Thlarau Thianghlim—Engvângin Nge Ngaih Dân A Tam?

THLARAU thianghlim chu eng nge ni? Zawhna awlsam tak niin a lang a; mahse, a chhânna hmuh chu a harsa mai thei. Pope Benedict XVI chuan Australia mipuite hnênah: “Thlarau thianghlim nihna dik tak chu kan hriatthiam phâk bâk thil niin a lang,” tiin a sawi a ni.

Thlarau thianghlim nihna chungchângah ngaih dân tam tak leh chiang lo tak tak a awm ngei mai. Mite chhân dân tlângpui lo târ lang ta ila:

• Thlarau thianghlim chu Krista zirtîrte thinlung chhûnga awm mi tak tak a ni.

• Thlarau thianghlim chu Pathian finna (divine science), Pathian dânin hna a thawhna hi a ni.

• Thlarau thianghlim chu Pathianin min awmpui tih kan hriat theihna hi a ni.

• Thlarau thianghlim chu Trinity-a a pathumna hi a ni.

Engvângin nge chutiang taka ngaih dân a tam? A chhan chu C.E. kum zabi linaa Pathian thu thiam theologian ṭhenkhatin thlarau thianglim chu Pathian tluk anga sawi theih mi mal pakhat anga an sawi vâng a ni. Mahse, chu chu Bible zirtîrna emaw, Krista hnungzuitu hmasate zirtîrna emaw a ni lo. The New Catholic Encyclopedia chuan: “Thuthlung Hlui chuan Pathian thlarau chu mi pakhat angin a sawi lang lo . . . Pathian thlarau chu Pathian thiltihtheihna a ni tawp mai,” tiin a hrilhfiah a. Chu lehkhabu vêk chuan: “Thuthlung Thar-a thuziak a tam zâwk pawhin Pathian thlarau chu mi tuemaw ang ni lovin, thil engemaw angin a târ lang zâwk a; chu chu Pathian thlarau leh Pathian thiltihtheihna sawi kawpna Bible chângte aṭang hian a lang chiang lehzual a ni,” tiin a sawi belh a ni.

Mite chuan thiltihtheihna chu mi pakhat anga ngaih harsa an ti a; chu chu a âwm rêng a ni. Chuvângin, United States-a tûn hnaia survey an neih pakhatah chuan mi tam zâwkin thlarau thianghlim chu mi mal pakhat emaw, “a hrang nalha nihna neia nung” emaw angin an ngai lo. An ngaih dân chu a dik em? Nge ni a, “Thlarau Thianghlim chu Pa leh Fapa aṭanga a hrang nalha nung Mi pakhat a ni,” ti tlattu Pathian thu thiam theologian-te sawi chu kan ring zâwk dâwn?

A chhânna rin tlâk tak hmu tûr chuan thlarau thianghlim chungchâng kimchang taka hrilhfiahtu Pathian Thu, Bible kan râwn a ngai a ni. Tirhkoh Paula chuan heti hian a ziak a: “Pathian Lehkha Thu zawng zawng hi Pathian thâwk khuma pêk a ni a, zirtîr kawngah te, thiam loh chantîr kawngah te . . . a sâwt bawk a ni,” tiin.—2 Tim. 3:16.

Engvângin nge thlarau thianghlim  chungchânga thu dik hmuh chhuah chu i tum ang? Chu chuan Pathian ṭanpuina a dawntîr theih che vâng a ni. Mahni chakna rinchhana kal zêl harsa tih châng i nei em? Isua chuan a zirtîrte hnênah: “Dîl rawh u, tichuan an pe ang che u . . . Nangni . . . mahin in fate thil ṭha pêk nachâng in hriat chuan, in Pa vâna mi chuan a dîltute chu thlarau thianghlim a va pe dâwn êm!” tiin a tiam a ni.—Luka 11:9, 13.

Bible chuan thlarau thianghlim nihna dik tak a lai lang a, chu chu a dawta thuziakah kan hmu ang. Tin, thlarau thianghlim kan hlâwkpui theih dân pawh kan bih chiang bawk ang. (w09 10/01)

[Phêk 3-naa thu lâk chhuah]

Bible chuan thlarau thianghlim nihna dik tak a lai lang