Engvângin Nge Pathian Jehova Hnênah I Inpumpêk Ang?
Engvângin Nge Pathian Jehova Hnênah I Inpumpêk Ang?
“A ta ka ni a, a rawng ka bâwl ṭhin Pathian . . . vântirhkoh pakhat nizân khân ka kiangah a lo ding a.”—TIRH. 27:23.
1. Baptisma chang tûra inpe tawhte’n eng hma lâkna nge an neih tawh a, chu chuan eng zawhnate nge a tih chhuah?
“ISUA Krista tlanna inthawina zârah i sualte simin, Jehova duhzâwng ti tûrin a hnênah i inpumpêk tawh em?” Hei hi baptisma chang tûrte’n baptisma thusawi tâwp dâwna an chhân zawhna pahnihte zînga a pakhat zâwk a ni. Engvângin nge Kristiante chu Pathian Jehova hnêna an inpumpêk a ngaih? Pathian hnêna inpumpêkna chu engtin nge kan hlâwkpui? Engvângin nge Pathian hnêna inpumpêkna tel lovin, mi chu Pathian betu pawm tlâk a nih theih loh? Hêng zawhnate hrethiam tûr hian, inpumpêkna awmzia kan ngaihtuah phawt a ngai a ni.
2. Pathian Jehova hnêna inpumpêk tih awmzia chu eng nge ni?
2 Pathian hnêna inpumpêk awmzia chu eng nge ni? Tirhkoh Paula’n Pathian nêna an inlaichînna a sawi dân hi han chhinchhiah teh. Lawng kehchhe mai tûra chuang mi dang tam takte hmâah, Pathian Jehova chu “a ta ka ni a, a rawng ka bâwl ṭhin Pathian,” tiin a ko a ni. (Tirhkohte 27:22-24 chhiar rawh.) Kristian dik zawng zawngte chu Pathian Jehova ta an ni a. He khawvêla mi a tam zâwkte erawh hi chu “mi sual thu thuin” an awm thung a ni. (1 Joh. 5:19) Kristiante chu Pathian Jehova hnêna ṭawngṭaia inpumpêkna pawm tlâk an siam hunah a ta an lo ni a. Chutiang inpumpêkna chu mi mal intiamkamna a ni. Chu chu tuia baptisma channain a zui ṭhîn.
3. Isua baptisma channa chuan eng nge a entîr a, chu chu a hnungzuitute’n engtin nge an zui theih?
3 Isua chuan Pathian duhzâwng tih thlangin, kan tân entawn tûr a siam a. Ani chu inpumpêk Israel hnama lo piang a nih avângin, Pathian hnêna inpumpêk sa a ni. Chuti chung pawhin, baptisma a chan khân, Dânin a phût aia tam thil engemaw a ti a. Pathian Thu chuan: “I duhzâwng ti tûrin ka lo kal e,” a ti tih a târ lang a ni. (Heb. 10:7; Lk. 3:21) Chuvângin, Isua baptisma channa chuan a Pa duhzâwng ti tûra Pathian hnêna a inpêkna a entîr a. A hnungzuitute pawhin baptisma chang tûra an inpêk hian, a entîrna chu an zui a ni. Mahse, an tân chuan, tuia baptisma channa chu Pathian hnêna ṭawngṭaia mi mala an inpumpêkna siam vântlâng hmaa târ lanna a ni.
Inpumpêkna Kan Hlâwkpui Dân
4. Davida leh Jonathana inkâra inṭhianna chuan intiamna chungchâng eng nge min hrilh?
4 Pathian hnêna kan inpumpêkna chu thil khûnkhân tak a ni a. Intiamna mai piah lam thil a ni. A nih leh, engtin nge inpumpêkna chu kan hlâwkpui? Kan hriat thiam theih nân, mihring inlaichînnaa intiam tlatnain hlâwkna a thlente i lo ngaihtuah ang u. Entîrna pakhat chu ṭhian inlaichînna hi a ni a. Ṭhian nei thei tûr chuan, ṭhian nihnain a ken tel mawhphurhnate chu i pawm a ngai a ni. Chutah chuan intiam tlatna—i ṭhian ngaihsak tûra mawhphurhna lâkna—a tel a ni. Bible-a târ lan inṭhianna langsâr berte zînga pakhat chu Davida leh Jonathana chungchâng a ni a. Anni chuan inṭhianna thuthlung an siam hial a ni. (1 Samuela 17:57; 18:1, 3 chhiar rawh.) Chutiang khawpa inṭhianna chu vâng hle mah se, inṭhiante chu an rinawm tawn a, an inngaihsak tawn chuan an inṭhianna chu a nghet sawt ṭhîn a ni.—Thuf. 17:17; 18:24.
