Unaute Hmangaihna Nei Lehzual Rawh U
Unaute Hmangaihna Nei Lehzual Rawh U
“Kristan a hmangaih che u . . .. ang bawk khân hmangaihnaah awm rawh u.”—EPH. 5:2.
1. Isua’n a hnungzuitute chhinchhiahna pawimawh tak chu eng nge nia a sawi?
PATHIAN RAM chanchin ṭha hrila in tina kal chu Jehova Thuhretute chhinchhiahna a ni a. Chutichung pawhin, Isua Krista chuan a zirtîr dik takte chhinchhiahna atân Kristianna hmêl hmang dang a la thlang cheu a ni: “Thupêk thar ka pêk che u hi, inhmangaih ula; keiin ka hmangaih ang che u hian nangni pawh inhmangaih ula. In inhmangaih chuan mi zawng zawngin ka zirtîrte in ni tih chu miah chuan an hria ang,” tiin.—Joh. 13:34, 35.
2, 3. Kan unau inhmangaihna chuan kan Kristian inkhâwmnaa lo telte chungah nghawng eng nge a neih?
2 Kristian dikte inkâra awm hmangaihna ang tluka nasa hmangaihna hi tumahin an nei lo. Thîrhîptheiin thîr a hîp khâwm ang chiah hian, hmangaihna chuan Pathian Jehova chhiahhhlawhte chu inpumkhat tûrin a hîp khâwm a, mi rilru dikte chu biakna dik lamah a hîp a ni. Entîr nân, Cameroon rama mi Marcelino-a hi ngaihtuah teh. Ani chuan a hna thawhna lamah a mit a chân a. Dawithiam a nih avânga mitdel angah a tlâng thang lehnghâl a ni. An pastor leh kohhrana mi dangte lah chuan thlamuan ahnêkin kohhran aṭangin an hnâwt chhuak bawk si. Jehova Thuhretute zînga pakhatin inkhâwm tûra a sâwm chuan, Marcelino-a chuan a hreh hle a. Mite hnâwlna tawn belhleh chu a duh lo a ni.
3 Marcelino-a chuan Kingdom Hall-a a thiltawn chu mak a ti hle mai. Mite chuan an lo lâwm êm êm a; tin, Bible zirtîrna thu a ngaihthlâkte aṭang chuan thlamuanna nasa tak a hmu bawk a ni. Tichuan, kohhran inkhâwm zawng zawngah tel ṭanin, a Bible zirnaah hma a sâwn zêl a, kum 2006-ah baptisma a chang ta a ni. Tûnah chuan a chhûngte leh ṭhenawmte hnênah thutak hrilhin, Bible zirpui engemaw zât a nei tawh a. Marcelino-a chuan Pathian mite zînga hmangaihna a dawn ang bawk chu a Bible zirpuite pawhin dawng ve se a duh a ni.
4. Engvângin nge ‘hmangaihnaa awm’ tûra Paula fuihna thu chu kan zawm ang?
4 He kan unau inhmangaihna hi duhawm hle mah se, amaha lo awm ve mai angah kan ngai tûr a ni lo. A êng leh a lumnaa mite hîp khâwmtu zâna meipui chheh chu han ngaihtuah ta la. A aitute’n thing an tuah belh zêl loh chuan mei chu a mit mai dâwn a ni. Chutiang bawkin, kohhrana min phuarkhâwmtu hmangaihna ropui tak pawh hi a tichak tûra Kristian mi mal tinte’n theih tâwp kan chhuah ṭheuh loh chuan a dai thei a ni. Engtin nge hmangaihna chu kan tihchak theih ang? Tihrkoh Paula chuan heti hian min hrilh: “Kristan a hmangaih che u a, rimtui atân Pathian hnêna thil hlanah leh inthawinaa kan aia a inpêk ang bawk khân hmangaihnaah awm rawh u,” tiin. (Eph. 5:2) Kan ngaihtuah tûr zawhna lo awm ta chu, Eng kawngin nge hmangaihnaah chuan ka awm ang?, tih hi a ni.
‘Nangni Pawh Inhawng Ve Rawh U’
5, 6. Engvângin nge Paula’n Korinth khuaa Kristiante chu “inhawng” tûra a fuih?
