Isua’n Ama Chungchâng A Zirtîr Chu

“Isua chuan a nihna te, a lo kalna te, khawvêla a lo kal chhan te, leh nakina a lâwmman tûrte chu a hre chiang hle.”—AUTHOR HERBERT LOCKYER.

ISUA thu zirtîrte kan pawm a, kan rin hmain, a chungchâng thu engemaw kan hriat a ngai a ni. Isua chu tunge a nih chiah? Khawi aṭangin nge a lo kal? A nuna a thiltum ber eng nge ni? Hêng zawhnate amah ngeiin a chhân dân chu Chanchin Ṭha—Matthaia, Marka, Luka, leh Johana—ziakahte kan hmu thei a ni.

He leia a lo pian hmain a awm tawh Abrahama chu Isua he leia a lo pian hma kum 2,000 vêla awm tawh a ni a. Mahse, ṭum khat chu Isua’n: “Abrahama awm hma pawhin ka awm,” a ti. (Johana 8:58) A nih chuan, chutih laiin Isua chu khawiah nge a awm? Ani chuan: “Vân aṭanga lo chhuk ka ni,” tiin a sawifiah a ni.—Johana 6:38.

Pathian Fapa A Ni Pathian Jehova chuan fa tam tak, vântirhkohte a nei a. Mahse, Isua chu a danglam bîk a ni. Amah ngeiin “Pathian Fapa mal neih” tiin a insawi a ni. (Johana 3:18) Isua chu Pathian ngeiin a siam awmchhun a ni tihna a ni a. Thil dang zawng zawng chu Fapa mal kal tlanga Pathian siam a ni.—Kolossa 1:16.

“Mihring Fapa” Isua chuan he ṭawngkam hi amah insawi nân a hmang a. (Matthaia 8:20) Chutiang chuan vântirhkoh mihringa rawn chang lawk emaw, thlarau tisaa rawn chang lawk emaw a nih lohzia a târ lang a ni. Chutiang ni lovin, ani chu mihring dik tak a ni a. Pathian chuan a thlarau thianghlim hmangin, a Fapa nunna chu vân aṭanga leia nula thianghlim Mari chhûlah a rawn sawn a. Chuvâng chuan, Isua chu ṭha famkim, sualna nei lo mihring angin a lo piang ta a ni.—Matthaia 1:18; Luka 1:35; Johana 8:46.

Thutiam Messia Samari hmeichhia chuan: “Messia . . . chu a lo kal dâwn tih ka hria,” tiin Isua a hrilh a. Isua chuan: “Keimah a betu che hi amah chu ka ni asin,” tiin a chhâng a ni. (Johana 4:25, 26) “Messia” tih thu mal chu “Krista” tih nên a inang a, “Hriak Thiha” tihna a ni. Isua chu Pathian thutiamte thlen famkimnaa chanvo danglam bîk tak chelh tûr atâna Pathian hriak thih, a nih loh leh ruat a ni.

He Leia A Lo Kal Chhan Ber Vawi khat chu Isua’n: “Khaw dangahte pawh Pathian ram chanchin ṭha ka hril tûr a ni, chu mi avâng chuan tirh ka ni si a,” a ti a. (Luka 4:43) Ṭanpui ngai tam takte chu ṭanpui tho mah se, Pathian Ram chanchin hrilh chu a nuna thil pawimawh ber a ni. Chu Lalram chungchâng chu nakinah kan sawiho dâwn a ni.

Isua chu mi pângngai mai a ni lo tih a chiang hle. * Kan la hmuh tûr angin, vâna a lo awm tawhna chuan he leia a rawn kal hnua a thusawite chu awmzia a neihtîr lehzual a ni. Chuti a nih chuan, a thusawite’n khawvêl pum puia mi maktaduai tam takte nun a nghawng hi thil mak a ni em? (w10-E  04/01)

[Footnote]