Thlarau Thianghlim—I Nuna I Mamawh Chakna Thahrui
Thlarau Thianghlim—I Nuna I Mamawh Chakna Thahrui
“IHNEN ata hi mi paih bo suh la; i thlarau thianghlim hi mi lâksak suh ang che.” (Sâm 51:11) Hei hi thil sual nasa tak a tih hnua Lal Davida ṭawngṭaina a ni.
Davida chuan thlarau thianghlim thiltihtheihna chu hmân ata tawh a lo tawng fo tawh a. Tleirâwl mai a nih lai pawhin, Goliatha—sipai hlauhawm tak—chu a lo hnehtîr tawh a ni. (1 Samuela 17:45-50) Tin, fakna hla azawnga mawi berte zînga ṭhenkhat pawh a phuahtîr bawk. Chuvângin, Davida chuan heti hian a sawi a ni: “LALPA thlarau chuan keimah mi hmangin a sawi a: a thu chu ka leiah a awm,” tiin.—2 Samuela 23:2.
Isua Krista ngei pawhin Davida nuna thlarau thianghlimin hna a thawhzia chu a nemnghet a. Ṭum khat chu, Isua chuan a thu ngaithlatute hnênah: “Davida ngeiin, thlarau thianghlimin, Lalpa [Jehova] chuan, ka Lalpa [Isua] hnênah ‘I hmêlmate i ke nghahchhana ka siam hma loh zawng ka ding lamah ṭhu rawh,’ a ti,” tiin a sawi a ni. (Marka 12:36; Sâm 110:1) Davida’n chu fakna hla a phuah lai chuan ani chu thlarau thianghlimin a kaihruai tih Isua chuan a hria a ni. Chu thlarau thianghlim chu min ṭanpui tûrin tûn laiah hmuh theih a ni ve em?
“Dîl Rawh U, Tichuan An Pe Ang Che U”
Fakna hla chu i phuah ngai miah lo pawh a ni thei. Mahse, Goliatha ang tluka harsatna lian tham chu i tawh ṭhin ngei a rinawm. Entîr * A pasal chuan hmeichhe naupang zâwk a neihsan daih a. Leiba tam tak a hnutchhiah a, an fanu tê pahnihte enkawlna tûrin sum leh pai lama ṭanpuina engmah a pe bawk si lo. Isabel-i chuan: “Phatsan leh hmusit taka cheibâwl niin ka inhria a. Mahse, min kalsan tâk aṭang chuan Pathian thlarau thianghlim ṭanpuina ka dawng a ni,” tiin a sawi.
nân, Isabel-i chanchin hi ngaihtuah teh.Isabel-i chuan thlarau thianghlim chu engmah tih ngai lova dawng mai tûrah a inbeisei em? Beisei lo ve, thlarau thianghlim dîlin nî tin Pathian hnênah a ṭawngṭai ṭhîn a ni. Ani chuan huaisen taka hma lam hun a hmachhawn theih nân, a fate ṭha taka a enkawl theih nân, leh mahni inhlutna a hloh tawh hnu a neih leh theih nân Pathian chakna leh ṭanpuina a mamawh tih a hria a ni. Ani chuan Isua ṭawngkam: “Dîl rawh u, tichuan an pe ang che u; zawng rawh u, tichuan in hmu ang; kik rawh u, tichuan an hawnsak ang che u,” tih chu a zâwm a ni.—Matthaia 7:7.
An harsatna chu inang lo mah se, Roberto-a pawhin Pathian thlarau a mamawh tih a inhre bawk a. Meizial leh ganza ngawlvei a ni a, a zu reng mai a ni. Kum hnih zet chu nghei tumin a bei tawh a; mahse, a hlawhchham leh ṭhîn. Ani chuan heti hian a sawi: “Nghei ka tum apiangin ka rilru a buai vek zêl a. Nî tin maiin ka taksa hian ruihhlo ngênin min tur ut ut mai a ni,” tiin.
Heti hian a sawi zawm a ni: “Mahse, pawm tlâka Pathian rawng ka bâwl theih nân ka nun chu thlâk danglam ka tum nghet tlat a. Ka ngaihtuahna chu Bible-a thu ṭha tak takte hmanga tihkhah ka tum tlat a ni. Nî tinin Pathian hnênah ka ṭawngṭai fan fan a, ka nun tithianghlim tûra ka mamawh chakna min pe tûrin ka dîl ṭhîn. Keima chakna mai chuan ka hlawhtling dâwn lo tih ka hria a. Pathian Jehova’n ka ṭawngṭaina min chhâng tih ka hria a, a bîk takin insûm thei ngang lova ka tlûk leh avânga hrehawm ka tih êm êm lai hian min chhânzia ka hre lehzual ṭhîn. Pathian thlarau thianghlim chuan chakna thar min pe tih ka hre chiang; chuti ni lo se chuan ka ngawl vei chu engti kawng mahin ka bânsan thei ngai lo vang,” tiin.—Philippi 4:6-8.