5 Tirhkoh Paula chuan hmân lai Korinth khuaa Kristiante hnênah heti hian a ziak a: “Aw, Korinth-a mite u, kan thinlung pawh phawrh vekin in hnênah thu kan sawi a, kan inhawng a, nangni erawh chu in inhawng ve si lo. Tichuan in chunga kan tih ang bawk khân nangni pawh kan lakah inhawng ve tûrin fate ngenin kan ngên a che u,” tiin. (2 Kor. 6:11-13) Engvângin nge Paula chuan Korinth mite chu hmangaihna kawnga inhawng lehzual tûra a ngen?
6 Hmân lai Korinth khuaa kohhran a lo din ṭan dân kha han ngaihtuah teh. Paula chuan Korinth khua chu C.E. 50-na tâwp lam khân a tlawh a. Chuta a thu hrilhna chuan atîr lamah harsatna tâwk mah se, bânsan lovin, a chhunzawm zêl a. A hnu rei lo têah chuan chu khawpuia mi tam tak chuan chanchin ṭha chu an rawn pawm ta a ni. Chutah chuan “kum khat leh thla ruk” chhûng thu hril leh kohhran tichakin a awm a. Chuvângin, Korinth khuaa Kristiante chu a hmangaih hle ngei ang tih a chiang hle. (Tirh. 18:5, 6, 9-11) Tin, anni pawhin amah chu hmangaih lêt a, zah lêtna tûr chhan tam tak an nei ve bawk. Chuti chung chuan, kohhrana mi ṭhenkhat chuan ani chu an hnaih ṭha duh lo. An zînga mi tlêm tê chuan a zilhna thu tlang takte chu an duh lo a ni thei ang. (1 Kor. 5:1-5; 6:1-10) Ṭhenkhat chuan ‘tirhkoh lian berten’ amah an sawichhiatna an ngaithla a ni thei bawk. (2 Kor. 11:5, 6) Paula chuan a unaute chu amah hmangaih tak tak tûrin a duh a. Chuvângin, amah leh an unau dangte hnaihna hmanga “inhawng” tûrin a ngên a ni.
7. Engtin nge unaute hmangaihna lantîrna kawngah kan ‘inhawn’ theih?
7 Keini kan inhawng ve em? Engtin nge unaute hmangaihna lantîrna kawngah chuan kan ‘inhawn’ ve theih ang? Kan rualpui emaw, kan hnampui emawte chunga unaute hmangaihna lantîr chu a awlsam viau thei a. Tin, intihhlimna ngainatzâwng inangte pawhin hun an hmang tlâng hnem hle thei bawk. Mahse, Kristian ṭhenkhatte nêna kan tuizâwng a inanna chuan a dangte laka min tihhran chuan, kan ‘inhawn’ a ngai a ni. Chuvângin, hetianga inzawh hi a finthlâk ang: ‘Ka ṭhian hnaite zînga mi ni lo unaute nên hian rawngbâwlnaah emaw, thiltih dangah emaw ka kal chhuak khât viau em? Kingdom Hall-a mi tharte chu ṭhiana siam tlâk an nihzia an lantîr hma loh zawng ka kâwm hreh deuh vem? Kohhrana mi a pui a pangte chu ka biain, ka kâwm vek em?
8, 9. Engtin nge Rom 15:7-a Paula fuihna thu hian unaute hmangaihna nei lehzual thei tûrzâwnga inchibai tawn tûrin min ṭanpui theih?
8 Inlawm tawn nâna chibai inbûkna kawngah chuan, Rom khuaa mite hnêna Paula thute hian kan rinpuite chungchâng thlîr dân dik nei tûrin min ṭanpui thei a. (Rom 15:7 chhiar rawh.) He Grik thu mal “inlâwm” tiha lehlin hi “ngil nei tak leh khual chhawn thiamna nêna lo dawn sawnna, kan zînga tel tûr leh kan ṭhian ni tûra pawmna” tihna a ni. Bible hun laia khual chhawn thiam takin a ṭhiante a ina thlentîrin, anmahni a hmuh avânga a hlimzia chu a lantîr ṭhîn. Krista pawhin chutiang chiah chuan kohhranah min lâwm a tih theih a, keini pawh hi amah entawn a, unaute lâwm ve tûra fuih kan ni.
