Nun Kawng Ṭha Bera Lawmluhna!
Nun Kawng Ṭha Bera Lawmluhna!
“Kan nun pawhin, kan thih pawhin, Lalpa ta kan ni.”—ROM 14:8.
1. Isua’n nun kawng ṭha ber chungchâng eng nge a zirtîr?
PATHIAN Jehova chuan nun kawng ṭha ber kan zawh chu a duh a. Mite chuan nun kawng hrang hrang an zawh thei; mahse, nun kawng ṭha ber chu pakhat chauh a awm. Pathian Thu mila nun leh a Fapa, Isua Krista hnên aṭanga inzir aia nun hman dân ṭha zâwk a awm thei lo. Isua chuan a hnungzuitute chu thlarau leh tih tak zet, a nih loh leh thutaka Pathian be tûrin a zirtîr a, zirtîrte siam tûrin thu a pe bawk. (Mt. 28:19, 20; Joh. 4:24) Isua kaihhruaina mila kan nun chuan Pathian Jehova kan tilâwm a, A malsâwmna kan dawng bawk a ni.
2. Kum zabi khatnaah khân engtin nge mi tam takin Lalram thuchah chu an chhân let a, “Kawnga mi” nih awmzia chu eng nge ni?
2 Mi inngaitlâwmte ringtu an lo nih a, baptisma an lo chan hian, “Nun kawng ṭha berah kan lawm lût a che u!” tihna tûr chhan ṭha kan nei a ni. Kan Vântlâng Kum Chhiar kum zabi khatna chhûng khân, hnam hrang hranga mi sâng tam tak chuan thutak an pawm a, Pathian hnêna an inpêkna chu baptisma changin vântlâng hmaah an lantîr a ni. (Tirh. 2:41) Chûng zirtîr hmasate chu “Kawnga mi” tia koh an ni a. (Tirh. 9:2; 19:23) Anni chuan Isua Krista rinna leh a entawn tûr siam zuinaa innghat nun kawng chu an zawh tlat avângin, chutianga koh chu a inâwm a ni.—1 Pet. 2:21.
3. Engvângin nge Pathian Jehova mite’n baptisma an chan a, kum sâwm kalta chhûng khân mi eng zâtin nge baptisma chang?
3 Zirtîr siamna chu tûn hun hnuhnûngahte hian a ṭhang chak hle a, tûnah chuan ram 230 chuangah hrilh a ni tawh a ni. Kum sâwm kalta chhûng khân, mi 27,00,000 chuangte chuan Pathian Jehova rawngbâwl tûra thu tlûkna siamin, a hnêna an inpumpêkzia lantîr nân tuiah baptisma an chang a. Chawlhkâr tinin mi 5,000 chuang zêlin baptisma an chang tihna a nih chu! Baptisma chang tûra thu tlûkna chu Pathian hmangaihna te, Bible hriatna te, leh a thu zirtîr rinna tea innghata siam a ni. Baptisma chan chu Pathian Jehova nêna inlaichînna ṭha neih ṭanna a nih avângin, kan nuna hun pawimawh tak a ni a. A chhiahhlawh hmasate a kawnga kal tûra a lo ṭanpui tawh ang bawkin, rinawm taka a rawng bâwl tûrin min ṭanpui ang tih kan rinzia târ lanna a ni bawk.—Is. 30:21.
Engvângin Nge Baptisma I Chan Ang?
4, 5. Baptisma channa avânga lo awm malsâwmna leh hlâwkna ṭhenkhat sawi rawh.
4 Pathian hriatna i neiin, i nun i thlâk danglam a, tûnah chuan baptisma chang lo thuchhuahtu i ni tawh pawh a ni thei e. Chutianga i hmasâwnna chu a fakawm hle. Mahse, ṭawngṭaia Pathian hnêna inpumpêk tawhin, baptisma chan i tum em? Bible i zirna aṭang chuan i nun chu mahni lâwmna atân leh sum leh pai khâwlna atân ringawta hmang lovin, Pathian Jehova fak nân i hmang zâwk tûr a ni tih i hriat ngei a rinawm a ni. (Sâm 148:11-13; Luka 12:15 chhiar rawh.) A nih chuan, baptisma channa aṭanga lo awm malsâwmna leh hlâwkna ṭhenkhat chu engte nge ni?
