang em ni?” tiin a zâwt a. (Luka 11:11, 12) Galili rama naupangte chuan artui leh sangha an ei tui hle; an ei duhzâwng chu an hria a ni.
Isua chuan naupang rilṭâmin chaw a ngên ang maia thlarau thianghlim dîl ngut ngut tûrin min hrilh a. (Luka 11:9, 13) Thlarau thianghlim nihna dik tak hriat thiamna chuan kan nuna neih a pawimawhzia chu min hriatthiamtîr ang. Chuvângin, Bible-in thlarau thianghlim chungchâng min zirtîr chu i lo bih chiang hmasa ang u.
‘Chungnungbera Thiltihtheihna’
Bible chuan thlarau thianghlim chu Pathianin a duhzâwng tihpuitlin nâna a hman ṭhin a chakna thahrui a nih thu a târ lang chiang hle. Vântirhkoh Gabriela’n Mari hnênah nula thianghlim a ni chung pawha fapa a hrin tûr thu a puan chhuah khân, heti hian a hrilh a ni: “Thlarau thianghlim i chungah a lo thleng ang a, Chungnungbera thiltihtheihnain a hliahkhuh ang che; chuvângin mi thianghlim lo piang tûr pawh chu Pathian Fapa an ti ang,” tiin. (Luka 1:35) Gabriela ṭawngkam aṭang chuan thlarau thianghlim leh ‘Chungnungbera thiltihtheihna’ chuan inzawmna a nei tih kan hmu a ni.
Chutiang chu Bible hmun dangah pawh a lang bawk. Zâwlnei Mika chuan heti hian a sawi: “LALPA thlarau avânga thiltihtheihna . . . chuan ka khat tak meuh a ni,” tiin. (Mika 3:8) Isua’n a zirtîrte hnênah: “Thlarau thianghlim chu in chunga a lo thlen hunah thiltihtheihna in la nei ang,” tiin a tiam a. (Tirh 1:8) Chu bâkah, tirhkoh Paula pawhin “thlarau thianghlim thiltihtheihna” chungchâng thu a sawi bawk a ni.—Rom 15:13, 18, 19.
A nih leh, hêng Bible chângte aṭang hian eng thu tlûkna nge kan siam theih? Thlarau thianghlim leh Pathian thiltihtheihna chuan inkungkaihna hnai tak a nei, tih chu. Thlarau thianghlim chu Pathian Jehova’n a thiltihtheihna a lantîrna a ni. Mâwl têa sawi chuan, thlarau thianghlim chu Pathian hman a thiltihtheihna, a nih loh leh a chakna chevêl reng hi a ni. Chu chu chakna mak a va ni êm! Lei leh vân pum pui siam tûr chuan thiltihtheihna engzât fakau nge ngai ang tih chu kan ngaih ruat phâk lo. Pathian Jehova chuan Isaia 40:26.
zâwlnei Isaia kal tlangin: “Chung lamah khian in mitte lên chho ula, khîngte khi tu siam nge ni en rawh u; ani chuan sipaihote khi indawt zêlin a hruai chhuak ṭhîn a, an hmingin a ko ṭheuh ṭhîn a; a chakna nasatna avâng leh, thiltihtheihna lama a chak avângin pakhat mah kim lo an awm ngai lo,” tih thute ngaihtuah tûrin min sâwm a ni.—Chutiangin Bible chuan lei leh vân leh fel taka ruahman a chhûnga thil awmte chu Pathian Engkimtitheia “chakna nasatna,” a nih loh leh thiltihtheihna avânga awm a ni tih a târ lang a ni. Pathian chakna chevêl reng chu a nasa êm êm a, kan nunna pawh chu mi-ah chuan a innghat tih a chiang hle.—“Thlarau Thianghlim Hnathawh Dân” tih bâwm chu en rawh.