9 Kingdom Hall leh hmun dangah kan unaute kan chibâi rêng rêngin, kan hmuh khât deuhte emaw, kan biak khât deuhte emaw chu kan ngaihsak bîk tûr a ni. Chûng mite biak nân engvângin nge rei lo te chhûng tal hun kan hman loh vang? Tichuan, inkhâwm leh hunah, mi dangte chu chutiang chuan kan be leh thei ang. Chutianga kan tih chuan, rei lo te chhûngin unau zawng zawng deuhthaw nên hlim taka inbiakna kan nei thei dâwn a ni. Ṭum khata unau zawng zawngte kan biak kim theih loh pawhin a pawi lo. Inkhâwm apianga kan biak ziah theih loh avângin tuman lungnih loh nân an hmang tûr a ni hek lo.
10. Kristian kohhrana mi zawng zawngte tân eng hun remchâng ṭha nge awm a, chu chu engtin nge kan hman ṭangkai theih ang?
10 Mi dangte lawm nâna kan tih hmasak ber chu anmahni chibai bûk hi a ni a. Chu chu tîtîna hlimawm tak leh inṭhianna nghet min neihtîr theitu rahbi a ni. Entîr nân, inkhâwmpuia telte’n mi dangte an han inhmelhriattîr a, an han biak hian inhmuh leh duhna an lo nei ṭhîn. Kingdom Hall saknaa inpete ang bawkin, chhawmdâwlna hna thawktute zîngah chuan an thiltawnte aṭanga an mize ṭhate an inhriatsak avângin inṭhianna ṭha tak a lo awm ṭhîn. Pathian Jehova inawpna pâwl chhûngah hian, chutiang inṭhianna nghet siam theihna hun remchâng chu a tam hle. Kan ‘inhawn’ phawt chuan, mi chi hrang hrangte chu ṭhianah kan nei ang a, biakna dika min phuarkhâwmtu hmangaihna chu kan nei zual sauh vang.
Mi Dangte Tân Hun Pe Rawh
11. Marka 10:13-16-a târ lan angin, Isua’n entawn tûr eng nge min hnutchhiah?
11 Kristian zawng zawngte chuan Isua ang bawka pan nuam tak nih chu an tum ṭheuh tûr a ni. Zirtîrte’n an fa rawn hruaitu nu leh pate dan an tum laia Isua chhân lêt dân kha han ngaihtuah teh. “Naupang tête ka hnênah han kaltîr ula, hnar suh u; Pathian ram chu hetiang mite ta a ni si a,” tiin a chhâng lêt a ni. Tichuan, “anmahni chu a kuangkuah a, an chungah a kut nghatin mal a sâwmsak ta a.” (Mk. 10:13-16) Zirtîrtu Ropuiin chuti taka a ngaihsak avânga naupangte lâwm dân tûr chu han ngaihtuah teh!
12. Engin nge mite nêna kan inbiakna tûr chu dâl thei?
12 Kristian tinte chu, ‘Mi dangte tân hun ka pe nge, buai êm êm angin ka lang fo zâwk?’ tiin an inzâwt ṭheuh tûr a ni. Thil sual pawh ni lêm lo, kan thil chînte chuan inbiakna tihtâwp theih châng a nei a. Entîr nân, mi dangte nêna awmho laia cell phone kan hman reng mai emaw, earphone hmanga rimawi kan ngaihthlâk reng mai emaw chuan anmahni kâwm peih lovah min ngai thei a ni. Mi dangte’n kuta ken mai theih chi computer kan khawih reng lai an hmuh chuan, anmahni be duh lovah min ngai mai thei bawk. ‘Ngawih hun zawng a awm’ tehmeuh mai. Mahse, mi dangte nêna kan awmho lai chu “ṭawng hun” a ni tlângpui ṭhîn. (Thur. 3:7) Ṭhenkhat chuan, “Mahnia awm mai mai ka duh” emaw, “Zîng kâr kârah chuan ka ṭawng peih vak lo” emaw an ti mai thei. Amaherawhchu, kan peih vak loh hun pawha mite nêlawm taka kan biak hian, ‘mahni hmasial lo’ hmangaihna kan lantîr tihna a ni.—1 Kor. 13:5.
