Krista Zuitu Dik Tak Ni Rawh

“Thing ṭha apiang a rah ṭha ṭhîn a; thing chhia erawh chu a rah chhe ṭhîn.”—MT. 7:17.

1, 2. Engtin nge Krista zuitu dik takte chu, a bîk takin, he tâwpna hun chhûng hian hriat hran theih an nih?

ISUA chuan a rawngbâwltu nia dik lo taka inchhâlte leh a hnungzuitu dik takte chu an rah—an zirtîrna leh an nungchang—aṭanga thliar hran theih an nih tûr thu a sawi a. (Mt. 7:15-17, 20) Dik takin, mite chu an rilru leh thinlunga an thil lâk luhte chuan matheilovin a thunun ṭhîn. (Mt. 15:18, 19) Dâwt thu hlîr lalûttute chuan ‘rah chhia’ an chhuah a, thlarau lam thutak zirtîra awmte erawh chuan “rah ṭha” an chhuah ṭhîn.

² He tâwpna hun chhûng hian rah chhuah chi hnih chu chiang takin a lang a. (Daniela 12:3, 10 chhiar rawh.) Kristian dik lote chuan Pathian thil thlîr dân vei herh tak chu an nei a, vervêk takin Pathian ngaihsak anna an nei a ni; thlarau lama hriatna neite erawh chuan Pathian chu “thlarau leh tih tak zetin” chibai an bûk thung. (Joh. 4:24; 2 Tim. 3:1-5) Anni chuan Krista neih ang miziate chu târ lan an tum a. Keini eng nge kan an ve? A hnuaia Kristian dik chhinchhiahna chi ngate hi i ngaihtuah pahin heti hian inzâwt ang che: ‘Ka nungchang leh zirtîrna chu Pathian Thu nên a inmil em? Ka  nungchang leh ka zirtîrna chuan thutak lamah mi a hîp em?’ tiin.

Pathian Thu Nunpui Rawh

3. Engin nge Pathian tilâwm a, Kristian dikte tân chutah chuan eng nge tel?

³ “‘Lalpa, Lalpa’ mi ti nazawng chu vân ramah an lût lo vang a; ka Pa vâna mi duhzâwng titu erawh chu an lût ang,” tiin Isua chuan a sawi a. (Mt. 7:21) Ni e, Kristiana inchhâlna mai chuan Pathian Jehova a tilâwm lo va, thiltiha lantîrna hian a tilâwm zâwk a ni. Chutah chuan, Krista zuitu dik takte tân an nun kawng zawng zawng, sum leh pai lama an rilru put hmang te, hnathawh te, intihhlimna te, khawvêl thil chîn ṭhante leh kût nîte, nupui pasal inneih leh mi dangte nêna an inlaichînna thlengin a tel a ni. Mahse, Kristian dik lote chuan he hun hnuhnûng chhûnga Pathian ngaihsak lozâwnga pung deuh deuh, khawvêl ngaituahna leh kawngte chu an chhawm a ni.—Sâm 92:7.

4, 5. Malakia 3:18-a Pathian Jehova thute hi engtin nge kan nunpui theih?

⁴ Zâwlnei Malakia chuan: “Mi fel leh mi suaksual, Pathian rawngbâwltu leh bâwl lotu chu in thliar thei tawh ang,” tiin a ziak a. (Mal. 3:18) Chûng thute ngaihtuah pahin heti hian inzâwt rawh: ‘Khawvêla mite nên kan inang em, nge an lakah ka dang lam bîk? School-ah emaw, hnathawhnaah emaw pawh ni se, pâwn lama ka ṭhiante mila awm ka tum ziah nge, a inâwm hunah chuan ṭawng pawh ṭawng chhuak hialin Bible thu bulte ka vuan tlat zâwk?’ tiin. (1 Petera 3:16 chhiar rawh.) Mahni intifel anga lan chu kan duh lo ngei mai; mahse; Pathian Jehova hmangaih lotute leh a rawngbâwl lotute lakah chuan kan danglam tûr a ni.

⁵ Hmasâwnna tûr nei nia i inhriat chuan, chu mi chungchângah engvângin nge Bible zir ziahna te, ṭawngṭai ziahna te, leh inkhâwm ziahna te hmanga thlarau lama chakna i zawn loh vang? Pathian Thu chu i nunpui zawh poh leh “Pathian . . . hming ṭanna hmuite rah” pawh tiamin “rah ṭha” i chhuah lehzual dâwn a ni.—Heb. 13:15.

