Zirtirna Dik Lo 6: Pathianin Biaknaah Milem Leh Milim Te Hman A Phal

He zirtîrna dik lo hi khawi aṭanga lo chhuak nge? “Kristian hmasate chuan Pathian an biaknaah milem an hmang ngai lo. . . . Kum zabi 4-na leh 5-naa church-in milem hman a phalna chu, mi mâwlte tân thusawi ngaihthlâk emaw, lehkhabu aṭanga zir emaw ai chuan a lem aṭangin Kristianna nih phung dik tak zir a awlsam zâwk tih ngaih dân ṭanchhana thiam chantîr chawp a ni.—Cyclopedia of Biblical, Theological, and Ecclessiastical Literaure, by McClintock and Strong, Volume 4, phêk 503 leh 504.

Bible-in eng nge a sawi? “Milem siam chawp leh thil, a anpui rêng rêng—chung lam vâna mi emaw, hnuai lam leia mi emaw, lei hnuai lama tuia mi emaw—i tân i siam tûr a ni lo: chûng chu chibai i bûk tûr a ni lo va, an rawng i bâwl tûr a ni hek lo.” (Exodus 20:4, 5) Tirhkoh Johana chuan kum zabi khatnaa Kristiante hnênah: “Naute u, milem lakah inthiarfihlîm rawh u,” tiin a ziak a ni.—1 Johana 5:21.

Church-in a chhâl angin, milemte chu Pathian panna leh chawimawina hmanrua mai a ni em? The Encyclopedia of Religion chuan: “Atîrah chuan, milemte chu mite zirtîr nân leh thil cheimawi nâna hman a ni a; a lo berah pawh milem hman chu chutianga thiam chantîr a ni. Mahse, rei lo têah chuan Pathian biak nâna hman a lo ni ta thuai a. Chu chu milimte’n hmun pawimawh tak an channa Eastern Orthodox kohhranahte chuan a ni lehzual a ni,” tiin a sawi. Amaherawhchu, zâwlnei Isaia chuan: “Pathian chu tu nên nge in tehkhin dâwn le? A nih loh leh, eng lem nge amah nên in tehkhin dâwn le?” tiin chiang takin a zâwt a ni.—Isaia 40:18. (w09-E 11/01)

Hêng Bible chângte nên hian khaikhin rawh: Isaia 44:13-19; Tirhkohte 10:25, 26; 17:29; 2 Korinth 5:7

ZIRTIRNA DIK CHU:

Pathian chuan milem leh milimte hman chu a phal lo

ZIRTIRNA DIK LOTE CHU HNAWLIN, THUTAK CHU VUAN TLAT RAWH

Kristian kohhran tam takin an la zirtîr, zirtîrna dik lote tawi têa kan enna aṭangin eng thu tâwp nge kan siam theih? Hêng zirtîrna dik lo, “thawnthu [Grik, myʹthos ] fing taka ngaihtuah chhuah maite” chuan Bible-a thutak tluang tak leh thlamuanthlâk takte chu a khing hneh thei lo.—2 Petera 1:16.

Chuvâng chuan, rilru inhawng takin zirtîrna i dawn chu, thutak lo chhuahna hnâr—Pathian Thu—nên khaikhin hre suh ang che. (Johana 17:17) Tichuan, he thutiam: “Thutak in hria ang a, thutak chuan bâwih a bân ang che u,” tih hi i chungah a thleng dik ngei ang.—Johana 8:32.

[Phêk 9-naa Milem Hawhtîrtu]

Pictorial Archive (Near Eastern History) Est.