5. Engtin nge bâwih chuan pu ṭha tak neih chu a hlâwkpui hlen theih?
5 Pathianin Israelte hnêna a pêk Dân chuan mite’n intiamna siam an hlâwkpui, inlaichînna dang a sawi a. Bâwihin a pu ṭha tak hnêna awm hlen a duh chuan, a pu nên chuan inremna nghet siamin, a awm hlen thei a ni. Dân thu chuan heti hian a sawi: “Bâwih chuan, ka pute, ka nupui te, ka fate hi ka hmangaih êm mai a; ka chhuak duh lo ve, a tih tlat chuan, a puin Pathian hnênah hruai sela, kawngkaah emaw kawngka biangah emaw hruai sela; tin, a puin a beng chu thîr zumin vit sela; tichuan kumkhuain a rawng a bâwl tawh ang,” tiin.—Ex. 21:5, 6.
6, 7. (a) Engtin nge mite chuan intiamna neih chu an hlâwkpui? (b) Chu chuan Pathian Jehova nêna kan inlaichînna chungchâng eng nge a târ lan?
6 Inneihna chu intiamna sâng tak ngai inlaichînna a ni a. Chu chu thil engemaw ti tûra intiamkamna mai ni lovin, tuemaw hnêna intiam tlatna a ni. Mi pahnih innei si lova awm tlângte chuan himna dik tak an nei thei ngai lo va, an fate lahin an nei thei ngai hek lo. Mahse, inneihna chawimawi tlâka intiamna nei nupate chuan buaina a lo chhuah hunah an harsatnate chu Bible hmanga hmangaihna nêna chinfel tum tlat chhan tûr an nei a ni.—Mt. 19:5, 6; 1 Kor. 13:7, 8; Heb. 13:4.
7 Bible hun lai chuan, mite chuan an sumdâwnna leh inhlawhfâknaa thuthlung emaw, intiamkamna emaw siam chu an hlâwkpui a. (Mt. 20:1, 2, 8) Tûn laiah pawh chutiang bawk chu a ni. Entîr nân, sumdâwnnaa kan tel ṭan hma emaw, company-a hna kan thawh ṭan hma emawa inremna ziaka siam emaw, thuthlung ziaka dah emaw chu kan hlâwkpui a ni. Chutianga intiam tlatnain inṭhianna te, inneihna te, leh hnathawhna tea inlaichînna mah a tihngheh chuan, Pathian Jehova nêna in inlaichînnaa inpumpêkna pumhlûm siam chu i va hlâwkpui lehzual dâwn êm! Tûnah chuan hun kal tawha Pathian Jehova hnêna inpumpêkte’n an hlâwkpui dân leh chu chu intiamna mai piah lam a nihzia i lo ngaihtuah tawh ang u.
Israelte’n Pathian Hnêna Inpumpêkna An Hlâwkpui Dân
8. (a) Israelte tân khân Pathian hnêna inpumpêkna chuan eng awmzia nge a neih?
8 Israel mite’n Pathian hnêna thu an tiam khân, a hnam pumin Pathian Jehova hnêna inpumpêk an lo ni a. Pathian Jehova chuan Sinai Tlângah a kal khâwmtîr a, an hnênah: “Ka thu in ngaihthlâk tak zet a, ka thuthlung hi in pawm chuan khawvêl hnam zawng zawng zîngah hian ka tân ro thlan bîk in ni ang,” a ti a. Mipuite chuan: “LALPA sawi zawng zawngte chu kan ti zêl ang e,” tiin a rualin an chhâng dual dual a ni. (Ex. 19:4-8) Israelte tân chuan inpumpêkna chuan thil engemaw ti tûra intiamna mai aia tam a huam a ni. A awmzia chu Pathian Jehova ta an ni a, Ani chuan anni chu “ro thlan bîk” angin a cheibâwl a ni.
