‘Huai Takin Pathian Thu Hril Rawh’
‘Huai Takin Pathian Thu Hril Rawh’
“An zain thlarau thianghlimin an lo khat a, huai takin Pathian thu an hril ta a.”—TIRH. 4:31.
1, 2. Engvângin nge rawngbâwlnaa hlawhtlin chu kan tum tlat ang?
ISUA chuan a thih hma ni thumah a zirtîrte hnênah chuan: “He ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang,” tiin a hrilh a. Vâna a lâwn hmain, tholeh Isua chuan a zirtîrte hnênah, ‘hnam tina mi zirtîrahte siam a, thu a pêk zawng zawng pawm tûra zirtîr tûrin’ a hrilh a. “Kumkhuain, khawvêl tâwp thleng pawhin” awmpui a tiam bawk a ni.—Mt. 24:14; 26:1, 2; 28:19, 20.
2 Jehova Thuhretute kan nih angin, kum zabi khatna aṭanga thawh ṭan tawh rawngbâwlnaah chuan taima takin kan tel a. Nun chhanhimna hna, Lalram thu hrilhna leh zirtîra siamna aia pawimawh zâwk hna dang rêng a awm lo. Chuti chu, rawngbâwlnaa kan hlawhtlin chu a va pawimawh êm! He thuziakah hian, thlarau thianghlim kaihhruainain rawngbâwlnaa huaisen taka thu hril tûra min ṭanpui dân kan hmu ang a. A dawta thuziak pahnihte chuan Pathian Jehova thlarauvin thiam taka zirtîr tûr leh thu hril reng tûra min kaihhruai dân a târ lang ang.
Huaisenna Kan Mamawh
3. Engvângin nge Ram chanchin ṭha hrilnaa tel tûrin huaisenna neih a ngaih?
3 Pathian min pêk Lalram chanchin puan chhuah theihna chu chanvo ropui tak a ni. Mahse, chu mi hlen chhuah chu a châng chuan a harsa hle thei a. Mi ṭhenkhatin chanchin ṭha chu duh taka an pawm laiin, mi tam tak chu Nova hun laia mite ang mai an ni. Isua chuan “tui a lo lêt a, an zaa a lâk bo vek hma loh chuan eng mah an hre [duh] lo,” tih a sawi. (Mt. 24:38, 39) Tin, min nuihsantu emaw, min dodâltu emaw pawh an awm bawk. (2 Pet. 3:3) Dodâlna chu thu neitute hnên aṭang leh kan school kalpui emaw, hnathawhpui emaw, a nih loh leh kan chhûngkaw zînga mite hnên aṭang emaw pawhin a lo awm thei. Dodâlna bâkah, zahzumna leh mi dangte hnâwl nih hlauhna ang chi mi mal chak lohna chu kan hmachhawn a ngai a. Thil tam tak chuan Pathian thu “huai taka” hrilh a tiharsa thei. (Eph. 6:19, 20) Chuvângin, Pathian thu hril reng tûr chuan huaisen a ngai a ni. Engin nge huaisen tûra min ṭanpui thei?
4. (a) Huaisenna chu eng nge ni? (b) Engtin nge tirhkoh Paula chu Thessalonika khuaa mite hnêna thusawi tûra a intihhuaisen?
4 Grik thu mal “huai” tia lehlin awmzia chu “tlang tak thu sawi, thu khuh lo, chiang tak,” tihna a ni a. Chu thu mal chuan “huai tak, inring tâwk tak, . . . hlauh nei lo” tih a kâwk a ni. Huaisenna chu chaltlaina a ni lo. (Kol. 4:6) Huaisen tak kan nih rualin, mi zawng zawng nêna inrem taka awm chu kan duh a ni. (Rom 12:18) Chu bâkah, Pathian ram chanchin ṭha kan hrilh hian, tum loh deuhva mite kan tihthinur loh nân huaisenna leh remhriatna inbûk tâwk taka kan neih a ngai a. Dik takin, huaisenna ṭha nei tûr chuan, nasa taka thawhrimna aṭang chauhva neih theih mize dangte pawh kan neih tel a ngai a ni. Mahse, chutiang huaisenna nei tûr chuan kan theihna emaw, kan chakna emaw chauhvah kan innghat thei lo. Tirhkoh Paula leh a ṭhiante khân ‘Philippi khuaa zahthlâk taka siama an awm’ hnuah, engtin nge Thessalonika khuaa mite hnênah “huai” taka thu an sawi theih? Paula chuan: “Kan Pathianah chuan kan lo huai tâk zâwk kha,” tiin a ziak a. (1 Thessalonika 2:2 chhiar rawh.) Pathian Jehova chuan kan hlauhna chu hnawt bovin, chutiang bawk huaisenna chu min pe thei a ni.
