Setana Rorêlna A Hlawhchham Ngei Ngei Dâwn
Setana Rorêlna A Hlawhchham Ngei Ngei Dâwn
“Mi suaksual tân kha chuan a ṭha lo vang a.”—THUR. 8:13.
1. Engvângin nge mi suaksualte chunga rorêlna lo thleng tûr chu chanchin thlamuan thlâk tak a nih?
ENGTIK nîah emaw chuan mi suaksualte chuan rorêl dikna chu an la tawng ngei dâwn a. An thiltih tawhte avânga an la insawifiah ngei a ngai dâwn a ni. (Thuf. 5:22; Thur. 8:12, 13) Chu chu chanchin thlamuan thlâk tak a ni; a bîk takin felna ngainatute, mi suaksualte kuta rorêl dik lohna leh tihretheihna tuartute tân a ni lehzual. Rorêl dikna tuartu tûrte zînga a langsâr ber chu mi suaksualte pa, Diabol-Setana a ni.—Joh. 8:44.
2. Engvângin nge Eden huana chawh chhuah buaina chinfel nân hun a ngaih?
2 Eden huanah khân, mahni inngaih pawimawhna rilruin a thunun Setana chuan mihringte chu Pathian Jehova rorêl dân a hnâwltîr a. Chu mi avâng chuan, kan nu leh pa hmasa ber chuan Pathian Jehova’n rorêl tûra dikna a neih chonaah Setana an zâwm a, Pathian mit hmuhah mi sual an lo ni. (Rom 5:12-14) Dik takin, Pathian Jehova chuan zahpah an neih lohna leh an helnain an chunga thil a thlen tûr chu a hria a ni. Mahse, chu thil lo thleng ngei ngei tûr chu finna nei thil siam zawng zawng hnêna tihlan a ngai a. Chuvângin, chu buaina chin fel nân leh hel hmangte dik lohzia chiang taka târ lan nân hun a ngai a ni.
3. Engtin nge mihring sawrkârna hi kan thlîr ang?
3 Mihringte’n Pathian Jehova enkawlna an hnâwl aṭang chuan, mahnia sawrkârna an din a ngai ta a. Tirhkoh Paula chuan Rom khuaa a rinpuite hnênah chutiang mihring sawrkârte chu “an chunga rorêltute” tiin a sawi a ni. Paula hun lai chuan, chûng an chunga rorêltute chu C.E. 54-68 chhûnga rorêltu, Lal Nero hnuaia Rom sawrkâra thuneitute an ni deuh ber a. Paula chuan chûng an chunga rorêltute chu: “Pathian ruat an ni,” tiin a sawi a ni. (Rom 13:1, 2 chhiar rawh.) Paula’n Pathianin mihringte sawrkârna kal tlangin ro a rêl a tihna a ni em? Ni hauh lo. Pathian Jehova’n mihring rorêlna awm a phal chhûng chuan Kristiante’n “Pathian ruat” anga sawi theih mihring rorêltute an zah tûr a ni, a tihna mai zâwk a ni.
Chhiatna Thlentu Kawng Chu
4. Mihringte rorêlna a tlûk chhiat ngei ngei chhan tûr hrilhfiah rawh.
4 Setana thunun mihringte rorêlna chu a hlawhchham ngei ngei dâwn a ni. Engvângin nge? A chhan pakhat chu Pathian finnaa a innghah loh vâng a ni. Pathian Jehova chauhvin finna ṭha famkim a nei a. Chuvângin, amah chauh hi rorêlna hlawhtling din tûrin kaihhruaina rin tlâk pe theitu a ni. (Jer. 8:9; Rom 16:27) Harsatna leh thiltih sualna aṭanga inzir ṭhîn mihringte ang lo takin, Pathian Jehova chuan englai pawhin thiltih dân kawng ṭha ber chu a hria a. A kaihhruaina zâwm lo sawrkâr tawh phawt chu a hlawhchham ngei ngei dâwn a ni. A thiltum suaksual tak chu sawi loh, chu ringawt pawh chu atîr aṭanga mihringte hmanga Setana rorêlna hlawhchham chhan tûr a tling a ni.
5, 6. Setana’n Pathian Jehova a dodâl chhan chu eng nge ni thei ang?
5 Mi pângngai chuan a tâwpa hlawhchham tûr tih hriatsa thil engemaw ûm chu a pumpelh tlângpui ṭhîn. Chu thil chu ûm lui ta se chuan, a thil tihsual pawm luihtîr a ni ngei ang. Engkimtithei Siamtu dodâlna chuan sâwtna rêng a nei lo tih thilthleng chanchinte chuan a finfiah tawh a ni. (Thufingte 21:30 chhiar rawh.) Amaherawhchu, Setana chuan mahni a inngaih pawimawhna leh a chapona avângin Pathian Jehova chu a hnuchhawn tlat a. Chutiang chuan, a tâwpa chhiatna thlen tûr kawng chu a zawh lui tlat a ni.
