Khawvêl Puma Buaina leh A Chinfel Hlenna

HAWINA lam apiangah hrehawm tawrhna hmuh tûr awm a, mi tam tak chuan chûng hrehawm tuarte chu lainat takin an ṭanpui a ni. Entîr nân, damdawi lama mithiamte chuan damdawi ina dam lote emaw, hliam tuarte emaw enkawl nân rei tak tak hna an thawk a. Kâng ṭhelhtute, police-te, dân siamtute, leh mi chhan chhuaktute chuan mi dangte hrehawm tawrhna chu dan emaw, chhâwk zângkhai emaw an tum a ni. Chûng thawh rimnate chuan mite chu a mi malin ṭanpui nasa hle mah se, khawvêl pum huapa hrehawm tawrhna nuai bo chu a mi mal emaw, a pâwl emaw ang pawhin tumahin an ti thei lo. Mahse, Pathian chuan a ti thei a, khawvêl pum huapin a rawn ching fel dâwn a ni.

Chutiang a nih tûrzia tiamkamna chu Bible bu hnuhnûng berah hmuh theih a ni: “[Pathian chuan] an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta,” tih chu. (Thu Puan 21:4) Chu thutiam chuan mi eng zât nge a nghawng dâwn tih chu han ngaihtuah teh? Chu chuan hrehawm tawrhna zawng zawng titâwp tûra Pathian thiltum chu tawi fel takin a sawifiah a ni. Ani chuan chu chu he leia indona te, ṭâm te, natna te, rorêl dik lohna  te, leh mi suaksual zawng zawngte tihbona hmangin a rawn ti dâwn a. Chu chu mihringte tih theih loh a ni.

Pathian Ramin A Tih Tûrte

Pathian chuan lei leh vâna thiltithei ber dawttu—tho leh Isua Krista—hmangin a thutiamte chu a hlen chhuak ang. Isua’n dodâltu nei lova he lei pumpui chunga Lal anga ro a rêl hun chu a lo thleng dâwn a. Mihringte chungah chuan mihring lalte, president-te, politician-te’n ro an rêl tawh lo vang a. Lal pakhat hnuaia sawrkârna pakhat—Pathian Ram—chuan anni chu a awp tawh zâwk ang.

Chu Lalram chuan mihring sawrkârna zawng zawng chu a tiboral vek dâwn a ni. Hun rei tak kal ta khân, Bible chuan: “Chûng lalte nîah chuan vân Pathianin ram a rawn din ang a, chu chu a chhe ngai tawh lo vang a, a lalna pawh mi dangte tân hnutchhiah a ni hek lo vang; hêng ram zawng zawngte hi a tikeh sawmin a tiral zâwk ang a, kumkhuain a ding reng ang,” tiin a sawi lâwk a. (Daniela 2:44) Lei pum puia mite chu sawrkâr fel pakhat—Pathian Ram—hnuaiah an inpumkhat dâwn a ni.

Isua chuan mihring anga leia a awm lai khân, chu Lalram chanchin chu vawi tam tak a sawi a. Ṭawngṭainaah pawh a telhin, a zirtîrte chu hetianga ṭawngṭai tûr hian a zirtîr a ni: “I ram lo thleng rawh se. I duhzâwng vâna an tih angin leia mi’n ti rawh se,” tiin. (Matthaia 6:10) Isua’n chu Lalram chu leia Pathian duhzâwng tih a nih tûr nên a inkûngkaihzia a târ lang tih hi lo chhinchhiah la, Pathian duhzâwng chu lei pumpuia hrehawm tawrhna zawng zawng nuai bo vek hi a ni.

Pathian sawrkârna fel chuan mihring sawrkârte’n a tih theih ngai loh malsâwmnate a rawn thlen dâwn a ni. Pathian Jehova chuan mihringte’n chatuan nunna an neih theih nân a Fapa chu tlanna atân a pe tih hre chhuak la. Lalram rorêlna dik leh ngilnei tak hnuaiah chuan mite’n ṭhat famkim lam an pan dâwn a ni. Eng nge a rah chhuah ang? Bible chuan: “[Pathian Jehova’n] Thihna chu a lem hlen ta; Lalpa PATHIAN chuan mi zawng zawng hmai ata chu mittuite a hru fai ang,” tiin a sawi.—Isaia 25:8.