Pathian Ram Thu Hril Rawh

6, 7. Lalram thuchah hrilh chungchângah, Kristian dik leh dik lo danglamna eng nge hmuh theih a nih?

⁶ Isua chuan: “Khaw dangahte pawh Pathian ram chanchin ṭha ka hril tûr a ni, chu mi avâng chuan tirh ka ni si a,” tiin a sawi a. (Lk. 4:43) Engvângin nge Isua chuan a rawngbâwlnaah Pathian Ram chu thupui bera a hman? Ani chuan Pathian Rama Lal niin, thlarauva kaihthawh a unaute nên mihringte chungpikna awmtîrtu ber—sual leh Diabola—chu an tiboral dâwn tih a hria a. (Rom 5:12; Thup. 20:10) Chuvângin, khawvêl tâwp thlenga chu Lalram thu chu puang chhuak tûrin a hnungzuitute thu a pe a ni. (Mt. 24:14) Krista hnungzuitu derte chuan he hna hi an thawk ve lo—a nihna takah chuan an thawk thei lo a ni. Engvângin nge? A lo berah a chhan pathum a awm: A pakhatnaah chuan, an hriatthiam loh thu chu an hril thei lo va. A pahnihnaah chuan, mi tam zâwkte chuan an vêngte hnêna Lalram thuchah hrilnaa an tawn theih nuihsawhna leh dodâlna hmachhawn tûrin inngaihtlâwmna leh huaisenna an nei lo a ni. (Mt. 24:9; 1 Pet. 2:23) A pathumnaah chuan Kristian dik lote chuan Pathian thlarau an nei lo a ni.—Joh. 14:16, 17.

⁷ Krista hnungzuitu dik takte erawh chuan Pathian Ram leh chu miin a hlen chhuah tûrte chu an hre thiam a. Chu bâkah, Pathian Jehova thlarau ṭanpuinain an nunah chu Lalram hmakhua chu an dah hmasa a, khawvêl pumah an puang chhuak a ni. (Zak. 4:6) He rawngbâwlnaah hian i tel ziah em? Rawngbâwlnaa hun tam lehzual hmanna emaw, thiam lehzuala hrilhna emaw hmangin Lalram thu puang chhuaktu hmasâwn tak nih i tum em? Ṭhenkhat chuan Bible thiam lehzuala hmangin an rawngbâwlna chu tihhmasâwn an tum a ni. Pathian Lehkha Thu aṭanga khûn taka chhûtpui ṭhîntu tirhkoh Paula chuan: “Pathian thu hi a nung a, thil a ti thei,” tiin a ziak a ni.—Heb. 4:12; Tirh. 17:2, 3.

8, 9. (a) Eng thiltawnte’n nge kan rawngbâwlnaa Bible hman a hlutzia târ lang? (b) Engtin nge Pathian Thu thiam lehzuala kan hman theih?

⁸ Unaupa pakhat chuan, in tin a kal laiin Catholic pa pakhat hnênah Daniela 2:44 chu chhiarsakin, Pathian Ramin remna leh himna dik tak a rawn thlen dân tûr chu a hrilhfiah a. Chu pa chuan: “Ṭawngkama min hrilh mai lo va, Bible châng keu ngeia min kawhhmuh avângin ka lâwm tak zet a ni,” tiin a sawi. Unaupa pakhatin Greek Orthodox nu pakhat Bible  châng a chhiarsak chuan, chu nu chuan zawhna ṭha tak tak engemaw zât a zâwt a ni. Chu mi ṭum pawh chuan unaupa leh a nupui chuan Bible aṭangin a zawhnate chu an chhânsak a. A hnuah chu nu chuan: “Ka biak duh chhan che u in hria em? Bible kengin in rawn kal a, chu mi aṭang ngeia in chhiar bawk vâng a ni,” a ti.