6 Setana chapona rilru put hmang chu a hnuah Babulon lal pakhat chuan: “Vânah ka chho vang a, Pathian arsite chung lamah khian ka lalṭhutphah ka chawi sâng ang; tin, inkhâwmna tlâng, hmâr tâwp rêta awmah chuan, ka ṭhu ang a: chhûm aia sâng zâwkahte khian ka chho vang a; Chungnungbera ang maiin ka awm ang,” tia sawiin a lo lantîr a ni. (Is. 14:13-15) Chu rorêltu thiltih âtthlâk tak chu a hlawhchham a, Babulona lalna kal zêl pawh zahthlâk takin a tâwp ta a ni. Chutiang bawkin, Setana leh a khawvêl pawh hi tihchhiat vek a ni thuai ang.
Engah Nge A Phal?
7, 8. Pathian Jehova’n suahsualna awm rih a phal avânga hlâwkna ṭhenkhat chu engte nge ni?
7 Ṭhenkhat chuan Pathian Jehova’n mihringte chu Setana lam ṭang lo tûr leh hlawhchham tho tho tûr mihringte rorêlna zâwm lo tûra a dan loh chhan chu an ngaihtuah mai thei a. Pathian Engkimtithei a nih angin, a dang thei ngei a ni. (Ex. 6:3) Mahse, chutiang ti lo tûrin a insûm rih a. A finna avângin mihringte helnaa inrawlh rih lohnain nakinah thil ṭha ber a thlen dâwn tih a hria a ni. A tâwp a tâwpah chuan, Pathian Jehova chu Rorêltu fel leh hmangaihna ngah a nihzia finfiah a niin, mi rinawmte chuan Pathian thutlûkna siam chu an hlâwkpui ang.
8 Mihringte chuan Setana hma lâkna leh Pathian rorêlna laka inlâkhran tum tlatna chu hnâwl se chuan, lungngaihna hi a va awm dâwn lo êm! Chutiang a ni chung pawhin, Pathian Jehova’n mihringte mahnia ro an inrêl rih a phalna chuan hlâwkna a nei a ni. Chu chuan mi rilru ṭhate thinlungah Pathian thu âwih leh amah rinchhan a finthlâkzia a tuh nghet hle a ni. Kum zabi tam tak chu, mihringte chuan sawrkârna hrang hrang an lo din tawh a; mahse, duhthusâm rêng a awm lo. Chu chuan Pathian betute chu Pathian Jehova rorêl dân a ṭha ber tih rinnghehna a neihtîr a ni. Pathian Jehova’n Setana rorêlna suaksual tak awm rih a phalna chuan, amah betu rinawmte pawh tiamin mihringte tân harsatna zawng a thlen ngei mai. Chuti chung pawhin, chûng betu rinawmte tân chuan hlâwkna a thlen bawk a ni.
Pathian Jehova Chawimawina Hmanruaa Ṭang Ta Helna
9, 10. Setana rorêlnain Pathian Jehova a chawimawi dân hrilhfiah rawh.
9 Mihringte Setana thununna hnuaia an awm leh mahnia ro an inrêl phalsakna chuan Pathian Jehova ro rêl dân chu engti kawng mahin a tihmingchhe lo. A chawimawi hlauh thung a ni. Thilthleng chanchin chuan, thlarau thâwk khuma Jeremia’n mihringte mahnia ro an inrêl theih lohzia a sawi chu a finfiah a ni. (Jeremia 10:23 chhiar rawh.) Chu bâkah Setana helna chuan Pathian Jehova chu A mize ṭhate fiah lehzuala târ lan theihna hun remchâng a pe a ni. Engtin nge a nih theih?
10 Setana rorêlnain rah chhe tak a chhuah tih kan hmuh theih avângin, Pathian Jehova mize ṭha famkimte chu a lan chian phah a, chuti ni lo se chuan a lang chiang lo pawh a ni mai thei. Chutiang chuan, Pathian chu amah hmangaihtute mithmuhah chawimawiin a awm. Ni e, âwm lo takin a lang naa, a nihna takah chuan Setana rorêl dân chu Pathian chawimawina hmanruaah a ṭang a ni. Chu chuan Pathian Jehova’n a lalchungnunna chona chu kawng ṭha chungchuanga a chhân lêt dân a târ lang a. Chu mi finfiah nân, Pathian Jehova mize ṭhenkhatte chu tâwi têa ngaihtuahin, chûng miziate kawng danga lantîr tûra Setana rorêlna suaksualin a chêttîr dân i lo en ang u.
