A Khawngaihna Azârah Jehova Ta Kan Ni
A Khawngaihna Azârah Jehova Ta Kan Ni
“Lalpa ta kan ni.”—ROM 14:8.
1, 2. (a) Eng chanvo hlu nge kan neih? (b) Eng zawhnate nge kan ngaihtuah ang?
PATHIAN Jehova’n Israel hnam hnênah: “Khawvêl hnam zawng zawng zîngah hian ka tân ro thlan bîk in ni ang,” a ti a, chu chu chanvo hlu a va ni tak êm! (Ex. 19:5) Tûn laia Kristian kohhran mite pawhin Jehova ta nihna chanvo chu an nei ve a. (1 Pet. 2:9; Thup. 7:9, 14, 15) Chu chanvo chu chatuana kan hlâwkpui theih a ni.
2 Pathian Jehova ta nih chu chanvo hlu a nih mai bâkah, chu chuan mawhphurhna pawh a keng tel a. Mi ṭhenkhat chuan: ‘Pathian Jehova’n ka lak aṭanga a beisei chu ka ti thei ang em? Thil sual ti palh ila, min hnâwl mai ang em? Pathian Jehova ta nihna chuan ka zalenna a ru bo ang em?’ tihte chu an ngaihtuah mai thei a. Chûng thilte chu ngaihtuah phû rêng a ni. Mahse, zawhna dang pakhat: Pathian Jehova ta nih hlâwknate chu eng nge ni? tih chuan ṭha taka kan ngaihtuah a phû phawt a ni.
Pathian Jehova Ta Nihna Chuan Hlimna A Thlen
3. Engtin nge Rahabi’n Pathian Jehova rawng bâwl tûra a thutlûkna siam chu a hlâwkpui?
3 Pathian Jehova ta nihna neitute chuan an dinhmun chu an ṭangkaipui em? Hmân lai Jeriko khuaa awm nawhchizuar Rahabi chungchâng hi han ngaihtuah teh. Ani chu Kanaan pathian biakna chîn dân pawlawh takte zui tûra enkawl seilen a nih ngei a rinawm a. Mahse, Pathian Jehova’n Israelte hnêna a pêk hnehna chungchâng a lo hriat chuan, Jehova chu Pathian dik a ni tih a hria a. Chuvângin, Pathian thlan mite chhanhim tûrin a nun a thâp a, chutiang chuan a nakin hun chu an kutah a dah a ni. Bible chuan: “Rahabi nawhchizuar pawh khân tirhkohte kha a lo lâwm a, kawng danga a hâwntîr lai khân thiltih avângin thiam a chang a ni lâwm ni?” tiin a sawi a ni. (Jak. 2:25) Pathian Dânin hmangaihna leh rorêl dikna kawnga a zirtîr, Pathian betu thianghlimte zînga a lo tel avânga hlâwkna a dawnte chu han ngaihtuah teh. A nun hlui a kalsan chu a va lâwm dâwn êm! Ani chuan Israel mi pasala neiin, fapa, Pathian mi langsâr tak Boaza chu a hring a ni.—Jos. 6:25; Rut. 2:4-12; Mt. 1:5, 6.
4. Engtin nge Ruthi chuan Pathian Jehova rawngbâwl tûra a thutlûkna siam chu a hlâwkpui?
4 Moab mi Ruthi pawhin Pathian Jehova rawng bâwl tûrin thutlûkna a siam a. Ani chu a naupan deuh lai chuan Kemosa pathian leh Moab pathian dangte betu a nih hmêl hle a; mahse, Pathian dik Jehova chu lo hriain, inhumhim nâna an rama rawn awm Israel mi chu pasalah a nei a ni. (Ruthi 1:1-6 chhiar rawh.) A hnuah Ruthi leh a mopuinu Orpi chu an pasala nu Naomi ruala Bethlehem lam pana an kal chhuah chuan, Naomi chuan anni chu hawkîr leh tûrin a ti a. An tân chuan Israel rama inbenbel chu thil awlsam a ni dâwn lo a ni. Orpi chu “a chite hnên leh a pathian hnên lamah chuan a kîr leh ta” ngei mai a, Ruthi erawh chu a kîr ve lo. Ani chuan a rinna târ langin thil a ti a, tuta nge nih a duh a hria a ni. Naomi hnênah: “Nangmah ṭhen tûr leh nangmah zui lova haw leh tûr chuan min thlêm lo hrâm hrâm rawh: i kalna apiangah ka kal ang a; i riahna apiangah ka riak ang a, i chite chu ka chite an ni ang a, i Pathian chu ka Pathian a ni ang,” tiin a sawi a ni. (Rut. 1:15, 16) Pathian Jehova rawng bâwl a thlan avângin, Ruthi chuan hmeithaite, mi retheite, leh hmun leh ram nei lote tâna hamṭhatna siamtu Pathian Dân chu a hlâwkpui a. Pathian Jehova thla zâr hnuaiah chuan hlimna, vênhimna, leh himna a hmu a ni.
