Jehova Rorêl Dân Chu Thiam Chantîr A Ni!
Jehova Rorêl Dân Chu Thiam Chantîr A Ni!
“Chungnungbera chuan mihringte lalna ram chungah thu a nei.”—DAN. 4:17.
1, 2. Mihringte rorêlna a hlawhchham chhan ṭhenkhat chu engte nge ni?
MIHRINGTE rorêlna a hlawhchham! Chu chu rinhlelh rual a ni lo. Chu hlawhchhamna awm chhan ber chu mihringte’n hlawhtling taka rorêl tûra finna an tlâkchham vâng a ni. Mihring rorêltu tam takte’n ‘mahni inhmangaihtu te, tangka ngainatu te, intivei te, chapo te, thianghlim lo te, huaikawmbâwl te, hêktu te, insûm thei lo te, mi kawlhsen te, ṭha duh hauh lo te, vervêk te, inngaihlu te,’ an nihzia an lantîrna hian mihring rorêlna hlawhchhamzia chu tûn laiah a tilang zual a ni.—2 Tim. 3:2-4.
2 Hun rei tak kal ta khân kan nu leh pa hmasa ber chuan Pathian rorêl dân chu an lo hnâwl a. Chutianga tiin, anni chuan zalênna thlang angah an inngai pawh a ni thei. Mahse, a nihna takah chuan Setana rorêlna hnuaiah an intulût a ni. Kum sâng ruk lai mihringte inruahmanna fel lo tak—“he khawvêl lal,” Setana’n nasa taka a thunun—chuan mihring chanchina dinhmun hniam tak tûn dinhmun hi min hruai thleng a ni. (Joh. 12:31) Tûn laia mihringte dinhmun chu sawiin, The Oxford History of the Twentieth Century chuan “khawvêl ṭha famkim beisei” chu thil ṭangkai lo a nih thu a sawi a. “Chutiang khawvêl chu hmuh theih a nih loh mai bâkah, khawvêl ṭha famkim siam tumna chuan chhiatna, politics pâwl khat chauhvin ro a rêlna (totalitarianism), leh indona râpthlâk ber a thlen zâwk a ni,” tiin a hrilhfiah a. Mihringte rorêlna a hlawhchham tih pawmna chiang tak a va ni êm!
3. Adama leh Evi kha sual lo ta se, Pathian rorêl dân tûr chungchângah eng nge kan sawi theih?
3 Kan nu leh pa hmasa berte’n rorêlna chhawr tlâk awmchhun—Pathian rorêlna—an hnâwl chu a va pawi tak êm! Adama leh Evi kha a chungah rinawm ta se, Pathian Jehova’n he lei a awp dân tûr chiah chu kan hre lo va. Mahse, mihring zawng zawngte pawm Pathian rorêlna chu hmangaihna leh duhsak bîk neih lohnaa chhinchhiah a ni dâwn tih kan chiang thei a ni. (Tirh. 10:34; 1 Joh. 4:8) Pathian finna tlukpui nei lo chu thlîrin, mihringte kha Pathian Jehova rorêlna hnuaiah awm reng se chuan mihring rorêlna thlâwptute thiltihsual zawng zawng chu pumpelh theih a ni ang tih chu kan chiang thei a ni. Pathian rorêlna, theocracy chu ‘thil nung zawng zawng châkna a tihrehnaah’ a hlawhtling ang. (Sâm 145:16) A tawizâwnga sawi chuan, chu chu rorêlna ṭha famkim a ni ang. (Deut. 32:4) Mihringte’n chu rorêlna an hnâwl chu a va pawi tak êm!
4. Setana chu eng chen nge ro a rêl phalsak a nih?
4 Pathian Jehova’n mihringte chu mahnia ro an inrêl phalsak mah se, a thil siamte chunga rorêl tûra dikna a neih chu a thlahthlam chuang lo tih kan hriat reng a ṭha. Babulon lal thiltithei tak pawh “Chungnungbera chuan mihringte lalna ram chungah thu a nei” tih pawm luihtîr a ni. (Dan. 4:17) A tâwp a tâwpah chuan, Pathian Ram chuan a duhzâwng a hlen chhuak ang. (Mt. 6:10) Ni e, Pathian Jehova chuan amah dotu Setana chawh chhuah buaina chhânna lungawithlâk tak a pêk theih nân Setana chu “he khawvêl pathian” anga thil a tih rih a phalsak a ni. (2 Kor. 4:4; 1 Joh. 5:19) Mahse, Setana chuan Pathian phal chen bâkin thil a ti thei ngai lo. (2 Chro. 20:6; Joba 1:11, 12; 2:3-6 nên khaikhin rawh.) Pathian Hmêlma lian berin ro a rêlna khawvêla awm chung pawhin, mi ṭhenkhat Pathian laka intukluh thlang an awm reng a ni.
