Jehova Thiltum Thlen Famkimnaa Thlarau Thianghlim Hnathawh

“Ka kâ aṭanga ka thu chhuak chu . . . engmah tih nei lovin ka hnênah a kîr leh lo vang a, . . . thil ti tûra ka tirhnaah chuan a hlawhtling bawk ang.”—IS. 55:11.

1. Thil ruahman leh thiltum danglamna sawi rawh.

CAR-A zin chhuak tûra inbuatsaih mêk pa pahnih chu han mitthla teh. Pakhat zâwk chuan a kalna tûr kawng chu chiang tak leh kimchang takin a hria a. A pakhat dang leh chuan a hriat chian mai bâkah, kawng dang pawh a hre ṭeuh bawk a. Harsatna engpawh atâna insiam rem thei tûrin a inbuatsaih a ni. Kawng ṭhenkhatah chuan chûng pa pahnihte inbuatsaih dân inang lo chuan thil ruahman leh thiltum danglamna a lantîr a ni. Thil ruahman tih chu khawi emaw lai thlen theihna tûra kal dân tûr chipchiar taka chhui lâwk nên a khaikhin theih ang a; thiltum erawh chu kal dân tûr thlangsa chuang lo va, thlen duhna lai rilrua hriat hi a ni.

2, 3. (a) Pathian Jehova thiltumah chuan eng nge tel a, Adama leh Evi’n thil sual an tih khân engtin nge hma a lâk? (b) Engvângin nge chu a thiltum a hlen chhuah dân nêna inmil thlapa kan awm a ngaih?

² Pathian Jehova chuan a duh zâwng hlen chhuahnaah ruahmanna nghet a nei bur lo va, chatuan remruat, a nih loh leh chatuana thiltum a nei zâwk a ni. (Eph. 3:11) Chu thiltumah chuan mihring leh lei atâna atîra A thil duan lâwk chu a tel a; chu a thil duan lâwk chu he lei pum pui hi mi ṭha famkimte’n remna leh hlimna tâwp thei lo an chenna tûr paradis-a chantîr a ni. (Gen. 1:28) Adama leh Evi’n thil sual an tih khân, Pathian Jehova chuan hma la nghâlin, a thiltum hlen chhuah a nih ngei theihna tûrin remruatna a siam a ni. (Genesis 3:15 chhiar rawh.) Pathian Jehova’n a entîr nei  hmeichhia chu “thlah” emaw, Fapa emaw hrintîr a tum tlat a, chu chuan a tâwpah chuan pawi khawihtu Setana chu tiboralin, a pawi lo khawih tawh zawng zawngte chu a sût lêt ang.—Heb. 2:14; 1 Joh. 3:8.

³ Vân emaw, lei emawa thiltihtheihna engmahin Pathian Jehova thiltum tihhlawhtlinna chu a dang thei lo. (Is. 46:9-11) Chu chu engtin nge kan sawi theih? A chhan chu Pathian Jehova thlarau thianghlim a tel vâng a ni. Chu chakna thahrui tuma hneh theih loh chuan Pathian thiltum chu ‘a hlawhtling ang’ tih min tiam a ni. (Is. 55:10, 11) Pathian thiltum thlen famkimnaah chuan kan hma lam nun a innghah tlat avângin, chu a thiltum a hlen chhuah dân nêna inmil thlapa kan awm chu a ngai a ni. Chu bâkah, Pathian Jehova’n a thlarau thianghlim a hman dân hriatna pawhin kan rinna a tichak bawk. Chuvângin, Jehova thiltum hlenna kawnga a thlarau thianghlimin tûn hma leh tûn laia hna a thawh dân, leh nakina a la thawh tûrte chu i lo ngaihtuah ang u.