5. Pathian Jehova rawng rinawm taka bâwltute chungchâng eng nge i hriat?
5 Pathian Jehova hnêna inpumpêk hnua kum tam tak chhûng rinawm taka rawngbâwl tute emaw chu i hre mai thei a. Anni chu Pathian rawng bâwl an hlâwkpui dân zâwt ang che. Buaina nei lo chu awm lo mah ila, fakna hla phuahtu thu: “LALPA Pathiana nei mite chu lâwm takin an awm ṭhîn,” tih thu dikzia finfiahtu tam tak a awm a ni.—Sâm 144:15.
Pathian Jehova Chuan A Beisei Sâng Lutuk Lo
6. Engvângin nge Pathian Jehova’n kan hnên aṭanga a beisei chu tithei lo tûra kan inngaih loh vang?
6 Pathian Jehova’n i hnên aṭanga a beisei chu i tih theih dâwn leh dâwn loh i ngaihtuah mai thei a. Pathian chhiahhlawh nih te, a dân mila nun te, a hminga thusawi te chu thil harsa tak niin kan ngai mai thei. Entîr nân, Mosia chuan Israelte leh Aigupta lal be tûra tirh a nih khân tling lo niin a inngai a. Mahse, Pathian chuan Mosia laka a beisei chu a sâng lutuk lo. Pathian Jehova chuan Mosia ‘tih tûr chu a hrilh zêl a ni.’ (Exodus 3:11; 4:1, 10, 13-15 chhiar rawh.) Mosia chuan ṭanpuina pêk chu a zawm avângin, Pathian duhzâwng a hlen chhuak theiin, hlimna a hmu a ni. Chutiang chiah chuan kan chungah pawh Pathian chuan a beisei sâng lutuk lo. Ani chuan mi ṭha famkim lo kan nihzia a hria a, min ṭanpui a duh bawk a ni. (Sâm 103:14) Isua hnungzuitute anga Pathian rawngbâwlna chuan mi dangte hlâwkna a thlen a, Pathian Jehova thinlung a tihlâwm avângin, thil khirh tak nih ahnêkin mi tihahdamtu a ni zâwk a ni. Isua chuan: “Ka hnênah lo kal ula, keiman ka chawlhtîr ang che u. Ka nghâwngkawl bât ula, ka hnênah zir rawh u; thuhnuairawlh leh rilrua inngaitlâwm tak ka nih hi,” tiin a sawi a ni.—Mt. 11:28, 29.
7. Engvângin nge Pathian Jehova’n thawk tûra a beisei che hnaah a ṭanpui dâwn che tih i rin tlat theih?
7 Pathian Jehova chuan chakna neih nâna amah kan rinchhan chhûng chuan kan mamawh fuihna min pe zêl ang. Entîr nân, Jeremia chu huai taka thusawi mi a nih loh hmêl hle a. Chuvâng chuan Pathian Jehova’n A zâwlnei ni tûra a ruat pawh khân Jeremia chuan: “E, Lalpa PATHIAN, ngai teh, thu ka sawi thiam lo, ka naupang si,” a ti a ni. A hnuah pawh: “A hmingin thu ka sawi tawh hek lo ang,” tiin a sawi hial a. (Jer. 1:6; 20:9) Mahse, Pathian Jehova fuihnain, Jeremia chuan mite lawm lohzâwng tak thuchah chu kum 40 lai a hril thei a. Pathian Jehova chuan: “Chhan chhuak tûr chein i hnênah ka awm e,” tiin vawi emaw zât a hrilh a ni.—Jer. 1:8, 19; 15:20.