Israelte Chunga Pathian Rorêlna
5. Israelte chuan Pathian hnênah eng intiamna nge an neih?
5 Abela aṭanga Israel hnam din ṭan thlengin, Pathian Jehova bia a, a thupêkte zâwmtu mi rinawm engemaw zât an awm a. (Heb. 11:4-22) Mosia hun lai khân, Pathian Jehova chuan Jakoba thlahte nên thuthlung a siam a, chu chu Israel hnam a lo ni a. B.C.E. 1513 khân Israelte leh an thlahte chuan: “LALPA sawi zawng zawngte chu kan ti zêl ang e,” tia sawiin Pathian Jehova chu an Rorêltuah an pawm a ni.
6, 7. Israelte chunga Pathian rorêlna chu eng anga chhinchhiah nge a nih?
6 Pathian Jehova chuan Israel hnam chu a mite ni tûra a thlan khân thiltum a nei a. (Deuteronomy 7:7, 8 chhiar rawh.) Chutah chuan Israelte ṭhatna tûr mai aia tam a tel a ni. Pathian hming leh a lalchungnunna a tel bawk a, chûngte chu thil pawimawh tak a ni. Israelte chuan Jehova chu Pathian dik awmchhun a nihzia an hriattîr tûr a ni a. (Is. 43:10; 44:6-8) Chuvângin, Pathian Jehova’n chu hnam hnênah chuan: “LALPA in Pathian tân hnam thianghlim in ni si a, leilunga hnam zawng zawng zînga a pual bîk ni tûra LALPAN a thlan che u in ni,” tiin a hrilh a ni.—Deut. 14:2.
7 Pathian rorêl dân chuan Israelte chu mi ṭha famkim lo an nihzia a ngaihtuah tel a. Chutih rual chuan, a dânte chu a ṭha famkimin, chûng dânte chuan a Petu miziate a lan chhuahtîr a ni. Mosia kal tlanga Pathian Jehova thupêk chuan a thianghlimna, rorêlna dik a ngainatna, ngaihdam a peihna, leh a dawhtheihna te chu a târ lang chiang hle a. A hnua Josua leh a thlahte hun lai chuan, a hnam pumin Pathian Jehova thupêk an zâwm a, remna leh thlarau lama malsâwmna an chên a ni. (Jos. 24:21, 22, 31) Chu chuan Pathian Jehova rorêl dân a hlawhtlinzia a târ lang.
Mihring Rorêlna Rah Chhuah Ṭha Lote
8, 9. Israelte chuan eng thil finthlâk lo tak nge an ngen a, chu chuan eng nge a rah chhuah?
8 Mahse, a hnuah chuan Israelte chuan Pathian rorêlna chu an kal pên san fo avângin a vênhimna chu an chân ta a. A tâwpah chuan, zâwlnei Samuela kal tlangin, Israelte chuan mita hmuh theih mihring lal neih chu an ngên ta hial a ni. Pathian Jehova chuan an dîlna chu phalsak tûrin Samuela a hrilh a. Mahse, Pathian Jehova chuan: “Nang duh lo che an ni lo va, an chunga lal atân keimah mi duh lo an ni zâwk e,” tiin a sawi belh a ni. (1 Sam. 8:7) Pathian Jehova chuan Israelte’n mita hmuh theih lal an neih chu phalsak mah se, mihring rorêlnain rah chhuah ṭha lo a neih tûr pawh a hrilh nghâl bawk a ni.—1 Samuela 8:9-18 chhiar rawh.
9 Thilthleng chanchin chuan Pathian Jehova thusawi dikzia chu a târ lang a. Mihring rorêlna chuan Israelte chungah buaina nasa tak a thlen a, lal rinawm lovin ro a rêl phei chuan a thlen lehzual a ni. Chu Israelte entîrna aṭanga han thlîr chuan, hun kal tawh zawng zawnga Pathian Jehova hre lo mihring sawrkârnain thil ṭha tluantling a thlen lo pawh hi a mak hran lo. Politician ṭhenkhat chuan remna leh himna nei tûra an thawhrimna chungah Pathian malsâwmna an dîl a; mahse, engtin nge Pathian chuan a rorêlnaa intulût lote chu mal a sâwm theih ang?—Sâm 2:10-12.
Pathian Rorêlna Hnuaia Hnam Thar
10. Engvângin nge Israelte chu Pathian hnam thlan an nih tâk loh?
10 Israel hnam chuan rinawm taka Pathian Jehova rawngbâwl chu an peih lo. A tâwpah chuan, Pathian ruat Messia chu an hnâwl a, Pathian Jehova pawhin anni chu hnâwl vein, hnam thara din tûr mi ṭhenkhatin a thlâk ta a. Chuvângin, C.E. 33-ah Jehova betu hriak thih Kristian kohhran a lo piang ta a ni. A nihna takah chuan chu kohhran chu Pathian Jehova thuneihna hnuaia awm hnam thar a lo ni a. Paula chuan “Pathian Israelte” tiin a ko a ni.—Gal. 6:16.
