Pathian Hnaih Rawh

Pathian Jehova Chuan Duh Thlan Tûr Min Pe

Deuteronomy 30:11-20

“PATHIAN Jehova chungah ka rinawm lo palh ang tih hlauhna hlîrin ka khat ṭhîn.” Heti hian a naupan laia a thil tawn ṭha lo tak avânga hlawhchham tûra inngai tlat Kristian hmeichhe pakhat chuan a sawi a ni. Chutiang chu thil awm dân dik tak a ni em? Dinhmun ṭha lo tuartu kan nihnaah ṭanpuitu nei miah lo kan ni em? Ni lo ve. Pathian Jehova chuan duh thlan theihna min pêk avângin, kan nun dân tûr chungchângah mahniin duh kan thlang thei a ni. Pathian Jehova chuan duh thlanna dik siam tûrin min duh a, kan tih theih dân chu a Thu, Bible-ah min hrilh a ni. Deuteronomy bung 30-a kan hmuh, Mosia thute chu i lo ngaihtuah ang u.

Pathian thil phûtte hriat leh a phût anga tih chu kan tân a harsa em? * Mosia chuan: “He thupêk, tûna ka pêk che u hi in tân a har lutuk lo va, a hlat lo bawk che u a ni,” tiin a sawi a. (Châng 11) Pathian Jehova chuan kan tlin theih loh tûr chu min phût ngai lo. A thil phûtte chu a âwmin, tlin theih a ni a, kan hriat phâk a ni bawk. Kan laka Pathian thil beiseite hre thei tûra ‘vâna kan kal’ emaw, ‘tuifinriat râla’ kan zin emaw a ngai lo. (Châng 12, 13) Bible chuan kan nun dân tûr chu tlang takin min hrilh a ni.—Mika 6:8.

Mahse, Pathian Jehova chuan a thuâwih tûrin min tilui lo. Mosia chuan: “Tûnah hian in hmaah nunna leh ṭhatna, thihna leh thil ṭha lo ka dah,” tiin a sawi a. (Châng 15) Nunna leh thihna, thil ṭha leh ṭha lo chu zalên takin kan thlang thei a ni. Malsâwmnate thlîrin Pathian biak leh a thuâwih kan thlang thei a, a nih loh leh a thu âwih lovin a rah chhuah ṭha lote tawrh pawh kan thlang thei bawk. A enga pawh chu ni se, duh thlanna chu kan ta a ni.—Châng 16-18; Galatia 6:7, 8.

Kan nun kawng thlan chuan Pathian Jehova tân awmzia a nei em? Nei tehrêng mai! Pathian thâwk khumin Mosia chuan: “Nunna chu thlang rawh u,” tiin a sawi a ni. (Châng 19) A nih leh, engtin nge nunna chu kan thlan theih ang? Mosia chuan: “LALPA in Pathian hmangaih a, a awkâ âwih a, amah vuan tlatin,” tiin kan thlan theih dân a hrilhfiah a ni. (Châng 20) Pathian Jehova kan hmangaih chuan thil eng pawh thleng se, thuâwih taka a thu zâwm a, rinawm taka amah vawn tlat chu kan duh ang. Chutiang nun kawng chu zawhin, nunna—Pathian khawvêl thar lo thleng tûra chatuan nun beiseina nên tûna nun kawng ṭha ber—chu kan thlang a ni.—2 Petera 3:11-13; 1 Johana 5:3.

Mosia thute chuan thu dik thlamuanthlâk tak min zirtîr a. He khawvêl suaksualah hian eng pawh tâwk mah la, ṭanpuitu nei lo i ni lo va, hlawhchham ngei ngei tûr i ni hek lo. Pathian chuan zalên taka duh thlan theihna thilpêk a pe che a ni. Ni e, Pathian Jehova hmangaih a, a thu âwih a, a chunga rinawm reng chu i thlang thei a ni. Chutiang duh thlanna i siam chuan, i thawh rimna chu Pathian Jehova’n mal a sâwm ang.

He thu dik—zalên taka Pathian Jehova hmangaih leh a rawngbâwl kan thlan theihna—hian atîra kan sawi tâk hmeichhia chu a thlamuan a ni. Ani chuan: “Tûn hma chuan Pathian Jehova ka hmangaihna hi thil pawimawh ber a ni tih ka lo hre reng ṭhîn lo. Mahse, Pathian Jehova chu ka hmangaih tak zet avângin, rinawmna ka vawng thei a ni,” a ti. Nang pawhin Pathian Jehova ṭanpuina nên chuan i rinawmna i vawng ve thei a ni. (w09-E 11/01)

[Footnote]