Mi Ṭha Zawng Zawng Vânah An Kal Em?

ISUA chuan tihhluma a awm hma, a tirhkohte nên zanriah hnuhnûng ber an kîl hnu chuan an hnênah vâna hmun pêk a tiam a: “Ka Pa inah awmna tam tak a awm a, a awm loh chuan ka hrilh tawh tûr che u a ni; in tân hmun siamin ka kal dâwn hi,” tiin. (Johana 14:2) Engvângin nge Isua chuan an tân vânah hmun a siam ang? Vânah chuan eng nge an tih dâwn?

Isua chuan a zirtîrte tân hnathawh tûr pawimawh tak a nei a ni. Chu zân hnuhnûng ber an hman lai chuan, an hnênah: “Thlêmna ka tawh chhûng zawng nangni mi awmpuitu in ni . . . ka Pain ram mi ruatsak angin ram ka ruatsak che u a ni,” a ti a. (Luka 22:28-30) Pathian chuan Isua hnênah mihringte mamawh ber—sawrkâr ṭha—petu tûr Lalber a nih tûr thu a tiam a. Isua chuan mite chu hnehchhiahna ata a chhan chhuak ang a, anmahni bumtute chu a tiboral ang. Ani chuan “kâwlkil thleng pawhin” khua leh tuite nei mah se, a lalṭhutthlêng chu vânah a ni ang.—Sâm 72:4, 8; Daniela 7:13, 14.

Amaherawhchu, Isua chuan amah chauhvin ro a rêl lo vang. Chuvângin a ni, a tirhkohte hnênah vâna awm hmun a tiam ni. Anni chu ‘lei chunga rorêltu tûrte’ zînga thlan hmasak berte an ni.—Thu Puan 5:9, 10.

Mi eng zât nge vânah kal dâwn? Sawrkârna rêng rêngah chuan rorêltute chu a khua leh tuite aiin an tlêm zâwk ṭhîn; chutiang bawkin Pathian vân Rama rorêltu tûrte pawh a rorêlna hnuaia awm tûrte nêna khaikhin chuan an tlêm hle a ni. Isua chuan a rorêlpui tûrte chungchângah: “Pâwl tlêmte u, hlau suh u; ram pêk che u hi in Pa lâwmzâwng tak a ni,” tiin a sawi. (Luka 12:32) Chu “pâwl tlêmte” chu a tâwpah chuan mi 1,44,000 an tling chho vang. (Thu Puan 14:1) Lalram khua leh tui rinawm anga leia chatuana nunna nei tûr mi maktaduai tam takte nêna khaikhin chuan, anni chu an tlêm tham hle a ni.—Thu Puan 21:4.

Chuvângin, mi ṭha zawng zawng vânah an kal lo. Lal Davida chungchângah tirhkoh Petera chuan: “Davida zawng vânah a lâwn chho lo,” tiin tlang takin a sawi mai a ni. (Tirhkohte 2:34) Baptistu Johana pawh mi ṭha tak a ni a. Mahse, Isua chuan vânah lal anga ro a rêl loh tûr thu heti hian min sawi hmuh a ni: “Hmeichhe hrin zîngah Baptistu Johana aia ropui zâwk an la chhuak ngai lo; nimahsela vân rama mi tê deuh pawh ani ai chuan an ropui zâwk si a,” tiin.—Matthaia 11:11.

Mi Ṭhate Lâwmman Dawn Tûr Chu I Dawng Ve Ang Em?

Leia chatuana nunna lâwmman hmu tûr chuan, miin eng nge a tih ngai? Isua chuan: “Pathianin khawvêl a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân,” a ti. (Johana 3:16) Pathianin khawvêl a hmangaihna chuan mi zawng zawng hnêna chatuana nunna neih theiha a siam laiin, ‘rinna’ neitute chauhvin chu lâwmman chu an dawng dâwn tih lo chhinchhiah ang che.

Rinna chuan hriatna dik a ṭanchhan tûr a ni a. (Johana 17:3) Mihringte tâna Pathian Jehova thiltum chungchâng zir belhin, mi ṭha tak i nihzia i târ lang thei a ni. Chuvângin, i thil zirte i rinna chuan thil ti tûrin chêttîr che rawh se. Tin, chatuana nun theihna hun remchâng chu i tân a inhawng ngei a ni tih ring thlap bawk ang che. (w10-E 02/01)

 [Phêk 7-naa bâwm]

Bible-in Eng Nge A Sawi?

Zawhna:

Mi ṭhate an thih hian an chungah eng thil nge thleng?

A Chhânna:

“Mitthi erawh chuan engmah an hre lo.”—THUHRILTU 9:5.

Zawhna:

Mi ṭhate’n hma lam hun beiseina eng nge an neih?

A Chhânna:

“A hun a thleng dâwn ta, chutih hunah chuan thlâna awm zawng zawngin [Isua] aw an hria ang a, an chhuak vek ang.”—JOHANA 5:28.

Zawhna:

Mi ṭha a tam zâwkte chu khawiah nge an chên ang?

A Chhânna:

“Mi felte chuan ram hi an luah ang a, a chhûngah hian kumkhuain an awm ang.”—SAM 37:29.