11, 12. Inenkawlna chungchângah atîra Israel hnam leh hnam thar “Pathian Israelte” inanna eng nge awm?
11 Atîra Israel hnam leh hnam thar “Pathian Israelte” chuan inanna leh inan lohna an nei a. Hmân lai Israelte ang lo takin, chu hnam thar, Kristian kohhran chuan mihring lal a nei ve lo va, mi sualte tâna rana inthawi a ngai lo bawk. Israel hnam leh Kristian kohhran inanna chu upaho an nei ve ve hi a ni. (Ex. 19:3-8) Chûng Kristian upate chuan berâmte chungah ro an rêl lo. Anni chuan kohhrana berâmte chu enkawlin, Kristian thiltihah taima takin hma an hruai a. Kohhrana mi tinte chu hmangaih taka dâwrin, an phu tâwk chawimawina leh zahna an lantîr ṭheuh a ni.—2 Kor. 1:24; 1 Pet. 5:2, 3.
12 “Pathian Israelte” zînga mite leh an ṭhian “berâm dang” te chuan Pathianin tisa lam Israelte a dâwr dân chhût ngunna aṭangin Pathian Jehova leh a rorêl dân an hre thiam lehzual a. (Joh. 10:16) Entîr nân, Israel rorêltute chuan a ṭhazâwng emaw, a chhezâwng emaw pawhin, an khua leh tuite chu nasa takin an thunun tih thilthleng chanchinte chuan a târ lang a. Chu chuan Kristian kohhrana hmahruaitute chu hmân lai lalte anga rorêltu ni lo mah se, rinna kawnga entawn tûr ṭha siam reng tûr an nihzia a hriattîr a ni.—Heb. 13:7.
Tûn Laia Pathian Jehova Rorêl Dân
13. Kum 1914 khân eng thil pawimawh tak nge thleng?
13 Tûn laia Kristiante chuan mihringte chunga mihring rorêlna khawvêl hi a tâwp ṭêp tawh tih an puang chhuak a. Kum 1914 khân Pathian Jehova chuan Lala a ruat Isua Krista kut hnuaiah a vân lam Lalram chu a din a. Chutih lai chuan, Isua chu ‘hneh chung leh hneh zêl tûra’ chhuak tûrin thuneihna a pe a ni. (Thup. 6:2) Lala ruat thar hnênah chuan: “Nangin nangmah dotute zîngah ro rêl rawh,” tia hrilh a ni. (Sâm 110:2) Lungchhiatthlâk takin, hnamte chu Pathian Jehova rorêlna hnuaiah an intulût ṭhîn lo va. “Pathian rêng a awm lo,” tia sawi ang maiin thil an tizawm zêl a ni.—Sâm 14:1.
14, 15. (a) Engtin nge tûn laiah Pathian Ram rorêlna hnuaia kan awm a, chu mi chungchângah chuan eng zawhnate nge kan inzawh ang? (b) Engtin nge tûn laiah pawh Pathian rorêlna chungnun bîkzia chu hmuh theih a nih?
14 Hriak thih “Pathian Israelte” zînga mi tlêm tê chu an la bâng a, Isua unaute an nih angin “Krista aia palai” hna an thawk chhunzawm a ni. (2 Kor. 5:20) Anni chu hriak thihte tân leh leia chatuana nun beiseina nei mipui pung chho zêl tûna mi maktaduai têl tling tawhte enkawl tûr leh thlarau lam chaw pe tûrin bâwih rinawm leh fing pâwla ruat an ni. (Mt. 24:45-47; Thup. 7:9-15) Chu ruahmanna chu Pathian Jehova’n mal a sâwm tih tûn laia betu dikte’n thlarau lam thil hnianghnâr taka an chen dân aṭang hian a chiang hle.
15 Heti hian kan inzâwt ṭheuh tûr a ni: ‘Kristian kohhrana ka mawhphurhna chu ka hre chiang em? Pathian Jehova rorêlna chu ṭha takin ka thlâwp em? Pathian Jehova Lalram khua leh tui ka nihna chu ka chhuang em? Pathian Ram chungchâng chu mi dangte hnênah ka theih ang tâwka hrilh zawm zêl ka tum tlat em? tiin. A huhovin, Governing Body pêk kaihhruaina hnuaiah inhuam takin kan intulût a, kohhrana upate chu kan thlâwp a ni. Chutiang chuan, Pathian rorêlna kan pawmzia kan târ lang a ni. (Hebrai 13:17 chhiar rawh.) Inhuam taka intukluhna chuan he inṭhen hranna khawvêla thil harsa tak khawvêl pum huapa inlungrualna chu a thlen a. Remna leh felna a rah chhuakin, Pathian Jehova chawimawina a thlen a, chu chuan a rorêlna chu a ṭha ber tih a târ lang a ni.
