Chhandamna Pek Nana Pathian Hman Messia Chu!
Chhandamna Pek Nana Pathian Hman Messia Chu!
Adama-ah chuan mi zawng zawng an thi ṭhîn ang hian Krista-ah chuan mi zawng zawng tihnunin an awm bawk ang.”—1 KOR. 15:22.
1, 2. (a) Andria leh Philipa te’n Isua an hmuh khân engtin nge an chhân lêt? (b) Kum zabi khatnaa Kristiante ai khân Isua chu Messia a ni tih finfiahna kan nei tam tawh zâwk tih engvângin nge kan sawi theih?
“MESSIA kan hmu ta,” tiin Andria chuan a unaupa Petera hnênah Nazaret Isua chu Pathian Hriak Thiha a ni tih a rin tlatzia a hrilh a. Philipa pawhin chu chu a ring thlap a, a ṭhian Nathanaela chu zawng chhuakin: “A chanchin Mosian Dân Lehkhabua a ziak leh, Zâwlneiten an ziak kha, amah chu ka hmu ta,” tiin a hrilh bawk a ni.—Joh. 1:40, 41, 45.
2 Isua chu thutiam Messia, Pathian Jehova hman ‘chhandamna Siamtu’ a ni tih i ring tlat em? (Heb. 2:10) Tûn laiah chuan, kum zabi khatnaa a hnungzuitute aiin Messia a ni tih finfiahna kan nei tam tawh zâwk a. Thlarauva thâwk khum Pathian Lehkha Thu-a Isua pian aṭanga a thih thleng chanchin chuan Krista a nihzia finfiahna hnial rual loh chu min pe a ni. (Johana 20:30, 31 chhiar rawh.) Bible chuan Isua’n Messia anga a chanvo chu vân aṭangin a hlen chho zêl ang tih a târ lang bawk. (Joh. 6:40; 1 Korinth 15:22 chhiar rawh.) Thlarau lam thila sawi chuan, tûn laiah pawh: ‘Messia ka hmu ta,’ tiin i sawi ve thei a ni. Mahse, chûng zirtîr hmasate’n Messia an hmu tih dik taka thu tâwp an siam dân chu i lo ngaihtuah hmasa ang u.
Messia “Thurûk” Chu Zawi Zawia Târ Lan A Ni
3, 4. (a) Engtin nge kum zabi khatnaa zirtîrte khân ‘Messia an hmuh’? (b) Engvângin nge Messia chungchânga hrilh lâwkna zawng zawng chu Isua-ah chauh a thleng famkim i tih theih?
3 Engtin nge kum zabi khatnaa Isua hnungzuitute khân, ani chu Messia a ni tih chiang taka an sawi theih? Pathian Jehova chuan, zâwlneite kal tlangin lo awm tûr Messia hriat theihna tûr chhinchhiahna chu zawi zawiin a târ lang a. Bible scholar pakhat chuan chu mi nih dân chu sailungvâr bung hrang hranga siam milim pakhat rem khâwm nên a tehkhin a ni. Inbiak pawhna pawh nei ngai miah lo mi tam tak chuan chu sailungvâr bung hrang hrangte chu pindan pakhatah an rawn keng lût thliah thliah a. Chûng an thil rawn kente chu milim pakhat din nâna rem khâwm thlap theih ni ta se, hriat loh tuemawin milim nih dân tûr chu duang a, a bung tinte chu mi hrang hrang hnênah a pe ṭheuh niin ngaih dân inâwm tak i siam ngei ang. Milim bung tinte ang bawkin, Messia chungchânga hrilh lâwkna tinte chuan Messia chungchânga thu pawimawh takte chu a pe a ni.
4 Chutiang a nih chuan, Messia chungchâng hrilh lâwkna zawng zawng chu tihpalh thil thuin mi pakhat chungah a thleng famkim vek a ni thei ang em? Thil zir chîkmi mi pakhat chuan, Messia chungchânga hrilh lâwkna zawng zawng chu tihpalh thil thuin mi pakhat chungah a thleng famkim tia sawi chu thil âwm lo tak a nih avângin, “thil ni thei lo anga ngaih tûr,” a ti. Chuvângin, chu scholar chuan “thil thleng chanchina mihring awm tawh zawng zawng zîngah Isua chauhvin chu chu a ti thei a ni,” tiin dik takin thu tâwp a siam a ni.
