Ṭhalaite U—Pathian Jehova Rawngbâwl In Chakna Tizual Rawh U
Ṭhalaite U—Pathian Jehova Rawngbâwl In Chakna Tizual Rawh U
“I vânglai hian i siamtu hre reng rawh.”—THUR. 12:1.
1. Israel rama naupangte hnênah eng sâwmna nge pêk a nih?
KUM 3,500 vêl kalta khân Pathian Jehova zâwlnei Mosia chuan Israel puithiamte leh upate hnênah: “Mipuiho ahmei apa, in fanau tê tê te, . . . anni chuan an ngaihthlâk a, an zir a, LALPA in Pathian chu an ṭih a, he dân thu zawng zawng hi fîmkhur taka an zawm theih nân . . . ko khâwm rawh u,” tiin thu a pe a. (Deut. 31:12, 13) Pathian be tûra koh khâwmte chu: a hmei apa leh an fanau tê tê te anni tih lo chhinchhiah ang che. Ni e, naupang tê tê te pawh ngaithla a, zir a, Pathian Jehova kaihhruaina zâwm tûra hrilh an ni.
2. Kristian kohhran din tirh lam khân, engtin nge Pathian Jehova’n ṭhalaite a ngaihsakzia a lantîr?
2 Kum zabi khatnaah pawh, Pathian Jehova chuan Amah ngaihsaktu ṭhalaite a ngaihsakzia chu a lantîr chhunzawm zêl a. Entîr nân, Pathian chuan tirhkoh Paula chu kohhranho hnêna a lehkha thawn ṭhenkhatah ṭhalaite tân liau liauva kaihhruaina ziak tel tûrin a thâwk khum a ni. (Ephesi 6:1; Kolossa 3:20 chhiar rawh.) Chutiang fuihna nunpuitu Kristian ṭhalaite chuan hmangaihna ngah tak an Pa vâna mi chunga an lâwmna chu an tipungin, a malsâwmna an dawng a ni.
3. Engtin nge tûn laiah ṭhalaite’n Pathian rawng bâwl an châkzia an lantîr?
3 Tûn laia ṭhalaite hi Pathian Jehova be tûra koh khâwm an ni ve em? Ni tehreng mai! Chuvângin, Pathian chhiahhlawh ṭhalai tam tak chuan Paula fuihna thu: “Hmangaih leh thil ṭha tiha inchawk tho tûrin inngaihtuah tawn ang u; ṭhenkhat tih dân anga kan inkhâwmte bânsan lovin, infuih tawn zâwk ang u; ni chu lo hnai telh telha in hriatin infuih tawn nasa lehzual sauh rawh u,” tih hi an zâwm a, chu chuan khawvêl puma Pathian mite a tilâwm a ni. (Heb. 10:24, 25) Chu bâkah, naupang tam tak chuan nu leh pate rualin Pathian Ram chanchin ṭha an hril bawk a. (Mt. 24:14) Tin, Pathian Jehova an hmangaihzia târ lan nân, kum tinin ṭhalai sâng tam tak chuan baptisma an chang a, Krista zirtîr nih avânga malsâwmnate chu an dawng a ni.—Mt. 16:24; Mk. 10:29, 30.
Sâwmna Chu Pawm Nghâl Rawh
4. Ṭhalaiin kum engzât a nihin nge Pathian rawng bâwl tûra sâwmna chu a chhân lêt theih?
4 Thuhriltu 12:1 chuan: “I vânglai hian i siamtu hre reng rawh,” tiin a sawi a. Pathian Jehova chibai bûk a, a rawng bâwl tûra sâwmna duhawm tak chu chhâng lêt tûrin ṭhalaite chu kum engzât mi nge an nih ngai? Bible-in kum bithliah engmah a nei lo va. Chuvângin, Pathian Jehova thu ngaithla a, a rawng bâwl tûrin naupang lutukah inngai mai suh. Kum engzât mi pawh ni la, ti nghâl vat tûra fuih i ni.
