He Hun Khirh Tak Kârah Hian “Thinlung Thianghlimna” Vawng Rawh

“TUN hnaia Itali rama mipat hmeichhiatna lama Kohhran hmingchhiatna chungchângah, Catholic chanchinbu mi Vittorio Messori-a chuan heti hian a sawi a ni: “Tûn lai Church hian thianghlimna a tlachham tih tuma phat rual a ni lo. Chu chu sakhaw thil avânga nupui pasal neih khapna dân paih bona pawhin a ching fel thei lo vang, a chhan chu buaina tâwkte zînga zaa 80 chuang chu mawngkawhur—mipa puitling leh naupangte khawih chingpentu puithiamte an nih vâng a ni.”—La Stampa.

Suahsualna pung nasa tak chu he khawvêl kal hmang ‘ni hnuhnûngte’ chhinchhiahna a ni tak meuh a ni. (2 Tim. 3:1-5) Chanchin thar chhuakte’n a târ lan angin, nungchang lama tlâk chhiatna chuan mi nâwlpuite chungah chauh ni lovin, Pathian mi nia inchhâlte meuh chungah pawh nghawng ṭha lo tak a nei a ni. An thinlung suaksual leh bawlhhlawh tak chuan thil khaw lo tak takte ti tûrin a chêttîr a. (Eph. 2:2) Isua chuan chhan ṭha tak neiin, “thinlungah hian ngaihtuahna sualte, tualthahnate, uirênate, inngaihnate, rûkrûknate, hêknate, sawichhiatnate a lo chhuak si ṭhîn” tiin a vaukhân a ni. (Mt. 15:19) Amaherawhchu, Pathian Jehova chuan a chhiahhlawhte chu “thinlung thianghlimna” ngaina tûrin a duh a. (Thuf. 22:11) Chuti a nih chuan, engtin nge Kristianin he hun khirh tak kârah hian thinlung thianghlim tak a vawn theih ang?

‘Thinlunga Thianghlim’ Tih Awmzia Chu

Bible-ah chuan “thinlung” tih thu mal chu entîr neia hman a ni ṭhîn a. Lehkhabu pakhat sawi dân chuan, Bible-a thinlung tih hian “mi chhûngrila a nihna ber” leh “nungchang thununtu, Pathian nêna inlaichînna a awmna mihring taksaa Pathian ngaih pawimawh lai ber” a kâwk a ni. Thinlung hian chhûng lama kan nihna dik tak a entîr a. A chunga târ lan tâk lehkhabu-in a sawi angin, thinlung chu Pathian Jehova’n a chhiahhlawhte laka a enfiah ber leh a thil ngaihhlut ber a ni.—1 Pet. 3:4.

Bible-ah chuan “thianghlim” leh “fai” tih chuan tisa lama thianghlimna a kâwk a. Nungchang lam leh sakhaw lam thila bawlhhlawh kai lo—pawlh dal loh, tihbawlhhlawh loh, a nih loh leh tihbalh loh—nihna pawh a kâwk bawk a ni. Tlâng chunga a Thusawiah Isua chuan: “Thinlung thianghlimte chu an eng a thâwl e,” tiin sawi a. Chhûngril lama thianghlimte a sawina a ni. (Mt. 5:8) Chûng mite chu an hmangaihna te, an châkzâwng te, leh an rilru put hmang te a thianghlim a. Anni chuan hmangaihna leh lâwmna avânga chêttîra awmin, Pathian Jehova chu vervêkna tel lo, tih tak zetin, leh an thinlung zawng zawngin an hmangaih a ni. (Lk. 10:27) Nang pawh chutiang bawka thianghlim chu i duh ve dâwn lâwm ni?

“Thinlung Thianghlimna” Vawn Reng A Harsa

Pathian Jehova chhiahhlawhte chuan “kut fai” mai bâkah, “thinlung thianghlim” an nei tel tûr a ni. (Sâm 24:3, 4) Mahse, tûn laiah hian Pathian chhiahhlawhte tân “thinlung thianghlim” vawn reng chu a harsa tial tial a. Setana leh a awpna hnuaia awm khawvêl bâkah, kan ṭhat famkim lohna chuan Pathian Jehova laka inla hrang tûrin nasa takin min nawr a ni. Chûng nawrnate do tûr chuan “thinlung thianghlimna” chu kan ngainain, vawn reng kan tum tlat chu a pawimawh hle. Chu chuan min vênghimin, Pathian ṭhian ni zêl tûrin min ṭanpui ang. A nih leh, engtin nge thinlung thianghlim chu kan vawn reng theih ang?