11. Engtin nge Pathian Jehova hmangaihna a lan chhuah?
11 Hmangaihna. Bible chuan “Pathian chu hmangaihna a ni,” tih min hrilh a. (1 Joh. 4:8) Pathianin mihringte a siam chu a bul berah chuan A hmangaihna târ lanna a ni. Chu bâkah, hlauhawm tak leh mak taka siam kan nihna chuan Pathian hmangaihna a târ lang bawk. Pathian Jehova chuan mihringte chu an hlim nâna thil ṭûl zawng zawng awmna leilung mawi tak chu hmangaih takin a pe bawk a. (Gen. 1:29-31; 2:8, 9; Sâm 139:14-16) Mahse, suahsualna chu mihringte hnêna hmêlhriattîr a nih chuan Pathian Jehova’n a hmangaihna chu kawng tharin a târ lang a ni. Engtin nge? Tirhkoh Johana chuan Isua thusawi: “Pathianin khawvêl a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân,” tih chu a la chhâwng a ni. (Joh. 3:16) Pathian tân mi sualte tlan nâna leia a Fapa mal neih chhun rawn tirh aia mihringte chunga a hmangaihna lantîr dân kawng ṭha zâwk a awm thei dâwn em ni? (Joh. 15:13) Chu hmangaihna lantîrna ropui tak chu mihringte tân entawn tûr a ni bawk a, chu chuan Isua tih anga an nî tin nuna Pathian neih ang mahni hmasial lo hmangaihna târ lanna hun remchâng a pe a ni.—Joh. 17:25, 26.
12. Eng kawngin nge Pathian Jehova thiltihtheihna chu lantîr a nih?
12 Thiltihtheihna. Amah chauh hi “Pathian, Engkimtithei” nunna siam tûra thiltihtheihna nei a ni. (Thup. 11:17; Sâm 36:9) Mihringte chu an han pian chhuah hian, lehkha puan la ziak loh ang an ni a. An han thih hian an dam chhûnga an nihna leh an mize duangtu an thutlûkna siamte, an thiltihte, an thiltawntein chu lehkha puan la ziak loh chu ziah khah a lo ni ta a ni. Chu chu Pathian Jehova hriat rengnaa dah ṭhat a ni a. A hun takah, Pathian Jehova chuan anmahni nih dân phung ang tak chu pekîrlehin, a tinung leh thei a ni. (Joh. 5: 28, 29) Chutiang chuan, mihringte thih chu atîr aṭanga Pathian thiltum ni lo mah se, thihna chuan Pathian Jehova chu thihna ai pawha thiltithei zâwk a nihzia lantîrna hun remchâng a pe a ni. Ni e, Jehova chu “Pathian, Engkimtithei” a ni tak meuh a ni.
13. Engtin nge Isua inthawina chu Pathian Jehova rorêl dikna ṭha famkim târ lanna a nih?
13 Rorêl Dikna. Pathian Jehova chuan dâwt a sawi ngai lo va, dik lo takin thil a ti ngai hek lo. (Deut. 32:4; Tit. 1:1, 2) Ani chuan a sâwtpui loh tûr nia a lan hunah pawh thutak leh rorêl dikna tehna sâng tak chu a vawng reng a ni. (Rom 8:32) Pathian Jehova tân chuan Pathian sawichhetu mi rinawm lo anga a Fapa duh tak nghaisakna bana a thi lai hmuh chu a va na dâwn êm! Mahse, mihring ṭha famkim lote a hmangaih avângin, Pathian Jehova chuan rorêl dikna tehna ṭha famkim vawng tûrin chu thil hrehawm tak chu a thlen a phal a ni. (Rom 5:18-21 chhiar rawh.) Rorêl dik lohnaa khat khawvêl hian Pathian Jehova chu rorêl dik ber a nihzia târ lan theihna hun remchâng a pe a ni.
14, 15. Pathian Jehova finna leh dawhtheihna ṭha chungchuang lan dân kawng ṭhenkhatte chu eng nge ni?
