Isua’n Pathian Ram Chungchâng A Zirtîr Chu

“Thu hril leh Pathian ram chanchin ṭha thlen chungin khaw lian leh khaw tê te a fang zêl a.”—LUKA 8:1.

KAN thil ngaih pawimawh leh kan ngainat zâwngte chu sawi nuam kan ti ṭhîn. Isua ngei pawhin, “thinlunga khat liam chu kain a sawi ṭhin” a lo ti a ni. (Matthaia 12:34) Isua’n a rawngbâwl chhûnga a thusawite kan han ngaihtuah hian, Pathian Ram chu a thil ngaih pawimawh ber a ni tih kan hre thei a ni.

Pathian Ram chu eng nge ni? Ram chu lal berin a awp sawrkârna hi a ni a. Chuvângin, Pathian Ram tih chu Pathian din sawrkârna hi a ni. Isua chuan Pathian Ram chungchâng a sawi nasa hle a, a thu hril thupui berah a hmang a ni. Chu Pathian Ram chungchâng sawina chu Chanchin Ṭha ziak pali-ah hian vawi 110 aia tam a chuang a ni. Mahse, Isua chuan thu chauhvin a zirtîr lo. A thiltih pawhin Pathian Ram leh chu miin thil a la tih tûrte chungchâng tam tak a zirtîr a ni.

Tunge a Lalber chu? Pathian Rama Lalber chu mihringte thlan tlin a ni lo va. A thlangtu chu Pathian a ni zâwk. Isua chuan a zirtîrnaah, Lal ni tûra Pathian thlan a nih thu a târ lang a ni.

Bible hrilh lâwknate chuan chatuan Lalrama Messia’n ro a rêl tûr thu a sawi lâwk tih Isua chuan a hria a. (2 Samuela 7:12-14; Daniela 7:13, 14; Matthaia 26:63, 64) Ani chuan sawi lâwk Messia hi amah ngei a nih thu tlang takin a sawi tih hre chhuak leh la. Chutiang chuan, Pathian Lal thlan ngei a nihzia a nemnghet a ni. (Johana 4:25, 26) Chu mi nêna inmil takin, “ka ram” tih ṭawngkam chu vawi engemaw zât a hmang a ni.—Johana 18:36.

Isua chuan chu Ramah chuan rorêlpui tûr a nei dâwn tih pawh a sawi bawk a. (Luka 22:28-30) Chûng a rorêlpui tûrte chu an tlêm dâwn avângin “pâwl tlêmte” tiin a ko a ni. An hnênah chuan: “Ram pêk che u hi in Pa lâwmzâwng tak a ni,” tiin a hrilh a. (Luka 12:32) Bible-a a bu hnuhnûng ber chuan Krista nêna rorêl theihna chanvo hlu tak nei tûrte chu mi 1,44,000 an ni dâwn tih a târ lang.—Thu Puan 5:9, 10; 14:1.

Khawiah nge chu Ram chu a awm? Isua chuan Pontia Pilata hnênah: “Ka ram chu he khawvêla mi hi a ni lo,” tiin a sawi a. (Johana 18:36) Krista’n ro a rêlna Pathian Ram chuan mihringte kal tlangin ro a rêl lo vang. Isua chuan Pathian Ram chu “vân ram” tiin a sawi fo ṭhîn. * (Matthaia 4:17; 5:3, 10, 19, 20) Chuvângin, Pathian Ram chu vân sawrkârna a ni.

Leia hun a hman hnuah Isua chuan vânah a kîr leh ngei dâwn tih a hria a. Chutah chuan a rorêlpui tûrte’n an va fin theih nân ‘hmun a siam’ tûr thu a sawi a ni.—Johana 14:2, 3.

 Pathian Ram chuan eng nge a hlen chhuah? Isua chuan a thusawi ngaithlatute chu: “I ram lo thleng rawh se. I duhzâwng vâna an tih angin leia mi’n ti rawh se,” tia Pathian hnêna ṭawngṭai tûrin a zirtîr a ni. (Matthaia 6:9, 10) Pathian duhzâwng chu vânah tih a ni tawh a. Chu Ram chu lei atâna Pathian thiltumte tihpuitlin nâna hman a ni a. Chutianga tipuitling tûr chuan, chu Ram chuan he leiah hian inthlâkthlengna nasa tak a rawn thlentîr dâwn a ni.

Pathian Ram chuan leiah eng nge a tih dâwn? Isua chuan Pathian Ramin thil sual tilui tlattute chu tiboralin, sualna a nuai bo dâwn tih a zirtîr a. (Matthaia 25:31-34, 46) Chutih hunah chuan chhiatna leh suahsualna tinrêng a tâwp vek tawh dâwn tihna a ni. Lei hi “thuhnuairawlhte,” “felnaa rilṭâma tuihâlte,” “mi khawngaih thei takte,” “thinlunga thianghlimte,” leh remna siamtutein an khat dâwn tih Isua chuan a zirtîr a ni.—Matthaia 5:5-9.