5. Engtin nge nu leh pate’n an fate thlarau lama hmasâwn tûra an ṭanpui theih?
5 In zînga tam tak chu in nu leh pate emaw, nu emaw, pa emaw chauh emawin thlarau lama hma sâwn tûrin an ṭanpui che u a. He mi kawngah hian, Bible hun laia Timothea ang kha in ni a tih theih a ni. Ani chu a naupan têt ata a nu Euniki leh a pi Loisii chuan lehkha thianghlim an zirtîr ṭhîn. (2 Tim. 3:14, 15) In nu leh pate pawhin Bible an zirpui che uin, an ṭawngṭaipui che uin, kohhran inkhâwmnaah leh Pathian mite inkhâwmpui lian zâwkah te leh thlawhhma rawngbâwlnaah te hruai che uin, chutiang bawk zirtîrna chu an pêk ngei che u a rinawm a ni. Dik takin, Pathian kawng zirtîr che u chu in nu leh pate’n Pathian Jehova hnên aṭanga mawhphurhna pawimawh tak an dawn a ni. An hmangaihna che u leh an ngaihtuahna che u chu in ngaihlu em?—Thuf. 23:22.
6. (a) Sâm 110:3 sawi angin, eng ang chi biaknain nge Pathian Jehova tilâwm? (b) Tûnah eng nge kan ngaihtuahho vang?
6 Mahse, in lo ṭhan len chuan, Pathian Jehova chuan Timothea ang bawk a ‘Pathian duhzâwng, a ṭha leh lawm tlâk leh, ṭhat famkim chu hre fiah’ tûrin a duh che u a ni. (Rom 12:2) Chutianga in tih chuan in nu leh pate’n ti tûra an duh vâng che u ni lovin, Pathian duh zâwng tih in duh avâng zâwkin kohhran thiltihahte in tel dâwn a ni. Inhuam tak chunga Pathian Jehova rawng in bâwl chuan amah in tilâwm ang. (Sâm 110:3) Chuti a nih chuan, engtin nge Pathian Jehova thu zawm leh a kaihhruaina zui in châkna tihzual in duh tih in lantîr theih? In lantîr theih dân kawng pawimawh tak pathum lo en ta ila. Chûngte chu inzirna te, ṭawngṭaina te, leh nungchang te hi a ni. A mal tê têin lo en ta ila.
Pathian Jehova Chu Mi Tak Tak Angin Hre Rawh
7. Engtin nge Isua’n Bible zir lai nihna kawngah entawn tûr a siam a, chutiang mi ni tûrin engin nge ṭanpui?
7 Pathian Jehova rawng bâwl i châkna i tihzual theih dân kawng khat chu Bible chhiar hi a ni a. Pathian Thu ngun taka chhiarna hmangin, i thlarau lam mamawh i phuhrûk theiin, Bible hriatna hlu tak i nei thei a ni. (Mt. 5:3) He mi kawngah hian Isua chuan entawn tûr ṭha tak a siam a. Ṭum khat chu kum 12 mi lek a nih laiin, a nu leh pate chuan Pathian biak inah “zirtîrtute zînga ṭhua an thu lo ngaithlaa lo zâwtin” an hmu a ni. (Lk. 2:44-46) Isua chuan naupang a nih lai pawhin Bible ngainatna leh hriatthiamna a nei dêr tawh a. Chutiang ni tûrin engin nge ṭanpui? A nu Mari leh a pa hrawn Josefa te chuan an ṭanpui nasa hle ang tih chu rinhlelh rual a ni lo. Anni chu a naupan têt ata Pathian thua kaihruaitu, Pathian chhiahhlawh an ni.—Mt. 1:18-20; Lk. 2:41, 51.
8. (a) Engtikah nge nu leh pate’n an fate Pathian Thu an zirtîr ṭan ang? (b) Fate an sên têt aṭanga zirtîr a hlutzia tilangtu thiltawn sawi rawh.
8 Chutiang bawkin, tûn laia Pathian ṭih mi nu leh pate chuan an naupan têt aṭanga an fate thinlunga Bible thutak ngainatna tuh a hlutzia chu an hria a ni. (Deut. 6:6-9) Kristian unaunu pakhat Rubi-i chuan a fa hmasa ber Joseph-a a pian velêh chutiang chuan a ti nghâl a ni. Ani chuan nî tinin Ka Bible Thawnthu Lehkhabu a chhiarsak ṭhîn a. A lo len deuh chuan Bible châng hrang hrang en lova sawi thei tûrin a pui leh a ni. Chutianga zirtîrna chu Joseph-a chuan a hlâwkpui em? A ṭawng theih ṭan meuh chuan Bible thawnthu tam tak a sawi chhuak thei a. Kum nga a nih chuan Theocratic Ministry School-ah thu a sawi ṭan dêr tawh a ni.
