Zirtirna Dik Lo 5: Mari Hi Pathian Nu A Ni

He zirtîrna dik lo hi khawi aṭanga lo chhuak nge? “Milem be tam takin church an han bawh tâk luai luaiah chuan Pathian nu biakna pawh chu a rawn lâr chho chak hle a. . . . [Milem bia aṭanga Kristiana inlette] sakhaw mi nihna leh sakhaw lama an thurin chu kum sâng tam tak kal taa ‘nu ropui’ pathiannu leh ‘pathiannu thianghlim’ an rinna aṭangin a lo piang chhuak daih tawh a ni.”—The New Encyclopædia Britannica (1988), Volume 16, phêk 326-327.

Bible-in eng nge a sawi? “I rai ang a, fapa i hring ang a, a hmingah chuan Isua i sa tûr a ni. Ani chu mi lian a la ni ang a, Chungnungbera Fapa an ti ang. . . . Chuvângin mi thianghlim lo piang tûr pawh chu Pathian Fapa an ti ang.”—Luka 1:31-35.

He Bible châng hian Mari chu Pathian nu ni lovin, “Pathian Fapa” nu a nih zâwkzia a sawi chiang hle a ni. Isua chu Pathian ni ta se chuan, Mari’n ‘vân pawha leng lo’ chu a pum chhûngah a pai tihna a ni dâwn a, chutiang chu a ni thei dâwn em ni? (1 Lalte 8:27) Mari chu chutiang niin a inchhâl ngai lo. A nihna chungchânga buaina chawk chhuaktu chu Trinity zirtîrna hi a ni. C.E. 431-a neih Ephesi Khuaa Khâwmpui (Counsel of Ephesus) chuan Mari chu Theotokos (Grik thu mal “Pathian hringtu”) a nih loh leh “Pathian Nu,” tia puangin, Mari biakna atân kawng a sial ṭan a. Chu khâwmpui neihna hmun Ephesi khawpui chu kum zabi tam tak chhûng fa neih theihna pathiannu Diani biakna hmunpui ber a lo ni tawh ṭhîn a ni.

Chutiang chuan, kawng zawhpui pawh tiamin, “vân aṭanga . . . tla” Diani lem biak dân chi hrang hrangte chu Mari biaknaah lâk luh a ni a. (Tirhkohte 19:35) Kristian zirtîrnaa zawi zawia lâk luh thil dangte chu Pathian biak nâna Mari lim leh mi dangte lim hman hi a ni. (w09-E 11/01)

Hêng Bible chângte nên hian khaikhin rawh: Matthaia 13:53-56; Marka 3:31-35; Luka 11:27, 28

ZIRTIRNA DIK CHU:

Mari chu Pathian nu ni lovin, Pathian Fapaa nu a ni zâwk. Trinity zirtîrna chuan Pathian Nu anga Mari biakna a hring