Hun Khirh Tak Kara Hlimna Vawn Dan
Hun Khirh Tak Kara Hlimna Vawn Dan
“Nangmaha an rinna nghat zawng zawngte . . . chu nangmahah chuan lâwm sela, i hum ṭhin avângin hlimin au kumkhua hlawm rawh se.”—SAM 5:11.
1, 2. (a) Tûn laia lungngaihna nasa tak awmtîrtu thil ṭhenkhat chu engte nge ni? (b) Mi tin chunga thleng thei chhiatnate bâkah, Kristian dikte chuan eng nge an tawrh ngai?
JEHOVA THUHRETUTE pawhin mi nâwlpuite tawn ang chhiatna chu an tawng lo bîk chuang lo va. Pathian mi tam takte chuan dân bawhchhiatna te, indona te, leh rorêl dik lohna dang te an tuar a. Leilung chhiatna te, retheihna te, leh thihna te chuan lungngaihna nasa tak a thlen bawk. Inâwm takin tirhkoh Paula chuan: “Thil siam zawng zawngte chu tûn thlengin rûm leh nauvei na tuarin an awm hlawm tih kan hre si a,” tiin a ziak a ni. (Rom 8:22) Kan ṭhat famkim lohna rah chhuah pawh kan tuar bawk. Hmân lai Lal Davida ang bawkin: “Ka khawlohnate chuan ka lû hi a chîm pil a, phur rit tak ang, ka zawh rual loh hi a ni,” tiin kan sawi ve mai thei a ni.—Sâm 38:4.
2 Mi tin chunga thleng thei chhiatnate bâkah, Kristian dikte chuan entîr nei nghaisakna ban an phur a ni. (Lk. 14:27) Ni e, Isua ang bawkin, a zirtîrte chu huat leh tihduhdah an ni a. (Mt. 10:22, 23; Joh. 15:20; 16:2) Chuvângin, Krista hnung zuinaah chuan, khawvêl thara malsâwmnate kan nghah rual hian, nasa taka ṭan kan lâk a, kan chhel a ngai a ni.—Mt. 7:13, 14; Lk. 13:24.
3. Kristiante chu Pathian tilâwm tûrin hrehawm taka an nun kher a ngai lo tih engtin nge kan hriat theih?
3 Chu chu Kristian dikte chuan hlimna leh lâwmna tel lo nun kawng an zawh tihna a ni em? Tâwpna a lo thlen hma loh zawng kan nun chu lungngaihna leh manganna hlîrin a khat tûr tihna a ni em? Dik tak chuan, Pathian Jehova chuan a thutiamte thlen famkimna kan nghah rual hian hlim taka kan awm a duh a. Bible chuan betu dikte chu an hlim tih a sawi nawn fo a ni. (Isaia 65:13, 14 chhiar rawh.) “Nangmaha an rinna nghat zawng zawngte . . . chu nangmahah chuan lâwm sela, i hum ṭhin avângin hlimin au kumkhua hlawm rawh se,” tiin Sâm 5:11 chuan a sawi a. Ni e, hun khirh tak kârah pawh hlimna, rilrua thlamuanna, leh lungawina engemaw chen chu a neih theih a ni. Hrehawmnate hmachhawn chung pawha hlim reng thei tûra Bible-in min ṭanpui dân i lo ennawn ang u.
Jehova—“Pathian Hlim” Chu
4. Pathian chuan a thuneihna hnâwl a nih khân engtin nge a ngaih?
4 Entîr nân, Pathian Jehova hi han ngaihtuah teh. Ani chuan Pathian engkimtithei a nih angin, lei leh vân pum hlûm chu a thuneihna hnuaiah a dah a. Engmah a thlachham lo va, tumah a mamawh hek lo. Mahse, tlukpui nei lo thiltihtheihna nei a ni chung pawhin, a thlarau fate zînga pakhat chu hel a, Setana a lo nih khân a lunghnual ngei ang le. A hnua vântirhkoh dang ṭhenkhat helnaa an tel vena chuan Pathian rilru chu a khawih ngei ang. Lei lama a kut chhuak Adama leh Evi’n amah an hnâwl laia a rilru nat dân tûr pawh chu han ngaihtuah bawk teh. Chuta ṭang chuan, an thlah hel hmang tlûklehdingâwn têlte chuan Pathian Jehova thuneihna chu an hnâwl a ni.—Rom 3:23.