8. Engtin nge Pathian Jehova kan rinchhan tih kan lantîr?
8 Pathian Jehova chuan Mosia leh Jeremia a tihchak ang bawkin, tûn lai Kristiante laka a beisei hna chu thawk tûrin min ṭanpui thei a. A pawimawh ber chu Pathian rinchhan hi a ni. Bible chuan: “I thinlung zawng zawngin LALPA ring la, nangma hriatnaah innghat suh; i kawng zawng zawngah amah hre reng la, i kawngte chu a kawhhmuh zêl ang che,” a ti a. (Thuf. 3:5, 6) A Thu leh kohhran hmanga ṭanpuina min pêk kan hman ṭangkai hian Amah kan rinchhanzia kan târ lang a ni. Kan nun kawnga Pathian Jehova kan inkaihhruaitîr chuan, engmahin a chunga rinawm lo tûrin min dang thei lo vang.
Pathian Jehova Chuan A Mite Chu A Mi Malin A Ngaihsak
9, 10. Sâm 91-na chuan eng ang chi vênhimna nge a tiam?
9 Mi ṭhenkhat chuan Pathian Jehova hnêna inpumpêk an rilrûk hian, thil sual tihpalh te, tlâk tlai lo nih te, leh A hnâwl nihte an hlau a ni thei. Mahse, lâwmawm takin, Pathian Jehova chuan amah nêna kan inlaichînna hlu tak vênhim nâna kan mamawh zawng zawng chu min pe a ni. Chu chu Sâm 91-naa târ lan a nih dân i lo en ang u.
10 Chu fakna hla chu: “Chungnungbera bihrûkna hmuna awma chu Engkimtitheia hlimah chuan a awm reng ang. LALPA chung thu-ah chuan, ‘Ani chu ka inhumhimna leh ka kulhpui; ka Pathian, ka rina chu a ni,’ ka ti ang. Ani chuan thang kamtu thang lakah . . . chuan a chhanhim dâwn che a ni,” tiin a inṭan a. (Sâm 91:1-3) Pathian chuan amah hmangaih a, rinchhantute chu vênhim a tiam tih lo chhinchhiah rawh. (Sâm 91:9, 14 chhiar rawh.) Eng ang vênhimna nge a tiam? Hmân laia A chhiahhlawh ṭhenkhat chu tisa lamah a vênghim a—dinhmun ṭhenkhatah chuan thutiam Messia lo lanna tûr thlah kal zêl vawn him nâna vênghim a ni. Amaherawhchu, mi rinawm tam tak chu Pathian laka an rinawmna thlahthlamtîr tumin lung ina khung, nghaisak, leh râwng taka tihhlum an ni a. (Heb. 11:34-39) Mahse, Pathian Jehova’n an rinawmna vawng reng tûra thlarau lama a vênhim avângin, chhel nâna an mamawh chakna an nei a ni. Chuvângin, Sâm 91-na chu thlarau lama vênghim tûra tiamna angin a hriatthiam theih a ni.
11. ‘Chungnungbera bihrûkna hmun’ chu eng nge ni a, chutah chuan tute nge Pathianin a vênhim?
11 Chuvângin, fakna hla phuahtu sawi ‘Chungnungbera bihrûkna hmun’ chu entîr nei thlarau lama vênhimna a ni a. Pathian mikhual anga chuta awmte chu Pathian an rinna leh an hmangaihna tiderthâwng thei thil engpawh leh tupawh lakah an him a ni. (Sâm 15:2; 121:5) Pathian ring lotute chuan he bihrûkna hmun hi an hre ve lo. Chutah chuan, Pathian Jehova’n: ‘Ka Pathian, ka rina chu i ni,’ titute chu a vênghim a ni. He invênhimna hmuna kan awm reng chuan “thang kamtu,” Setana thanga awhna avânga Pathian duhsakna chân chu kan hlauh lutuk a ngai lo.