Chûng mi rinawmte chu he lei bawlhhlawh takah hian em ni an chên ang? Ni lo ve! Pathian Ram awpna hnuaiah chuan he lei hi ropui taka thlâkthleng a ni dâwn tih Isua chuan min tiam a ni. Isua ruala khaihlum mi pakhat chuan a thih hmain: “Isu, i ram i thlen hunah mi hre reng ang che,” a ti a. Isua chuan: “Vawiinah hian tih tak meuhvin ka hrilh a che, ka hnênah Paradis-ah i awm ve ang,” tiin a chhâng a ni. (Luka 23:42, 43, New World Translation) Ni e, Pathian Ram chuan he lei pum pui hi Eden huana lo awm tawh ang paradis-ah a chantîr dâwn a ni.

Pathian Ram chuan mihringte tân eng dang nge a tih belh dâwn? Isua chuan Pathian Ramin a tih tûrte chu a tiam mai a ni lo, a takin a lantîr bawk a ni. Isua chuan mi tam takte chu thilmak tih theihna hmanga tidamin, Lalrama  ro a rêl huna zau zâwk leh ropui zâwka a tih tûrte chu a lo entîr lâwk a ni. Thlarauva thâwk khum Chanchin Ṭha ziak chuan Isua chungchângah: “An inkhâwmna inahte zirtîrin, Ram Chanchin Ṭha chu hrilin mite zînga natna tinrêng leh chak lohna tinrêng tidamin Galili ram zawng zawng a fang vêl a,” tiin a sawi.—Matthaia 4:23.

Isua chuan natna chi hrang hrang a tidam a. ‘Mitdel saa piang mit a tihvârsak’ a. (Johana 9:1-7, 32, 33) Phâr natna tenawm tak vei pawh, zâwi têa dekin a tidam bawk. (Marka 1:40-42) “Mi pakhat bengngawng, ṭawng pawh ṭawng fiah thei lo” a hnêna an rawn hruai pawh khân, Isua chuan lo tidamin, ‘bengngawngte a tihvârsak a, ṭawngthei lote pawh a tihṭawng’ theihzia a lantîr a ni.—Marka 7:31-37.

Pathian Lal thlan Isua chuan mitthite nunna meuh pawh a pe kîr leh thei a ni. Ṭum thum lai chu mitthi a kaihthawh thu chhinchhiah a ni a. Chûngte chu hmeithai pakhat fapa neih chhun, hmeichhe naupang kum 12 mi, leh a ṭhian duh tak Lazara te an ni.—Luka 7:11-15; 8:41-55; Johana 11:38-44.

Pathian Ram khua leh tuite hma lam hun tûr chungchângah, Isua chuan tirhkoh Johana kal tlangin heti hian a sawi lâwk a ni: “Ngai teh, Pathian bâwktê chu mihring zîngah a lo awm ta, ani chu an hnênah a awm ang a, anni chu a mite an ni ang a, Pathian ngei chu an hnênah a awm ang a, an Pathian a ni bawk ang; an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta,” tiin. (Thu Puan 1:1; 21:3, 4) Lungngaih te, ṭah te, nat te leh thihna te awm tawh lohna khawvêl chu han ngaihtuah teh! Chutih hunah chuan, Pathian duhzâwng vâna tih a nih angin leiah pawh tih ni rawh se, tia kan dîlna chu a thleng famkim tawh ang.

Pathian Ram chu engtikah nge a lo thlen ang? Isua chuan lal anga ro a rêl ṭan hun chu ‘tâwpna hun’ nên a inrual dâwn tih a sawi a. Lal thu neihna changa a lo kal hun hriat theih nân hrilh lâwkna kimchang tak min pe bawk a ni. Chu mi hunah chuan indo te, ṭâm te, lîrnghîng te, hrilêng te, leh suahsualna pung te pawh tiamin, khawvêl pum huap buaina a thleng ang. (Matthaia 24:3, 7-12; Luka 21:10, 11) Hêng thilte leh Isua sawi lâwk thil dang tam takte chu Khawvêl Indopui I-na lo chhuah hun, kum 1914 aṭang khân a lang chiang ṭan lehzual a ni. Chuvângin, Isua chuan Lal angin ro a rêl tawh tih kan hre thei a ni. Pathian Ram leh chu miin Pathian duh zâwng leia a tihtîr hun chu a lo thleng thuai ang. *

Pathian Ram lo thleng tûr chuan a mi mal takin i tân eng awmzia nge a neih dâwn? Chu chu Isua thu hril i chhân lêt dânah a innghat a ni. (w10-E 04/01)

[Footnote-te]