“Thlarau Ngûnhnâm” Thiam Takin Hmang Rawh

“Thlarau ngûnhnâm (Pathian Thu chu) la ula.”—EPH. 6:17.

1, 2. Lalram chanchin puangchhuaktu tam lehzual mamawhna chu engtin nge kan chhân lêt ang?

MIPUITE thlarau lam mamawh a hmuhin, Isua chuan a zirtîrte hnênah: “Buh seng tûr a tam hle si a, nimahsela a thawktute an tlêm; chutichuan, a buh seng tûra thawktu tûrte tîr tûrin buh Neitupa hnênah chuan ngên rawh u,” tiin a sawi a. Chutianga sawi mai chu a duh tâwk lo. A sawi hnu chuan, “a zirtîr sâwm leh pahnihte chu a ko va,” thu hril tûr, a nih loh leh ‘buh seng tûrin’ a tîr chhuak a. (Mt. 9:35-38; 10:1, 5) A hnuah, Isua chuan chu hna bawk chu thawk tûrin “mi dang sawmsarih a ruat a, . . . pahnih zêlin a tîr” chhuak leh a ni.—Lk. 10:1, 2.

² Tûn laiah pawh Lalram chanchin puangchhuaktu mamawhna chu a nasa hle a. Kum 2009 rawngbâwl kum chhûnga khawvêl pum huapa Hriatrengna inkhâwma tel zât chu 18,164,539 an ni a, Jehova Thuhretute belh khâwm aiin maktaduai 10-in an tam zâwk tihna a ni. Buh seng chu a hun tawh tak zet a. (Joh. 4:34, 35) Chuvângin, hnathawktu tam lehzual dîlin kan ṭawngṭai tûr a ni. Mahse, chutiang dîlna nêna inmilin engtin nge thil kan tih theih ang? Ṭhahnemngai taka Lalram thu hrilhna leh zirtîr siamna kawngah rawngbâwltu hlawhtling tak ni chho zêlin, kan dîlna nêna inmilin thil kan ti thei a ni.—Mt. 28:19, 20; Mk. 13:10.

3. Engtin nge Pathian thlarau chuan rawngbâwltu thiam lehzual ni tûrin min ṭanpui?

³ Thuziak hmasaah khân, Pathian thlarauvin ‘huai taka Pathian thu hril’ tûra min ṭanpui dân sawiho a ni tawh a. (Tirh. 4:31) Chu thlarau bawk chuan rawngbâwltu thiam tak ni tûrin min ṭanpui thei a ni. Rawngbâwlnaa kan thiamna tihhmasâwn theih dân kawng khat chu Pathian Jehova min pêk hmanraw ṭha tak—a Thu, Bible thiam taka hman hi a ni. Bible chu thlarau thianghlim hmanga ziak a ni a. (2 Tim. 3:16) A thuchah ken chu Pathian thâwk khum a ni. Chuvângin, rawngbâwlnaa Bible thutak thiam taka kan hrilhfiah hian thlarau thianghlim kaihhruaiin kan awm tihna a ni. Chutianga kan tih theih dân sawiho hmain, chu Pathian Thu-in thil a tihtheih dân chu i lo ngaihtuah phawt ang u.

‘Pathian Thu Chuan Thil A Ti Thei’

4. Bible-a hmuh Pathian thuchah ken chuan mi chungah eng inthlâk danglamna nge a awmtîr theih?

⁴ Pathian thu, a nih loh leh thuchah chuan thil a va ti thei tak êm! (Heb. 4:12) Bible aṭanga chhuak thuchah chuan ruhtuah leh thlîng a phel hran hial theih avângin, mihring siam khandaih engpawh aiin a hriam zâwk a tih theih a ni. Bible thutak chuan mihring chhûngril ber a khawih pha a, thinlunga ngaihtuah leh thiltumte hre theiin, chhûng lama nihna dik tak a hai lang a. Chu thutak chuan a thiltihtheihna hmangin mite nunah inthlâkthlengna dik tak a thlen thei a ni. (Kolossa 3:10 chhiar rawh.) Ni e, Pathian Thu chuan nun a va thlâk danglam thei tak êm!