5. Engin nge a bîk takin Pathian Jehova chu timangang?
5 Setana helna chawh chhuah chu a la awm chhun zawm zêl a. Kum 6,000 vêl chhûng chu Pathian Jehova chuan milem biakna te, tharum thawhna te, tualthahna te, leh mipat hmeichhiatna hman khaw lohna te chu a hmu tawh a. (Gen. 6:5, 6, 11, 12) Chu bâkah, a chungchânga dâwt thu huatthlala tak leh sawichhiatna te pawh a hria a ni. Amah betu dikte ngei pawhin a rilru an tihnat châng a awm a. Chutiang dinhmun pakhat chu târ langin, Bible chuan: “Thlalêrah khân a chungah an va hel zingin, ram rovah khân amah chu an va tilungngai zing êm! An hawi kîr lehin Pathian an fiah a, Israel-ho Mi Thinghlim chu an tivui ṭhîn,” a ti. (Sâm 78:40, 41) A mite’n an hnâwl lai khân, Pathian Jehova rilru chu a na hle a. (Jer. 3:1-10) Thil ṭha lo a thlen a, an manganin, Pathian Jehova pawh nasa takin a mangang ve ṭhîn tih a chiang hle a ni.—Isaia 63:9, 10 chhiar rawh.
6. Engtin nge Pathian chuan manganna dinhmunte chu a hmachhawn?
6 Mahse, Pathian Jehova chuan a rilru natna leh lunghnualna chu hma lâk loh nân a hman phah lo. Buaina a chhuahin, thilthleng avânga a rah ṭha lo tinêp tûrin hma a la vat a. A tâwpa a thiltum a thlen famkim theih nân khua reia tihhlawhtlin tûr hma lâkna a siam bawk. Chûng hma lâkna ṭhate chu thlîrin Pathian Jehova chuan a lalchungnunna thiam chantîrna tûr leh chu miin rinawm taka amah betute malsâwmna a thlen hun tûr chu hlim takin a nghâk a ni. (Sâm 104:31) Ni e, nasa taka sawichhiat a ni chung pawhin, Pathian Jehova chu “Pathian hlim” a la ni reng a ni.—1 Tim. 1:11 NW; Sâm 16:11.
7, 8. Thil a kal sual hunah, engtin nge Pathian Jehova kan entawn theih?
7 Buaina chinfel theih dân chungchângah chuan Pathian Jehova nên chuan kan intehkhin thei lo ngei mai. Amaherawhchu, harsatnate kan hmachhawnnaah Pathian Jehova chu kan entawn thei a ni. Thil a kal sual chânga kan lunghnual deuh ṭhîn chu thil pângngai tak a ni a; mahse, chutianga awm reng chu a ṭûl hran lo. Pathian Jehova anpuia siam kan nih avângin, ngaihruat thiamna leh finna chhawr tlâk tak kan nei a, chu chuan kan buainate chhût ngun tûr leh a theih ang anga a ṭhazâwnga hma la tûrin min ṭanpui a ni.
8 Nuna buainate hmachhawn tûra min ṭanpui theitu thil pawimawh tak pakhat chu thil ṭhenkhat chu kan thunun phâk a ni lo tih hriat hi a ni a. Chûng thilte avânga nasa taka manganna chuan beidawnna a belhchhah theiin, biakna dik nêna inkûngkaih kan hlimna tûr tam tak min rûk bosak thei a ni. Buaina ching fel tûra theih tâwk kan chhuah hnu chuan, kan ngaihtuah zawm zêl loh va, thil ṭangkai zâwkte kan ngaihsak chu a ṭha ber. Chu chu tûna Bible thuziak kan en tûrte hian a târ lang a ni.