Ṭhenkhat chuan heti hian an zâwt mai thei: ‘Engvângin nge Pathian chuan hma a lo lâk daih tawh loh? Eng nge a nghah a?’ tiin. Pathian Jehova chuan hrehawm tawrhna zawng zawng chu hmân aṭang tawhin a tiboral emaw, awm lo tûrin a dang hial emaw thei reng a. Mahse, chutianga ti lovin, a awm zawm zêl a phal a; mahni hmasial vâng ni lovin, leia a fate tâna chatuan hlâwkna tûr a nih vâng zâwk a ni. Hmangaihna ngah tak nu leh pa chuan an fa tâna hlâwkna tluantling a thlen dâwn tih an hriat chuan tûna harsatna a tawrh chu an phal ngei ang. Chutiang bawkin, Pathianin rei lote chhûng mihringte’n hrehawm an tawrh a phal chhan ṭha tak a awm a, chûngte chu Bible-ah min hrilhfiah a ni. Chutah chuan zalên taka duh thlan theihna te, sualna te, leh Pathian Jehova’n rorêl tûra dikna a neih chungchânga thu buaite a tel a ni. Bible chuan thil siam thlarau suaksual tak chu hun engemaw ti chhûng he khawvêla ro a rêl phalsak a nih chhan pawh a hrilhfiah bawk. *

Chûng a chhan zawng zawng chu he thuziakah hian hrilhfiah vek sêng lo mah ila, beiseina leh chakna min pe thei thil pahnih a awm a. A pakhatna chu hei hi a ni: Pathian Jehova chuan hrehawmna kan tawn engpawh aia nasa zâwkin mal min sâwm ang. Chu bâkah, Pathian chuan: “Tûn hma thilte chu hriat rengin a awm tawh lo vang a, rilruah pawh a lût tawh hek lo vang,” tiin min tiam bawk. (Isaia 65:17) Pathian chuan suahsualna engemaw chen awm a phal avânga lo awm lungngaihna leh hrehawm tawrhna chu chatuan atân a tiboral ang.

A pahnihna chu hei hi a ni: Pathian chuan hrehawm tawrhna tihtâwp hun tûr chu thlâk thleng theih lohvin a ruat. Zâwlnei Habakuka’n Pathian Jehova hnênah eng chen nge inpâwngnêkna leh innghirnghona awm a phal dâwn tih a zawh kha han ngaihtuah chhuak leh teh. Pathian Jehova chuan: “Inlârna hi hun ruat chhûng atân mai a ni . . . a tlai chuang lo vang,” tiin a chhâng a ni. (Habakuka 2:3) A dawta thuziaka kan la hmuh tûr angin, chu “hun ruat” chu a hnai hle tawh a ni. (w09-E 12/01)

[Footnote]

 [Phêk 7-naa bâwm]

Hun Hlimawm Tak Lo Thleng Tûr Târ Lanna Bible Chângte

INDONA A AWM TAWH LO VANG:

“Hawh u, LALPA thiltihte hi en rawh u, leilunga thil a tihchhiatziate hi. Ani chuan indonate chu kâwlkil thlengin a tireh ṭhîn.”—Sâm 46:8, 9.

HMANGAIH THI TAWHTE AN LO THO LEH ANG:

“Mi felte leh fel lote thawhlehna a awm ang.”—Tirhkohte 24:15.

MI TIN TAN EI TUR A AWM ANG:

“Leiah, tlâng chungahte hian, buh tam tak a awm ang a; a vui chu . . . a nghîng suau suau ang.”—Sâm 72:16.

NATNA A AWM TAWH LO VANG:

“Chu mi khuaa awm chuan ‘Ka dam lo ve,’ a ti lo vang.”—Isaia 33:24.

MI SUAKSUAL AN AWM TAWH LO VANG:

“Mi suaksualte erawh chu leilung ata tihboral an ni ang a, vervêk taka titute chu tihboral phiar an ni ang.”—Thufingte 2:22.

ROREL DIKNA A DINGCHANG ANG:

“Ngai teh, fel taka rorêl tûr lal [Isua Krista] a lo awm ang a, dik taka ti ṭhîn hotute an lo chhuak bawk ang.”—Isaia 32:1.

[Phêk 7-naa milemte]

Pathian Ram chuan kan hrehawm tawrh zawng zawng a tibo vang