5 Kristian inpumpêk tawh i nih angin, i nun chuan thiltum ṭha ber a nei ang a. Pathian duhzâwng i tih avângin i hlim hle ang. (Rom 12:1, 2) Pathian Jehova thlarau thianghlim chuan Pathian duhzâwng mizia remna leh rinna ang chite a neihtîr ang che. (Gal. 5:22, 23) Tin, Pathianin i ṭawngṭaina a chhâng ang a, a Thu mila nun tuma i thawhrimna chu mal a sâwm ang. I rawngbâwlna chu a hlimawm ang a, Pathian pawmzâwnga i nunna chuan chatuan nun i beiseina chu a tinghet sauh bawk ang. Chu mai a ni lo, inpumpêkna leh baptisma i channa chuan Jehova Thuhretute zînga mi nih i duh tak zetzia a târ lang bawk ang.—Is. 43:10-12.
6. Baptisma kan channa chuan eng nge a târ lan?
6 Pathian Jehova hnêna inpumpêkna leh baptisma channa hmangin, A ta kan nihzia kan lantîr a. Tirhkoh Paula chuan: “Tumah mahni tâna nung kan ni lo va, tumah mahni tâna thi kan ni hek lo. Kan nun chuan Lalpa tân kan nung a; kan thih pawhin Lalpa tân kan thi a ni si; chuvângin kan nun pawhin, kan thih pawhin, Lalpa ta kan ni,” tiin a ziak a ni. (Rom 14:7, 8) Pathian chuan zalên taka duhthlan theihna pein, min chawimawi a. Pathian kan hmangaih avânga chutiang nun kawng zawh kan tum tlat hian a thinlung kan tilâwm a ni. (Thuf. 27:11) Baptisma kan channa chu Pathian Jehova hnêna kan inpumpêkna chhinchhiahna leh Amah chu kan chunga Rorêltu a ni tih mipui hmaa kan puan chhuahna a ni a. Lei leh vâna lalchungnunna thu buaiah a lam kan ṭanzia târ lanna a ni bawk. (Tirh. 5:29, 32) Chutianga a lama kan ṭan chuan, ani pawh kan lamah a ṭang ṭhîn. (Sâm 118:6 chhiar rawh.) Baptisma channa chuan tûnah leh nakin hun atâna thlarau lam malsâwmna dang tam tak dawn theihna kawng a hawng bawk.
Inunauna Duhawm Tak An Nei
7-9. (a) Isua chuan engkim kalsana amah zuitute hnênah eng thu nge a tiam? (b) Engtin nge Marka 10:29, 30-a chhinchhiah Isua thutiam chu a thlen famkim?
7 Tirhkoh Petera chuan Isua hnênah: “Ngai teh, keinin engkim kalsanin kan zui ta chia; engnge kan hmuh ang le?” tiin a zâwt a. (Mt. 19:27) Petera chuan amah leh Isua zirtîr dangte hma lam hun tûr chu hriat a duh a ni. Lalram thu hrilh rawngbâwlnaa an inhman pumhlûm theih nân, anni chuan inpêkna pawimawh tak an siam a ni. (Mt. 4:18-22) Isua’n an hnênah eng nge a tiam?
8 Chu mi chungchâng bawk sawina Marka ziakah, Isua chuan a zirtîrte chu thlarau lama inunauna an neih tûr thu a hrilh a ni: “Tupawh keimah avâng leh chanchin ṭha avânga in emaw, unaupate emaw, farnute emaw, nu emaw, pa emaw, fate emaw, ramte emaw kalsan tawh phawt chu, tûn dam chhûng la la hian, inte, unaupate, farnute, nute, fate, ramte a leh zain, tihduhdahnate nên, hmu lo tûr tumah an awm lo; hun lo la thleng tûra chatuana nunna nên,” tiin. (Mk. 10:29, 30) Kum zabi khatnaa Kristian Ludi te, Akuilia te, Priskilli te, leh Gaia angte chu Isua lo tiam tawh anga rinpuite tâna chênna tûr ‘in’ petu leh an tâna “unaupate, farnute, nute” ang lo ni tate zînga ṭhenkhat an ni.—Tirh. 16:14, 15; 18:2-4; 3 Joh. 1, 5-8.
