Pa leh Fapa leh Thlarau Thianghlim Hminga Baptisma Chan
Pa leh Fapa leh Thlarau Thianghlim Hminga Baptisma Chan
“Chutichuan kal ula, . . . mite zirtîrahte siam ula, Pa leh Fapa leh thlarau thianghlim hmingah chuan baptis ula.”—MT. 28:19.
1, 2. (a) Pentikost nî, C. E. 33 khân Jerusalem-ah eng thil nge thleng? (b) Engvângin nge mipui zînga mi tam tak chu baptisma chang tûra chêttîr an nih?
JERUSALEM-AH chuan ram tam tak aṭanga lo kal mipuiho chu an zi mur mur mai a. C.E. 33, Pentikost nî a ni a, kût pawimawh tak hman mêkah chuan mikhual tam tak an tel a ni. Mahse, thil dangdai tak mai a thleng ta thut a, chu mi hnu chuan tirhkoh Petera chuan mite thinlung hneh tak thusawina a nei a ni. A thusawi chuan Juda leh suphun mi 3,000 te rilru chu a hneh êm avângin an sim a, tuiah baptisma an chang ta hial a. Chutiang chuan anni chuan Kristian kohhran din thar chu an belhchhah a ni. (Tirh. 2:41) Jerusalem leh a chhehvêl dîl emaw, tuikhuah emawa mi tam takin baptisma an han chan chuan mipui chu an ri nuaih nuaih ngei ang!
2 Engin nge mi tam tak chu baptisma chantîr? Chu mi ni chawhma lam chuan “thâwklehkhatan vân ata ri, thlipui tleh angin a lo thleng ta phut a.” Pindan chungnungah chuan Isua zirtîr mi 120 vêl chu thlarau thianghlimin an khat a. Chu mi hnu chuan Pathian ṭih mi hmeichhia leh mipate chu an lo kal khâwm a, chûng zirtîrte ‘ṭawng danga ṭawng’ chu ngaih thlâk an châk a ni. Isua thih thu pawh tiamin, Petera thusawi an ngaihthlâk chuan mi tam tak chu “thinlunga chhun ang an lo ni ta a.” Eng nge an tih tâk ang le? Petera chuan: “Sim ula, . . . Isua Krista hmingin baptisma chang ṭheuh rawh u; tichuan, thlarau thianghlim pêk hi in hmu ang,” tiin a chhâng a ni.—Tirh. 2:1-4, 36-38.
3. Pentikost nî khân sim a, inlamlêt Judate leh saphunte khân eng nge an tih ngai?
3 Petera thusawi ngaithlatu Judate leh saphunte sakhaw lam dinhmun tûr chu han ngaihtuah teh. Anni chuan Jehova chu an Pathianah an lo pawm diam tawh a. Hebrai Pathian Lehkha Thu aṭangin thlarau thianghlim, Pathian chakna thahrui che vêl reng chu thil siam a nih chhûng leh chu mi hnua hman a nih dân pawh an hre bawk. (Gen. 1:2; Ro. 14:5, 6; 1 Sam. 10:6; Sâm 33:6) Mahse, chu mai chu a tâwk lo. Pathianin chhandamna pêk nâna a hman—Messia, Isua—chu an hriat chian a, an pawm a ngai a ni. Chuvângin, Petera chuan ‘Isua Krista hminga baptisma chan’ a pawimawhzia a târ lang a ni. A hma ni engemaw zâtah pawh tholeh Isua chuan Petera leh mi dangte chu “Pa leh Fapa leh thlarau thianghlim hmingah” chuan mite baptis tûrin thu a lo pe tawh bawk. (Mt. 28:19, 20) Chu chuan kum zabi pakhatnaah khân awmze thûk tak a nei a, tûnah pawh a la nei reng a ni. Chu awmze thûk tak chu eng nge ni?
Pa Hminga Baptisma Chan
4. Pathian Jehova nêna inlaichînna neite chungah eng inthlâk thlengna nge thleng?
4 Kan hriat tawh angin, Petera thusawi chhâng lêttute kha Pathian Jehova betu, amah nêna inlaichînna nei tawh sa an ni a. Anni chuan a Dân chu zawm an tum a, chuvânga ram dang daih aṭanga Jerusalema rawn kal pawh an ni rêng a ni. (Tirh. 2:5-11) Mahse, Pathian chuan mite a dâwr dân chu kawng pawimawh takin a thlâk thleng zo chiah a ni a. A thlan bîk Juda hnam chu a hnâwl a; Dân an zawmna chu a pawm nih hlawhna a ni tawh lo. (Mt. 21:43; Kol. 2:14) Chûng thu ngaithlatute chuan Pathian Jehova nêna inlaichînna neih zawm zêl an duh chuan thil dang pawh an tih a ngai a ni.