Hebrai 3:12-ah chuan he vaukhânna hi kan hmu a: “Unaute u, fîmkhur rawh u, chutilochuan Pathian nung chu bânsan tûrin in zîngah  tu chhûngah pawh rin lohna thinlung sual a lo awm dah ang e,” tih hi. “Rin lohna” thinlung kan neih chuan “thinlung thianghlimna” vawng kan ni thei lo. Setana chuan Pathiana rinna kan hloh theih nân eng ngaih dânte nge a theh darh? A ngaih dânte zîngah chuan chanchhâwnna ngaih dân theh darhte zîngah chuan nungchang lam leh sakhaw lama thu dik belh chian dâwl a awm lo tih ngaih dân te, leh Bible hi Pathian thâwk khum a nih rinhlelhna te a tel a ni. Chutiang ngaih dân hlauhawm takte chu kan do tûr a ni. (Kol. 2:8) Nî tina Bible chhiar leh ngun taka ngaihtuah chu chutiang ngaih dân hlauhawm takte do dân ṭha ber a ni a. Pathian Thu hriatna dik chuan Pathian Jehova hmangaihna a tithûkin, mite a dâwr dân kan hriatthiamna a tipung a ni. Ngaih dân dik lote hnâwl thei tûr leh thinlung thianghlim kan vawn reng theih nâna Pathian Jehova rinna nghet nei reng tûr chuan chutiang hmangaihna leh ngaihhlutna chu neih ngei a ngai a ni.—1 Tim. 1:3-5.

Tisa Châkna Kan Hmachhawn Hunah

“Thinlung thianghlimna” vawn reng kan tumna kawnga harsatna kan tawh theih dang lehah chuan tisa lam leh sum leh pai lam thil neih châkna pawh a tel a ni. (1 Joh. 2:15, 16) Sum ngainatna emaw, hausak lutuk leh thil ngah lutuk tumna emaw chuan thinlung a tibawlhhlawh thei a, Kristian chu Pathian duh lohzâwng a tihtîr thei a ni. Ṭhenkhat chu an hna thawhnaah an rinawm lo ṭanin, mi dangte an bum a, a nih loh leh pawisa leh thil dangte an ru ta hial a ni.—1 Tim. 6:9, 10.

Kawng leh lamah chuan, Pathian Jehova tihlâwm loh hlauhna ṭha te, rorêl dikna ngainatna te, leh chhia leh ṭha hriatna thiang neih tum tlatna te kan neih chuan “thinlung thianghlimna” kan ngainatzia kan lantîr tihna a ni a. Chu hmangaihna chuan “engkimah dik taka awm” tûrin min chêttîr a ni. (Heb. 13:18, New World Translation) Dik tak leh rinawm taka thil kan tihna chuan thu hrilhna hun ṭha a awmtîr thei a ni. Entîr nân, Italy mi Thuhretu pakhat Emilio-a chu public transport company-a driver a ni a, a ni chuan euro 470 ($680 U.S.) awmna pawisa bag a chhar a. An hotupa hnêna a han pêk chuan a thawhpuite chuan mak an ti hle a, an hotupa  chuan a neitu dik tak hnênah a pe leh ta a ni. Emilio-a thiltih chuan an rilru a khawih êm avângin a thawhpui ṭhenkhat chuan Bible an ngaihsakin, an zir ṭan phah a. Chhûngkaw pahnih aṭangin mi pasarihin thutak an pawm phah a ni. Ni e, rilru thianghlim tak pu chunga dik taka kan awmna chuan mi dangte chu Pathian chawimawi tûrin a chêttîr thei tak meuh a ni.—Tit. 2:9, 10.

Kristian thinlung thianghlimna chunga nghawng ṭha lo nei thei dang leh chu mipat hmeichhiatna chungchânga ngaih dân dik lo leh bawlhhlawh tak hi a ni. Mi tam takin inneih hmaa mipat hmeichhiatna hman te, uirêna te, leh mawngkawhurna te thil pângngai taka an thlîrna chuan Kristian thinlung a tibawlhhlawh thei a ni. Mipat hmeichhiatna lama inhmang chuan a sual chu thupin, vervêk takin nun kawng chi hnih a zawh thei a. Chu chuan “thinlung thianghlimna” a lantîr lo a ni.

