Pathian Hnaih Rawh

Ani Chuan Kan Hlawhtlin A Duh

Josua 1:6-9

FATE ngaihsak tak nu leh pate chuan an fate chu hlawhtling taka an awm a, nun awmze nei leh lungawithlâk tak neia an awm chu hmuh an châk ṭhîn. Chutiang bawkin, kan Pa vâna mi, Pathian Jehova pawhin lei lama a fate chu hlawhtling se a duh a, min ngaihsakzia lantîr nân hlawhtling taka awm dân min hrilh a ni. Entîr nân, Josua hnêna a thusawi, Josua 1:6-9-a chhinchhiah hi han ngaihtuah teh.

He milema târ lan thilthleng hi han mitthla teh. Mosia a thih hnu chuan, Josua chu Israel mi maktaduai tam tak hruaitu thar a rawn ni a. Israel mite chu Pathianin an thlahtute hnêna a lo tiam tawh rama lût tûrin an inbuatsaih mêk a ni. Pathian chuan Josua hnênah kaihhruaina a pe a. Chu chu Josua’n a zawm phawt chuan a hlawhtling ngei dâwn a ni. Mahse, chu fuihna chu Josua tân chauhva hlâwkna a ni lo. Keini pawhin kan zawm chuan kan hlawhtling ve thei a ni.—Rom 15:4.

Pathian Jehova chuan Josua chu chak tak leh huai taka awm tûrin—vawi khat mai pawh ni lo, vawi thum lai—a hrilh a. (Châng 6, 7, 9) Israel mite Ram Tiama hlawhtling taka hruai tûr chuan Josua chuan chakna leh huaisenna a mamawh dâwn chiang a ni. Mahse, chûng miziate chu engtin nge a neih theih ang?

Josua chuan Pathian thâwk khum thute aṭangin chakna leh huaisenna a nei a. Pathian Jehova chuan: “Ka chhiahhlawh Mosian dân zawng zawng zâwm tûra thu a pêk che kha zâwm tlat” rawh tiin a hrilh a ni. (Châng 7) Khatih hun lai khân Josua chuan Bible bu tlêmtê chauh a nei a nih hmêl a. * Mahse, Pathian Thu neih ringawt chuan Josua tân hlawhtlinna a thlen lo. Chu mi hlâwkpui tûr chuan thil pahnih a tih a ngai a ni.

A pakhatnaah chuan, Josua chuan a thinlung chu Pathian thuin a tikhat rêng tûr a ni. Pathian Jehova chuan: ‘Chhûn leh zânin i ngaihtuah tûr a ni,’ tiin a sawi. (Châng 8) Lehkhabu pakhat chuan: “Pathian chuan Josua hnênah A Dân thu chu amah leh amah ‘inhrilh mawlh mawlh,’ ‘ngaihtuah,’ a nih loh leh ‘ngun taka rilrua bûk’ tûrin a hrilh,” tiin a sawifiah a ni. Nî tina Pathian Thu chhiar leh chhût ngunna chuan Josua chu a hmaa harsatna lo thleng tûr hmachhawn thei tûrin a ṭanpui dâwn a ni.

A pahnihnaah chuan, Josua chuan Pathian Thu a zirte a nunpui a ngai a. Pathian Jehova chuan: “Chu mi thu ziak zawng zawng chu i zawm tlat theih nân . . . i ngaihtuah tlat . . . tûr a ni: tichuan i kawngte chu i lo titluang zel ang,” tiin a hrilh a. (Châng 8) Josua hlawhtlinna chu Pathian duhzâwng a tihna nên a inzawm tlat a ni. Chuti ni lo se engtin nge a hlawhtlin theih tehrêng ang? Pathian duhzâwng chu englai pawhin a hlawhtling si a.—Isaia 55:10, 11.

Josua chuan Pathian Jehova thurâwn chu a zâwm a. Chuvângin, Pathian Jehova betu rinawm tak niin, nun lungawithlâk leh hlawhtling tak a nei a ni.—Josua 23:14; 24:15.

Josua anga nun hlawhtling tak neih chu i duh ve em? Pathian Jehova chuan hlawhtling ve tûrin a duh che a. Mahse, a Thu, Bible neih mai chu a tâwk lo. Kum rei tak chhûng Kristian rinawm lo ni tawh chuan: “Bible thute chu chhiarin, i thinlung chhûngah khung rawh,” tiin thurâwn a pe a ni. I thinlung chu Pathian thua i tihkhah a, i thil zirte i nunpui chuan, Josua angin, “i kawngte chu i lo titluang zel ang.” (w09-E 12/01)

[Footnote]