⁹ Kan thu leh hla chhuahte chu a pawimawhin, rawngbâwlnaah kan pe chhuak tûr a ni ngei mai. Mahse, Bible chu kan hmanrua ber a ni a. I rawngbâwlnaah Bible i hmang ṭhîn lo a nih chuan, engvângin nge hman ṭhin chu i tum loh vang? Pathian Ram nihna hrilhfiahtu leh chu miin tualchhûnga mite ngaihmawh buainate a tihven dân tûr hrilhfiahtu Bible châng ṭhenkhat chu i thlang thei a. Tichuan, in tin kal huna chhiar atân i inbuatsaih thei a ni.

Pathian Hming Chu Chhuang Takin Pu Rawh

10, 11. Pathian hming hman chungchângah, Isua leh a hnungzuitu nia inchhâl mi tam takte inan lohna chu eng nge ni?

¹⁰ “Nangni hi ka thu mi hriatpuitute in ni, LALPAN a ti, tin, kei chu Pathian ka ni.” (Is. 43:12) Pathian Jehova hriatpuitu, a nih loh leh thuhretu langsâr ber, Isua Krista chuan Pathian hming put leh mite hnêna hriattîr chu chawimawinaah a ngai a. (Exodus 3:15; Johana 17:6; Hebrai 2:12 chhiar rawh.) Dik takin, a Pa hming a puan chhuah avângin, Isua chu “thu hretu rinawm tak,” tia koh a ni.—Thup. 1:4, 5; Mt. 6:9.

¹¹ Inkalh takin, Pathian leh a Fapa aiawhtu anga inchhâl mi tam tak chuan Pathian hming chungah rilru put hmang zahthlâk tak an lantîr a, an Bible lehlinah pawh a hming chu an paih hial a ni. Chutiang bawk rilru put hmang chu lantîrin, tûn hnai maia Catholic bishop-te hnêna kaihhruaina thar pêkah chuan biakna neih chhûngin “Pathian hming tetragrammaton-a YHWH tih chu hman emaw, lam rîk emaw tûr a ni lo” tia târ lan a ni. * Chutiang ngaihtuah dân chu a va demawm tak êm!

12. Kum 1931 khân engtin nge Jehova chhiahhlawhte chu Pathian Jehova hming hmerha hriat an lo nih lehzual?

¹² Krista leh a awm hmaa mi ‘chhûmpui nasa tak ang thlîrtute’ chu entawnin, Kristian dikte chuan Pathian hming chu chhuang takin an hmang a. (Heb. 12:1, 2) Kum 1931-a Jehova Thuhretute tih hming an invuah tâkah chuan, Pathian chhiahhlawhte chu Pathian Jehova hming hmerha hriat an lo ni lehzual ta a ni. (Isaia 43:10-12 chhiar rawh.) Chutiang chuan, Krista hnungzuitu dik takte chu kawng pawimawh takin ‘Pathian hming pute’ an lo ni ta a ni.—Tirh. 15:14, 17.

13. Engtin nge Pathian min pêk hming mila kan nun theih ang?

¹³ Engtin nge a mi mal takin kan hming danglam bîk tak mila kan nun theih ang? Kawng khatah chuan, rinawm taka Pathian chanchin hrilhin a ni. Paula chuan: “‘Tupawh Lalpa hming lam apiangte chu chhandamin an awm ang,’ tih a ni a. A nih leh, an rin lohva chu engtin nge an lam ang? A thu an hriat lohva chu engtin nge an rin ang? Thu hriltu awm lovin engtin nge an hriat ang? Tirh an nih loh chuan engtin nge thu an  hril ang?” tiin a ziak a. (Rom 10:13-15) Chu bâkah, min Siamtu sawichhiatna sakhaw lam thu dik lo tak—hmangaihna Pathiana Diabola nunrâwnna hmehbeltu—hremhmun meidîl thurin ang chite chu thiam takin kan hai lang tûr a ni.—Jer. 7:31; 1 Joh. 4:8; Marka 9:17-27 nên khaikhin rawh.