9. Engtin nge Israelte chuan Pathian hnêna inpumpêkna chu an hlâwkpui?
9 Pathian Jehova ta nihna chu Israelte chuan an hlâwkpui a. Ani chu an lakah a rinawmin, hmangaihna nei nu leh pain fa an enkawl ang maiin anni chu a enkawl a ni. Israelte hnênah Pathian chuan: “Hmeichhiain a fapa, a rîla rah chu, khawngaih lohna tûrin a nau a hnute hne lai chu a theihnghilh thei em ni? Thei e, chûngte chuan an theihnghilh a ni thei e, nimahsela kei chuan ka theihnghilh lo vang che,” tiin a hrilh a ni. (Is. 49:15) Pathian Jehova chuan anmahni kaihhruai nân Dân a pe a, zâwlneite kal tlangin fuihna a pein, vântirhkohte kal tlangin vênhimna a pe bawk a ni. Fakna hla phuahtu chuan: “A thu chu Jakob-ho hnênah a lantîr a, a thuruatte leh a rorêlnate pawh chu Israel-ho hnenah a lantîr ṭhîn. Ani chuan eng hnam chungah mah chutiang chuan a ti ngai lo,” tiin a ziak a ni. (Sâm 147:19, 20; Sâm 34:7, 19; 48:14 chhiar rawh.) Pathian Jehova chuan hun kal tawhah khân a ta neih Israel hnam chu a lo enkawl a, chuvângin, tûn laia a hnêna inpumpêkte pawh a enkawl ngei ang.
Pathian Hnêna Kan Inpumpêkna Tûr Chhan
10, 11. Lei leh vâna Pathian chhûngkaw zînga piang kan ni em? Hrilhfiah rawh.
10 Inpumpêk a, baptisma chan an rilrûk laiin, mi ṭhenkhat chuan, ‘Pathian be thei tûrin engah nge a hnêna ka inpumpêk kher a ngaih?’ tiin an ngaihtuah mai thei a. Tûna Pathian hmaa kan dinhmun dik tak han ngaihtuah chuan kan inpumpêk kher a ngaih chhan chu a chiang a ni. Adama sual avângin, kan vai hian Pathian chhûngkaw zînga piang kan ni lo tih chu hre reng la. (Rom 3:23; 5:12) Pathian hnêna kan inpumpêkna chu lei leh vâna a chhûngkaw zînga mi nih nâna thil pawimawh tak a ni. A chhan i lo en ang u.
11 Tumah hian Pathian thiltum anga chatuan nunna min pe thei pa kan nei lo va. (1 Tim. 6:19) Nupa tuak hmasa berte an sual khân, mihringte chu hmangaihna nei tak an Pa, Siamtu hnên aṭanga inlahrang an lo nih tâk avângin Pathian fate anga piang kan ni lo. (Deuteronomy 32:5 nên khaikhin rawh.) Chuta ṭang chuan, khawvêla mihringte chu Pathian lak ata inmihranin, lei leh vâna Pathian Jehova chhûngkaw zînga mi an ni ta lo a ni.
12. (a) Engtin nge mihring ṭha famkim lote chu Pathian chhûngkaw zînga mi an lo nih theih? (b) Baptisma chan hmaa kan tih ngei ngei tûr thilte chu eng nge ni?
12 Amaherawhchu, a mi malin Pathian hnênah a chhûngkaw zînga chhiahhlawh ni tûrin kan dîl thei a ni. * Engtin nge chu chu keini mi sualte tâna thil theih a nih? Tirhkoh Paula chuan: ‘Hmêlma kan nih lai maha a Fapa thihna avânga Pathian nêna lo inrem tawh kan ni,’ tiin a ziak a. (Rom 5:10) Baptisma kan chan hian Pathian hnênah a pawm tlâk nih theih nân chhia leh ṭha hriatna thiang kan dîl a ni. (1 Pet. 3:21) Mahse, baptisma kan chan hmain, kan tih ngei ngei tûr thilte a awm a. Pathian hriatna kan neih a, amah rinchhan kan zir a, kan sim a, kan kawngte kan thlâk thleng a ngai a ni. (Joh. 17:3, Tirh. 3:19; Heb. 11:6) Pathian chhûngkaw zînga pawm ni tûr chuan thil dang engemaw pawh kan tih a la ngai cheu. Chu chu eng nge ni?