Tûn Hmaa Thlarau Thianghlim Hnathawh Dân

4. Engtin nge Pathian Jehova’n a thiltum chu zawi zawia a târ lan?

⁴ Bible hun lai chuan Pathian Jehova chuan a thiltum chu zawi zawiin a târ lang a. Atîrah chuan, thutiam chi Thlah nihna chu “thurûk” a ni a. (1 Kor. 2:7) A hnu kum 2000 vêlah chauh Pathian Jehova chuan chi thlah chungchâng chu a sawi leh a ni. (Genesis 12:7; 22:15-18 chhiar rawh.) Ani chuan Abrahama hnênah thlen famkimna ropui zâwk nei tûr thutiam chu a pe a. “I thlahah chuan” tih hian chu chi Thlah chu mihring angin Abrahama thlah aṭanga lo awm tûr a nihzia a târ lang a ni. Setana chuan chu thiltum hlen chhuah a nih dân chu a ngaihven hle tih kan ring thei a. Chu Dodâltu chuan Abrahama thlahte chu tiboral emaw, tichhia emawin, Pathian thiltum tihsukuk chu a tum ber a ni ang tih rinhlelh rual a ni lo. Mahse, chu chu thil theih a ni lo, hmuh theih loh Pathian thlarau chuan hna a thawh tlat avângin. Eng kawngin nge a thawh?

5, 6. Pathian Jehova chuan chi Thlah lo lanna tûr chhuan kal zêl vênhim nân engtin nge a thlarau a hman?

⁵ Pathian Jehova chuan chi Thlah lo lanna tûr chhuan kal zêl vênhim nân a thlarau a hmang a. Abrama (Abrahama) hnênah Pathian Jehova chuan: “Kei hi i phaw . . . ka ni asin,” tiin a sawi a ni. (Gen. 15:1) Chûng thute chu sawi satliah mai mai a ni lo. Entîr nân, B.C.E. 1919-a Abrahama leh Sari’n Gerar-a awm hmun an khuar laia thil thleng kha han ngaihtuah ta ila. Gerar lal Abimeleka chuan Sari chu Abrahama nupui a ni tih hre lovin, a nupui atân a hruai a. Abrahama thlah tûr hrinna dan tumin, Setana’n dinhmun chu a thunun a ni thei ang em? Bible chuan engmah a sawi lo va. Chutih rual chuan Pathian Jehova a inrawlh tih erawh a sawi thung. Ani chuan Abimeleka chu a mumangah Sari khawih lo tûrin a hrilh a ni.—Gen. 20:1-18.

⁶ Chu chu Pathian Jehova’n anmahni a vênhim ṭum awmchhun a ni lo. Abrahama leh a chhûngte chu vawi tam tak a chhan chhuak a ni. (Gen. 12:14-20; 14:13-20; 26:26-29) Chuvângin, fakna hla phuahtu chuan Abrahama leh a thlahte chungchângah: “[Jehova’n] tuma hnehchhiah a phal lo va: a ni, anmahni avângin Lalte pawh a zilhhau va; ‘Ka hriak thihate chu tawk suh ula, ka zâwlneite pawi rêng rêng pawh khawih suh u,’ tiin,” a sawi a ti thei a ni.—Sâm 105:14, 15.

7. Eng kawngin nge Pathian Jehova chuan Israel hnam chu a vênhim?

⁷ Pathian Jehova chuan a thlarau hmangin Thlah lo pianna tûr hmân lai Israel hnam chu a vênghim. A thlarau kal tlangin Pathian Jehova’n Israelte chu dân a pe a, chu chuan biakna dik a vawng ṭhain, Judate chu thlarau lam, nungchang lam, leh tisa lam bawlhhlawhna lakah a vênghim bawk. (Ex. 31:18; 2 Kor. 3:3) Rorêltute hun lai khân, Pathian Jehova thlarau chuan Israelte chu an hmêlmate kut ata chhan chhuak tûrin mi ṭhenkhat hnênah thiltihtheihna a pe a. (Ro. 3:9, 10) Abrahama thlah bul ber, Isua chungchâng hrilh lâwkna thlen famkimnaah Bethlehem te, Jerusalem  te, leh a biak in te chu a tel dâwn avângin, Pathian thlarau chuan chûng hmunte chu a vênghim ngei ang.

8. Pathian Fapa chu a dam chhûng zawng leh a rawngbâwl chhûng zawng khân thlarau thianghlimin a ṭanpui tih engin nge târ lang?