9 Isua thusawi chuan tûn laiah thlen famkimna ropui zâwk a nei a. A hnungzuitute kalsan “ramte” chuan, mi tam takin khawvêl ram hrang hranga Lalram chanchin a zauh nâna phal taka an kalsan tâk an eizawnnate a entîr a; chûng mite zîngah chuan missionary te, Bethel chhûngkaw zînga mi te, international-a rawngbâwl te, leh mi dang dangte pawh an tel a ni. Unau tam takte chuan samkhai taka an nun theih nân an in leh lote an kalsan a, Pathian Jehova’n anmahni a enkawl dân leh a rawngbâwlnaa hlimna an hmuh dân târ langtu an thiltawnte chuan min tihlim a ni. (Tirh. 20:35) Chu bâkah, Pathian Jehova chhiahhlawh baptisma chang tawh zawng zawngte chuan khawvêl pum huap Kristian unaute zînga mi an nih angin, ‘a ram leh [Pathian] felna zawn hmasakna’ aṭanga lo awm malsâwmna chu an dawng ṭheuh thei a ni.—Mt. 6:33.
“Bihrûkna Hmuna” Him Taka Awm
10, 11. ‘Chungnungbera bihrûkna hmun’ chu eng nge ni a, chutah chuan engtin nge kan awm theih?
10 Inpumpêkna leh baptisma channa chuan malsâwmna nasa tak dang pawh a thlen a—“chungnungbera bihrûkna hmuna” awm theihna chanvo chu. (Sâm 91:1 chhiar rawh.) Hei hi entîr nei thlarau lama himna leh inhumhimna hmun, thlarau lam chhiatna laka inhumhimna hmun a ni. Chu chu thlarau lam thil thlîr thiam lo leh Pathian rinchhan lote’n an hriat loh avângin ‘hmun biru’ a ni. Kan inpumpêkna mila kan nun a, Pathian Jehova kan rin pumhlûm hian: “Ani chu ka inhumhimna leh ka kulhpui; ka Pathian, ka rina chu a ni,” tia sawi ang kan ni a. (Sâm 91:2) Pathian Jehova chu kan inhumhimna hmun a lo ni. (Sâm 91:9) Chu aia hmun him zâwk chu a awm thei dâwn em ni?
11 Pathian Jehova “bihrûkna hmuna” awmna chuan amah nêna mi mal inlaichînna neih theihna chanvo kan neihzia a hril tel bawk a. Chu chu inpumpêkna leh baptisma channa hmangin a inṭan a. Chutah, Bible zirna te, tih tak zeta ṭawngṭaina te, leh thuâwih pumhlûmna te hmanga Pathian hnaihin, amah nêna kan inlaichînna chu kan sawh nghet chho a ni. (Jak. 4:8) Siamtu chunga a rinna nghîng ngai lo Isua aia Pathian Jehova hnaih zâwk tumah an awm lo. (Joh. 8:29) Chuvângin, Pathian Jehova chu ringhlel lovin, a hnêna kan inpumpêkna hlen chhuak tûra min ṭanpui a châkzia leh a theihzia pawh i ringhlel ngai lo vang u. (Thur. 5:4) Pathianin a mite tâna thlarau lam châwmna a pêkte hian min hmangaih tak zet a, a rawngbâwlnaa kan hlawhtlin a duh tak zetzia a târ lang chiang hle a ni.
Thlarau Lam Paradis Chu Hlut Rawh
12, 13. (a) Thlarau lam paradis chu eng nge ni? (b) Engtin nge mi tharte kan ṭanpui theih?
12 Inpumpêkna leh baptisma channa chuan thlarau lam paradis-a chên theihna kawng a hawng bawk a. Chu chu Pathian Jehova leh mi dangte nêna inrem, kan rinpuite nêna thlarau lam boruak nuam tak kan chen tlânna hmun hi a ni. (Sâm 29:11; Is. 54:13) Khawvêlah hian kan thlarau lam paradis nêna khaikhin theih thil engmah a awm lo. Chutiang a nihzia chu unau hnam hrang hrang, ṭawng hrang hrang, leh chi hrang hrang te inrem tak, lungrual tak, leh inhmangaih taka an awmho dial dialna international inkhâwmpui-ahte hian a lang chiang zual a ni.