13. Kristian unaute chungah eng rilru put hmang nei tûrin nge Paula’n Timothea chu a fuih?
13 Paula chuan tlangvâl Timothea chu kohhrana mi zawng zawngte zah tûrin a fuih a. (1 Timothea 5:1, 2 chhiar rawh.) Keini pawhin Kristian upa lamte chu nu leh pa ang te, naupang zâwkte chu pianpui unau angtein kan en tûr a ni. Chutiang rilru put hmang kan neih chuan, kan unau tumahin kan bula awm hrehawm an ti lo vang.
14. Mi dangte nêna inbiakna mi tichak thei tak neih a hlâwkna ṭhenkhat chu engte nge ni?
14 Mi tichak thei tûrzâwnga mite kan kawm chuan, an thlarau lam leh rilru lam ṭhatna atân thil kan ti tihna a ni. Branch office-a thawk unaupa pakhat chuan Bethel-a a awm tirh laia hun pea amah be ṭhîntu Bethel-a lo awm hmasa tawh mi engemaw zât chu a hre reng a. An fuihna thu ṭha tak takte chuan Bethel chhûngkaw zînga mi ngei nia inhriatna a neihtîr a. Tûnah chuan Bethel-a a awmpuite kâwmin chûng mite entawn chu a tum a ni.
Inngaihtlâwmna Chuan Remna Siam Tûrin Min Ṭanpui
15. Inrem loh châng kan nei ve thei tih engin nge târ lang?
15 Hmân lai Philippi khuaa Kristian unaunu pahnih, Euodii leh Suntuki te chuan buaina chinfel harsa tak an nei niin a lang a. (Phil. 4:2, 3) Paula leh Barnaba pawh tlâng thang khawp hiala nasain an inhnial a, hun engemawti chhûng chu an zin tlâng thei lo hial a ni. (Tirh. 15:37-39) Hêng thute hian betu dikte inkârah pawh inrem lohna a chhuak ve ṭhîn tih a târ lang a. Pathian Jehova chuan chûng inrem lohnate chu chingfel a, inṭhianna nei leh thei tûrin ṭanpuina min pe a ni. Mahse, keimahni lamah thil engemaw min phût a ni.
16, 17. (a) Mi mal inkâra buaina chinfelnaah eng ang takin nge inngaihtlâwmna a pawimawh? (b) Engtin nge Jakoba’n Esauva a pan dân chungchâng thuziak chuan inngaihtlâwmna hlutzia a târ lan?
16 I ṭhian tuemaw nên motor-a zin chhuak tûr angah han inchan teh. Kal chhuak thei tûr chuan chabi hmanga car chu i tihnun phawt a ngai a ni. Chutiang bawkin, mi mal inkâra inrem lohna chingfel tûr chuan chahbi aṭanga inṭan a ni a. Chu chabi chu inngaihtlâwmna a ni. (Jakoba 4:10 chhiar rawh.) A hnuaia Bible-a thilthlengin a târ lan ang hian, chu chabi chuan a hmaa lo inhmu thiam lo ṭhînte pawh Bible thu bulte nunpui ṭan tûrin a ṭanpui thei a ni.
17 Esauva’n a phîrpui Jakoba laka a fatîr nihna a hloh avânga thah duh hial khawpa a thinur atangin kum sawm hnih lai a liam ta. Tûnah chuan chûng phîr pahnihte chu an inhmu dâwn ta a, “Jakoba chuan a hlau êm êm a.” Esauva’n a beih mai a ring tlat a ni. Mahse, an han inhmuh chuan Jokoba chuan Esauva beisei hauh loh tûr thil engemaw a ti a. A unaupa bul a thlen hma chuan “lei siin chibai a bûk” a ni. Chu mi hnuah eng thil nge thleng? “Esauva chu amah lâwm tûrin a tlân a, a pawm a, a ir a chuktuah a, a fâwp a: tin, an ṭap dûn ta a.” Inbeih mai hlauhawmna dinhmun chu pumpelh a ni ta. Jakoba inngaihtlâwmna chuan Esauva’n amah huatna rilru a neih engpawh chu hneh tûrin a ṭanpui a ni.—Gen. 27:41; 32:3-8; 33:3, 4.
18, 19. (a) Mi mal inkâra inrem lohna a chhuahin, engvângin nge Bible fuihna nunpui tûra hma la hmasatu nih chu a pawimawh êm êm? (b) Kan inrem loh puiin atîrin kan hma lâkna a chhâng lêt ṭha lo a nih pawhin engvângin nge kan beidawn loh vang?