13. Pathian chhûngkuaa betu zînga mi ni tûrin, A hnêna inpumpêkna thutiam neih chu engvângin nge thil âwm tak a nih?
13 Pathian laka inmihran tuemaw chu Pathian chhûngkaw zînga chhiahhlawha pawm a nih hmain, Pathian Jehova hnênah inpêkna thutiam urhsûn tak a siam phawt a ngai a ni. Chutiang a nih chhan hriatthiam nân, pa zah kai tak pakhatin ṭhalai fahrah pakhat chunga ngilneihna a lantîr a, ama chhûngkaw zînga mi anga faa lâk a duh chu han mitthla teh. Chu pa chu pa ṭha tak nia hriat hlawh a ni a. Chuti chung pawh chuan, chu ṭhalai chu fa anga a pawm hmain intiamna nei tûrin a duh a ni. Chuvângin, chu pa chuan: “Fapa anga ka pawm hma chein, pa angin min hmangaihin, min zah ang tih hriat chu ka duh a ni,” a ti a. Chu ṭhalai chuan intiamna khûnkhân tak a siam duh chauhvin, chu pa chuan a chhûngkaw zînga mi angin a pawm dâwn a ni. Chu chu thil âwm tak a ni lâwm ni? Chutiang bawkin, Pathian Jehova chuan a hnêna inpumpêkna thutiam siam duhte chauh a chhûngkaw zîngah a pawm a ni. Bible chuan: ‘Inthawina nung leh thianghlim leh Pathian lawm tlâk ni tûrin in taksa chu inhlân [“inpumpêk” NW] rawh u,’ a ti a ni.—Rom 12:1.
Inpumpêkna Chu Hmangaihna leh Rinna Thiltih A Ni
14. Eng kawngin nge inpumpêkna chu hmangaihna lantîrna a nih?
14 Pathian Jehova hnêna inpumpêkna thutiam neih chu Amah kan hmangaih tak zetzia târ lanna a ni a. Kawng ṭhenkhatah chuan inneihna thutiam nên a inang a ni. Kristian mopa chuan a hmangaihna chu eng dinhmun hnuaiah pawh monu chunga rinawm tlat tûra intiamna hmangin a târ lang a. Chu chu thil engemaw ti tûra intiamna mai ni lovin, mi tuemaw hnêna thuthlunna a ni. Kristian mopa chuan inneihna thu tiam a neih loh chuan monu nên an khawsa dûn thei dâwn lo tih a hria a ni. Chutiang bawkin, inpumpêkna thutiam kan neih loh chuan Pathian chhûngkaw zînga mi angin a hlâwkna kimchang kan nei thei lo. Chuvângin, kan ṭha famkim lo chung pawhin Pathian ta nih kan duh avângin a hnênah kan inpumpêk a, engpawh lo thleng se, a chunga rinawm kan tum tlat a ni.—Mt. 22:37.
15. Engtin nge inpumpêkna chu rinna lantîrna a nih?
15 Pathian hnêna kan inpumpêk hian rinna kan lantîr tihna a ni. Engtin nge chutiang chu a nih? Pathian Jehova kan rinna chuan Amah hnaih chu kan tân a ṭha tih rinnghehna min pe a. (Sâm 73:28) “Chhuan bengtla lo leh tihmawhte zînga” kan chên chhûng hian Pathian nêna lên dun chu thil awl a ni reng lo tih kan hria; mahse, kan ṭan lâkna min ṭanpui tûra Pathian thutiam chu kan ring thlap a ni. (Phil. 2:14-16; 4:13) Mi ṭha famkim lo kan ni tih kan hria a; mahse, thil kan tihsual pawhin Pathian Jehova chuan khawngaihna nei takin min cheibâwl dâwn tih kan ring tlat a ni. (Sâm 103:13, 14; Rom 7:21-25 chhiar rawh.) Dikna, a nih loh leh rinawmna vawn tlat kan tumna chu Pathian Jehova’n mal a sâwm dâwn tih kan ring a ni.—Job. 27:5.
Pathian Hnêna Inpumpêkna Chuan Hlimna A Thlen
16, 17. Engvângin nge Pathian Jehova hnêna inpumpêkna chuan hlimna a thlen?