Inbûktâwkna A Pawimawh
9. Engtin nge Hani chuan inbûktâwkna a lantîr?
9 A tâwp a tâwpa zâwlnei Samuela hringtu lo ni ta, Hani entawn tûr siam hi han ngaihtuah teh. Ani chu fa a neih theih loh avângin a lunghnual hle a, deusawh a ni hle bawk a. A châng chuan, a lungngaih êm avângin a ṭapin, chaw pawh a ei thei lo a ni. (1 Sam. 1:2-7) Pathian Jehova hmun thianghlima a kal laiin ṭum khat chu, “a rilru a mangang êm êm mai a, LALPA hnênah a ṭawngṭai a, lungchhe takin a ṭap a.” (1 Sam. 1:10) Hani’n Pathian Jehova hnêna a thinlung a leihbuak hnu chuan, puithiam lal ber Elia chuan amah va panin: “Thlamuang takin kal rawh khai, Israelte Pathian chuan i thil dîl chu pe che rawh se,” a ti a. (1 Sam. 1:17) Chutah chiah chuan, Hani chuan a theih ang tâwkin thil a ti tih a hre chiang ta hle a. A fa neih theih lohna chu a thunun phâk bâk a ni. Hani chuan inbûktâwkna a lantîr a. Tichuan, “a kal ta a, chaw te a ei a, lungngai hmêl a pu ta lo va.”—1 Sam. 1:18.
10. Paula’n a chinfel theih loh tûr buaina a hmachhawn khân, eng thil thlîr dân inâwm tak nge a lantîr?
10 Tirhkoh Paula pawhin harsatna a tawh khân chutiang bawk thil thlîr dân chu a lantîr a. Ani chuan amah tilungngai hletu hrehawm a tuar a. Chu chu ‘tisaa hlîng’ tiin a ko a ni. (2 Kor. 12:7) A hrehawm tawrh chu engpawh ni se, Paula chuan a tihreh nân a theih tâwp a chhuah a, lâk bosak tûrin Pathian Jehova hnênah a dîl a ni. Chu mi chungchângah chuan Paula chu vawi eng zât nge a ṭawngṭai? Vawi thum lai a ṭawngṭai a ni. Chu mi hnu chuan, Pathian chuan Paula hnênah ‘tisaa hlîng’ chu thiltihtheihna hmanga mak taka tihrehsak a ni lo vang tih a hrilh a. Paula chuan thil nih dân chu pawmin, Pathian rawngbâwlnaah a inhmang lehzual a ni.—2 Korinth 12:8-10 chhiar rawh.
11. Harsatnate kan hmachhawn hunah ṭawngṭaina leh dîlna chuan engtin nge min ṭanpui theih?
11 Hêng entîrnate hian kan lungngaihnate Pathian Jehova hnênah kan thlen lo tûr a tihna a ni lo. (Sâm 86:7) Chu ai mah chuan, Pathian Thu chuan: “Engah mah mangang suh u; engkimah ṭawngṭai leh dîlin, lâwmthu hril tel zêlin, in duhnate chu Pathian hnênah hriattîrin awm zâwk rawh se,” tiin min fuih a. Engtin nge Pathian Jehova chuan chutiang dîlnate leh duhnate chu a chhân lêt ang? Bible chuan: “Tichuan Pathian thlamuanna, rilru rêng rênga hriat sên loh khân, in thinlung leh in ngaihtuahnate chu Krista Isuaah chuan a vênsak ang che u,” tiin a sawi belh a ni. (Phil. 4:6, 7) Ni e, Pathian Jehova chuan kan harsatna chu a la bo lo mai thei a; mahse, kan ngaihtuahnate min vênsakna hmangin kan ṭawngṭainate chu a chhâng thei a ni. Thil pakhat chungchânga kan ṭawngṭai hnu chuan, manganna ei rala awm a hlauhawmzia i hre chhuak ang u.