12. Eng thil hlauhawmte’n nge Pathian nêna kan inlaichînna tiderthâwng?
12 Eng hlauhawmte’n nge Pathian nêna kan inlaichînna hlu tak chu tiderthâwng? Fakna hla phuahtu chuan thil hlauhawmte chu a sawi nual a, chûng zîngah chuan “thim hnuaia hri lêng ṭhîn . . . [leh] chhûn laia thil tichhe ṭhîn chhiatna” te a tel a ni. (Sâm 91:5, 6) “Thang kamtu” chuan mi tam tak chu hmasial taka inlâk hran duhna thangah a awhtîr a. (2 Kor. 11:3) Mi dangte chu duhâmna te, chapona te, leh hausak âtchilhna te vawrh lârin a âwk bawk a ni. Mi dang lehte chu ram leh hnam hmangaihna te, chanchhâwnna te, leh sakhaw dik lo ang chi mihring finna tein a hruai bo bawk. (Kol. 2:8) Tin, mi tam tak chu dân lo anga mipat hmeichhiat hmanna thangah a awhtîr a. Chu hri lêng thlarau lam tâna hlauhawm tak chuan mi maktaduai têlte chu Pathian an hmangaihna a hlohtîr a ni.—Sâm 91:7-10 chhiar rawh; Mt. 24:12.
Pathian I Hmangaihna Chu Vênghim Rawh
13. Engtin nge Pathian Jehova chuan kan thlarau lam ṭhatna tiderthâwng thei thil lakah min vênhim?
13 Engtin nge Pathian Jehova chuan a mite chu thlarau lam tâna hlauhawm thilte lakah a vênhim? Fakna hla phuahtu chuan: “I kawng tinrênga humhim tûr chein, i chung thu-ah zawng a vântirhkohte chu thu a pe dâwn si a,” tiin a sawi a. (Sâm 91:11) Vâna vântirhkohte chuan chanchin ṭha kan hril theih nân min kaihruaiin, min vênghim ṭhîn a ni. (Thup. 14:6) Vântirhkohte bâkah, Kristian upate chuan an zirtîrnaa Pathian Lehkha Thu vuan tlatin, ngaihtuahna dik lo hmanga bumna lakah min vênghim a. Khawvêl rilru put hmangte hneh tuma theih tâwp chhuahtute pawh ṭanpuina an pe thei bawk. (Tit. 1:9; 1 Pet. 5:2) Tin, “bawi rinawm, fing tak” chuan chanchhâwnna zirtîrna lakah te, nungchang bawlhhlawhna thiltih lakah te, hausakna leh challanna ûmna lakah te, leh châkna dik lo leh thununna hlauhawm dang tam tak lakah te min vênhim nân thlarau lam chaw min pe bawk a ni. (Mt. 24:45) Chûng thil hlauhawm ṭhenkhatte chu do tûrin engin nge ṭanpui che?
14. Engtin nge Pathianin vênhimna min pêk chu kan hman ṭangkai theih?
14 Pathian vênhimna ‘bihrûkna hmuna’ awm reng tûr chuan eng nge kan tih ngai? Chêtsualna te, dân bawhchhetu te, a nih loh leh tlâng hrilêng te ang chi taksa lama hlauhawm laka kan invên reng a ṭûl ang chiahin, kan thlarau lam tâna thil hlauhawmte lakah pawh kan invên reng a ṭûl a ni. Chuvâng chuan, Pathian Jehova’n kan thu leh hla chhuah te, kohhran inkhâwm te, leh inkhâwmpui te kal tlanga kaihhruaina min pêk chu kan hmang ṭangkai reng tûr a ni a. Upate hnênah pawh thurâwn kan dîl bawk tûr a ni. Kan Kristian unaute lantîr mize hrang hrangte chu kan hlâwkpui bawk a ni lâwm ni? Dik takin, kohhrana mite nêna inkawmna chuan fing tûrin min ṭanpui a ni.—Thuf. 13:20; 1 Petera 4:10 chhiar rawh.
15. Engvângin nge Pathian Jehova chuan a pawm tlâk nihna min hlohtîr thei eng thil lakah pawh a vênghim thei che tih i rin tlat theih?
15 Pathian Jehova chuan a pawm tlâk nihna min hlohtîr thei eng thil lakah pawh min vênghim thei tih rinhlelh chhan tûr kan nei lo. (Rom 8:38, 39) Ani chuan kohhran chu hmêlma hlauhawm tak, sakhuana leh politics lakah a vênghim a, chûng hmêlmate thiltum chu min tihhlum ni lovin, kan Pathian thianghlim laka min lâk hran hi a ni tlângpui ṭhîn. Pathian Jehova thutiam: “Nangmah beina tûra hriam chher rêng rêng a sâwt lo vang,” tih chu a dik tak zet a ni.—Is. 54:17.
Tuin Nge Zalênna Min Pe?