5. Engtin nge Pathian Jehova chuan Petera, Johana, leh zirtîr dangte chu huaisenna a pêk?
5 Mite chunga “hotute, upate, lehkhaziaktute” an hmachhawn pawh khân, tirhkoh Petera leh Johana chuan: “Pathian mithmuhin Pathian thu zawm aiin nangni thu zawm a dik zâwk emaw chu ngaihtuah rawh u. Keini zawng thil kan hmuh leh kan hriatte kha sawi lovin kan awm thei lo,” tiin an sawi a. Tihduhdahna titâwp tûra Pathian hnêna dîl ai chuan, anmahni leh an rinpuite chuan: “Lalpa an mi vauziate hi ngai teh; i bawite hi huai takin i thu hriltîr la,” tiin an dîl zâwk a ni. (Tirh. 4:5, 19, 20, 29) Engtin nge Jehova chuan an dîlna chu a chhân lêt? (Tirhkohte 4:31 chhiar rawh.) Pathian chuan a thlarau hmangin huaisen tûrin a ṭanpui a. Pathian thlarau chuan keini pawh min tihuaisen ve thei a ni. A nih chuan, engtin nge Pathian thlarau chu kan dawn theih ang a, kan rawngbâwlnaah a kaihhruaina kan dawn theih ang?
Huaisenna Neih Theih Dân
6, 7. Pathian thlarau thianghlim dawn theih dân bul ber chu eng nge ni? Entîrna pe rawh.
6 Pathian thlarau thianghlim dawn theih dân bul ber chu a hnêna dîl hi a ni a. Isua chuan a thu ngaithlatute hnênah: “Nangni mi sual mahni in fate thil ṭha pêk nachâng in hriat chuan, in Pa vâna mi chuan a dîltute chu thlarau thianghlim a va pe dâwn êm!” tiin a hrilh a. (Lk. 11:13) Thlarau thianghlim dîlin kan ṭawngṭai reng tûr a ni. Rawngbâwl dân ṭhenkhat, kawtthlêra thu hrilh te, tawnchawpa thu hrilh te, a nih loh leh office vêla thu hrilh ang chi-te chu kan hreh deuh a nih chuan, Pathian Jehova hnênah a thlarau min pe tûr leh huaisen tûra min ṭanpui tûrin kan dîl thei a ni.—1 Thes. 5:17.
7 Chu tak chu a ni, Kristian hmeichhia Rosa-i thiltih chu. * Ni khat chu a hnathawhna hmuna a awm laiin, a thawhpui zirtîrtu chuan school dangin naupang chunga kut an thlâk dân chanchin chu a chhiar a. Chu a thil chhiar chuan a tihlungngaih êm avângin: “He khawvêl hi engtin nge a awm zêl dâwn?” tiin a sawi chhuak a. Rosa-i chuan chutianga thu hrilh theihna hun remchâng a neih chu a ngaihthah mai thei lo. Tîtîna ṭan tûra huaisenna nei tûrin eng nge a tih? “Pathian Jehova hnênah ṭawngṭaiin, min ṭanpui tûrin a thlarau ka dîl a ni,” a ti. Ani chuan ṭha takin thu a hrilh thei a, chu mi chungchâng chu sawipui leh tûrin ruahmanna a siam ta a ni. Kum nga mi, New York Khawpuia awm Milane-i chungchâng pawh hi ngaihtuah ta la. Ani chuan: “School ka kal hmain, ka nu nên Pathian Jehova hnênah kan ṭawngṭai ziah,” tiin a sawi. Eng atân nge an ṭawngṭai? Milane-i chu rinnaa a din ngheh theih nân leh a Pathian chanchin hril tûra huaisenna a neih theih nân a ni. “Chu chuan Milane-i chu pian cham leh kût nî chungchânga a dinhmun hrilhfiah tûr leh chutiang nîte lawm a nih huna tel ve lo tûrin a ṭanpui a ni,” tiin a nu chuan a sawi. Hêng entîrnate hian huaisenna nei tûra ṭawngṭainain min ṭanpui theihzia a târ lang a ni lâwm ni?