14. Mi ṭhenkhatin Pathian hming an han hriat chuan engtin nge an chhân lêt?

¹⁴ Kan Pa vâna mi hming putu i nihna chu i chhuang em? Chu hming thianghlim chu hre ve tûrin mi dangte i ṭanpui em? France ram, Paris khawpuia nu pakhat chuan Jehova Thuhretute’n Pathian hming an hria tih a hriat chuan, a hnua Thuhretu a tawn hnênah ama Bible-a chu hming awmna chu kawhhmuh tûrin a ngên a ni. Sâm 83:18 a han chhiar chuan, a chungah nghawng nasa tak a nei a. Ani chuan Bible a zir ṭan a, tûnah chuan ram danga rawng bâwl unaunu rinawm tak a ni tawh a ni. Australia rama awm Catholic nu pakhat chu Bible-a Pathian hming a hmuh hmasak ber ṭum chuan lâwm avângin a ṭap hial a. Tûnah chuan, kum tam tak chhûng regular pioneer a thawk tawh. Tûn hnai mai khân, Jamaica rama Thuhretute chuan nu pakhat chu ama Bible ngei aṭanga Pathian hming an han hmuh chuan, ani pawh lâwm avângin a mittui a thla a ni. Chuvâng chuan, Isua entawnin Pathian hming putu i nihna leh mi zawng zawng hnêna chu hming hlu tak puang chhuaktu i nihna chu chhuang ang che.

‘Khawvêl Hi Hmangaih Suh U’

15, 16. Kristian dikte chuan khawvêl hi engtin nge an thlîr a, eng zawhnate nge kan inzawh theih?

¹⁵ “Khawvêl hi hmangaih suh ula, khawvêla thil awmte pawh hi hmangaih hek suh u. Mi tupawhin khawvêl hi a hmangaih chuan Pa a hmangaihna amahah a awm lo.” (1 Joh. 2:15) Khawvêl leh a tisa lam rilru put hmang chuan Pathian Jehova leh a thlarau thianghlim a kalh a. Chuvâng chuan, Krista hnungzuitu dik takte chu khawvêl ata an inlahrang mai a ni lo. Zirtîr Jakoba’n: “Khawvêl ṭhian nihna hi Pathian hmêlma nihna a ni,” tia a ziah chu hre rengin an hnâwl ṭhak a ni.—Jak. 4:4.

¹⁶ Thlêmna chhiarsên loh awmna khawvêlah hian Jakoba thute nunpui chu a harsa thei a. (2 Tim. 4:10) Chuvâng chuan Isua chu a hnungzuitute tân heti hian a ṭawngṭai a ni: “Nangin anni chu khawvêl ata i lâk chhuah tûra ngên ka ni lo va, mi sual lakah chuan i hum tûr ka ti zâwk a ni. Anni chu khawvêla mi an ni lo, kei khawvêla mi ka ni lo ang bawk hian,” tiin. (Joh. 17:15, 16) Hetiang hian inzâwt ang che: ‘Khawvêl mi nih loh ka tum tlat em? Bible nêna inrem lo kût nî leh hnam chîn dân te, milem biakna aṭanga lo chhuak ni chiah chuang lo, khawvêl thlarau chiang taka târ lang si thilte ka thlîr dân chu mi dangte chuan an hria em?’ titein.—2 Kor. 6:17; 1 Pet. 4:3, 4.

17. Mi rilru ṭha pute chu Pathian Jehova lam ṭang tûrin engin nge chêttîr thei?

¹⁷ Bible ṭanchhana kan dinna chuan khawvêl lawm min hlawh lohtîr ngei ang; mahse, mi rilru ṭha pute ngaihven min hlawhtîr thei thung a ni. A dik a dik chuan, kan rinna chuan Bible-ah nghet takin zung a kaih tlat tih leh kan nun pumpui nên a inkûngkaih tlat tih chûng mi rilru ṭha pute’n an hmuh chuan: “I hnênah Pathian a awm tih kan hriat avângin i hnênah kan kal ve dâwn e,” tia hriak thihte hnêna sawina hmangin an chhâng lêt mai thei asin.—Zak. 8:23.

Kristian Dik Hmangaihna Lantîr Rawh

18. Pathian Jehova leh kan ṭhenawmte hnêna hmangaihna lantîrnaah eng nge tel?

¹⁸ Isua chuan: “Lalpa i Pathian chu i thinlung zawng zawngin, i thlarau zawng zawngin i rilru zawng zawngin i hmangaih tûr a ni,” tih leh “nangmah i inhmangaih angin i vêngte pawh i hmangaih tûr a ni,” tih a sawi a. (Mt. 22:37, 39) Chu hmangaihna (Grik ṭawnga a·gaʹpe) chu tih tûr hriatna te, thu bul te, leh thil âwm leh mawi tea innghat hmangaihna dik a ni a; mahse, rilrua nasa taka veina nên a inzawm fo. Chu chu duhawm tak a niin, a nasa hle thei bawk. (1 Pet. 1:22) Chu hmangaihna chu mahni ṭânghma hai lo ṭawngkam leh thiltiha lantîr a nih avângin, mahni hmasialna nên a inkalh chiah a ni.—1 Korinth 13:4-7 chhiar rawh.

