Zu Chungchânga Pathian Thlîr Dân Chu Eng Nge Ni?

MIN Siamtu, kan tâna thil ṭha ber duhtu chuan a tawk chauhva zu in chu a khap lo. * Chutih ahnêkin, mihringte hnênah chuan ‘thinlung tihlâwmna uain, hmai tihmawmna tûr hriak, thinlung tihchakna chhang’ a pe zâwk a ni. (Sâm 104:15) Ṭum khat pawh Isua Krista chuan tui chu “uain ṭha” ber chi-a chantîrin, inneihna chu hlimawm tak a nihtîr a ni.—Johana 2:3-10.

Siamtu chuan zuin kan taksa leh thluak a nghawng theih dân chiah a hria tih rin chu a inâwm hle a. Kan Pa vâna mi chuan Bible  hmangin, ‘kan ṭhatna tûrin min zirtîr’ a, zu in nasatna laka fîmkhur tûrin min hrilh a ni. (Isaia 48:17) Hêng vaukhânna thu chiang tak hi han ngaihtuah teh:

“Uain ruiin awm suh u, chu miah chuan insûm lohna a awm si a.” (Ephesi 5:18) “Zu ruih hmangte . . . emawin Pathian ram an luah lo vang.” (1 Korinth 6: 9-11) Pathian Thu chuan “zu ruihna te, zu hmun hlimna te,” leh ‘chutiang thilte’ chu a dem a ni.—Galatia 5:19-21.

Tûnah chuan zu in hnem lutuk hlauhawmna kawng ṭhenkhat i lo ngaihtuah ang u.

Zu In Hnem Lutuk Hlauhawmnate

Zu chuan ṭhatna engemaw chen chu nei mah se, taksa leh rilru hna thawk ṭha lai khawih buai thei thil a pai a. Chuvângin, in hnem lutukna chuan a hnuaia târ lan harsatna engemaw ber hi a thlen thei a ni:

Zu in hnem lutukna chuan ngaihtuahna a khawih buai theih avângin, zu in nasa mi chuan “chiang kuang takin thil a ngaihtuah thei ṭhîn lo.” (Thufingte 23:33, Today’s English Version) Zu in nasa tak Allen-a chuan heti hian a sawi: “Zu ngawl vei chu taksa lama dam lohna chi khat a nih mai bâkah, rilru leh ngaihtuahna lama dam lohna pawh a ni bawk. Mi dangte chunga harsatna a thlen dân chu kan ngaihtuah lo a ni,” tiin.

Zu in hnem lutukna chuan mahni inthunun theihna pawh a tihniam thei. Bible chuan: “Uain . . . chuan thinlung a la bo ṭhîn,” tiin min vaukhân a. (Hosea 4:11) Engtin nge a lâk bo ṭhin? Kan ngaihtuahna leh châkzâwng kan tihlan loh tlângpuite pawh zu thununna hnuaiah chuan thil tih châk awm tak a nih loh pawhin, tih âwm tak niin a lang thei a. Thil dik tih kan tum tlatna chu a tinêp thei a ni. Zu chuan rilru lama invênhimna kawngah min inthlahdahtîr theiin, chu chuan thlarau lama chhiatna a thlen a ni.

Entîr nân, John-a chu a nupui nêna an inhnial hrep hnuah zu dâwrah a lût a. A thinrim hrîk thlâk nâna no engemaw zât a dawm hnu chuan hmeichhe pakhatin a rawn pan a. No hnih khat vêl a dawm belh leh hnu chuan John-a chuan chu nu chu hruai chhuakin, a chêtsualpui ta a ni. A hnuah chuan John-a chu a harhfîm laia ngaih pawh a ngaihtuah ngai loh tûr thil zu avânga a ti ta chu a inchhîr hle a ni.