5. Eng kawngin nge Bible chuan min kaihhruai theih a, eng nge a rah chhuah?

⁵ Chu bâkah, Bible chu finna chungchuang tak chuanna lehkhabu a ni. Chutah chuan mite hnêna he khawvêl dinhmun khirh taka nun dân tûr kawhhmuh theitu thu ṭangkai takte a chuang a. Pathian Thu chuan tûna kan ke pên mêk chauh ni lovin, kan kalna tûr kawng pawh thui takin a chhun êng a ni. (Sâm 119:105) Chu chuan buaina kan hmachhawn  hunah emaw, ṭhian kawm tûr te, intihhlimna te, hnathawh tûr te, silh leh fên te, leh thil dang dangte thlan chungchânga thutlûkna kan siam hunah emaw nasa takin min ṭanpui a ni. (Sâm 37:25; Thuf. 13:20; Joh. 15:14; 1 Tim. 2:9) Bible thu bulte nunpuina chuan mi dangte nên inngeih takin min awmtîr thei a. (Mt. 7:12; Phil. 2:3, 4) Kan kalna tûr kawng chu ṭha taka chhun ên a nih avângin, kan thutlûkna siamin nakin hnua nghawng a neih thui dân tûr chu kan ngaihtuah tel thei a ni. (1 Tim. 6:9) Bible chuan nakin hun atâna Pathian thiltum pawh a sawi lâwk a, chu thiltum nêna inmil nun kawng ûm tûrin min ṭanpui a ni. (Mt. 6:33; 1 Joh. 2:17, 18) Pathian thu bulte inkaihhruaitîrtu chuan nun awmze nei a va chên dâwm êm!

6. Kan thlarau lam indonaah Bible chu eng ang taka thiltithei nge a nih?

⁶ Bible chu kan thlarau lam indona atâna hriamhrei thiltithei tak a nih dân pawh hi han ngaihtuah teh. Paula chuan Pathian thu chu “thlarau ngûnhnâm” tiin a ko va. (Ephesi 6:12, 17 chhiar rawh.) Thiam taka hman a nih chuan, Bible thuchah chuan mite chu Setana thununna hnuaia thlarau lam sal tânna ata a chhuah zalên thei a ni. Chu chu mite tiboral lo va, chhanhim zâwktu ngûnhnâm a ni a. Chu ngûnhnâm thiam taka hman chu kan tum tlat tûr a ni lâwm ni?

Pathian Thu Fel Takin Hmang Rawh

7. Engvângin nge “thlarau ngûnhnâm” chu hmang thiam tûra kan zir a pawimawh?

⁷ Sipai chuan a ngûnhnâm hman dân ṭha taka a zir chauhvin, indonaah a hmang ṭangkai thei ang. Chutiang bawk chu kan thlarau lam indonaa “thlarau ngûnhnâm” kan hman dân pawh chu a ni. Paula chuan: “Hnathawktu, thutak thu fel taka hmang chu zak tûr a ni lo angin, Pathian ngaiha ṭhaa inentîr tûrin ṭhahnem ngai rawh,” tiin a ziak a ni.—2 Tim. 2:15.

8, 9. Engin nge Bible thute hre thiam tûrin min ṭanpui ang? Entîrna pe rawh.

⁸ Engin nge kan rawngbâwlnaah ‘thutak thu fel taka hmang’ tûrin min ṭanpui ang? Bible thu chu mi dangte hnêna kan hrilhfiah hmain, chiang taka kan hriatthiam phawt a ngai a. Chutiang ni tûr chuan Bible châng a chung leh a hnuaia thu awmte chu kan ngaihtuah a ngai a ni.