5, 6. Kum zabi khatnaa Juda leh saphun tam tak khân, Pathian nêna inlaichînna nei tûrin eng nge an tih?
5 Anni chuan Nunna Petu Pathian Jehova chu an hawisan loh a ngai a ni. (Tirh. 4:24) Ni e, Petera thusawi pawmtute chuan Pathian Jehova chu hmangaihna ngah, Pa a nihzia an hmu chiang lehzual thei tawh a. Pathian chuan anmahni chhan chhuak tûrin Messia a tîr a, Petera’n: “Isua in khenbeh ngei kha, Pathianin Lal leh Krista ni fâwmin a siam ta tih Israel hnam tinin hre mawlh rawh se,” tia a hrilhte ngei pawh ngaihdam a inhuam a ni. A nihna takah chuan, chûng Petera thu zâwmtute chuan Pathianin Amah nêna inlaichînna neih duhtu apiangte tâna a thil tihsakte avânga lâwmna tûr chhan an nei lehzual a ni.—Tirhkohte 2:30-36 chhiar rawh.
6 Chûng Judate leh saphunte chuan Pathian Jehova nêna inlaichînnaah chuan Ani chu Isua kal tlanga chhandamna Petu a nihzia hriatna a tel tih an hre chiang thei ta a ni. Chuvângin, Isua hnâwlna leh a thihnaa a pâwl anga mawh an phurhna pawh tiamin, an sualte an sim chhan chu i hrethiam thei tawh ngei ang a. Chu mi hnu ni engemaw zât chhûng chu ‘tirhkohte zirtîra . . . ṭhahnemngai taka an awm reng’ chhan pawh i hrethiam thei bawk ang. (Tirh. 2:42) Anni chuan “khawngaihna lalṭhutphah chu huai takin [an] hnaih” theiin, an hnaih duh ngei bawk ang.—Heb. 4:16.
7. Engtin nge tûn laiah mi tam takin Pathian chungchânga an ngaih dân an thlâk a, Pa hminga baptisma an chan?
7 Tûn laiah, mi chi hrang hrang maktaduai têlte chuan Bible aṭangin Pathian Jehova chungchâng thutak chu an zir a. (Is. 2:2, 3) An zînga ṭhenkhat chu tûn hmaa Pathian awm ring lote leh Pathian awm chu ring a; mahse, a thilsiamte ngaihsak lo nia ngai ṭhînte an ni a, chûng mite chu inlaichînna hnai an neihpui theih Siamtu a awmzia ringtu an lo ni ta a ni. Mi dang lehte chu Pathian pakhata mi pathum emaw, milem dang dang be ṭhînte emaw an ni a. Mahse, anni chuan Jehova chauh hi Pathian engkimtithei a nihzia an hre ta a, tûnah chuan a hming an lam tawh a ni. Chu chu Isua’n a zirtîrte hnêna Pa hmingin baptisma an chang tûr a ni a tih nên a inmil a ni.
8. Adama hnên aṭanga rochun sualna hre lote chuan Pa chungchângah eng nge an hriat ngai?
8 Anni chuan Adama aṭangin sual an rochung tih an hre bawk a. (Rom 5:12) Chu chu a dik tih an pawm ngei ngai thil thar a ni. Chûng mite chu natna a nei tih pawh inhre lo damlo tuemaw nêna tehkhin theih an ni a. Ani chuan dam loh rûkna engemaw a neihzia târ langtu, nâ neih zeuh zeuh châng nei mahse, natna engemaw vei anga enkawl mêk a nih loh avângin, hrisêl ṭha pângngaiah a inngai thei a ni. Mahse, chutiang chu a ni si lo. (1 Korinth 4:4 khaikhin rawh.) A nih leh, natna a vei a ni tih hmuh chhuah ni ta se engtin nge ni ang? Inenkawlna rin tlâk leh ṭhaa hriat hlawh chu zawng a, chutianga a inenkawl chu a finthlâk dâwn lâwm ni? Chutiang bawkin, mi tam tak chuan sual an rochun chungchâng thudik an han hriat chuan, Bible-in a pêk “inenkawlna” chu an pawm a, Pathianin “tihdamna” a pe tih an lo hre thiam ta a ni. Ni e, Pa hnên aṭanga inlahrang tawh phawt chuan “tihdamna” pe theitu Ama lam an hawi a ngai a ni.—Eph. 4:17-19.
