Chhûngkaw Hlim Neih Dân Kawngte

Kawppui Nu leh Pate Nêna Indâwr Dân

Jenny-i * chuan heti hian a sawi: Ryan-a nu chuan min duh lohzia a sawi hreh miah lo va. Ka nu leh pate pawhin Ryan-a chu an ti ṭha bîk chuang lo. Mi dang chunga chutiang taka an hawihhâwm loh lai ka la hmu ngai si lo! A tuemaw zâwk zâwk nu leh pate tlawh chu thil hrehawm tak a tling ve ve a ni.

Ryan-a pawhin heti hian a sawi: Ka nu chuan a fate tân tumah ṭha tâwk niin a hre lo va; chuvângin, atîr aṭang rêngin Jenny-i sawisêlna tûr hlîr a zawng nghâl a. Jenny-i nu leh pate min thlîr dân lah chutiang bawk. A buaithlâkna pakhat chu, chutiang thil a thlen hnua mahni nu leh pate ṭana kan inhnial ta ṭhîn hi a ni.

KAWPPUI nu leh pate nêna inngeih lohna chu fiamthu thiamte chuan fiamthu thawh nân hmang ṭhîn mah se, a takah chuan thil nuihzatthlâk a ni lo. India rama mi Reena-i chuan: “Kum tam tak chhûng chu kan pa nu hi kan inneihnaah a rawn inrawlh ṭhîn a. Ka thinurna a chunga ka hrîkthlâk theih loh avângin, ka pasal chungah ka ṭuan ṭhîn. Ka pasal chuan nupui tâna pasal ṭha nge nih a duh a, nu tâna fapa ṭha tih chu a thlan a ngai reng mai niin a lang,” tiin a sawi.

Engvângin nge nu leh pa ṭhenkhat chu an fate inneihnaah an inrawlh ṭhin? A tîra kan târ lan tâk Jenny-i chuan, a chhan ni thei âwma lang chu heti hian a sawi: “An tân chuan an fapa emaw, fanu emaw chu tuemaw naupang tak leh thiltawn nei lo takin a enkawl chu pawm harsa tak a ni thei ang,” tiin. Reena-i pasal, Dilip-a chuan, a chhan dang a sawi belh a: “An fate lo enkawl a, an tâna nasa taka inpe nu leh pate chuan, hnâwl nia inhriatna an nei a ni thei ang. Tin, an fanu emaw, an fapa emawte chuan an inneihna tihlawhtling tûrin finna an mamawh nia an hriat avângin, an lungngai tak zet pawh a ni thei ang,” tiin.

Kawng leh lamah chuan, kawppui nu leh pate chu inrawlh tûra sâwm an nih châng pawh a awm. Entîr nân, Australia rama nupa tuak khat, Michael-a leh Leanne-i chanchin hi ngaihtuah ta ila. Michael-a chuan: “Leanne-i chu thil engkim sawiho ṭhinna chhûngkaw inpawh tak aṭanga lo kal a ni a. Chuvângin kan inneih hnuah pawh, kan pahniha thu tlûkna kan siam ngai thilahte pawh a pa a râwn ṭhîn a. A pa chuan thurâwn  ṭha tak a pe ṭhîn ngei mai; mahse, kei min râwn lova a pa a râwn ṭhîn chuan ka rilru a ti-nâ a ni!” tiin a sawi.

Kawppui nu leh pate nêna indâwr thiam lohna chuan nupate chungah lungngaihna a thlen thei tih a chiang hle. Chutiang chu i chungah a thleng ve em? I kawppui nu leh pate nên in inremin, i kawppui chu i nu leh pate nên an inrem em? Harsatna lo chhuak thei thil pahnih leh chûngte i hmachhawn theih dân i lo en ang u.

HARSATNA #1: I kawppuiin i duh aia nasaa a nu leh pate a hnaihna. Spain rama mi Luis-a chuan: “Ka nupui chuan a nu leh pa kiang hnaia khawsak loh chu an laka rinawm lohna tlukah a ngai a. Kawng leh lamah chuan, fapa kan neih khân, ka nu leh pate chu nî tin mai hian an lo lêng a, chu chuan ka nupui a tichau va. Kan inkârah buaina tam tak a thlen phah a ni,” tiin a sawi.