⁹ Bible châng dik taka hre thiam tûra a chung leh a hnuaia thu awmte kan ngaihtuah a ngaihzia chu, Galatia 5:13-a Paula thusawi chuan a târ lang chiang hle a. Ani chuan: “Nangni unaute u, bâwih ni lo tûrin koh in ni si a; nimahsela in bâwih nih lohna chu tisa tâna remchângah hmang suh ula, hmangaihnain rawng inbâwlsak tawn ṭheuh zâwk rawh u,” tiin a ziak a ni. Hetah hian Paula’n eng bâwih nih lohna, a nih loh leh zalênna nge a sawi? Sual leh thihna aṭanga zalênna leh thurin dik lo aṭanga zalênna nge ni a, thil dang aṭanga zalênna zâwk? A chung leh a hnuaia thu awmte chuan Paula sawi chu ‘Dân ânchhe lak ata tlan chhuah’ avânga zalênna a ni tih a târ lang. (Gal. 3:13, 19-24; 4:1-5) Ni e, Paula  sawi chu Kristiante neih zalênna hi a ni. Chu zalênna hluttute chuan hmangaihna avângin rawng an inbâwlsak tawn ṭheuh va. Hmangaihna nei lote erawh chu an inrêlin, an inhnial ṭhîn a ni.—Gal. 5:15.

10. Bible thute dik taka hre thiam tûr chuan, eng thute nge kan ngaihtuah ngai a, chûng chu khawiah nge kan hmuh theih ang?

¹⁰ Bible châng pakhat hre thiam tûr chuan a ziaktu, a ziah hun leh a ziah lai dinhmun ang chi, a thu ṭobul (background) te kan ngaihtuah tel a ngai a. Tin, ziah a nih chhan leh, a theih chuan a hun laia mite khawtlâng nun, nungchang, leh sakhaw vawn te hriat tel chu a ṭangkai thei bawk. *

11. Bible châng kan hrilhfiah hian eng thilah nge kan fîmkhur ang?

¹¹ ‘Thutak thu fel taka hmannaah’ chuan Bible thutak dik taka hrilhfiah mai aia tam a tel a. Bible chu mite vau nâna hmang lo tûrin kan fîmkhur tûr a ni. Thutak humhim nân Bible chângte chu hmang thei mah ila, Bible chu kan thu ngaithlatute vauna talhtum anga hman tûr a ni lo. (Deut. 6:16; 8:3; 10:20; Mt. 4:4, 7, 10) Tirhkoh Petera fuihna thu: “In thinlungah Krista chu Lalah ruat rawh u; nangmahnia awm in beisei chhan zâwt apiang che u chhâng tûrin inpeih sa fo ang che u, nimahsela thuhnuairawlh tak leh ṭih dêk chungin,” tih chu kan zâwm tûr a ni.—1 Pet. 3:15.

12, 13. Eng “kulhpui nghet takte” nge Bible thutak chuan a ṭhiah theih? Entîrna pe rawh.

¹² Pathian Thu fel taka hman a nih hian, chu chuan eng nge a hlen chhuah theih? (2 Korinth 10:4, 5 chhiar rawh.) Bible thutak chuan “kulhpui nghet takte” a ṭhiat thei a, chu mi awmzia chu thurin dik lote, thil chîn ṭha lote, leh mihring finna târ langtu khawvêl finnate chu a hai lang thei tihna a ni. Bible chu ‘Pathian hriatna dâl tûra siam’ ngaih dân engpawh ṭhiah nân kan hmang thei a. Tin, Bible zirtîrna chu thutak mila an ngaihtuahna siamrem tûra mite ṭanpui nân a hman theih bawk.