14 Finna. Adama leh Evi an sual hnu lawkah Pathian Jehova chuan an helnain a rah chhuah ṭha lo zawng zawng tih bo dân kawng chu a târ lang nghâl a. (Gen. 3:15) Chutianga hma lâk vatna leh a chhiahhlawhte hnêna chu thiltum chu zâwi zâwia kimchang taka a târ lanna chuan, Pathian Jehova finna chu fiah takin a târ lang a ni. (Rom 11:33) Pathian Jehova’n hlawhtling taka thil a chinfel theihna chu engmahin a tibahlah thei lo. Nungchang chhiatna te, indona te, âwm lo taka thil tihna te, thuâwih lohna te, nunrâwnna te, hleih neihna te, vervêkna tea khat khawvêlah hian Pathian Jehova chuan finna nei a thilsiamte hnênah finna dik tak nihna târ lan theihna hun remchâng tam tak a nei a ni. Zirtîr Jakoba chuan: “Chung lam aṭanga finna lo chhuak erawh chu atîrin a thianghlim phawt a, chu mi hnuah chuan inrem a duh a, a nunnêm a, a tihnuam a, khawngaihna leh rah ṭhain a khat a, thlei bîk a nei lo va, a vervêk lo a ni,” tiin a sawi.—Jak. 3:17.
15 Dawhtheihna leh Chhelna. Pathian Jehova chuan mihringte famkim lohnate, sualnate, leh tlin lohnate hi a dâwr ngai lo ta sela chuan, a dawhtheihna leh chhelna miziate hi a langsâr lutuk lo mai thei a. Kum sâng tam tak chhûng inhuam taka dawhtheihna leh chhelna a lantîrna chuan chûng mize ropui takte chu sawisêl bova a neihzia a târ lang a, a chungah kan lâwm hle tûr a ni. ‘Kan Lalpa dawhtheihzia chu chhandamnaa ruat’ tûr kan nihzia tirhkoh Petera’n dik takin a sawi a ni.—2 Pet. 3:9, 15.
16. Engvângin nge Pathian Jehova ngaihdam inhuamna chuan hlimna nasa tak a thlen?
16 Ngaihdam Inhuamna. Kan vaiin mi sual kan ni a, thil tam tak kan tisual vek a ni. (Jak. 3:2; 1 Joh. 1:8, 9) Pathian Jehova chuan “nasa” taka min ngaihdam a inhuam avângin lâwm tûr kan va ni tak êm! (Is. 55:7) Hei pawh hi han ngaihtuah teh: Mi ṭha famkim lo sual faa piang kan nih angin, kan sualnate Pathianin a ngaihdam hian nasa taka hlim tûr kan ni a. (Sâm 51:5, 9, 17) Chu a mize duhawm tak chu a mi mal taka kan tawn hian amah kan hmangaihna a zualin, mi dangte nêna kan indâwrnaah amah entawn tûrin min fuih a ni.—Kolossa 3:13 chhiar rawh.
Khawvêl Dinhmun A Chhiat Chhan
17, 18. Eng kawngin nge Setana rorêl dân chu a hlawhchham?
17 Setana rorêl dân aṭanga lo chhuak he khawvêl kalhmang zawng zawng hi kum zabi liam ta chhûng zawng khân a hlawhchham char char a. Setana thununna hnuaiah, kan nu leh pa hmasa ber chuan Pathian Jehova rorêlna aiin mihring rorêlna an thlang a ni. Chutiang chuan hlawhchham ngei ngei tûr sawrkârna chu an din a. Khawvêl puma mite’n hrehawmna leh manganna an tawrhte hi mihringte inawpna a hlawhchham chianzia târ langtu a ni.
18 Setana rorêl dân chuan mahni hmasialna a awmtîr a. Amaherawhchu, mahni hmasialna chuan Pathian rorêlna innghahna ber hmangaihna chu a hneh thei lo a ni. Setana rorêl dân chuan ngelnghehna, hlimna, a nih loh leh himna a pe thei lo va. Pathian Jehova rorêl dân erawh chu thiam chantîr a ni! Tûn laiah chu mi finfiahna chu kan nei em? Nei tehrêng mai, chu chu a dawta thuziakah kan hmu ang. (w10-E 01/15)
Hêng Bible Chângte Chhiarna Aṭangin Rorêlna Chungchâng Eng Nge Kan Hriat?
• Thufingte 21:30.
• Jeremia 10:23.
• Kolossa 3:13.
[Zirlai Atâna Zawhnate]
[Phêk 23-naa milemte]
Setana rorêlna chuan mihringte hlâwkna a thlen ngai lo
[Milem Hawhtîrtute]
U.S. Army photo
WHO photo by P. Almasy
[Phêk 24-naa milem]
Pathian Jehova chuan thihna aia chak zâwk thiltihtheihna a nei
[Phêk 25-naa milem]
Pathian Jehova hmangaihna leh rorêl dikna chu a Fapa inthawinaah a lang chhuak