Zirtirna Dik Lo 4: Pathian Chu Trinity A Ni

He zirtîrna dik lo hi khawi aṭanga lo chhuak nge? “Trinity thurin hi kum zabi 4-na tâwp lama tihchhuah thar a nih rinna a awm thei a. Dikna chin pawh a nei a ni. . . . Kum zabi 4-na a tâwp hma loh chuan ‘Pathian pakhata Mi pathum’ belhkhâwm hi Kristian nunah leh rinnaah lâk luh ngheh a la ni lo.”—New Catholic Encyclopedia (1967), Volume 14, phêk 299.

“May 20, 325 [C.E.] khân, Nicaea Khâwmpui neih a ni a. Amah Constantine-a ngei chuan sawihona chu kaihruaiin, thothâng ṭha takin a ho va; tin, . . . khâwmpuia thurin put luh ‘Pa nêna ang khat an ni,’ tia Krista leh Pathian inlaichînna pawimawh tak chu nemngheh atân amah ngeiin rawtna a siam bawk a ni. . . . Lalber zahna leh hlauhna avângin, bishop pahnih tih loh a dang zawngte chuan an rinna nên inkalh mah se, chu thurin chu an nemnghet ta a ni.”—Encyclopædia Britannica (1970), Volume 6, phêk 386.

Bible-in eng nge a sawi? “Ani [Stephana] chu thlarau thianghlima khat a ni a, vân lam a en tlat a, Pathian ropuizia leh Pathian ding lama Isua ding a hmu a; ‘Ngai teh u, vân inhawngte ka hmu a, Pathian ding lama Mihring Fapa ding pawh ka hmu,’ a ti a.”—Tirhkohte 7:55, 56.

He inlârna hian eng nge a târ lan? Pathian thiltihtheihna che vêl renga khatin, Stephana chuan “Pathian ding lama Isua ding” chu a hmu a ni. Chuvângin, Isua chu vâna kaihthawh a nih hnuah pawh Pathian a han ni lo va, thlarau thil siam amaha awm hrang nalh a han ni zâwk a ni tih a chiang hle. Chu bâkah, Pathian bulah mi dang a pathumna tûr a awm thu sawi lan a ni lo bawk. Trinity thurin thlâwptu Bible châng hmuh hrâm tuma a bei chung pawhin, Dominican puithiam Marie-Émile Boismard-a chuan a lehkhabu, À l’aube du christianisme—La naissance des dogmes (Kristianna Bul Inṭan Hun—Thurin Lo Pian Chhuahna) tihah chuan heti hian a ziak a ni: “Pathian pakhatah mi pathum . . . a awm tih thuziak hi Thuthlung Thar bu khawi laiah mah hmuh tûr a awm lo,” tiin.

Constantine-a vawrh lâr chu thurin chu kum zabi palinaa Church mite inrem lohna tihtâwp nâna tihchhuah a ni a. Mahse, chu chuan buaina dang: Isua hringtu nu, Mari chu “Pathian Nu” a ni em? tih chu a hring chhuak a ni. (w09-E 11/01)

Hêng Bible chângte nên hian khaikhin rawh: Matthaia 26:39; Johana 14:28; 1 Korinth 15:27, 28; Kolossa 1:15, 16

ZIRTIRNA DIK CHU:

Trinity thurin chu kum zabi lina tâwp lama din chhuah a ni

[Phêk 7-naa Milem Hawhtîrtu]

Museo Bardini, Florence