9. Pathian Jehova chuan amah nêna inlaichînna neih theih nân eng nge a tih?
9 Pathian Jehova hnêna inpumpêk, baptisma chang tawh Kristian i nih chuan, amah nêna inlaichînna neih chu thil ropui tak a ni tih i hria a. Tûnah chuan, i Pa, Jehova chu hmangaihna ngah a nihzia i hre thiam ta a ni. (Rom 5:8 chhiar rawh.) Evi leh Adama chuan a lakah thil sual ti mah se, Pathian chuan keimahni pawh tiamin, a thlahte’n amah nêna inlaichînna ṭha an neih theih nân hma a la a ni. Chutiang a tihnaah chuan, Pathian chuan A Fapa duh tak hrehawm tuar lai leh thi lai hmêl chu a hmuh a ngai a ni. Chu mi hriatna chuan Pathian thuneihna pawm tûr leh amah hmangaih avânga a thupêkte zâwm tûrin min ṭanpui dâwn lo vem ni?
Fapa Hminga Baptisma Chan
10, 11. (a) Isua lakah eng nge i bat? (b) Tlanna atâna Isua thihna chu eng angin nge i ngaih?
10 Mipui hmaa Petera thusawi kha han ngaihtuah leh ta la. Chutah chuan Isua pawm a ngaih thu a sawi uar hle a, chu chu ‘Fapa hminga’ baptisma channa nên a inzawm tlat a ni. Engvângin nge chu chu khatih hun lai leh tûnah pawh a pawimawh? Ni e, Isua pawm tih leh a hminga baptisma chang tih awmzia chu Siamtu nêna kan inlaichînnaa a chanvo neih kan pawm hi a ni. Isua chu Judate Dân ânchhia la bo tûrin nghaisakna banah khaikâna a awm a ngai a; mahse, a thihna chuan hlâwkna ropui zâwk pawh a nei a. (Gal. 3:13) Mi zawng zawng mamawh tlanna inthawina a pe a ni. (Eph. 2:14-16; Kol. 1:19, 20; 1 Joh. 2:1, 2) Chu mi ti tûr chuan, Isua chuan rorêl dik lohna te, hauh te, nghaisakna te, leh a tâwpa tihhlum hial te a tawrh a ngai a ni. A inpêkna chu eng ang takin nge i hlut? Kum 1912-a vûr tlang su a, pil ta Titanic lawnga chuang mipa naupang kum 12 mi angah han inchan teh. Chhan chhuahna lawnglêngah chuan zuan luh i han tum a; mahse, a lo khat vek tawh si. Chuta lo chuang sa pa pakhat chuan a nupui chu a fâwp a, Titanic lawng chhûngah chuan rawn zuang kîrlehin, chhan chhuahna lawnglêngah chuan a nâwr lût ta thung che a ni. Engtin nge i ngaih? A chungah i lâwm hle ang. Chu thil lo tawng tak taktu mipa naupang pakhat rilru tûr chu i hre thiam thei a ni. * Isua chuan i tân chu aia tam chu a ti a. Ani chuan chatuan nun i neih theih nân a nun a pe asin.
11 Pathian Fapain i tâna a thil tih i hriat chuan engtin nge i ngaih? (2 Korinth 5:14, 15 chhiar rawh.) A chungah i lâwm hle ngei ang. Chu chuan Pathian hnêna inpumpêk tûr leh ‘mahni tâna nung tawh lo va, i thih aia thia’ tâna nung tawh zâwk tûrin a chêttîr che a ni. Fapa hminga baptisma chang tih awmzia chu i tâna Isua thiltih i hria leh ‘Lal leh Chhandamtu’ anga a thuneihna i pawm hi a ni. (Tirh. 5:31) A hma chuan, Siamtu nên inlaichînna in nei lo va, beiseina chiang kuang nei lovin i awm a ni. Mahse, Isua Krista thisen chhuaka rinna lantîr a, baptisma changin, tûnah Pa nên inlaichînna i lo nei ta a ni. (Eph. 2:12, 13) Tirhkoh Paula chuan: “Nangni hmâna in thiltih sualnaah khân ama lakah ṭhenin in lo awm a, in rilruah chuan a hmêlma in lo nih bawk kha, nimahsela tûnah zawng, . . . thianghlim tak leh, hmêlhem lo leh, sawisêlbova a dintîrna tûr che uin, a thihnain [Isua] tisa taksaah chuan [Pathianin] amah nên a inremtîr tawh che u a ni,” tiin a ziak a ni.—Kol. 1:21, 22.