Gabriele-a chuan kum 15 mi a nihin baptisma a chang a, pioneer a thawk nghâl bawk a. Mahse, a hnuah chuan nightclub-ah ṭhian sual a kâwm ṭan ta a. (Sâm 26:4) Chu chu nun kawng bawlhhlawh leh vervêk tak a zawh ṭanna a lo ni a, Kristian kohhran aṭanga hnawhchhuah hial a lo ngai ta a ni. Chutianga Pathian Jehova thununna chuan a nun kawng ngun takin a chhût lêttîr a. Gabriele-a chuan: “Tûn hmaa ka lo ngaihthah ṭhin thilte pawh ka ti ṭan ta a. Nî tin Bible ka chhiarin, Pathian Jehova thil min hrilh tum chu hriatthiam ka tum a; tin, society thu leh hla chhuahte pawh ngun takin ka zir bawk a. Mahnia zirna neih a manhla dân leh lungâwina min pêk dân ka hmu a, Bible chhiar leh tih tak zeta ṭawngṭainain min tihchak theihzia ka hmu bawk a ni,” tiin a sawi. Hei hian Gabriele-a chu a nungchang bawlhhlawh kalsan a, Pathian Jehova nêna an inlaichînna nei lêt leh tûrin a ṭanpui a ni.

Tûnah chuan, Gabriele-a chuan a nupui nên pioneer an thawk leh tawh a. A thiltawn chuan Bible leh “bawi rinawm, fing tak” thu leh hla chhuahte zirnain mi chu thinlung thianghlim nei tûr leh nungchang bawlhhlawhna hnâwl tûra a ṭanpui theihzia a nemnghet a ni.—Mt. 24:45; Sâm 143:10.

Fiahna Hnuaia “Thinlung Thianghlimna”

Pathian mi ṭhenkhat chu dodâltu lak aṭanga nêksâwrna te, ei leh bâr harsatna te, leh dam lohna nasa takte chuan a tlâk buak a. Chûng chuan an thinlung ṭha lo taka nghawng châng pawh a nei a ni. Lal Davida pawhin chutiang thil chu a lo tawng tawh a: “Ka thlarau hi ka kawchhûngah a chau va; ka thinlung hi ka kawchhûngah a mangang ta a,” a ti hial a ni. (Sâm 143:4) Engin nge chutiang dinhmun hrehawm tak chu hmachhawntîr thei? Davida chuan Pathianin a mite a dâwr dân leh amah ngei pawhin a chhan chhuahna a lo tawnte chu a hre chhuak a. A hming ropui avânga Pathian Jehova thil lo tih tawhte chu ngun takin a ngaihtuah a. Pathian kut hnathawhte chu a chhût bawk a ni. (Sâm 143:5) Chutiang bawkin, min Siamtu leh kan tâna a thil tih tawhte leh a tih mêkte chhût ngunna chuan fiahna hnuaiah pawh min ṭanpui ang.

Miin kan chungah dik lo takin thil an tih emaw, an ti nia hriatna kan neih emaw hian kan thin a ur ṭhîn. Chu mi thil ngaihtuah rengna chuan kan unaute chungah rilru khirh tak min puttîr thei a ni. Mahni inla hrang a, mi dangte ngaihsakna lantîr meuh lovin min siam thei bawk. Mahse, chutianga chhân lêt chu “thinlung thianghlimna” neih kan duhna nên a inrem thei ang em? Chutiang thinlung neih tumnaah chuan kan Kristian unaute nêna kan indâwr dân leh kan inrem loh huna kan chhân lêt dân a tel bawk a ni tih a chiang hle.

Tûn hma zawng aia chhe zâwk leh nungchang lama tlachhe telh telh he khawvêlah hian, “thinlung thianghlimna” kan ngainat avângin Kristian dik angin kan langsâr zual a. Pathian duhzâwng tihna aṭanga kan neih chhûng lama thlamuanna chuan kan nunah nghawng ṭha tak a nei a ni. A pawimawh ber chu, “thinlunga thianghlimte” ngainatu min Siamtu, Pathian Jehova nêna inṭhianna ṭha tak kan nei thei hi a ni. (Sâm 73:1) Ni e, Isua tiam anga Pathianin “thinlung thianghlimna” ngainatute tâna thil a tih huna ‘Pathian la hmu tûr’ mi hlim leh engthâwl takte zînga mi kan ni ve thei a ni.—Mt. 5:8. (w10-E 03/15)