⁸ Thlarau thianghlim chuan Isua leia a dam chhûng zawng leh a rawngbâwl chhûng zawng khân a ṭanpui. Nula thianghlim Mari chhûlah hna thawkin, thlarau thianghlim chuan tûn hmaa la thleng ngai lo thil engemaw a thlentîr a. Mi ṭha famkim lo nula chu nau paitîrin, Fapa ṭha famkim thihna rochung ve lo chu a hrintîr a ni. (Lk. 1:26-31, 34, 35) A hnuah chu thlarau chuan Isua chu a hun lo taka thihna lakah a vênghim bawk. (Mt. 2:7, 8, 12, 13) Isua chu kum 30 vêl a nih chuan Pathianin thlarau thianghlimin hriak a thih a, Davida lalṭhutthlêng luah tûrin a ruat a, thu hril tûrin a tîr bawk a ni. (Lk. 1:32, 33; 4:16-21) Thlarau thianghlim chuan Isua chu dam lo tihdam te, mipui hrai puar te, leh mitthi kaihthawh te pawh tiamin, thil mak a tih theihtîr a ni. Chûng thil ropui tak takte chu Isua lalna hnuaia kan beisei theih malsâwmna entîr lâwkna a ni.

9, 10. (a) Engtin nge thlarau thianghlim chuan kum zabi khatnaa Isua zirtîrte chungah hna a thawh? (b) C.E. kum zabi khatnaah khân Pathian Jehova thiltum hlen chhuah dân tûr chungchângah eng nge târ lan a nih?

⁹ C.E. 33 Pentikost aṭanga inṭanin, Jehova chuan a thlarau chu Abrahama thlah zawmpuitu tûrte hriak thih nân a hmang a, chûng zînga tam tak chu Abrahama thlah zînga mi an ni lo. (Rom 8:15-17; Gal. 3:29) Thlarau thianghlim chuan kum zabi khatnaa Isua zirtîrte chungah hna a thawk a, anni chu ṭhahnemngai taka thu hrilh theihtîrin, thil ropui tak tak ti tûrin a thuam chak a ni. (Tirh. 1:8; 2:1-4; 1 Kor. 12:7-11) Chûng thlarau thilpêk mak tak an dawnna chuan Pathian Jehova’n a thiltum a hlen chhuah dân tûr chungchângah thil thar engemaw tak chu a târ lang a ni. Pathian Jehova chuan kum zabi kal ta tea a ruahman biakna, Jerusalem biak ina innghat chu a hmang tawh lo va. A duhsakna chu Kristian kohhran din tharah chuan a pe tawh zâwk a ni. Chuta ṭang chuan, Pathian Jehova chuan chu hriak thih kohhran chu a thiltum tipuitling tûrin a hmang ta a ni.

¹⁰ Vênhim, thuam chak, hriak thih—hêngte hi Pathian Jehova’n a thiltumte tih thlen famkim theih nâna Bible hun laia thlarau thianghlim a hman dân tam takte zînga ṭhenkhat chauh a ni. A nih leh kan hun lai ve hi le? Engtin nge Pathian Jehova’n a thiltum tihpuitlin nân a thlarau chu a hman? Chu thlarau mila thiltih kan duh avângin chu chu kan hriat ngei a ngai a ni. A nih chuan, Pathian Jehova’n tûn laia a thlarau a hman dân kawng li i lo ngaihtuah ang u.

Tûn Laia Thlarau Thianghlim Hnathawh Dân

11. Thlarau thianghlim chu Pathian mite zînga thianghlimna awmtîrtu thahrui a ni tih engin nge târ lang a, chu thlarau chuan i nun a thununzia engtin nge i târ lan theih?

¹¹ A hmasa berin, thlarau thianghlim chu Pathian mite zînga thianghlimna awmtîrtu thahrui a ni a. Pathian Jehova thiltuma chanvo neite chu nungchang lamah an thianghlim tûr a ni. (1 Korinth 6:9-11 chhiar rawh.) Kristian dik rawn ni ta ṭhenkhat chu tûn hmain inngaih hmang te, uirê te, leh mawngkawhur te an lo ni tawh ṭhîn a ni. Thil sual hring chhuak ṭhîn châkna ṭha lo chu thinlungah a bet nghet thei hle. (Jak. 1:14, 15) Mahse, chûng mite chu “tlenfai” an ni a, anni chuan Pathian tihlâwm nâna ṭûl an nuna inthlâk thlengna an neihzia an târ lang a ni. Châkna ṭha lo anga thil tihna hlawhtling taka do thei tûrin Pathian hmangaihtu chu engin nge ṭanpui thei? 1 Korinth 6:11 chuan ‘Pathian thlarau’ tiin a sawi a ni. Nungchang thianghlim taka nungin, chu thlarau chuan i nun a thununzia i lantîr a ni.