12, 13. (a) Engtin nge Fapa hminga baptisma i channa chuan mi tuin emaw i rilru a tihnat huna i chhân lêt dân tûr a thunun ang? (b) Isua hminga baptisma chang Kristian i nih angin, eng mawhphurhna nge i neih?
12 Fapa hmingin baptisma chang mah la, i pianpui rilru put hmang sual chu i hre reng a. Chu i hriat rengna chu i nî tin nunah a ṭangkai a ni. Entîr nân, mi tuemawin i rilru a tihnatin, in pahnih chuan mi sual in ni tih chu rilruah i vawng reng em? In pahnihin Pathian ngaihdamna mamawh ve ve in ni a; chuvângin, nangni pawh inngaidam tawn tûr in ni. (Mk. 11:25) Chutianga tih a ṭûlzia târ lan nân, Isua’n tehkhin thu a pe a: Bawih pakhat chu a puin a talent sîngkhat (duli maktaduai 60) ba a ngaidam a. A hnuah chu bawih chuan a bawihpui duli 100 chauh ba chu a ngaidam ve duh lo a ni. Isua chuan heti hian sawi zawm a: A unau ngaidam lotu chu Pathian Jehova pawhin a ngaidam bîk lo vang, tiin. (Mt. 18:23-35) Ni e, Fapa hminga baptisma chan awmzia chu Isua thuneihna hriat leh mi dangte ngaihdam a inhuamna pawh tiamin, a entawn tûr siam leh zirtîrnate zui tum tlat hi a ni.—1 Pet. 2:21; 1 Joh. 2:6.
13 Ṭha famkim lo i nih avângin, Isua thiltih ang chiah chuan i ti ve thei lo va. Mahse, Pathian hnêna i inpumpêkna nêna inmilin, i theih tâwka ṭhaa Isua entawn chu i duh a ni. Chutianga tihnaah chuan mihring hlui hlîp a, mihring thara inthuam tûra beih chhunzawm zêlna a tel a ni. (Ephesi 4:20-24 chhiar rawh.) I ṭhian zah tak tuemaw thiltih dân leh mize ṭhate entawn leh zir chu i duh ngei a rinawm a. Chutiang bawkin, Isua chu entawn a, a hnên aṭanga zir chu i duh a ni.
14. Engtin nge Isua vân lam Lal a nih anga a thuneihna i pawmzia i lantîr theih?
14 Fapa hminga baptisma channain a huam telte i hriat thiamzia i lantîr theih dân kawng dang pawh a la awm a. Pathian chuan “engkim [Isua] ke hnuaiah a dah a, amah chu engkim zawng zawng chungah lû atân kohhranho hnênah chuan a pe a.” (Eph. 1:22) Chuvângin, Pathian hnêna inpumpêkte Isua’n a kaihhruai dân chu i zah a ngai a ni. Krista chuan tualchhûng kohhranah hian mihring ṭha famkim lote a hmanga a, a bîk takin, kohhran upate a hmang bîk a ni. Chutianga upate thlan an nih chhan chu “mi thianghlimte tihfamkim nân Krista taksa siam ṭha tûrin” a ni. (Eph. 4:11-13) Ṭha famkim lo mihringte chuan thil tisual mah se, vân lam Lalrama Lalber, Isua chuan thil awm dân chu ama hun leh ama kawngin a chingfel thei a ni. Chu chu i ring em?