9. Engvângin nge Bible chhiar leh i thil chhiarte chhût ngun chu a pawimawh?
9 Ṭhalaite u, thlarau lama hma sâwn zêl tûr chuan Bible chhiar chu chîn ṭhana in neih a, in puitlin thlenga in tih chhunzawm zêl a ngai a ni. (Sâm 71:17) Engvângin nge Bible chhiarna chuan hma sâwn tûrin a ṭanpui ang che u? Isua’n a Pa hnêna ṭawngṭaia a sawi hi lo chhinchhiah teh: “Hei hi chatuana nunna a ni, nang Pathian tak chauh leh i tirh Isua Krista hriat hi,” tih hi. (Joh. 17:3) Dik takin, Pathian Jehova hriatna i neih tam poh leh ani chu mi tak tak angin i hmu chiang telh telh ang a, amah i hmangaihna pawh a zual telh telh bawk ang. (Heb. 11:27) Chuvângin, Bible châng i chhiar apiangin, chu hun chu Pathian Jehova chungchâng zir belh nân hmang ṭhîn ang che. Heti hian i inzâwt ṭhîn dâwn nia: ‘He thu hian Pathian Jehova chungchâng eng nge min zirtîr? Engtin nge he Bible châng hian Pathianin min hmangaihzia leh ngaihsakzia a târ lan?’ tiin. Chutiang zawhnate chhût ngunna chuan Pathian Jehova ngaihtuahna leh thil veizâwngte leh i lak aṭanga a thil phûtte hre tûrin a ṭanpui ang che. (Thufingte 2:1-5 chhiar rawh.) Ṭhalai Timothea angin, Bible aṭanga i thu zirte chu ‘ring tûra thlêmthlûkin’ i awm ang a, inhuam taka Pathian Jehova rawng bâwl tûra chêttîrin i awm ang.—2 Tim. 3:14, NW.
Ṭawngṭainain Pathian Jehova I Hmangaihna A Tihzual Theih Dân
10, 11. Engtin nge ṭawngṭaina chuan Pathian rawng bâwl i duhna chu a tihngheh theih?
10 Pathian Jehova rawng bâwl i châkna i tihngheh theih dân kawng hnihna chu ṭawngṭaina hi a ni. Sâm 65:2-ah chuan heti hian kan chhiar: “Aw ṭawngṭaina ngaithlatu, i hnênah tîsa zawng zawng chu an lo kal ang,” tiin. Israel mite chu Pathian thuthlunpuite an nih lai pawh khân, Pathian Jehova biak ina hnam dang mi lo kalte pawh khân amah chu ṭawngṭaiin an pan thei a ni. (1 Lal. 8:41, 42) Pathian chuan tumah thlei bîk a nei lo va. A thupêk zâwmtu apiangte chuan an ṭawngṭaina ngaihthlâk a ni ang tih an ring tlat thei a ni. (Thuf. 15:8) Chiang takin, “tîsa zawng zawng” tihah hian ṭhalaite pawh an tel a ni.
11 Inṭhianna ṭha rêng rêng chu inbiakpawhna ṭha neihah a innghat tih i hre ngei ang a. I ṭhian ṭha tak hnênah chuan i ngaihtuahna te, i ngaihven zâwngte leh i rilru vei zâwngte hrilh chu i châk hle ṭhîn. Chutiang bawkin, tih tak zeta i ṭawngṭai hian i Siamtu Ropui nên in inbia tihna a ni. (Phil. 4:6, 7) Pathian Jehova chu hmangaihna ngah tak nu leh pate emaw, i ṭhian ṭha tak emaw hnêna i thinlung zawng zawng i leihbaw ang maiin bia ang che. Dik takin, i ṭawngṭai dân leh Pathian Jehova chungchâng i ngaih dân chuan inzawmna thûk tak a nei a. Amah nêna inṭhianna i neih ṭhat poh leh i ṭawngṭaina pawhin awmzia a nei thûk sawt ang.
12. (a) Engvângin nge awmze nei taka ṭawngṭainaah chuan kan thu chham mai aia tam a tel? (b) Pathian Jehova’n a hnaih reng che tih hre tûrin engin nge ṭanpui ang che?