5, 6. (a) Setana chunga rorêlna chu eng anga kenkawh nge ni ang? (b) Engtin nge Pathian chuan thutiam ‘thlah’ lo lanna chu zawi zawia a târ lan?
5 Messia hrilh lâwknate chu, lei leh vâna pawimawhna nei ‘thurûkah’ chuan a innghat vek a ni. (Kol. 1:26, 27; Gen. 3:15) Chu thurûkah chuan mihringte sual leh thihnaa hruai lûttu “rûlpui tar,” Diabol-Setana chunga rorêlna pawh a tel a ni. (Thup. 12:9) Engtin nge chu rorêlna chu kenkawh a nih ang? Pathian Jehova chuan ‘hmeichhe’ hrin tûr ‘thlahin’ Setana lû a tihthitlin tûr thu a sawi lâwk a. Chu sawi lâwk ‘thlah’ chuan rûl lu chu a tikehsawmin, helna te, natna te, leh thihna te awmtîrtu chu a tiboral ang. Mahse, Pathian phalnain, Setana chuan hmeichhe ‘thlah’ chu entîr neiin a ke artui a tihthitlinsak phawt dâwn a ni.
6 Pathian Jehova chuan chu thutiam ‘thlah’ lo ni tûr chu zawi zawiin a târ lang a. Pathian chuan Abrahama hnênah: “I thlahah chuan khawvêla chi tin an la thawveng ang” tiin chhia a chham a ni. (Gen. 22:18) Mosia chuan chu Mi chu a aia ropui zâwk “zâwlnei” a ni dâwn tih a sawi lâwk a. (Deut. 18:18, 19) Davida hnênah Messia chu a thlah zînga mi a ni ang a, Davida lalṭhutthlêng chu chatuanin a luah ang tiin a tiam a, chu chu a hnuah zâwlneite’n an nemnghet a ni.—2 Sam. 7:12, 16; Jer. 23:5, 6.
Isua chu Messia A Nihzia Finfiahnate
7. Pathian ‘hmeichhe’ thlah lo pian nân eng nge ṭûl?
7 Pathian chuan A nupui anga sawi theih, thlarau lam thil siam vân lam inawpna pâwl aṭangin a thil siam hmasa ber, a Fapa chu thutiam ‘thlah’ ni tûrin a rawn tîr a. Chutiang ni tûr chuan Pathian Fapa mal neih chhun chu vân lam nun aṭanga “intitlâwmin,” mihring ṭha famkim anga a lo pian a ngai a ni. (Phil. 2:5-7; Joh. 1:14) Mari thlarau thianghlima “hliahkhuh” a nihna chuan, nau lo piang tûr chu ‘mi thianghlim, Pathian Fapa’ tia koh a nih tûrzia a tichiang a ni.—Lk. 1:35.
8. Engtin nge Isua’n tuia baptisma chang tûra a inlan khân, Messia chungchânga hrilh lâwkna chu a thlen famkimtîr?
8 Messia chungchânga hrilh lâwknate chuan Isua lo lanna tûr hmun leh hun te a târ lang a. Sawi lâwk a nih ang chiahin, Bethlehemah chuan a lo piang ta ngei a ni. (Mik. 5:2) Kum zabi khatnaah khân, Juda mite chuan amah chu an beisei hle a. Messia lo lan hun chu nghâkhlelin, mi ṭhenkhat chuan Baptistu Johana chungchângah: “Krista a lo ni mial dah law maw?” tiin an zâwt a. Mahse, Johana chuan: “Keimah aia mi ropui a lo kal dâwn e,” tiin a chhâng a ni. (Luka 3:15, 16) C.E. 29 tâwp lamah, kum 30 mi Isua chu Johana hnênah baptisma chang tûrin a kal a, Messia ni tûrin a hun takah a va inlan a ni. (Dan. 9:25) Tichuan, rawngbâwlna pawimawh tak chu ṭanin: “Hun chu a lo thleng ta a, Pathian ram pawh a lo hnai ta,” tiin a sawi a ni.—Mk. 1:14, 15.
