‘Eng Chen Nge Min Pui Tûrin Ka Auh Vang Che?’

“Ka na tawrh hi tâwp se ka va ti tak êm!” tiin Jayne-i chu a ṭap zawih zawih a. Ani chuan cancer a vei a, a taksa pumah a ṭai darh tawh a ni. A chhûngte leh a ṭhiante chuan a natna leh a rilru hrehawmna tihbosak chu an va châk tak êm! Ṭanpuina dîlin Pathian hnênah an ṭawngṭai a. Pathian chuan a ngaithlain, a ngaihsak ang em?

PATHIAN chuan mihringte dinhmun chu a hre hneh hle a. A Thu, Bible chuan: “Thil siam zawng zawngte chu tûn thlengin rûm leh nauvei na tuarin an awm hlawm tih kan hre si a,” tiin a sawi a ni. (Rom 8:22) Pathian chuan Jayne-i angin mi maktaduai tam takin nî tin taksa lam, rilru lam, a nih loh leh thinlung lamah hrehawm an tuar tih a hria a. Ani chuan mi maktaduai 800-te zan tin rilṭâm chunga an mu te, mi maktaduai tam tak dangin in chhûngkhura tharum thawhna an tuar te, leh an fate ṭhatna tûr leh nakin hun tûr lungkham nu leh pa tam takte chu a hmu reng a ni. Hêng harsatnate ching fel tûr hian Pathianin hma a lâk dâwn leh dâwn loh chu i ngaihtuah ngai em? Keini mahin kan hmangaihte ṭanpui kan duh si chuan, Pathian phei chuan a thil siam, mihringte chu ṭanpui a duh ngei dâwn lâwm ni?

Hêng zawhnate hi i lo inzâwt tawh ngai a nih chuan, i mal lo ve. Kum 2,600 chuang kal ta khân, mi rinawm Habakuka chuan tûn laia mi tam takte ang bawkin a ngai ve a, Pathian hnênah heti hian a zâwt a ni: “Aw LALPA, min pui tûrin ka auh che hi, eng chen nge, min ngawihsan dâwn? ‘Mi sualten min vaw hlum takngial dâwn,’ tia ka auh che pawhin, engati nge min chhân loh? Engati nge dik lo taka thil an tih min hmuhtîra, râwng taka an chêt i ngaihtheih zêl le? Inrawk leh invuak a hluar a, inhau leh invelh a tam hle hi,” tiin. (Habakuka 1:2, 3, The Holy Bible, Mizo (Lushai) - C.L. Re-edited) Hebrai mi, zâwlnei Habakuka chuan a hun laia dik lo taka tharum thawhna leh invaivungna thiltih thin tiṭhâwng tak takte chu a hmu a ni. Tûn laiah chûng thiltihte chu mi khawngaih thei takte rilru tinatu nî tin chanchin thar a ni.

Pathian chuan Habakuka thil lungkhamte chu a ngaihthah em? Ngaihthah lo ve. Tih tak zeta Habakuka zawhnate chu a ngaithla a; tichuan, mi lungngai tak chu a thlamuanin, a fuih a ni. Pathian Jehova chuan Habakuka rinna chu hrehawm tawrhna A tihtâwp tûrzia thutiamin a tichak a. Pathian pêk beiseina chuan Jayne-i leh a chhûngte angin, a thlamuan ve thei che a ni. A dawta thuziakte hian hêng zawhnate hi a chhâng ang: Engtin nge Pathianin min ngaihsak tak zet tih kan rin tlat theih? Hrehawm tawrhna titâwp tûrin Pathianin eng nge a tih ang a, engtikah nge? tihte chu. (w09-E 12/01)