Pathian Rorêlna A Hlawhtling
16. Tûn laiah mi tinin eng thutlûkna nge an siam ngai?
16 Eden huana chawh chhuah thubuai chinfel hun tûr chu a thleng ṭêp tawh a. Chuvângin, mite tân tûn hi thutlûkna siam hun a ni. Mi tinte chuan Pathian Jehova rorêlna an pawm dâwn nge, mihring rorêlna an vuan tlat zâwk dâwn tih thutlûkna an siam ṭheuh a ngai a. Thutlûkna dik siam tûra mi thuhnuairawlhte ṭanpui chu kan tân chanvo hlu a ni. Nakin lawkah chuan, Armageddon-ah Pathian Jehova rorêlna chuan Setana thununna hnuaia mihringte sawrkârna chu a rawn thlâk hlen ang. (Dan. 2:44; Thup. 16:16) Mihring rorêlna chu a tâwp ang a, Pathian Ram chuan khawvêl pumah ro a rêl tawh ang. Pathian Jehova rorêl dân chu a taka thiam chantîr a ni tawh ang.—Thu Puan 21:3-5 chhiar rawh.
17. Mi thuhnuairawlhte chu rorêlna chungchânga thutlûkna dik siam tûrin engin nge ṭanpui?
17 Pathian Jehova lam ṭang tûra thutlûkna chiang tak la siam lote chuan Pathian rorêlnain mihringte chunga hlâwkna a thlen tûrte chu ngun takin an ngaihtuah tûr a ni. Mihring rorêlna chuan firfiaka chêtna pawh tiamin, dân bawhchhiatnate chu a tibo thei lova. Pathian rorêlna erawh chuan leilunga mi suaksual zawng zawng a tiboral vek ang. (Sâm 37:1, 2, 9) Mihring rorêlna chuan indonate chatlak lovin a thlentîr a, Pathian rorêlna erawh chuan “indonate chu kâwlkil thlengin a tireh” ang. (Sâm 46:9) Pathian rorêlna chuan mihringte leh ramsate inkârah pawh remna a awmtîr dâwn avângin! (Is. 11:6-9) Mihringte rorêlna hnuaiah chuan retheih leh ṭâm a awm reng a; mahse, Pathian rorêlna chuan a tireh vêk ang. (Is. 65:12) Rilru ṭha tak pu mihring rorêltute pawhin natna leh thihna chu an tibo thei lo va, Pathian rorêlna hnuaiah erawh chuan târte leh dam lote chu an vânglai nîah hlim takin an kîr leh ang a. (Job. 33:25; Is. 35:5, 6) Lei pum pui chu mitthite pawh an lo thawh lehna paradis-ah a lo chang tawh ang.—Lk. 23:43; Tirh. 24:15.
18. Engtin nge Pathian Jehova rorêl dân chu a ṭha ber tih kan rinzia kan târ lan theih?
18 Ni e, Pathian Rorêlna chuan Setan’n kan nu leh pa hmasa ber chu anmahni Siamtu hawisan tûra a thununna avânga lo awm hrehawm tawrhna zawng zawng chu a tireh ang. Setana’n kum 6,000 chhûng vêl hrehawm tawrhna a lo awmtîr tawh chu Pathianin kum 1,000 chhûngin Krista kal tlangin a tireh vek dâwn tih pawh hi han ngaihtuah bawk teh! Pathian rorêl dân chungnun zâwkzia finfiahna ropui tak a va ni êm! Kan Pathian tâna Thuhretu kan nih angin, amah chu Rorêltuah kan pawm a. Chuvâng chuan, nî tinin, a dârkâr tinin Pathian Jehova betu, a Lalram khua leh tui kan nihzia târ lang ila, a Thuhretu nihna chu i chhuang ang u. Tin, Pathian Jehova rorêl dân a ṭha ber tih a ngaithla duh apiangte hnêna hrilh theihna hun remchâng chu i hmaih lo vang u. (w10-E 01/15)
Hêng Bible Chângte Chhiarna Aṭangin Pathian Rorêlna Chungchâng Eng Nge Kan Hriat?
• Deuteronomy 7:7, 8.
• 1 Samuela 8:9-18.
• Hebrai 13:17.
• Thu Puan 21:3-5.
[Zirlai Atâna Zawhnate]
[Phêk 27-naa milemte]
Pathian Jehova chuan a rorêlna chu a kengkawh reng
[Phêk 29-naa milem]
Pathian Jehova rorêlna hnuaia inhuam taka intukluhna chuan khawvêl puma inlungrualna a awmtîr