12 Mahse, awmze nei taka ṭawngṭainaah chuan i thu chham mai bâkah, i ngaihtuahna chhûngril ber pawh a tel tih hre reng la. I ṭawngṭainaah chuan Pathian Jehova i hmangaihzia te, amah zahna thûk tak i neihzia te, leh amaha rinna i nghah pumhlûmzia te lantîr ang che. Pathian Jehova’n i ṭawngṭaina a chhân dân i han hriat chuan, Ani chuan “a kotu zawng zawngte chu a hnaih ṭhîn” tih tûn hma zawng aiin i hre chiang lehzual ang. (Sâm 145:18) Ni e, Pathian Jehova chuan a hnaih ang che a, Diabola do thei tûra tichak chein, nuna duhthlanna dik siam tûrin a ṭanpui ang che.—Jakoba 4:7, 8 chhiar rawh.
13. (a) Engtin nge Pathian nêna inṭhianna chuan unaunu pakhat a ṭanpui? (b) Engtin nge Pathian nêna inṭhianna chuan ṭhiante nawrna hnial thla thei tûra a ṭanpui che?
13 Cherie-i’n Pathian Jehova nêna inlaichînna hnai a neih avânga chakna a neih dân hi han ngaihtuah teh. Ani chuan high school a kal laiin, a zirna lamah leh infiamna lama a sân êm avângin zirna sâng zâwk ûmtîr thei tûr scholarship a dawng thei hial a ni. Cherie-i chuan: “Chutianga zirna sâng ûm mai chu thil châkawm tak a ni, zirtîrtute leh ṭhiante lahin min nawr nasa mai si a,” tiin a sawi. Mahse, zirna sâng zâwk a ûm chuan a hun zawng zawng deuhthaw chu zirna leh infiamna lamah a hmang zovin, Pathian Jehova rawng bâwl nân hun tlêmtê chauh a nei dâwn tih a hria a ni. Engtin nge a tih tâk? “Pathian Jehova hnêna ka ṭawngṭai zawh chuan, chu scholarship chu hnâwlin, regular pioneer ka thawk ta zâwk a ni,” a ti. Tûnah chuan kum nga lai pioneer a thawk tawh a ni. Ani chuan: “Ka thutlûkna siam chu Pathian Jehova duh zâwng a ni tih ka hriat avângin ka inchhîr hauh lo. Kan nuna Pathian ram kan dah hmasak phawt chuan, thil dang zawng zawng chu pêk belhchhah ka ni dâwn tak meuh a ni,” tiin a sawi a ni.—Mt. 6:33.
I Nungchang Ṭhatna Chuan “Thinlung Thianghlim” I Putzia A Târ Lang
14. Engvângin nge nungchang ṭhat hi Pathian mit hmuha thil pawimawh tak a nih?
14 Inhuam tak chungin Pathian Jehova rawng i bâwl tih i lantîr theih dân kawng thumna chu i nungchang hmangin a ni. Pathian Jehova chuan nungchang thianghlimna vawng ṭhalaite chu mal a sâwm ṭhîn a. (Sâm 24:3-5 chhiar rawh.) Tleirâwl Samuela chuan Puithiam Lal Elia fapate nungchang bawlhhlawh tak chu a entawn duh lo va. Chu a nungchang ṭha tak chu tuma hmuh lohvin a kal ral mai lo. Bible chuan: “Naupang Samuela chu a ṭhang lian deuh deuhva; Pathian leh mihring duhzâwngin a awm a,” tiin a sawi a ni.—1 Sam. 2:26.