9. Isua zirtîrte khân thil awm dân a kip a kawiin hre lo mah se, eng nge an rin tlat?
9 Mahse, mite chuan an beisei dân chu an siam rem a ngai a. Isua chu Lal anga ṭha taka lawm a ni a; mahse, tûnah rorêl nghâl lovin, nakinah vân aṭangin a rêl dâwn tih chutih laia mite chuan an hre thiam lo a ni. (Joh. 12:12-16; 16:12, 13; Tirh. 2:32-36) Amaherawhchu, Isua’n: “Tunge a ni mi tih?” tia a zawh khân, Petera chuan: “Krista, Pathian nung fapa chu i ni,” tiin a chhâng vat a. (Mt. 16:13-16) A zirtîrna avânga mi tam takin an kalsan pawh khân, Petera chuan chutiang deuh bawk chuan a chhâng a ni.—Johana 6:68, 69 chhiar rawh.
Messia Thu Ngaithla Rawh
10. Engvângin nge Pathian Jehova’n a Fapa thu ngaihthlâk a ngai tih a sawi uar?
10 Pathian fapa mal neih chhun chu vânah thlarau thiltithei tak a ni a. Leia a awm lai khân, Isua chu Pa aiawhtu, a nih loh leh “Paa chhuak” a ni a. (Joh. 16:27, 28) Ani chuan: “Ka thu zirtîr hi ka ta a ni lo va, mi tîrtu ta a ni zâwk,” tiin a sawi a ni. (Joh. 7:16) Hmêl danglamnaah khân Pathian Jehova chuan: “Ama thu ngai rawh u,” tiin Isua chu Messia a nihzia a finfiah a ni. (Lk. 9:35) Ni e, he Pathian Mi Thlana thu hi kan ngaithlain, kan âwih tûr a ni. Chu mi ti tûr chuan rinna leh thil ṭha tih—Pathian tihlâwm nân leh chatuan nunna chan nâna pawimawh tak—chu a ngai a ni.—Joh. 3:16, 35, 36.
11, 12. (a) Engvângin nge kum zabi khatnaa Judate khân Isua chu Messia anga an pawm loh? (b) Tute’n nge Isua ring?
11 Isua chu Messia a nihzia finfiahna tam tak awm mah se, kum zabi khatnaa Juda mi a tam zâwkte chuan an hnâwl a ni. Engvângin nge? Anni chuan Rom mite awpbehna aṭanga chhan chhuaktu tûr politics lama inhmang messia a nih rinna pawh tiamin, Messia chungchângah chuan mahnia ngaih dân an lo neih sa vâng a ni. (Johana 12:34 chhiar rawh.) Chuvâng chuan, mihringte hmuhsit leh duh lohvin a awm ang a, lungngaihnate nei mi leh natna hre mi a ni ang a, a tâwpah chuan tihhlumin a awm ang tih hrilh lâwknate tifamkimtu Messia chu an pawm thei lo a ni. (Is. 53:3, 5) Isua chuan Rom mite awpbehna ata Israel-te a chhan chhuah loh avângin, a zirtîr rinawm ṭhenkhat pawh an lunghnual hial a. Mahse, rinawmna chu an vawng zêl a, a hun takah chuan hriatthiamna dik pêk an ni ta a ni.—Lk. 24:21.
12 Mite’n thutiam Messia an hnâwl chhan dang leh chu mi tam takin pawm harsa an tih êm êm a zirtîrna vâng a ni. Lalrama lût tûr chuan ‘mahni hrehawm pawisak loh’ te, ‘Isua tisa leh a thisen ei’ te, “pian thar” te, leh ‘khawvêla mi nih loh’ te a ngai a. (Mk. 8:34; Joh. 3:3; 6:53; 17:14, 16) Mi chapo te, mi hausa te, leh mi vervêk te chuan hêng thil phûtte hi zawm harsa an ti hle a ni.