16 Pathian Jehova hnêna inpumpêknaah chuan mahni inpêkna a tel avângin, chu chuan hlimna a thlen a. Isua’n: “Englo lâk aiin pêkin lukhâwng a nei zâwk,” tia a sawi khân, chu thudik bulpui chu a târ lang a ni. (Tirh. 20:35) Isua chuan leia rawng a bâwl chhûng khân, pêkna aṭanga neih hlimna chu a pum hlûmin a tawng a. Mite chu nunna kawng zawng hmu tûra a ṭanpui theih nân a ṭûl hunah chuan chawlh hahdam te, ei leh in te, leh mahni nawmsakna tûr te pawh chân a inhuam a ni. (Joh. 4:34) Isua chuan a Pa thinlung tihlâwm chu nuam a ti a, ‘A thil lâwmzâwng apiang ka ti fo,’ tiin a sawi.—Joh. 8:29; Thuf. 27:11.
17 Chuvângin, Isua’n a hnungzuitute hnênah: ‘Tupawhin amah zui a duh chuan mahni hrehawm a pawisa tûr a ni lo’ tia a sawi khân nun lungâwithlâk chu a kawhhmuh a ni. (Mt. 16:24) Chutianga tihna chuan Pathian Jehova min hnaihtîr a ni. Ani aia min hmangaih zâwktu mi dang an awm thei dâwn em ni?
18. Pathian Jehova hnêna inpumpêkna mila kan nunna chuan engvângin nge thil dang emaw, mi dang emaw hnêna inpumpêkna aia hlimna nasa zâwk min pêk?
18 Pathian Jehova hnêna kan inpumpêkna leh a hnua a duhzâwng tihna hmanga chu inpumpêkna mila kan nunna chuan thil dang emaw, mi dang emaw hnêna inpumpêkna aia hlimna nasa zâwk min pe a ni. Entîr nân, mi tam tak chuan hlimna leh lungawina dik tak nei chuang si lovin, an nun chu hausak ûmnaah an pe a. Mahse, Pathian Jehova hnêna inpumpêkte chuan hlimna tluantling an hmu a ni. (Mt. 6:24) Anni chu “Pathian hnathawhpuite” nihna dinhmun sâng tak chuan a tihlim a; mahse, an inpumpêkna chu hnaah ni lovin, lâwmna châng hria Pathian hnênah a ni zâwk. (1 Kor. 3:9) An inpêknaah Pathian tluka lâwmna châng hria tumah an awm thei lo. Ani chuan a ngaihsakna chatuana an hlâwkpui theih nân a mi rinawmte chu an vânglai nîah a kîrtîr leh ang.—Job. 33:25; Hebrai 6:10 chhiar rawh.
19. Pathian Jehova hnêna inpumpêkte chuan eng chanvo nge an neih?
19 Pathian Jehova hnêna i inpumpêkna chuan Amah nêna inlaichînna hnai nei tûrin a siam che a. Bible chuan: “Pathian hnaih rawh u, tichuan anin a hnaih ang che u,” tiin a sawi a ni. (Jak. 4:8; Sâm 25:14) A dawta thuziakah chuan, rin tâwkna nei chunga Pathian Jehova ta nih kan thlan chhan kan ngaihtuah ang. (w10-E 01/15)
[Footnote]
^ par. 12 Isua “berâm dang” te chu kum sângkhat a tâwp hma loh chuan Pathian fate an ni dâwn lo va. Mahse, Pathian hnêna an inpumpêk avângin, Pathian chu “Pa” tiin an ko thei a, Pathian Jehova betu chhûngkaw zînga mi angin an inngai thlap thei a ni.—Joh. 10:16; Is. 64:8; Mt. 6:9; Thup. 20:5.
Engtin Nge Kan Chhân Ang?
• Pathian hnêna inpumpêk awmzia chu eng nge ni?
• Pathian Hnêna inpumpêkna chu engtin nge kan hlâwkpui?
• Engvângin nge Kristiante chu Pathian Jehova hnêna an inpumpêk a ngaih?
[Zirlai Atâna Zawhnate]
[Phêk 12-naa milem]
Kan inpumpêkna mila nunna chuan chatuan hlimna min thlen