8. Huaisenna neih chungchângah zâwlnei Jeremia hnên aṭangin eng nge kan zir theih?
8 Huaisenna nei tûra zâwlnei Jeremia ṭanpuitu pawh hi ngaihtuah teh. Hnamte tâna zâwlnei ni tûra Pathian Jehova’n a thlan khân, Jeremia chuan: “Thu ka sawi thiam lo, ka naupang si,” tiin a châng lêt a ni. (Jer. 1:4-6) Mahse, a hnuah chuan Jeremia chu a thu hrilhnaah a ṭang hlein, a bei nasa ta hle a, mi tam tak chuan chungpikna zâwlnei angin an thlîr hial a ni. (Jer. 38:4) Kum 65 aia tam chu Pathian Jehova rorêlna thu huaisen takin a puang chhuak a. Hlauh a neih lohna leh huai taka thu a hrilhna chuan Israel ramah hriat a hlawh êm avângin, kum 600 vêl hnua Isua’n huaisen taka thu a sawi khân, mi ṭhenkhat chuan Jeremia a lo tholeh niin an ngai hial a ni. (Mt. 16:13, 14) Engtin nge a tîra hreh tak zâwlnei Jeremia chuan a zahzumna chu a hneh? Ani chuan: “Ka ruh chhûnga mei kâng inkhung ta ang mai hian ka thinlung chhûngah chuan [Pathian thu chu] a awm si ṭhîn,” tiin a sawi. (Jer. 20:9) Ni e, Pathian Jehova thu chuan Jeremia chu chakna a pein, thu sawi tûrin a tur a ni.
9. Engvângin nge Pathian thu chuan Jeremia a nghawng angin kan chungah pawh nghawng a neih theih?
9 Tirhkoh Paula chuan Hebrai mite hnêna a lehkha thawnah: “Pathian thu hi a nung a, thil a ti thei a, khandaih hriam tawn eng ang ai pawhin a hriam a, nunna leh thlarau, ruhtuah leh thlîng phel hrang khawp hialin a chhun thei a, thinlunga ngaihtuah leh tumte hi a hre nghâl thei a ni,” tiin a ziak a. (Heb. 4:12) Pathian thu, a nih loh leh a thuchah chuan Jeremia chunga nghawng a neih angin kan chungah pawh a nei thei a ni. Bible chu mihringte ziak mah ni se, Pathian thâwk khum a nih avângin mihringte finna lâwr khâwmna lehkhabu a ni lo tih hre reng ang che. Petera thawn hnih 1:21-ah heti hian kan chhiar a ni: “Thu hrilh lâwk rêng rêng hi mihring thua chhuak a ni ngai si lo a, miten thlarau thianghlim tirhin Pathian hnên ata an sawi zâwk ṭhîn,” tiin. Awmze nei taka mahnia Bible zirna neih nâna hun kan hman hian, kan rilru chu thlarau thianghlima thâwk khum thuchahin a lo khat a. (1 Korinth 2:10 chhiar rawh.) Chu thuchah chu keimahniah ‘mei kâng inkhung ta ang maia’ lo awmin, mahni chauhva vawn chu kan thei lo a ni.
10, 11. (a) Huaisen taka thu hrilh kan duh chuan eng angin nge Bible kan zir ang? (b) Mahnia Bible zirna ṭha neih chhoh deuh deuh nâna hma lâk i tum dân pakhat tal sawi rawh.
10 Mahnia Bible zirnain kan chunga rah ṭha chhuah tûr chuan Bible thuchah ken chu kan thinlung thleng tûr leh chhûng lama kan mizia thlâk thei tûrzâwnga kan zir a ngai a ni. Entîr nân, zâwlnei Ezekiela chu inlârnaah thu ngaithla duh lo mite hnêna puan chhuah tûr thuchah khauh tak chuanna lehkhabu zial chu eitîr a ni a. Ezekiela chuan chu thuchah chu a hre chiang hlein, a taksa pêng pakhat ang mai a nihtîr tûr a ni a; a rilru zawng zawng a thununtîr tlat tûr a ni. Chu chuan, a thuchah puan chhuahna hna chu khawizu thlum ei ang maiin thiltih nuam tak a nihtîr dâwn a ni.—Ezekiela 2:8–3:4, 7-9 chhiar rawh.