‘Mupuite Anga Thlaa’ Thlâwk Chhovin
Isabel-i leh Roberto-a te ang bawkin, Jehova Thuhretu maktaduai tam takte chuan an nuna thlarau thianghlim hnathawh chu an tawng a. I duh phawt chuan nang pawhin, Pathian Jehova chakna chevêl reng—lei leh vân siam nân pawha a hman a chakna—chu i nei ve thei a. Tih tak zeta i dîl phawt chuan Pathianin a thlarau pêk che chu a châk êm êm a ni. Mahse, chu thlarau dawng tûr chuan a chungchâng thudik i zir leh tih tak zeta a duhzâwng tih i tum a ngai a ni.—Isaia 55:6; Hebrai 11:6.
Thlarau thianghlim tihchakna nên chuan hlawhtling taka Pathian rawng bâwl tûr leh i nuna harsatna i tawh engpawh hmachhawn thei tûra i mamawh chakna chu i nei thei ang. Bible chuan heti hian min tiam a ni: “[Jehova chuan] chau hnênahte chuan thiltihtheihna a pe ṭhîn a; chakna rêng nei lote chu a tichak ṭhîn. . . . LALPA nghâktute erawh chuan an chakna chu an siamṭha leh ang a; mupuite angin thlain an thlâwk chho vang a; hah lovin an tlân ang a; chau lovin kêin an kal ang,” tiin.—Isaia 40:28-31. (w09 10/01)
[Footnote]
^ par. 6 Hming ṭhenkhat chu thlâk a ni.
[Phêk 8-naa thu lâk chhuah]
‘Nî tinin Pathian hnênah chakna dîlin ka ṭawngṭai fan fan a. Keima chakna mai chuan ka hlawhtling dâwn lo tih ka hria. Ani’n ka ṭawngṭaina min chhâng a ni’
[Phêk 7-naa bâwm/milemte]
Thlarau Thianghlim Hnathawh Dan
Pathian chuan thlarau thianghlim chu lei leh vân leh thil dang zawng zawngte siam nân a hmang. “Aw LALPA, i thiltihte chu a va tam êm! Finnain i siam vek a ni: leilung hi i hausaknain a khat a nih hi. . . . I thlarau chu i tîr chhuak a, siamin an awm ṭhîn,” tiin fakna hla phuahtu chuan a puang chhuak a ni.—Sâm 104:24, 30; Genesis 1:2; Joba 33:4.
Thlarau thianghlim chuan Pathian ṭih mite chu Bible ziak tûrin a thâwk khum. “Pathian Lehkha Thu zawng zawng hi Pathian thâwk khuma pêk a ni a . . . a sâwt bawk a ni,” tiin tirhkoh Paula chuan a ziak a. (2 Timothea 3:16) “Pathian thu” chu a nih ang chiah chiaha an ziak chhâwn theih nân, Bible ziaktute ngaihtuahna chu Pathian Jehova thaw, a nih loh leh a thlarau chuan a kaihruai a ni.—1 Thessalonika 2:13.
Thlarau Thianghlim chuan Pathian chhiahhlawhte chu hma lam hun dik taka hrilh lâwk theihna a pe. Tirhkoh Petera chuan: “Pathian Lehkhaa thu hrilh lâwk rêng rêng hi mahniin hrilhfiah tûr a ni lo tih hre hmasa phawt ula. Thu hrilh lâwk rêng rêng hi mihring thua chhuak a ni ngai si lo a, miten thlarau thianghlim tirhin Pathian hnên ata an sawi zâwk ṭhîn a ni,” tiin a hrilhfiah a ni.—2 Petera 1:20, 21; Joela 2:28.
Thlarau thianghlim chuan Isua leh rinna nei mi dangte chu Pathian Ram chanchin ṭha hril tûr leh thil mak ti tûrin a ṭanpui. Isua chuan: “Riangvaite hnênah chanchin ṭha hril tûra mi ruat avângin Lalpa thlarau chu ka chungah a awm; ani chuan salte hnêna chhuahna thu leh, mitdelte hnêna mitvâr neih lehna thu sawi tûr . . . tein mi tîr a ni,” tiin a sawi.—Luka 4:18, 19; Matthaia 12:28.
[Phêk 9-naa bâwm/milemte]
THLARAU THIANGHLIMIN MIN ṬANPUI THEIH DAN KAWNGTE
Thlarau thianghlim chuan thlêmna do tûr leh thil chîn ṭha lote bân thei tûrin min tichak thei. Tirhkoh Paula chuan heti hian a sawi: “Pathian zawng a rinawm a ni, ani chuan in tuar theih tâwk aliam chu thlêmna in tawh a phal lo vang; in tuar theihna tûrin thlêmna rualin tlân chhuahna kawng a siam nghâl zâwk ang,” tiin.—1 Korinth 10:13.
Thlarau thianghlim chuan Pathian lâwmzâwng miziate nei tûrin a ṭanpui thei che. “Thlarau rah erawh chu hmangaihna te, hlimna te, remna te, dawhtheihna te, ngilneihna te, ṭhatna te, rinawmna te, thuhnuairawlhna te, insûmtheihna te a ni.”—Galatia 5:22, 23.
Thlarau thianghlim chuan fiahnate tuar chhuak thei tûrin a tichak thei che. “Mi tichaktuah chuan engkim ka ti thei a ni.”—Philippi 4:13.