Pathian Duhzâwng Tihnaah Lâwmna Zawng Rawh
12. Engvângin nge lunghnual taka awm reng chu a hlauhawm theih?
12 Thufingte 24:10 chuan: “Mangan nîa i chauh mai chuan i chakna a bei tham a ni,” tiin sawi a. Thufing dang leh chuan: “Thinlung lungngaihna erawh chuan rilru a tilungchhe ṭhîn,” tiin a sawi bawk. (Thuf. 15:13) Kristian ṭhenkhat chuan an lunghnual êm avângin a mi mala Bible an chhiarna leh Pathian Thu an chhût ngunna chu an thlahthlam hial a. An ṭawngṭaina pawh a hming mai niin, an Kristian unaute lak aṭangin an inla hrang hial thei bawk a ni. Lunghnual taka awm reng chu a hlauhawm tih a chiang hle.—Thuf. 18:1, 14.
13. Lunghnualna hnawt bo va, hlimna engemaw chen min pe theitu thiltih ṭhenkhat chu engte nge ni?
13 Kawng leh lamah chuan, thil a ṭhazâwnga thlîrna chuan kan nuna hlimna leh lâwmna kan hmuh theihna lam ngaihven zâwk tûrin min ṭanpui ang. Davida chuan: “Aw ka Pathian, i duhzâwng tih hi ka lâwmzâwng tak a ni,” tiin a ziak a. (Sâm 40:8) Kan nuna thil a kal sual hunah, kan Pathian biakna hun duan ṭha chu kan thlahthlam tûr a ni lo. Dik tak chuan, lungngaihna tihbona ṭha ber chu hlimna thlen thei thiltiha tel hi a ni. Pathian Jehova chuan a Thu chhiarna leh chhût ziahna aṭangin hlimna leh lâwmna kan hmu thei tih min hrilh a. (Sâm 1:1, 2: Jak. 1:25) Pathian Lehkha Thu Thianghlim leh Kristian inkhâwmnate aṭangin, min tiphûr a, min tihlim theitu “thu pai nuam” takte kan dawng a ni.—Thuf. 12:25; 16:24.
14. Pathian Jehova thutiam engin nge tûnah hlimna min pe?
14 Pathian chuan hlim chhan tûr tam tak min pe a. A thutiam chhandamna chu hlim chhan tûr bul ber a ni tak meuh mai. (Sâm 13:5) Tûnah chuan kan chungah eng thil pawh thleng mah se, Pathian chuan tih tak zeta amah zawngtute chu a tâwpah lâwmman a pe ngei ang tih kan hria a ni. (Thuhriltu 8:12 chhiar rawh.) Zâwlnei Habakuka chuan: “Theipui thing pâr vul dâwn lovin, grêp hrui rah dâwn hek suh sêng, olive thing pawh rah lovin, lovin ei tûr chhuah dâwn lo sêng, huang ata ran rual tibovin, ran inah ran awm lo mah sêng, ka lâwm zêl ang, LALPA-ah chuan, ka chhandamna Pathianah chuan ka lâwm cheu dâwn,” tia ziakin chutianga rin tlatna chu mawi takin a târ lang a ni.—Hab. 3:17, 18.
“LALPA Pathiana Nei Mite Chu Lâwm Takin An Awm Ṭhîn”
15, 16. Nakin huna malsâwmnate kan nghah ruala Pathian thilpêk kan hlimpui ṭhenkhatte chu sawi rawh.
15 Nakin hun ropui tak kan nghah rual hian, Pathian Jehova chuan thil ṭha min pêkte chên tûrin min duh a. Bible chuan: “Hlim taka awma, an nun chhûnga thil ṭha an tih aliama an tâna ṭha zâwk engmah ka hre lo. Tichuan, mi tin ei leh in leh an thawhrimna zawng zawnga hlim taka an awm chu Pathian thilpêk a ni,” a ti. (Thur. 3:12, 13) ‘Thil ṭha tihnaah’ chuan mi dangte tâna thil ṭangkai tihsak a tel a ni. Isua chuan lâk aiin pêkin lukhâwng a nei zâwk tih a hria a. Kan kawppui te, kan fa te, kan nu leh pa te, leh kan chhûngkhat te chunga ngilnei taka thil kan tih chuan lungawina nasa tak kan nei ṭhîn a. (Thuf. 3:27) Kan thlarau lam unaute chunga nunnêmna, khualchhâwn thiamna, leh ngaihdamna lantîrna pawhin hlimna nasa tak min pe thei a, Pathian Jehova a tilâwm bawk. (Gal. 6:10; Kol. 3:12-14; 1 Pet. 4:8, 9) Tin, mahni inpêkna rilru nêna kan rawngbâwlna hlen chhuah chu a manhla tak zet a ni.