13 Thlarau lam paradis kan chen mêk chu tûn lai khawvêl dinhmun chhe tak nên chuan a inang lo hle. (Isaia 65:13, 14 chhiar rawh.) Lalram thuchah puang chhuakin, mi dangte pawh thlarau lam paradis-a lo chêng ve tûrin kan sâwm thei a. Chu bâkah, kohhrana rawn lût tharte leh rawngbâwl dân zirtîrna hlâwkpui tûrte ṭanpui theihna chanvo hlu tak kan nei bawk. Akuila leh Priskilli te’n Apollova hnêna ‘Pathian kawng thu fel lehzuala hrilh’ theihna chanvo an neih ang bawkin, upate kaihhruaina hnuaiah mi thar tuemaw ṭanpui theihna chanvo kan nei thei bawk.—Tirh. 18:24-26.
Isua Hnên Aṭangin Zir Zêl Rawh
14, 15. Isua hnên aṭanga zir zêlna tûr chhan ṭha eng nge kan neih?
14 Isua hnên aṭanga zir zêl nachhan tûr kan nei a. Mihring anga a lo kal hmain, Isua chuan kum chhiarsên loh chhûng a Pa kiangah hna a thawk a. (Thuf. 8:22, 30) Ani chuan Pathian rawng bâwl leh thutak hriattîr chu nun kawng ṭha ber a ni tih a hria a ni. (Joh. 18:37) Nun kawng dang rêng rêng chu mahni hmasialna leh dâwn tawina a ni tih Isua chuan a hre chiang hle. Fiahna nasa tak a tâwk ang a, tihhlum hial a ni dâwn tih a hria a ni. (Mt. 20:18, 19; Heb. 4:15) Kan entawn tûr ber a nih angin, rinawmna vawn dân pawh min zirtîr bawk a ni.
15 Isua’n baptisma a chan zawh hnu lawkah, Setana’n nun kawng ṭha ber a zawh lai bânsan tûrin a thlêm a—mahse, a hlawhtling lo. (Mt. 4:1-11) Chu chuan Setana’n kan chungah eng pawh ti se, kan rinawmna kan vawng tlat thei tih min zirtîr a ni. Setana chuan baptisma chan tum mêkte leh a chang tharte chu a thlêm duh bîk ngei ang. (1 Pet. 5:8) Chhûngkaw zînga mi tuemaw chuan Jehova Thuhretute chungchâng thu dik lo an hriat avângin min vênhim an tumna lamah min dodâl thei a ni. Mahse, chutiang fiahnate chuan zawhnate kan chhân hun leh thu kan hrilh huna mi dangte zahna leh remhriatna ang chi Kristian mize ṭhate lantîr theihna hun remchâng min pe a ni. (1 Pet. 3:15) Chuvângin, chutiang thiltawnte chuan kan thu ngaithlatute chungah nghawng ṭha a nei thei a ni.—1 Tim. 4:16.
Nun Kawng Ṭha Ber Chu Vuan Tlat Rawh!
16, 17. (a) Deuteronomy 30:19, 20-a kan hmuh nunna atâna thil phût bulpui pathum chu engte nge ni? (b) Engtin nge Isua te, Johana te, leh Paula te chuan Mosia thu ziah an thlâwp?
16 Isua leia a lo kal hma kum 1,500 vêl khân, Mosia chuan Israelte chu chutih hun laia nun kawng ṭha ber chu thlang tûrin heti hian a fuih a ni: “In hmaah nunna leh thihna, malsâwmna leh ânchhia ka dah tih tûnah hian in chungchâng thua hretu atân lei leh vân ka ko a ni; chutichuan nunna chu thlang rawh u, in nun theih nân, nangni leh in thlahte nên; LALPA in Pathian hmangaih a, a awkâ âwih a, amah vuan tlatin,” tiin. (Deut. 30:19, 20) Israelte chu Pathian lakah an rinawm lo va; mahse, Mosia’n nunna atâna thil ṭûl bulpui pathum a sawite chu a inthlâk chuang lo. Chu chu Isua leh mi dangte pawhin an sawi nawn leh a ni.