Buaina chu: Inneihna chungchânga ruahmanna chu sawiin, Bible chuan, a hunah chuan “mipain a nu leh a pa a kalsan ang a, a nupui a vuan ang: tichuan tisa pum khat an lo ni tawh ang,” a ti a. (Genesis 2:24) “Tisa pum khat” nihna chuan khawsak dunna mai a kâwk lo. A awmzia chu, nupa chuan chhûngkaw thar—an lo chhuahna chhûngkua aia an ngaih pawimawh zâwk tûr chu—an din tihna a ni. (1 Korinth 11:3) An nupa chuan an nu leh pate an chawimawi chu a la ngai reng tho va, chutianga chawimawinaah chuan ngaihsakna pêk a tel tlângpui ṭhîn. (Ephesi 6:2) I kawppuiin chu a mawhphurhna a hlen dân chuan nangmah ngaihsak lo leh hnâwl nia inhriatna a neihtîr che a nih chuan engtin nge ni ang?

I tih theih chu: Chu dinhmun chu rilru inhawng takin bih chiang ang che. I kawppui chuan a nu leh pate chu a hnaih lutuk tak zet nge ni a, nangma’n i nu leh pate nên chutiang inlaichînna chu i nei lo mai zawk? Chutiang a nih chuan, i lo seilenna chhûngkua chuan chu dinhmun i thlîr dân chu engtin nge a nghawng theih? Nangma’n thîkna deuh i neih vâng a ni thei ang em?—Thufingte 14:30; 1 Korinth 13:4; Galatia 5:26.

Chûng zawhnate chhâng tûr chuan rilru inhawng taka mahni i inbih chian a ngai a. Chutianga inbih chianna neih ngei chu a pawimawh a ni. Kawppui nu leh pate avânga in inkâra inhnialna a chhuah fo chuan, kawppui nu leh pate nên buaina in nei ni lovin, in nupa inkârah buaina in nei tihna a ni zâwk si a.

Nupa inkâra buaina lo chhuah chhan chu, thil thlîr dân thuhmun thlap nei nupa an awm loh vâng a ni. Thil awm dân chu i kawppui thlîr dân aṭanga thlîr chhin i tum thei ang em? (Philippi 2:4; 4:5) Mexico rama pa pakhat, Adrian-a chuan chutiang chuan a tum a ni. Ani chuan: “Ka nupui chu chhûngkaw boruak ṭha vak lova seilian a nih avângin, a nu leh pate chu ka kâwm ṭha duh lo va. A tâwpah phei chuan, inbiakpawhna pawh nei miah lovin kum tam tak ka awm a. Chu chuan ka nupuiin a chhûngte, a bîk takin a nu nêna inhnaih a duh si avângin kan nupa inkârah buaina a chawk chhuak a ni,” tiin a sawi.

A hnuah Adrian-a chuan chu dinhmun chu inbûk tâwk takin a thlîr a. Heti hian a sawi a ni: “A nu leh pate nêna an inbiakpawh nasatna chuan ka nupui chungah nghawng ṭha lo a nei tih hre mah ila, inbiakpawh miah lohna pawhin harsatna a thlen thei tho tih ka hria a. A theih ang tâwkin, ka nupui nu leh pate nêna inlaichînna ṭha neih lêt a, neih chhoh zêl chu ka tum ta a ni,” tiin. *

HETI HIAN TICHHIN TEH: I kawppui nên chuan, in nu leh pate chungchânga in thil ngaihmawh ber nia lang chu ziak chhuak ula. A theih phawt chuan, “Ka ngaih dân chuan . . . ” tiin ziak ṭan ang che u. Tichuan, in thuziak chu inthleng ula. In thil ngaihmawhte sut kian dân tûr chu tih tak zeta ngaihtuahin, zawng dûn ang che u.

HARSATNA #2: I kawppui nu leh pate in nupa inkâra an inrawlh reng a, in dîl miah loh thurâwn an rawn pêkna. Kazakhstan rama nu pakhat, Nelya-i chuan: “Kan inneih hnu kum sarih chhûng chu ka pasala chhûngte nên kan  chêng za a. Fate kan enkawl dân chungchâng bâkah, ka ei rawngbâwl dân leh thil vêl ka tihfai dân chungchângah inhnialna a chhuak fo a ni. Ka pasal leh a nu hnênah chu harsatna chungchâng chu ka hrilh a; mahse, chu chuan buaina tam zâwk a hring chhuak a ni!” tiin a sawi.