11 Keini pawh Ezekiela dinhmun angah hian kan ding a. Tûn laiah, mi tam tak chuan Bible thu chu an ngaithla duh lo va. Pathian thu hril fo tûr chuan, Pathian Lehkha Thu chu hre thiam tak zet tûr leh ring tak zet thei tûrzâwnga kan zir a pawimawh a ni. A châng châng chauh ni lovin, hunbi neiin kan inzir ziah tûr a ni a. Kan duhzâwng chu: “Aw LALPA, ka lungpui leh mi tlantu, ka kâa thu chhuakte leh ka thinlunga ngaihtuahnate hi i mithmuhah lawmtlâk takin awm rawh se,” titu fakna hla phuahtu duhzâwng ang a ni tûr a ni. (Sâm 19:14) Bible thutak kan thinlung chhûngrila a luh theih nân, kan thil chhiarte chhût ngun tûra hun kan inpêk chu a va pawimawh tak êm! Ni e, mahnia inzirna ṭha neih chhoh deuh deuh chu kan tum tlat tûr a ni. *
12. Engvângin nge Kristian inkhâwmnate chuan thlarau thianghlim kaihhruaia awm tûrin min ṭanpui?
12 Pathian Jehova thlarau thianghlim hlâwkpui theih dân kawng khat leh chu ‘hmangaih leh thil ṭha tiha inchawk tho tûra inngaihtuah tawn a, kan inkhâwmte bânsan lova, infuih tawn’ hi a ni. (Heb. 10:24, 25) Kristian inkhâwmnaa tel ziah te, ṭha taka ngaihthlâk te, leh kan thil zirte nunpui tum hrâm hrâmte chu thlarauva kaihhruaia awm dân kawng ṭha tak a ni. Tihah chuan, Pathian Jehova thlarau chuan kohhran kal tlangin kaihhruaina a pe si a!—Thu Puan 3:6 chhiar rawh.
Huaisenna Neih Hlâwknate
13. Kum zabi khatnaa Kristiante’n thu hrilh rawngbâwlna an hlen chhuah dân aṭangin eng nge kan zir theih?
13 Thlarau thianghlim chu lei leh vâna thiltithei ber a ni a, mihringte chu Pathian Jehova duhzâwng ti tûrin a thuam thei a ni. Chu thlarau thununna hnuaiah chuan, kum zabi khatnaa Kristiante chuan thu hrilh rawngbâwlna ropui tak an hlen chhuak a. Chanchin ṭha chu “vân hnuaia thil siam zawng zawngte” zîngah an hril a ni. (Kol. 1:23) An zînga a tam zâwk chu “lehkha thiam lo, mi mâwl tak” an ni tih han ngaihtuah chuan, thiltihtheihna chak takin a chêttîr a ni tih a chiang hle.—Tirh. 4:13.
14. Engin nge ‘thlarau kawnga ṭhahnemngai’ tûrin min ṭanpui thei?
14 Thlarau thianghlim kaihhruaia awm tûrzâwnga kan nun hmanna pawhin huaisen taka rawngbâwl tûrin min chêttîr thei bawk a. Thlarau dîla ṭawngṭai reng te, awmze nei tak leh taima taka mahnia inzir te, kan thu chhiarte ngun taka ngaihtuah te, leh Kristian inkhâwmnaa tel ziah te ṭang kawp chuan ‘thlarau kawnga ṭhahnemngai’ tûrin min ṭanpui ang. (Rom 12:11) ‘Juda pakhat, a hming Apollova, Aleksandria khuaa piang mi fing tak, Ephesi khuaah chuan a kal a.’ A chungchângah, Bible chuan: “Rilrua ṭhahnemngai tak a nih avângin Isua chanchin chu ngun takin a hril a, a zirtîr ṭhîn,” tiin a sawi a ni. (Tirh. 18:24, 25) ‘Thlarau kawnga ṭhahnem kan ngaih’ chuan, in tin kalnaah leh tawnchawpa thu hrilhnaah huaisenna kan lantîr lehzual thei a ni.
15. Engtin nge huaisen lehzuala thu sawina chu kan hlâwkpui?
15 Thu hrilhnaa huaisen lehzualna chuan keimahniah nghawng ṭha a nei thei a ni. Kan rawngbâwlna pawimawhzia leh ṭangkaizia kan hriatthiam lehzual avângin, kan rilru put hmang chuan hma a sâwn a. Rawngbâwlnaa kan hlawhtlin hian kan hlim sawt ṭhîn a; chu chuan kan phûrna pawh a tizual ṭhîn. Tin, thu hrilhna a hmanhmawhthlâkzia hriat chianna chuan kan ṭhahnemngaihna a tizual bawk.