19, 20. Kristian hmangaihnain thil a tihtheihzia târ langtu thiltawn ṭhenkhat sawi rawh.

 ¹⁹ Hmangaihna chu Pathian thlarau thianghlim rah chhuah a nih avângin, chu chuan Kristian dikte chu hnam te, chi te, leh politics te avânga indaidanna nei lovin a awmtîr thei a, chu chu mi dangte tih ve theih loh a ni. (Johana 13:34, 35 chhiar rawh; Gal. 5:22) Chutiang hmangaihna chuan berâm ang mite rilru chu mathei lovin a khawih a ni. Entîrna nân, Israel rama Juda tlangvâl pakhat chuan Kristian inkhâwma a tel hmasak ber ṭuma Juda unaute leh Arab unaute’n lungrual taka Pathian Jehova an be tlâng a hmuh chuan mak a ti hle a. A inkhâwm ziah phahin, Bible pawh a zir phah ta a ni. Chutianga tih tak zeta hmangaihna chu i unaute chungah i lantîr em? Eng hnam pawh, eng vun râwng pawh, a nih loh leh eng dinhmuna ding pawh ni se, in Kingdom Hall-a mi thar lo tel vete chu phûr taka lo lâwm tûrin ṭan i la em?

²⁰ Kristian dik kan nih angin, mi zawng zawng chungah hmangaihna lantîr chu kan tum tlat a. El Salvador rama thuchhuahtu ṭhalai pakhat chuan pitar kum 87 mi, Catholic ruh tak pakhat chu Bible a zirpui a. Ni khat chu, a dam loh vak avângin damdawi ina dah luh a ni a. Damdawi in aṭanga a lo chhuah chuan, chaw a ei ngei tih chian tûrin Thuhretu unaunute’n an va tlawh a. Chutiang chuan thla khat vêl lai an ti a ni. An kohhran aṭang erawh chuan tumahin an tlawh lo. Eng nge a rah chhuah? Ani chuan a milemte chu paih bovin, an kohhranah bânna a theh lût a, Bible a zir chhunzawm a ni. Ni e, Kristian hmangaihna chuan thil a va tithei tak êm! Chu chuan thu hrilh mai aiin mite thinlung a hneh thei zâwk a ni.

21. Engtin nge nakin hun him tak kan neih theih ang?

²¹ Isua’n nakin lawkah chuan a rawngbâwltu nia dik lo taka inchhâlte hnênah: “Nangni thil sual tite u, ka hre ngai lo va che u, ka hnên ata kal bo rawh u,” tiin a la sawi ang. (Mt. 7:23) Chuvâng chuan, Pa leh Fapa chawimawi ve vetu rah chu i chhuah ang u. Isua chuan: “Mi tin hêng ka thu hi hriaa zâwm apiang chu, mi fing lungpui chunga in satu nên tehkhin tûr a ni,” tiin a sawi a ni. (Mt. 7:24) Ni e, Krista hnungzuitu dik tak kan nihzia kan tar lan chuan, Pathian duhsak kan hlawh ang a, lungpui chunga in sa ang maiin kan nakin hun chu a him dâwn a ni. (w10-E 01/15)

[Footnote]

Kan Hre Chhuak Thei Em?

• Engtin nge Krista zuitu dik takte chu a dik lote laka an hriat hran theih?

• Kristian dik tar langtu “rah” ṭhenkhat sawi rawh.

• Kristian rah i chhuah nân, eng thiltumte nge i insiam theih?

[Zirlai Atâna Zawhnate]

[Phêk 19-naa milem]

Rawngbâwlnaah Bible i hmang ṭhîn em?

[Phêk 21-naa milem]

Bible nêna inrem lo kût nî leh thla lawm chungchâng i thlîr dân mi dangte’n an hria em?