15. Nungchang ṭha i vawn tlat chhan ṭhenkhatte chu eng nge ni?
15 Tûnah hian Paula’n mizia a sawi lan ṭhenkhat, mi mahni inhmangaihtu te, mi chapo te, nu leh pa thuawih lo te, lâwm nachâng hre lo te, thianghlim lo te, mi kawlhsen te, inngaihlu te, Pathian hmangaih aia mahni lâwmna mai hmangaih zâwktu te hlîra khat khawvêlah kan chêng a. (2 Tim. 3:1-5) Chuvângin, chûng mi ṭha lo takte kâra entawn tlâka nun chu thil harsa tak a ni thei. Mahse, thil dik tih i duh a, Pathian duh lohzâwng nungchangte pumpelh i duh apiangin, lei leh vân huap thubuaia Pathian Jehova lam i ṭanzia i lantîr tihna a ni a. (Job. 2:3, 4) Tin, Pathian Jehova sâwmna: “Ka fapa, fing la, ka thinlung tilâwm rawh; mi sawichhetute ka chhân theih nân,” tih hi i chhân lêt avângin lungawina i nei bawk a ni. (Thuf. 27:11) Chu bâkah, Pathian Jehova pawm i ni tih i inhriatna chuan a rawng bâwl i duhna chu a tinghet zual sauh bawk ang.
16. Engtin nge unaunu pakhatin Pathian Jehova thinlung a tihlâwm?
16 Kristian tleirâwl pakhat Carol-i chuan school a kalnaah Bible thu bulte chu a nunpui tlat a, a nungchang ṭhatna chu mite hmuhah a lang chhuak a ni. Ani chuan eng nge a tawn? Bible ṭanchhan a chhia leh ṭha hriatna avângin kût nî leh hnam hmangaihna lantîrna ni serhahte a tel thei lo va; chuvângin, a school kalpuite chuan an nuihzat a ni. Chûng hunahte chuan a rinna hrilhfiah theihna hun ṭha neih châng pawh a nei ṭhîn a. A hnu kum tam takah Carol-i chuan a school kalpui pakhat hnên aṭangin card a dawng nawlh mai a, heti hian a inziak a ni: “Han biak pawh leh che a, lâwmthu hrilh che hi ka duh reng ṭhîn a. Kristian i nih anga i nungchang entawn tlâk tak leh kût leh ni serh chungchânga huaisen taka i din tlatnate kha tuma hmuh lohvin a thâmral hauh lo. Nang hi Jehova Thuhretute zînga ka mi tawn hmasak ber i ni,” tiin. Carol-i entawn tûr siam chuan a school kalpuinu rilru chu a hneh hle avângin a hnuah Bible a zir phah ta hial a ni. Carol-i hnêna a card thawnah chuan kum 40 chuang Thuhretu baptisma chang a nih tawh thu a ziak a nih chu! Carol-i ang bawkin, huaisen taka Bible dân bulte vuan tlattu ṭhalaite u, in entawn tûr siam chuan thinlung ṭha pu mite chu Pathian Jehova hriatna neih duh tûrin a chêttîr thei asin.
Ṭhalaite’n Pathian Jehova An Fak
17, 18. (a) In kohhrana ṭhalaite chu engtin nge in thlîr? (b) Pathian ṭih ṭhalaite chu eng malsâwmnain nge hmuak?
17 Khawvêl pum puia Jehova inawpna pâwla mite hian ṭhalai sâng tam takin biakna dik an zâwm hmuh chu nuam kan va ti tak êm! Chûng ṭhalaite chuan nî tina Bible chhiarna te, ṭawngṭaina te, leh Pathian duh zâwnga nunna te hmangin Pathian Jehova rawng bâwl an châkna chu an tizual a ni. Chutiang ṭhalai entawn tlâk takte chu an nu leh pate leh Pathian Jehova mi zawng zawngte tân rilru hahdamna thlentu an ni.—Thuf. 23:24, 25.
18 Nakinah chuan, ṭhalai rinawmte chu Pathian tiam khawvêl thara dam khaw chhuak tûrte zînga chhiar tel an ni ang. (Thup. 7:9, 14) Chutah chuan, Pathian Jehova chunga an lâwmna a pun zêl rualin malsâwmna chhiar sên loh an dawng ang a, chatuanin amah an fak thei tawh ang.—Sâm 148:12, 13. (w10-E 04/15)
Kan Hrilhfiah Thei Em?
• Engtin nge tûn laiah ṭhalaite chu biakna dika an tel?
• Engvângin nge i Bible chhiar chu hlâwkpui tûrin chhût ngun a ngaih?
• Engtin nge ṭawngṭaina chuan Pathian Jehova hnaih tûra a ṭanpui theih che?
• Kristian nungchang ṭhatna chuan eng nge a hlen chhuah?
[Zirlai Atâna Zawhnate]
[Phêk 15-naa milem]
Nî tina Bible chhiar chu i tih ṭhan a ni em?