15. Baptisma la chang tûr i nih chuan, i chan hnuah eng malsâwmnate nge i beisei theih?
15 Ṭhenkhat chuan Pathian Jehova hnêna inpumpêkna leh baptisma channa an la nei lo cheu va. Nang pawh, i la chang lo a nih chuan, a chunga kan sawi tâk ang khian Fapa pawm chu i tâna thil tihâwm tak leh tih atâna ṭha tak a ni tih i hmu thiam em? Fapa hminga baptisma channa chuan malsâwmna ropui tak dawngtu tûrte zîngah a dah ang che.—Johana 10:9-11 chhiar rawh.
Thlarau Thianghlim Hminga Baptisma Chan
16, 17. Thlarau thianghlim hminga baptisma channa chuan i tân eng awmzia nge a neih?
16 Thlarau thianghlim hminga baptisma chang tih awmzia chu eng nge? Kan hriat tawh angin, Pentikost nîa Petera thusawi ngaithlatute chuan thlarau thianghlim nihna chu an hria a. Dik takin, Pathianin thlarau thianghlim a hmang chhunzawm zêl tih fiahna chu an mit ngeiin an hmu a ni. Petera chu ‘thlarau thianghlima khat vek a, thlarauvin a ṭawngtîr ang zêla ṭawng danga lo ṭawng tate’ zînga pakhat a ni a. (Tirh. 2:4, 8) ‘Hminga’ tih ṭawngkam hi mi mal hming atân chauhva hman a ni kher lo. Tûn laiah, thil tam tak chu “sawrkâr hminga” tih a ni a; mahse, sawrkâr chu mi mal a ni lo. Sawrkâr thuneihna hmanga tih a ni tihna mai a ni. Chutiang bawkin, thlarau thianghlim hminga baptisma chang chuan thlarau thianghlim chu mi mal ang ni lovin, Pathian Jehova thiltihtheihna che vêl reng a ni tih a hria a. Chutianga baptisma changtu chuan Pathian thil tuma thlarau thianghlim chanvo chu a pawm tihna a ni.
17 I Bible zirna aṭangin thlarau thianghlim chungchâng chu i hria a ni lâwm ni? Entîr nân, Bible hi thlarau thianghlim thâwk khuma ziah a ni tih i hria a. (2 Tim. 3:16) Thlarau lama hma i sâwn chhoh zêl hian, ‘kan Pa vâna mi chuan [nangmah pawh tiamin] a dîltute chu thlarau thianghlim a pe’ ṭhîn tih chu i hre thiam lehzual ang. (Lk. 11:13) Thlarau thianghlim chuan i nuna hna a thawhzia i hmu mai thei a ni. Kawng lehlamah chuan, thlarau thianghlim hminga baptisma la chang tûr i nih chuan Isua’n Pathianin thlarau thianghlim a pe dâwn a tih awmzia chu, chu thlarau i dawn rualin malsâwmna dik tak dawn tûr i nei tihna a ni.
18. Thlarau thianghlim hminga baptisma changte’n eng malsâwmna nge an dawn?
18 Tûn laiah, Pathian Jehova chuan Kristian kohhran chu a thlarau hmangin a kaihruai tih a chiang bawk a. Chu thlarau chuan kan nî tin thiltihah a mi malin min ṭanpui bawk. Thlarau thianghlim hminga baptisma kan channaah chuan kan nuna thlarau thianghlim chanvo hriat leh lâwm taka chu thlarau kaihhruaina mila awm chu a tel a ni. Mahse, mi ṭhenkhat chuan Pathian Jehova hnêna kan inpumpêkna mila kan nun theih dân leh kan inpumpêknaa thlarau thianghlim tel ve dân chu an hre thiam lo mai thei a. Chu chu a dawta thuziakah kan ngaihtuahho dâwn a ni. (w10-E 03/15)
[Footnote]
^ par. 10 Awake! October 22, 1981 (English), phêk 3-8 en rawh.
Kan Hre Chhuak Thei Em?
• I tân Pa hminga baptisma channaah eng nge tel?
• Fapa hminga baptisma chang tih awmzia chu eng nge ni?
• Pa leh Fapa hminga baptisma chan a pawimawhzia i hre thiam tih engtin nge i târ lan theih?
• Thlarau thianghlim hminga baptisma chan awmzia chu eng nge ni?
[Zirlai Atâna Zawhnate]
[Phêk 14-naa milemte]
Pentikost nî, C.E. 33 khân, zirtîr tharte chuan Pa nên eng inlaichînna nge an siam?
[Milem Hawhtîrtu]
Israel Museum, Jerusalem phalnaa târ lan