“Hun Ruat” Chu A Hnai

ZAWINEI Habakuka angin, Isua zirtîrte chuan hrehawm tawrhna tâwp hun tûr hmuh chu an nghâkhlel hle a. Leia thil awm dân siam ṭhat nâna Pathian Ramin a tih tûr chu hriain, anni chuan Isua hnênah: “Chûng chu engtikah nge a lo awm ang? [Lalram thuneihna nêna] i lo kal lehna leh khawvêl tâwpna chhinchhiahna chu engnge ni ang?” tiin an zâwt a. (Matthaia 24:3) An zawhna chu chhângin Isua chuan, Lalramin leia thuneihna pumhlûm a lâk hun tûr tak chu Pathian Jehova chauhvin a hria tih a sawi a ni. (Matthaia 24:36; Marka 13:32) Amaherawhchu, Isua leh mi dangte chuan chu hun chu a hnai tawh tih târ langtu thilthleng a awm tûr thu an hrilh lâwk a ni.— A ding lama bâwm hi en rawh.

Hêngte hi tûn laiah a hluar hle tih chu i pawm lâwm ni? Isua chuan khawvêl pum huapa zirtîrna hna thawh a nih tûr chungchâng pawh a hrilh lâwk bawk a. Ani chuan: “He ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang,” tiin a sawi a ni.—Matthaia 24:14.

Chu chu tûn laiah a thleng chiah a ni. Jehova Thuhretute chuan chu hna chu an thawk a. Ram 236 vêlah, Thuhretu maktaduai sarih chuangte chuan mite hnênah Lalramin a tih tûrte hrilhin, hrehawm tawrhna leh natna tihtâwp duhtu Pathian tehna felte mila nung tûrin an ṭanpui a ni. Pathian Ram chanchin chu zir chhunzawm zêl la, hrehawm tawrhna awm lohna khawvêla chatuan nun beiseina i nei ang. (w09-E 12/01)

[Phêk 8-naa bâwm]

 Ni Hnuhnûng Târ Langtu Bible Chângte

MATTHAIA 24:6, 7; THU PUAN 6:4

• Tûn hma zawng aia nasa zâwk indona

MATTHAIA 24:7; MARKA 13:8

• Lîrnghîng nasa tak

• Ṭâm tla

LUKA 21:11; THU PUAN 6:8

• Hrilêng

MATTHAIA 24:12

• Dân bawhchhiatna pung zêl

• Hmangaihna dai

THU PUAN 11:18

• Lei tihchhiahna

2 TIMOTHEA 3:2

• A hlei a hluaka tangka ngainatna

• Nu leh pa thuâwih lohna

• A lutuka mahni inhmangaihna

2 TIMOTHEA 3:3

• Hmangaihna pianpui neih lohna

• Huaikawmbâwlte

• Kawng tinrênga insûm theih lohna

• Ṭhat duh hauh lohna hluar tak

2 TIMOTHEA 3:4

• Pathian hmangaih aia mahni nawmna hmangaih zâwkna

2 TIMOTHEA 3:5

• Vervêk taka Kristiana inchhâlna

MATTHAIA 24:5, 11; MARKA 13:6

• Zâwlnei der tam tak phusakna

MATTHAIA 24:9; LUKA 21:12

• Kristian dikte tihduhdahna

MATTHAIA 24:39

• Bible vaukhânnate ngaihsak lohna

[Phêk 8-naa milem]

Jehova Thuhretute chuan khawvêl pum puiah Pathian Ram chungchâng mi dangte an zirtîr