¹³ Entîr nân, India rama nu pakhat kum 93 mi chungchâng hi han ngaihtuah teh. A naupan lai aṭangin chanchhâwnna ring tûra zirtîr a ni a. Ram danga awm a fapain lehkhathawn hmanga Bible a zirpui ṭan chuan, Pathian Jehova leh a thiltum chungchâng a zirte chu a pawm nghâl mai a ni. Mahse, chanchhâwnna zirtîrna chu a thinlungah a intuh ngheh tawh êm avângin, a fapain mitthite dinhmun chungchâng a ziah chu a pawm thei hlawl lo va. Heti hian a sawi a ni: “Bible chungchâng thutak i rawn sawi kha ka hre thiam thei thlâwt lo. Sakhua zawng zawng chuan kan taksa chhûnga thil engemaw chu thi thei lo niin a zirtîr si a. Tûn thleng hian taksa a thihin hmuh theih loh thil engemaw chu taksa dangah vawi 8,400,000 lai a chang nawn niin ka ring a. Chu chu engtin nge a dik loh theih ang? Sakhua zawng zawng deuh thaw chu a  dik lo tihna em ni ang?” tiin. Thlarau ngûnhnâm chuan kulhpui anga thinlunga zung kaih nghet chutiang thurinte chu a ṭhiat thei em? Chu mi chungchânga Bible zirtîrna an sawi belh hnu, chawlhkâr engemaw zâtah chuan heti hian a ziak a ni: “A tâwp a tâwpah chuan mitthite chungchânga thu dik chu ka hre thiam ṭan ta. Thawhlehna hunah chuan kan hmangaih thi tawhte kan hmu leh thei dâwn tih hriatna chuan hlimna nasa tak min pe a ni. Pathian Ram chu a lo thlen thuai ka beisei,” tiin.

Thlêm Thiamna Nên Hmang Rawh

14. Kan thu ngaithlatute thlêmthlu tih awmzia chu eng nge ni?

¹⁴ Rawngbâwlnaa Bible thiam taka hmang tih chu Bible chângte lâk chhuah mai hi a ni lo. Paula chuan mite ‘thlêm thiamna’ nên thu a sawi a, keini pawhin chutiang chuan kan ti ve tûr a ni. (Tirhkohte 19:8, 9; 28:23 chhiar rawh.) “Thlêm” tih awmzia chu “hmin” tihna a ni a. Thlêmthlûka awm chuan “a rilru a hmin êm avângin thil engemaw chu a ring thlap thei” a ni. Mi tuemaw Bible zirtîrna pawm tûra kan thlêmthlûk hian, chu zirtîrna chu ring nghet tûrin kan hmin tihna a ni a. Chutianga hmin thei tûr chuan, thu ngaithlatu chuan kan thusawi chu a dik tih a rin tlat a ngai a ni. A hnuaia mi ang hian kan ti thei ang.

15. Engtin nge Pathian Thu zahna neihtîr thei tûrzâwngin chu mi lamah chuan mite ngaihsakna i lâk theih ang?

¹⁵ Pathian Thu zahna neihtîr thei tûrzâwngin chu mi lamah chuan an ngaihsakna la rawh. Bible châng i hmêlhriattîr hian, i thusawi lai chungchânga Pathian ngaih dân hriat a pawimawhzia sawi lang rawh. Zawhna i zawh a, in neitu chhânna i dawn hnu chuan, hetiang deuh hian i sawi duh mai thei, ‘He mi chungchânga Pathian ngaih dân hi lo en ta ila,’ tiin. A nih loh leh heti hian i sawi thei ang, ‘He mi chungchângah hian Pathianin eng nge a sawi?’ tiin. Chutianga Bible châng hmêlhriattîrna chuan Bible hi Pathian hnêna mi a nihzia a târ lang a, ngaithlatu chu Pathian Thu zahna nei tûrin a ṭanpui bawk a ni. Chutianga tih chu Pathian ring si, Bible zirtîrna hre vak si lote hnêna thu kan hrilh hunah a pawimawh lehzual a ni.—Sâm 19:7-10.

16. Engin nge Bible châng ṭha taka hrilhfiah tûrin ṭanpui ang che?

¹⁶ Bible chângte chhiar mai suh; hrilhfiah tel rawh. Paula chuan a thil zirtîrte chu “a hrilhfiah a, [Bible châng dangte hmangin] a tilang ṭhîn.” (Tirh. 17:3) Bible chângah chuan thu pakhat aia tam a tel ṭhin avângin, i thusawi lai atâna pawimawh thu hlâwmte chu i lâk hran a ngai thei a. Chu chu a thu pawimawh lai chhiar nawnin emaw, in neituin a lo hriat theih nâna zawhna siamin emaw i ti thei a ni. Tichuan, chu thu awmzia chu hrilhfiah rawh. Chu mi hnuah chuan, i thu ngaithlatu chu, chu Bible chângin a nun a khawih tel dân hmu thiam tûrin ṭanpui ang che.