Zu in hnem lutukna chuan ṭawngkam leh chêtziaa insûm lohna a thlen. “Tute nge chungpik ṭhîn a, . . . tute nge inhau ṭhîn?” tiin Bible chuan zawhna a siam a. Bible vêk chuan: “Zu hmuna awm reng ṭhînte, zu chawhpawlh in ṭhînte an ni,” tiin a chhâng a ni. (Thufingte 23:29, 30) Zu in tam lutukna chuan ‘lawng ngul lêra awm, inthên inthên, lawng rui angin a inhriattîr’ thei che a ni. (Thufingte 23:34, Mizo (Lushai) – C.L. Re-edited) Zu in hnem lutuk chu a han harh chhuah chuan “a hriat lohvin a lo pem pheng phung” thei a ni.—Thufingte 23:35, The Contemporary English Version.

Zu in hnem lutukna chuan hrisêlna a tichhe thei. “A tâwpah chuan [zu chuan] rûl  angin a chu a, rûl tûr ṭha mi angin mi a chu ṭhîn.” (Thufingte 23:32) Damdawi lam thiamna chuan he hmân lai thufing dikzia hi a nemnghet a ni. Zu in hnem lutukna chuan natna chi hrang hrang cancer, thin vûng (hepatites), thin sâwng (cirrhosis of the liver), la natna (pancreatitis), thisena a thlum tlâk chhamna zunthlum natna chi khat, zu avânga taksa chhiatna hlauhawm tak, zeng thutna, a nih loh leh lung lam ṭhat lohna te leh thil dang dangte a thlen thei a ni. Tin, vawikhat in hnem lutukna emaw, intihsiak nâna in vak emaw chuan mi chu nî khaw hre lova awmna leh thihna hial pawh a thlen thei a ni. Amaherawhchu, zu in hnem lutukna rah chhuah ṭha lo ber chu hrisêlna tlâk chhiatna mai a ni lo.

A hlauhawmna ber. Mi chu rui kher lo mah se, a âwm tâwk bâka in chu thlarau lam tân a hlauhawm a ni. Bible chuan: “Zu um tûra zîng tak taka tho va, uainin a tihruih bûng hmâ lohva zân rei tak tak thlenga awm ṭhînte chu an chung a pik e!” tiin chiang takin a sawi a ni. Eng nge a chhan? Isaia chuan a âwm tâwk bâka zu innain thlarau lama nghawng a neih chu heti hian a sawifiah a ni: “LALPA hnathawh chu an ngaisâng ṭhîn lo va, a kut thiltih chu an ngaihtuah ngai hek lo,” tiin.—Isaia 5:11, 12.

Pathian Thu chuan “uain heh mite zîngah” tel lo tûrin min ti a. (Thufingte 23:20) Hmeichhe puitlingte pawh “uain heh mite” ni lo tûra vaukhân an ni bawk. (Tita 2:3-5) Engvângin nge chutiang mi chu an nih loh vang? Mi chuan a hriat lêm lohvin a inbelh hret hret a, a in zîng tawlh tawlh ṭhîn a. A tâwpah chuan zu ringawt ngaihtuahin: “Engtikah nge ka lo harh ang aw? Kan in leh bawk ṭhîn ang” a ti ṭan thei a ni. (Thufingte 23:35) Zu in miin a penṭâwng tihreh nâna in belh a châk hian dinhmun hlauhawm takah a ding ta tihna a ni.

Bible chuan “uain hehnaah te, zu hmun hlimnaah te, zu inhonaah te” tel ṭhîn mite chuan “mi nung leh mitthite ngaihtuah tûra inpeih sa hnênah chuan an chanchin an la sawi ang,” tih a vaukhân a. (1 Petera 4:3, 5) Tin, tûn laia kan dinhmun khirh tak chungchângah, Isua chuan: “Fîmkhur rawh u, chutilochuan ei puar lutuk nên, zu ruih nên, dam chhûng khawsak ngaihtuah nên, in rilru a khat lutuk hlauh ang a, [Jehova] nî chu thang âwk angin thâwklehkhatan in chungah a lo thleng phut ang,” tiin a vaukhân bawk.—Luka 21:34, 35.

A nih leh, a âwm tâwk bâka zu in mite chuan ‘zu ruihna nêna an rilru a khah lutuk’ loh nân eng nge an tih theih? (w10-E 01/01)

[Footnote]

[Phêk 6, 7-naa milemte]

Zu in hnem lutukna chuan harsatna tam tak a thlen thei