18 Bible-ah chuan inhmuh thiam lohna chinfel chungchângah fuihna thu ṭha tak a chuang a. (Mt. 5:23, 24; 18:15-17; Eph. 4:26, 27) * Mahse, chu fuihna chu inngaitlâwm taka kan nunpui loh chuan remna siam chu thil harsa tak a ni ang. Keini pawh inngaihtlâwmna kan lantîr theih laia mi dangte chauh lantîr tûra nghah chu harsatna chinfel dân tûr a ni lo.
19 Chhan engemaw avânga remna siam tuma hma kan lâkna hmasa ber chu a hlawhtling lo a nih pawhin, kan beidawng tûr a ni lo. Kan inrempui lohva chuan a rilru siam fel nân hun a duh rei deuh pawh a ni mai thei. Josefa pawh a unaute’n dik lo takin an cheibâwl a. Aigupta ram prime minister a nih a, an inhmuhleh hma chuan kum rei tak a ral hman a ni. Mahse, a tâwpah chuan an rilru an thlâk a, ngaihdam an dîl ta a. Josefa chuan anni chu a ngaidam a, Jakoba fate chu Pathian Jehova hming putu hnam pakhat an lo ni ta a ni. (Gen. 50:15-21) Unaute nêna kan inkâra remna vawng tlatin, kohhranah inlungrualna leh hlimna kan awmtîr a ni.—Kolossa 3:12-14 chhiar rawh.
“Thiltih leh Tih Tak Zetin” I Inhmangaih Ang U
20, 21. Isua’n a zirtîrte ke a silsak aṭangin eng nge kan zir theih?
20 Isua chuan a thih hma lawkin a tirhkohte hnênah: “In chunga ka tih ang hian nangni pawhin in tih vena tûrin ka tihhmuh che u a ni si a,” tiin a hrilh a. (Joh. 13:15) Chu mi a hrilh lai chuan a zirtîr 12-te ke a silsak zo chiah a ni. A thiltih chu tihtûr a nih avâng maia ti a ni lo va, ngilneihna thiltih satliah mai lah a ni hek lo. Ke sil chungchâng thu a sawi hmain, Johana chuan heti hian a ziak a ni: “Isuan . . . amaha mi khawvêla awm a hmangaih ṭhinte chu a tâwp thleng pawhin a hmangaih reng a,” tiin. (Joh. 13:1) Chhiahhlawhin an thawh ṭhin, an ke silsak tûra Isua chêttîrtu chu a zirtîrte a hmangaihna hi a ni a. Tûnah chuan anni pawhin inngaitlâwm takin hmangaihna avângin thil an intihsak tawn tûr a ni. Ni e, unaute hmangaihna dik tak chuan kan Kristian unau zawng zawngte ngaihsakna leh ngaihtuahna lantîr tûrin min chêttîr tûr a ni.
21 Pathian Fapain a ke a silsak tirhkoh Petera chuan Isua thiltih awmzia chu a man chiang hle. Heti hian a ziak a ni: “Unaute hmangaih tak tak tûrin thutak zâwma in thlarau in tihthianghlim tawh avângin thinlunga ṭhahnem ngai takin in hmangaih tawn rawh u,” tiin. (1 Pet. 1:22) Lalpa’n a ke a silsak ve bawk tirhkoh Johana pawhin: “Naute u, thu chauhvin i hmangaih suh ang u khai, lei chauhvin i hmangaih hek suh ang u, thiltih leh tih tak zetin ni zâwk rawh se,” tiin a ziak bawk. (1 Joh. 3:18) Kan unaute kan hmangaihna chu thiltiha lantîr tûrin kan thinlungin min chêttîr rawh se. (w09 11/15)
[Footnote]
^ par. 18 Organized to Do Jehovah’s Will, phêk 144-150 en rawh.
Kan La Hre Reng Em?
• Mi dangte kan hmangaihnaah eng kawngin nge kan ‘inhawn’ theih?
• Engin nge mi dangte tâna hun pe tûrin min ṭanpui ang?
• Remna siamnaah inngaihtlâwmna chu eng anga pawimawh nge a nih?
• Kan rinpuite ngaihsak tûrin engin nge min chêttîr ang?
[Zirlai Atâna Zawhnate]
[Phêk 25-naa milem]
Mi dangte tân hun pêk hmaih suh