16. Rawngbâwlnaah ṭhahnemngaihna kan hloh tial tial a nih chuan eng nge kan tih ang?
16 Rawngbâwlnaa kan neih ṭhin ṭhahnemngaihna leh phûrna kan hloh chuan, engtin nge ni ang? Chutiang a nih chuan, ngun takin kan inenfiah tûr a ni. Paula chuan: “Rinnaah chuan in awm emaw, . . . nangmahni ngei infiah ṭhîn rawh u,” tiin a ziak a ni. (2 Kor. 13:5) Heti hian inzâwt rawh: ‘Thlarau kawngah chuan ṭhahnem ka la ngai reng em? Pathian Jehova hnênah a thlarau dîlin ka ṭawngṭai em? Ka ṭawngṭaina chuan Pathian duhzâwng ti tûra amah ka rinchhanzia a târ lang em? Ka ṭawngṭainaah chuan rawngbâwlna min kawltîr avângin lâwmthu ka hrilh tel em? Mahnia inzirna ka nei ṭha em? Ka thu chhiar leh ngaihthlâkte chhût ngun nân hun engzât nge ka hman? Kohhran inkhâwmnaah eng angin nge ka tel ve?’ tiin. Hêng zawhna ang chite ngaihtuahna hian i chak lohna lai hre thiam tûr leh hma lâk dân tûr hre tûrin a ṭanpui thei che a ni.
Pathian Thlarau Chuan Tihuaisen Che Rawh Se
17, 18. (a) Tûn laiah thu hrilh rawngbâwlna chu eng ang khawpa thawh nge a nih? (b) Engtin nge “huai takin” Pathian Ram chanchin kan puan chhuah theih?
17 Tholeh Isua chuan a zirtîrte chu: “Thlarau thianghlim chu in chunga a lo thlen hunah thiltihtheihna in la nei ang; tichuan Jerusalem khuaah te, Judai leh Samari ram khaw tinah te, kâwlkil thleng pawhin ka thuhretute in ni ang,” tiin a hrilh a. (Tirh. 1:8) Chutih hun laia ṭan tawh rawngbâwlna chu tûn hma zawng aia nasain thawh mêk a ni. Jehova Thuhretu mi maktaduai sarih chuangte chuan Lalram thuchah chu ram 230 chuangah an puang chhuak a; rawngbâwl nân kum khatah dârkâr tlûklehdingâwn khat leh a chanve vêl an hmang a ni. Engtikah mah thawh nawn leh ngai tawh loh tûr he hnaa ṭhahnemngai taka tel ve chu a va phûrawm êm!
18 Kum zabi khatna hun lai ang bawkin, tûn laia khawvêl pum huap thu hrilh rawngbâwlna chu Pathian thlarau kaihhruaina hnuaia thawh a ni a. Thlarau kaihhruaina kan chhân lêt chuan, “huai takin” rawng kan bâwl ang. (Tirh. 28:31) Chuvângin, Pathian Ram chanchin ṭha kan puan chhuah rual hian thlarau kaihhruaiin i awm ṭheuh vang u! (w10-E 02/15)
[Footnote-te]
^ par. 7 An hming thlâk a ni.
^ par. 11 Bible chhiarna leh mahnia inzirna hlâwkpui tak zet tûr chuan, Benefit From Theocratic Ministry School Education (English) tih lehkhabu, phêk 21-32-naa awm “Lehkha Chhiar Uar Rawh” leh “Zirna Neih A Manhla,” tih bungte chu en rawh.
Eng Nge Kan Zir?
• Pathian thu kan hrilhnaah engvângin nge huaisen a ngaih?
• Zirtîr hmasate kha engin nge huaisen taka thu hril tûra ṭanpui?
• Engtin nge huaisenna kan neih theih ang?
• Huaisenna neih chu engtin nge kan hlâwkpui?
[Zirlai Atâna Zawhnate]
[Phêk 15-naa milem]
Engtin nge nu leh pate chuan an fate chu huaisen tûra an ṭanpui theih?
[Phêk 16-naa milemte]
Tawi têa ṭawngṭaina chuan rawngbâwlnaa huaisen tûrin min ṭanpui thei