Buaina chu: Kawppui nei i nih hnu chuan i nu leh pate thuneihna hnuaia awm i ni tawh lo va. Chutih a hnêkin, Bible chuan “mipa tawh phawt lû chu Krista a ni, hmeichhe lû chu mipa a ni”—a pasal chu, tiin a sawi a. (1 Korinth 11:3) Mahse, a hmaa kan sawi tâk ang khân, nupate chuan an nu leh pate chu an chawimawi tûr a ni. Thufingte 23:22 chuan: “I pa, a hringtu che thu pawm la, i nu chu a lo tarin hmusit suh,” tiin min hrilh si a. A nih leh i nu leh pa—a nih loh leh i kawppui nu leh pa—chuan pasal lû nihna chu ngaihthahin, anmahni ngaih dân kenkawh tum tlat ta se engtin nge ni ang?

I tih theih chu: Hriatthiamna rilru nei tak chungin, chutianga an rawn inrawlh luih tlat chhan chu hmuh chhuah tum ang che. Atîra târ lan tâk Ryan-a chuan: “A châng chuan nu leh pate chuan an fate nunah pawimawhna an la nei reng tih an hriat chu a ṭûl a ni,” tiin a sawi. Chutianga an inrawlhna chu an duh rêng vâng a ni lo thei a, Bible fuihna thu “tupawhin tu chungah pawh thupawi nei ang ula indawh tawnin inngaidam tawn ula,” tih hi zawm a nih chuan chinfel a ni thei a ni. (Kolossa 3:13) Mahse, i kawppui nu leh pate chu in nupa inkâra inngeih lohna awmtîr thei khawpa an inrawlh thûk chuan engtin nge ni ta ang?

Nupa ṭhenkhat chuan an nu leh pate nêna an inkârah ramri inâwm tâwk kham dân an zir a. Chu chu an lakah inkhuahkhirh chin kan nei tih hawihhâwm lo takin kan hriattîr kher tûr tihna a ni lo. * I kawppui i ngaih pawimawh zâwkzia chu chêtziaa lantîr theih a ni tlângpui ṭhîn. Entîr nân, Japan rama pa pakhat Masayuki-a chuan heti hian a sawi: “Nu leh pate’n an ngaih dân an sawi a nih pawhin, pawm nghâl mai suh. Chhûngkaw thar din tawh i ni tih hre reng rawh. Chuvângin, i kawppuiin chu thurâwn a thlîr dân chu hre hmasa phawt ang che,” tiin.

HETI HIAN TICHHIN TEH: I kawppui nên chuan nu leh pate rawn inrawlhnain in nupa inkâra harsatna a siam dân chiah sawi dûn ang che u. Ramri in siam theih tûrte leh nu leh pate chawimawi chung si a, chûng ramri in siamte in zawm theih dân tûr ziak chhuak bawk ang che u.

Kawppui nu leh pate nêna inhmuhthiam lohna tam tak chu an rawn inrawlh chhan hriatna leh nang leh i kawppui inkâra buainaa chantîr lohna hmangin a tihbo theih a ni. He mi chungchângah hian, Jenny-i chuan: “Ka pasal nêna kan nu leh pate chanchin kan sawite hian rilru na taka min siam châng a nei a; nu leh pate ṭhat famkim lohna han sawi chhuahte hian rilru na deuhvin min siam thei tih a lo lang chiang nghâl ṭhîn. Mahse, a tâwpah chuan nu leh pate ṭhat famkim lohna chu nupa inkâra inhauh nâna hman loh dân leh kan harsatna hmachhawnte tihven dân kan thiam ṭan a. Chuvângin, kan nupa pawh kan inpawh sawt a ni,” tiin a sawi. (w10-E 02/01)

[Footnote-te]

HETI HIAN INZAWT RAWH . . .

▪ Ka kawppui nu leh pate chuan eng ang mize ṭha nge an neih?

▪ Engtin nge ka kawppui ngaihthah chuang si lovin, ka nu leh pate ka chawimawi theih ang?