16 A chunga târ lan tâk Thuhriltu thu khian, ei leh in ang chia nun hlim chenna mai a sawi a. Ni e, hrehawm tuar chung pawhin, Pathian Jehova hnên aṭanga kan thil dawn engpawh aṭangin hlimna kan hmu thei a ni. Chu bâkah, ni tla êng mawi tak te, ram mawi tak te, nungcha notê hlim taka an infiam lai te, leh thil siam ropui tak tak dangte thlîr tûrin kan insênso a ngai lo va; mahse, chûng thilte chuan mak tihna leh hlimna min pe thei a ni. Chutiang thilte kan ngaihtuah chuan, Pathian Jehova chu thil ṭha zawng zawng Petu a nih avângin, amah kan hmangaihna a zual a ni.
17. Engin nge harsatna aṭanga fihlîm ṭhakna min pe ang a, chutih chhûng chuan engin nge thlamuanna min pe?
17 A tâwpah chuan, Pathian kan hmangaihna te, a thupêk kan zawmna te, leh tlanna inthawinaa rinna kan neihna te chuan ṭhat famkim lohna avânga lo awm harsatnate laka fihlîm ṭhakna leh hlimna tluantling min pe ang. (1 Joh. 5:3) Chutih chhûng chuan, Pathian Jehova’n kan hrehawm tawrhna zawng zawng a hria tih hriatna aṭangin thlamuanna kan nei thei a ni. Davida chuan: “I ngilneihna avâng hian ka hlimin ka lâwm ang: ka manganna hi i hmu si ṭhîn a; ka nunna hi a hrehawm laite pawhin i hre ṭhîn,” tiin a ziak a ni. (Sâm 31:7) Pathian Jehova chuan min hmangaih avângin hrehawm tawrhna ata min chhanhim ang.—Sâm 34:19.
18. Engvângin nge Pathian mite zîngah hlimna chu thil langsâr tak a nih ang?
18 A thutiamte thlen famkimna kan nghah rual hian, Pathian hlim Jehova chu i entawn ang u. A ṭha lozâwnga thil ngaihtuahnain Pathian rawng kan bâwlna a tihtâwp chu i phal ngai lo vang u. Harsatna a chhuahin, ngaihruat thiamna leh finna chhawr tlâk chuan min kaihruai rawh se. Pathian Jehova chuan kan rilru veizâwng thunun tûr leh chhiatna lo thlengte rah chhuah ṭha lo tak tak tihnêp nâna theih tâwka hma la tûrin min ṭanpui ang. Pathian hnên aṭanga lo kal, tisa lam leh thlarau lama thil ṭhate chungah lâwmna i zawng ang u. Pathian hnaih taka kan awm chuan kan hlim thei dâwn a ni, “LALPA Pathiana nei mite chu lâwm takin an awm ṭhîn” si a!—Sâm 144:15. (w09-E 12/15)
Eng Nge Kan Zir?
• Harsatna kan tawh hunah, engtin nge Pathian Jehova chu kan entawn theih?
• Engtin nge inbûktâwkna chuan harsatna hmachhawnnaah min ṭanpui?
• Kan lungngaih hunah pawh, engtin nge Pathian duhzâwng tihnaa lâwmna kan hmuh theih?
[Zirlai Atâna Zawhnate]
[Phêk 18-naa milemte]
Pathian Jehova chu thil ṭha lo thlengte’n a tilungngai
[Milem Hawhtîrtu]
© G.M.B. Akash/Panos Pictures
[Phêk 20-naa milemte]
Pathian Jehova chuan hlimna vawn reng theih dân min hrilh