13. Engtin nge Isua chuan entîr nei ke artui tihthitlinna chu a tawrh?
13 Isua chuan puithiam lalte’n thiam loh an chantîr ang a, Jentailte tihhlumin a awm ang a; mahse, ni thum niah kaihthawhin a awm leh ang tih a sawi lâwk a. (Mt. 20:17-19) Sanhedrin hmaa “Krista Pathian Fapa” a ni tih a nemngheh avângin Pathian sawichhetu anga puh a ni. (Mt. 26:63-66) Pilata chuan “thihna khawp meuhvin engmah a ti lo” tih a hmu a; mahse, Judate chuan sawrkâr laka hel tiin an puh tel bawk avângin, “an duh duha tihah a pe ta a.” (Lk. 23:13-15, 25) Isua chuan Pathian tirh a nihzia finfiahna ṭhahnem tak a nei chung pawhin, “Nunna Siamtu” chu ‘duh lovin’, tihhlum dân an ruahman a ni. (Tirh. 3:13-15) Messia chu “tihbo” a ni ang tih sawi lâwk a nih ang ngeiin, C.E. 33 Kalhlên Kût Nî-ah tihhlum a ni a. (Dan. 9:26, 27; Tirh. 2:22, 23) Chutianga râwng taka thiin, Genesis 3:15-a sawi lâwk “ke artui” tihthihtlinna chu a tuar a ni.
Messia A Thih A Ngaih Chhan
14, 15. (a) Pathian Jehova’n Isua thih a phal chhan pahnih chu eng nge ni? (b) Isua’n kaihthawh leh a nih hnu khân eng nge a tih?
14 Pathian Jehova’n Isua thih a phal chhan pawimawh tak pahnih a awm a. A hmasain, thih thlenga Isua rinawmna chuan “thurûk” chungchânga thil pawimawh tak chu a ching fel a ni. Ani chuan mihring ṭha famkimin “Pathian ngaihsakna” a lantîr reng thei tih leh Setana fiahna nasa ber tuar chung pawhin Pathian lal chungnunna a chawisâng thei tih finfiahna chiang tak a pe a ni. (1 Tim. 3:6) A pahnihnaah chuan, Isua sawi angin, ‘Mihring Fapa hi mi tam tak tlan nâna a nun pe tûrin a lo kal a ni.’ (Mt. 20:28) Chu ‘tlanna’ chuan Adama thlahte’n an rochun sual avânga hremna chu tlâkin, Isua chu chhandamna pêk nâna Pathian hman a ni tih pawm zawng zawngte tân chatuan nunna a pe bawk.—1 Tim. 2:5, 6.
15 Thlâna ni thum a awm hnuah, Krista chu kaihthawh leh a ni a, kaihthawh leh a nihzia finfiahin, a zirtîrte hnênah ni 40 chhûng a inlan a, kaihhruaina a pêk belh a ni. (Tirh. 1:3-5) Chu mi hnu chuan a inthawina hlutna chu Pathian Jehova hnêna hlân tûrin vânah a lâwn chho va, chutah chuan Messia Lal anga a lo awm ṭan hun tûr chu a nghâk a ni. Chutih chhûng chuan, thiltih tûr tam tak a nei a ni.
Messia Anga A Chanvo Hlen Chhuakin
16, 17. Vâna a lâwn hnua Messia anga Isua chanvo chu sawi rawh.
16 Kaihthawh leh a nih hnu aṭanga tûn thlengin, Isua chuan Lal anga ro a rêlna Kristian kohhran thiltihte chu rinawm takin a enkawl a. (Kol. 1:13) Hun ruatah chuan, Pathian Rama Lal anga a thiltihtheihna chu a hmang ṭan ang. Bible hrilh lâwknate leh khawvêla thil thlengte chuan kum 1914-ah “khawvêl tâwpna” hun a inṭan ang bawkin, Krista chu Lal angin a lo awm tawh tih a nemnghet a ni. (Mt. 24:3; Thup. 11:15) Chu mi hnu lawk chuan, vân aṭanga Setana leh a ramhuaite paih thlâknaah vântirhkoh thianghlimte a kaihruai a ni.—Thup. 12:7:10.
17 Isua’n C.E. 29-a a ṭan thu hrilh leh zirtîr rawngbâwlna chuan a vawrtâwp a thleng ṭêp tawh a. Ani chuan mi nung zawng zawngte chungah ro a rêl thuai ang. Chutih hunah chuan chhandamna pêk nâna Pathian Jehova mi hman anga amah pawmtu berâm ang mite hnênah chuan: “Khawvêl siam ṭantirh ata in tâna ram buatsaih chu chang rawh u,” tiin a hrilh ang a. (Mt. 25:31-34, 41) Isua Lal a nihna hnâwltute chu, mi suaksual zawng zawng do tûra a vân lam sipaite a kaihhruai hunah tihboralin an awm ang. Tichuan, Isua chuan Setana chu a phuar ang a, a ramhuaite nên chuan “leilâwtah” a paih lût ang.—Thup. 19:11-14; 20:1-3.