Pathian Jehova chuan a thlarau thianghlim chu lei leh vân a siam lai ang khân ropui takin a hmang thei a. Mahse, a mihring siamte tân pawh a hmang thei bawk a ni. Bible-ah hian
Pathian chakna chevêl rengin he leia a chhiahhlawhte thiltihtheihna a pêk dân târ lanna tam tak a chuang a ni.“Lalpa Thlarau Chu Ka Chungah A Awm”
Isua rawngbâwlna chuan Pathian thlarau thianghlimin a chhiahhlawhte a tihchak theih dân hriat thiamna phûrawm tak min pe a. Isua chuan Nazaret mite hnênah, “Lalpa thlarau chu ka chungah a awm,” tiin a hrilh a ni. (Luka 4:18) Isua chuan “thlarau thiltihtheihna” avângin eng thilte nge a tih theih? (Luka 4:14) Ani chuan natna tinrêng a tidam a, tuipui fâwn nasa tak pawh a tireh a, mi sâng tam tak pawh chhang leh sangha tlêm têin a hrai puar a; tin, mitthi meuh pawh a kaitho a ni. Tirhkoh Petera chuan Isua chu ‘Pathianin amah hmanga . . . thil ropui te, thilmak tak te, chhinchhiahna te a tih a, a hriat chiantîra’ a nih thu a sawi a ni.—Tirhkohte 2:22.
Tûn laiah thlarau thianghlim hmanga chutiang thil mak chu tih a ni tawh lo va. Mahse, nasa takin kan ṭangkaipui thei a ni. Isua’n a zirtîrte a lo tiam tawh ang khân, Pathian Jehova chuan amah betute hnênah a thlarau thianghlim chu phal takin a pe ṭhîn. (Luka 11:13) Chuvângin, tirhkoh Paula chuan: “Mi tichaktuah chuan engkim ka ti thei a ni,” tiin a sawi thei a ni. (Philippi 4:13) Thlarau thianghlimin i nunah chutiang nghawng chu a nei ve thei ang em? A dawta thuziak chuan chu chu a rawn chhâng ang. (w09 10/01)
[Phêk 5-naa bâwm/milem]
Thlarau thianghlim chu mi mal anga sawi theih a nih loh chhan
Bible chuan thlarau thianghlim chu tui nên a tehkhin a. Pathianin a mite malsâwm a tiam khân, heti hian a sawi a ni: “Tuihâl chungah chuan tui ka leih dâwn si a, lei rovah chuan tuiluangte chu ka leih bawk dâwn a ni: in thlahte chungah ka thlarau ka leih ang a, in fate chungah ka malsâwmna ka leih bawk ang,” tiin.—Isaia 44:3.
Pathianin a chhiahhlawhte chunga a thlarau a leih chuan, anni chu ‘thlarau thianghlimin an khat’ a ni. Isua te, Baptistu Johana te, Petera te, Paula te, Barnaba te, leh C.E. 33 Pentikost nia zirtîr awmkhâwm te chu an zaa thlarau thianghlima khat anga sawi an ni.—Luka 1:15; 4:1; Tirhkohte 4:8; 9:17; 11:22, 24; 13:9.
Hei hi han ngaihtuah teh: Mi tuemaw chu mi tam tak chunga tui anga “leih” theih a ni ang em? Mipui pung khâwmte chu mi pakhata ‘tih khah’ vek theih an ni ang em? Chu chu thil theih a ni lo. Bible chuan mi chu finna, hriatthiamna, a nih loh leh hriatna dika khat angin a sawi ṭhîn ngei mai; mahse, mi tuemaw chu mi danga tihkhah a nih thu a sawi ngai lo.—Exodus 28:3; Luka 2:40; Kolossa 1:9.
“Thlarau” tia lehlin Grik thu mal hi pneuʹma a ni a, chu chuan hmuh theih loh chakna lam a kâwk bawk a ni. Vine’s Expository Dictionary of New Testament Words chuan, pneuʹma tih thu mal chu “thli tihna a ni deuh ber a, . . . thaw tihna pawh a ni tel bawk; chuti chu, a bîk takin thli anga sawi theih thlarau chu hmuh theih loh, tak nei lo leh thiltithei tak a ni,” tiin a sawi a ni.
Chuti a nih chuan, thlarau thianghlim chu mi mal anga sawi theih a ni lo tih a chiang hle. *
[Footnote]
^ par. 19 Hriat belh i duh chuan, Jehova Thuhretute tihchhuah, Bible Zirtîrna Dik Tak Chu Eng Nge Ni? tih bu phêk 201-204 naa chuang, “Pa, Fapa, leh Thlarau Thianghlim Chungchânga Thu Dik Tak Chu” tih chu en rawh.
[Milem Hawhtîrtu]
Photodisc/SuperStock