Zirtirna Dik Lo 2: Mi Sualte Chu Hremhmuna Nghaisak An Ni

He zirtîrna dik lo hi khawi aṭanga lo chhuak nge? “Grik mi fing lawr bîk zawng zawngte zînga Hremhmun chungchâng mite thlîr dân thununtu ber chu Plato-a hi a ni.”—Histoire des enfers (Hremhmun Chanchin), by Georges Minois, phêk 50.

“AD kum zabi 2-na laihâwl vêl aṭang khân, Grik finna zir Kristian ṭhenkhat chuan an rinna chu Grik mi fingte thlîr dân hmanga târ lan ṭûl niin an hre ṭan a. . . . An tâna mil ber Grik finna chu Plato-a zirtîrna hi a ni.”—The New Encyclopædia Britannica (1988), Volume 25, phêk 890.

“Church zirtîrna chuan chatuan hremhmun a awm tih a pawm tlat a. Mi suaksualte an thih hian an thlarau chu hremhmunah a tla a, chutah chuan ‘chatuan meia’ nghaisak an ni. Hremhmuna inhremna sâng ber chu Pathian nêna chatuana inmihranna hi a ni.”—Catechism of the Catholic Church, 1994 edition, phêk 270.

Bible-in eng nge a sawi? “Mi nungdamte chuan an la thi dâwn tih an hre si a, mitthi erawh chuan engmah an hre lo, . . . thlân i kalna tûrah chuan thiltih tûr emaw, remruat tûr emaw, hriatna emaw, finna emaw a awm si lo va.”—Thuhriltu 9:5, 10.

He Bible châng hian mitthite dinhmun chungchâng eng nge a târ lan? Anni chuan an sualte tlenfai nân khawi emaw laiah hrehawm an tuar em? Tuar lo ve, ‘engmah an hre tawh si lo va.’ Chuvâng chu a ni, thlahtu Joba’n natna khirh tak a tawrh laia Pathian hnêna: “Seolah [“hell-ah,” Douay Rheims Version] chuan mi thukru teh la,” tia a ngen hial ni. (Joba 14:13) Hebrai thu mal Sheohlʹ aṭanga lehlin Mizo ṭawnga Seol kan tih hi “mitthite awmna hmun” sawina a ni a, Bible ṭhenkhatah chuan “hremhmun” tia lehlin a ni. Seol chu chatuana nghaisakna hmun—hremhmun—a nih chuan, Joba tân chuta thuhrûk dîl chu eng nge sâwt ang? Chuvângin, Bible aṭanga kan en chuan, hremhmun kan tih chu engmah tih theih tawh lohna mitthite awmna hmun thlân sawina mai a ni.

Hremhmun chungchânga he hrilhfiahna hian awmzia a nei zâwkin, Pathian Thu nên pawh a inmil zâwk a ni lâwm ni? Eng anga râpthlâk pawh ni se, eng thil sual tihnain nge hmangaihna Pathian chu kumkhuaa mite nghaisaktîr thei ang? (1 Johana 4:8) Mahse, hremhmun meidîl chu zirtîrna dik lo a nih chuan, vân lam nun pawh hi zirtîrna dik lo a ni ve em? (w09-E 11/01)

Hêng Bible chângte nên hian khaikhin rawh: Sâm 146:3, 4; Tirhkohte 2:25-27; Rom 6:7, 23

ZIRTIRNA DIK CHU:

Pathianin mite chu hremhmunah a nghaisa lo

[Phêk 5-naa Milem Hawhtîrtu]

Barrators—Giampolo/The Doré Illustrations For Dante’s Divine Comedy/Dover Publications Inc.