16. Engvângin nge khawvêl hian zalênna min pêk theih loh?
16 Pathian Jehova ta nihna chuan kan zalênna a ru bo ang em? Ru bo lo vang, khawvêl ta nihna hian a ru bo zâwk ang. He khawvêl hi Pathian Jehova laka inmihran a ni a, mite sala siamtu pathian nunrâwng takin a awp a ni. (Joh. 14:30) Entîr nân, Setana khawvêl chuan mite chu sum leh pai lama nêksâwrin an zalênna a rûk bosak a. (Thu Puan 13:16, 17 nên khaikhin rawh.) Sual pawh hi mite sala tântîr tûra bum hmang thiltithei tak a ni. (Joh. 8:34; Heb. 3:13) Chuvângin, ring lo mite’n Pathian Jehova zirtîrna kalh nun dân chu chawisângin, zalênna neihna tûr angah sawi mah se, anmahni ngaithlatute chuan nun phung sual leh chhe tak bâwihah an tâng tih an inhre thuai dâwn a ni.—Rom 1:24-32.
17. Pathian Jehova chuan eng duhthlan theihna nge min pêk?
17 Kawng leh lamah chuan, Pathian Jehova’n amah kan rinchhan phawt chuan hlauhawm engpawh lakah min tizalên ang. Kawng ṭhenkhatah chuan, kan dinhmun chu miin thihpui mai theih natna hlauhawm tak laka tizalên thei doctor thiam tak kuta a nun a dah ang a ni. Kan vai hian sual kan rochun avângin nunna atâna dinhmun hlauhawm takah kan ding vek a. Krista inthawina ṭanchhan a, Pathian Jehova kuta kan inkawltîr chauhvin, sualnain a nghawng chhuahte pumpelh tûr leh chatuana nung tûrin beiseina kan nei thei a ni. (Joh. 3:36) Dortor-in hmingṭha a nei tih kan hriatna chuan amah kan rinna a tihpun theih ang bawkin, Pathian Jehova chanchin zir belhna chuan amah kan rinna chu a tipung ang. Chuvângin, Pathian Thu chu ngun takin kan zir zawm zêl a ni; chu chuan Pathian ta nih hlauhna engpawh tibo thei hmangaihnaa amah hmangaih tûrin min ṭanpui dâwn si a.—1 Joh. 4:18.
18. Pathian Jehova tate chuan eng hlâwkna nge an neih dâwn?
18 Pathian Jehova chuan mi zawng zawng hnênah zalên taka duh thlan theihna a pe vek a. A Thu chuan: “Nunna chu thlang rawh u, in nun theih nân, nangni leh in thlahte nên; LALPA in Pathian hmangaih . . . tlatin,” tiin a sawi a ni. (Deut. 30: 19, 20) Ani chuan mahni duhthua a rawng bâwl thlangin, amah kan hmangaihna târ lang tûrin min duh a. Kan hmangaih Pathian ta nihna chuan kan zalênna rûk bo ahnêkin, min tihlim zâwk ngei ang.
19. Engvângin nge Pathian Jehova tâ kan ni chu a khawngaihna vâng a nih?
19 Mi sual kan nih avângin Pathian ṭha famkim ta nih chu kan phu lo va. Pathian khawngaihna avâng chauhva a ta ni thei kan ni. (2 Tim. 1:9) Chuvângin, Paula chuan: “Kan nun chuan Lalpa tân kan nung a; kan thih pawhin Lalpa tân kan thi a ni si; chuvângin kan nun pawhin, kan thih pawhin, Lalpa ta kan ni,” tiin a ziak a ni. (Rom 14:8) Pathian Jehova ta nih kan thlan avângin kan inchhîr ngai lo vang. (w10-E 01/15)
Engtin Nge Kan Chhân Ang?
• Pathian Jehova ta nih a hlâwknate chu eng nge ni?
• Engvângin nge Pathian Jehova’n kan hnên aṭanga a beiseite chu kan tih theih?
• Engtin nge Pathian Jehova’n a chhiahhlawhte tân vênhimna a pêk?
[Zirlai Atâna Zawhnate]
[Phêk 14-naa milemte]
Mi dangte chu Pathian Jehova ta nih an hlâwkpui dân zâwt rawh
[Phêk 16-naa milem]
Eng kawng ṭhenkhatin nge Pathian Jehova’n vênhimna min pêk?