17 A hmasa berin ‘Lalpa kan Pathian chu kan hmangaih’ tûr a ni a. A kawng felte mila kan nun hian Amah kan hmangaihzia kan lantîr a ni. (Mt. 22:37) A pahnihnaah chuan, A Thu zirin leh a thupêkte zâwmin ‘a awkâ kan âwih’ tûr a ni a. (1 Joh. 5:3) Chutianga ti tûr chuan Bible chungchâng sawikhâwmna hmun, Kristian inkhâwmnaah kan tel ziah a ngai a ni. (Heb. 10:23-25) A pathumnaah chuan, ‘amah kan vuan tlat’ tûr a ni. Eng thil pawh tawng mah ila, Pathian ring tlatin, a Fapa chu i zui tlat reng ang u.—2 Kor. 4:16-18.
18. (a) Engtin nge kum 1914 khân Vênnainsâng chuan thutak chungchâng a sawi? (b) Engtin nge tûn laia thutak êng hi kan ngaih ang?
18 Bible thutak mila nun chu malsâwmna a va ni tak êm! Kum 1914 chuan he thu pawimawh tak hi Vênnainsâng-a tihchhuah a ni: “Malsâwmna dawng, mi hlim tak kan ni lo vem ni? Kan Pathian chu a rinawm lo vem ni? Mi tupawhin hei aia thil ṭha zâwk hi a hriat chuan, la rawh se. Hei aia ṭha zâwk hmu in awm chuan, min hrilh ve ngei kan beisei. Keini erawh chuan Pathian Thua kan thil hmuhte aia ṭha zâwk hi engmah kan hre lo va, a ṭhatna chanve tluk pha pawh kan hmu hek lo. . . . Pathian dik hriatna chiang takin kan thinlung leh nuna remna, hlimna leh malsâwmna a rawn thlen hi sawifiah theih rual a ni lo. Pathian Finna, Rorêl Dikna, Thiltihtheihna leh Hmangaihna thu hian kan rilru leh thinlung châkzâwngte a phuhru tak zet a. Thil dang rêng rêng kan mamawh lo. He Thu ropui tak fiah lehzuala hriat aia duh zâwk tûr dang engmah rêng a awm lo,” tih hi. (Vênnainsâng, December 15, 1914, [English] phêk 377-378) Thlarau lam êng leh thutak kan ngaihhlutna chu a inthlâk danglam lo. Dik takin, tûnah hian ‘LALPA ênga kan lên’ avânga lâwm chhan tûr kan ngah lehzual a ni.—Is. 2:5; Sâm 43:3; Thuf. 4:18.
19. Engvângin nge baptisma chang tûra tlingte chu an vuaicha loh vang?
19 ‘LALPA ênga lêng’ duh si, baptisma changa la inpumpêk rih lo i nih chuan, vuaicha suh ang che. Pathian leh Krista’n thil min tihsakte avânga kan lâwmzia lantîrna kawng ṭha ber, Baptisma chang thei tûra Bible thil phûtte tlin tûrin i tih ngai apiang ti ang che. I thil neih hlu ber—i nunna—chu Pathian Jehova hnênah pe rawh. A Fapa chu zuiin Pathian duhzawng tih i tum tlatzia chu lantîr rawh. (2 Kor. 5:14, 15) Chu chu nun kawng ṭha ber a ni tih rinhlelh rual a ni lo! (w10-E 02/15)
Engtin Nge Kan Chhân Ang?
• Kan baptisma channa chuan eng nge a entîr?
• Pathian hnêna inpumpêk a, baptisma channa chuan eng malsâwmnate nge a thlen?
• Engvângin nge Isua hnên aṭanga zir chu a pawimawh êm êm?
• Nun kawng ṭha ber vuan tlat tûrin engin nge min ṭanpui ang?
[Zirlai Atâna Zawhnate]
[Phêk 29-naa milem]
Baptisma i channa chuan nun kawng ṭha ber i thlang tih a târ lang
[Phêk 30-naa milemte]
‘Bihrûkna hmunah’ him takin i awm em?