18, 19. Messia anga a chanvo a hlen chhuahnaah Isua’n eng nge a tih a, chu chuan thuâwih mihringte tân eng nge a rah chhuah?
18 Kum Sâng Rorêl chhûngin, Isua chuan “Remruattua, Pathian Chaka, Chatuan Pa, Remna Lal” tih a nihna zawng zawng milin tlin takin thil a ti ang a. (Is. 9:6, 7) A Lalram Rorêlna chuan mitthi a kaihthawh lehte pawh tiamin, mihringte chu ṭhat famkimnaah a hlâng kai ang. (Joh. 5:26-29) Messia chuan thuawih mihringte chu “nunna tuikhurahte” a hruai ang a, chu chuan Pathian Jehova nêna inlaichînna muanawm tak a neihtîr ang. (Thu Puan 7:16, 17 chhiar rawh.) Fiahna hnuhnûng ber hnuah chuan, Setana leh a ramhuaite pawh tiamin, hel hmang zawng zawng chu “mei leh kât dîlah chuan an paih” ang a, “rûlpui” lû chu tihkeh sawm vek a ni ang.—Thup. 20:10.
19 Isua’n Messia anga sawisêl bova a chanvo a hlen chhuah dân chu a va ropui tak êm! Lei paradis chu hrisêlna ṭha famkim leh hlim taka chatuana nung tûr, chhan chhuah mihringte’n an luah khat ang. Pathian Jehova hming thianghlim chu sawi chhiatna zawng zawng lak ata a fihlîm tawh ang a, lei leh vâna a lalchungnunna pawh thiam chantîr pumhlûm a ni ang. Pathian Mi Thlana thuâwihtu zawng zawngte tân chuan rochan tûr ropui a va ni êm!
Messia Chu I Hmu Em?
20, 21. Mi dangte hnêna Messia chungchâng hrilh chhan tûr eng nge i neih?
20 Kum 1914 aṭang khân Krista pa·rou·siʹa hun, a nih loh leh a lo awmna hunah kan chêng a. Pathian Lalrama Lal anga a lo awmna chu hmuh theih ni lo mah se, hrilh lâwknate thlen famkimna aṭangin a chiang hle a ni. (Thup. 6:2-8) Amaherawhchu, kum zabi khatnaa Judate ang bawkin, tûn laia mi a tam zâwkte pawhin Messia anga a lo awmna finfiahna chu an ngaihthah a. Politics lama messia emaw, a lo berah politics rorêltute kal tlanga thiltitu tûr emaw chu an duh ve a ni. Mahse, nang erawh chuan Pathian Ramah Isua’n Lal angin ro a rêl ṭan tawh tih i lo hre ta a. Chu mi hriat chhuah chu i phûr hle a ni lâwm ni? Kum zabi khatnaa zirtîrte ang bawkin: “Messia kan hmu ta,” tia sawi chhuak tûra chêttîrin i awm ve ta a ni.
21 Tûn laiah, thutak chungchâng i sawi hian, Messia anga Isua chanvo chu i sawi uar em? Chutianga i tihna chuan, i tâna thil a tih tawh te, a tih mêk te, leh a la tih tûrte avânga i lâwmna chu a tipung ang. Andria leh Philipa te angin, Messia chungchâng chu i chhûngte leh i ṭhiante hnêna i sawi ngei a rinawm a ni. Engvângin nge i ṭhahnemngaihna chu titharin, Isua Krista chu thutiam Messia, chhandamna pêk nâna Pathian hman a nihzia anni chu i hrilh loh vang? (w09-E 12/15)
Kan Hrilhfiah Thei Em?
• Engtin nge kum zabi khatnaa zirtîrte khân Messia an hmuh?
• Isua thih chhan pawimawh tak pahnih chu engte nge ni?
• Isua chuan Messia a nih anga a chanvo hlen chhuahnaah eng nge a la tih dâwn?
[Zirlai Atâna Zawhnate]
[Phêk 23-naa milemte]
Kum zabi khatnaa mite khân engtin nge Isua chu thutiam Messia a ni tih an sawi theih?
[Phêk 25-naa milem]
Mi dangte i biakin, Messia anga Isua chanvo chu i sawi uar em?