17. Engtin nge mite hmin thei tûrzâwngin Pathian Lehkha Thu aṭanga i chhûtpui theih?

¹⁷ Mite rilru hmin thei tûrzâwngin Pathian Lehkha Thu aṭangin chhûtpui rawh. Paula chuan tih tak zeta ngenna leh chhût dân ṭha tak hmangin, mi dangte chu ‘Pathian Lehkha Thu aṭangin khun takin a chhûtpui’ a ni. (Tirh. 17:2, 4) Amah ang bawkin, i thu ngaithlatute thinlung thlen chu tum tlat ang che. Amah i ngaihsakzia târ langtu zawhnate hmangin a thinlunga thil awm chu “phawrh chhuak” ang che. (Thuf. 20:5) Mi hawihhâwm lo tak nih chu pumpelh la, chiang tak leh fel takin chhûtpui rawh. I thusawi  nemngheh nân a finfiahna lungawithlâk tak i pe tûr a ni a. I thusawi chuan Bible a ṭanchhan tlat tûr a ni bawk. Bible châng pahnih emaw, pathum emaw a inzawma chhiarsak ai chuan, Bible châng pakhat ṭha taka hrilhfiah leh tehkhin thu hmanga hrilhfiah chu a ṭha zâwk a ni. A tih chianna dangte hmang pawhin, ‘i hmuiah thiamna i belhchhah’ thei a ni. (Thuf. 16:23) A châng chuan zir chîkna neih emaw, thu dang pêk belh emaw pawh a ngai mai thei. A hmaa kan sawi tâk pitar kum 93 mi chuan thlarau thi thei lo zirtîrna hluar êm êm chhan chu a hriat a ngai a. Chu zirtîrna lo chhuahna leh khawvêl sakhaw tam zâwka a lo luh dân hriatthiam chu Bible zirtîrna pawm tûra amah hmin nân a pawimawh hle a ni. *

Thiam Takin Hmang Zêl Rawh

18, 19. Engvângin nge “thlarau ngûnhnâm” chu thiam taka kan hman zêl ang?

¹⁸ Bible chuan “he khawvêl awm dân hi a boral mêk” a ti a. Mi suaksualte chu an sual zual deuh deuh a ni. (1 Kor. 7:29-31; 2 Tim. 3:13) Chuvâng chuan ‘thlarau ngûnhnâm, Pathian Thu’ hmanga “kulhpui nghet takte” kan ṭhiah zêl chu a ngai a ni.

¹⁹ Pathian Thu, Bible kan nei thei leh a thuchah ken thiltithei tak chu mi rilru ṭhate hnêna thlen a, zirtîrna dik lo phawrh chhuah nâna kan hmang thei chu a va lâwmawm tak êm! A thuchah ken chuan ngaih dân insawh nghet eng pawh chu a ṭhiat thei a ni. Chuvângin, Pathian min pêk Lalram thu puan chhuahnaah hian “thlarau ngûnhnâm” thiam taka hman chu i tum tlat ang u. (w10-E 02/15)

[Footnote-te]

Eng Nge Kan Zir?

• Engtiang khawpin nge Pathian Thu chuan thil a tih theih?

• Engtin nge ‘thutak thu fel taka kan hman’ theih ang?

• Bible thuchah chuan “kulhpui nghet takte” chungah eng thil nge a tih theih?

• Rawngbâwlnaa mi i thlêmthlûk thiamna chu engtin nge i tihhmasâwn theih?

[Zirlai Atâna Zawhnate]

[Phêk 20-naa bâwm/milem]

Thlêm Thiamna Nêna Bible Hman Dân

▪ Bible zahna neihtîr rawh

▪ Bible chângte hrilhfiah rawh

▪ Mite thinlung a thlen theih nân an rilru hmin thei tûrzâwngin chhûtpui rawh

[Phêk 19-naa milem]

“Thlarau ngûnhnâm” thiam taka hman dân i zir tûr a ni