12. (a) Ezekiela inlârnain a sawi angin, engtin nge Pathian Jehova chuan a inawpna pâwl chu a kaihhruai? (b) Engtin nge chu thlarau milin thil i ti tih i lantîr theih?

¹² Pathian Jehova chuan a thlarau chu a duhna lam kawnga kal tûra a inawpna pâwl kaihhruai nân a hmang a. Ezekiela inlârnaah,  Pathian Jehova vân lam inawpna pâwl chu a thiltum tihhlawhtlin nâna dan rual lova hma lam pan mêk vân tawlailîr anga târ lan a ni. Engin nge chu tawlailîr chu pan bîk neia kaltîr? Thlarau thianghlimin a ni. (Ezek. 1:20-21) Pathian Jehova inawpna pâwl chu pêng pahnih, vân lam leh lei lam pêng belhkhâwma din a ni a. Van lam pêng chu thlarau thianghlimin a kaihhruai chuan lei lam pêng pawh a kaihruai ve ngei ang. Pathian inawpna pâwl lei lam pêng kaihhruainate rinawm taka zâwmin, Pathian Jehova vân tawlailîr rualin i kal ve zêl tih leh a thlarau thianghlim nêna inmilin thil i ti tih i târ lang a ni.—Heb. 13:17.

13, 14. (a) Isua’n “tûn lai chhuante” a tih hi tute nge ni? (b) Bible thutak hriat thiamnaah thlarau thianghlimin min ṭanpui tih târ langtu entîrna pe rawh. (“Thutak Êng Zual Zêl Rualin I Ke I Pên Ve Em?” tih bâwm en rawh.)

¹³ A pathumnaah chuan, thlarau thianghlim chuan Bible thutakte hre thiam tûrin min ṭanpui. (Thuf. 4:18) “Bawi rinawm, fing tak” chuan he magazine hi Bible thu tak zawi zawia târ lanna hmanrua ber atân kum rei tak a lo hmang tawh a ni. (Mt. 24:45) Entîr nân, Isua sawi “chhuante” chungchâng kan hriatthiamna hi han ngaihtuah teh. (Matthaia 24:32-34 chhiar rawh.) Isua’n eng chhuan chungchâng nge a sawi? “Krista Lo Awmna—I Tân Eng Awmzia Nge A Neih?” tih thuziak chuan, Isua’n mi suaksualte ni lovin, thlarau thianghlima hriak thih ni mai tûr a zirtîrte a sawina a ni tih a târ lang a ni. * Kum zabi khatna leh kan hun laia Isua hnungzuitu hriak thihte chuan chhinchhiahna an hmu mai ni lovin, a awmzia—Isua chu “kawngka bul ngeiah a awm tih”—chu an hre thiam bawk a ni.

¹⁴ He hrilhfiahna hian kan tân eng nge awmzia a neih? “Tûn lai chhuante” rei zâwng chiah chu hre lo mah ila, “chhuante” tih thu mal chungchângah thil ṭhenkhat kan hriat a ngai a: Chu chuan thilthleng engemaw chhûnga dam rual apui apangte a kâwk fo va; hun chu a lutuka rei a ni lo va, tâwpna a nei bawk tih chu. (Ex. 1:6) A nih chuan Isua sawi “tûn lai chhuante” chungchâng chu engtianga hriat thiam tûr nge? Ani chuan kum 1914-a chhinchhiahna inṭanna hmutu hriak thihte an awm ang a, hrehawm nasa tak inṭanna hmutu hriak thihte an awm bawk dâwn tih a sawi duhna a ni. Chu chhuante chuan inṭanna hun a nei a, tâwp hun pawh a nei ngei bawk ang. Chhinchhiahna tam tak thlen famkimna chuan hrehawmna chu a hnai tawh hle ang tih a târ lang chiang hle a ni. Hmanhmawhna thinlung i neih rengna leh ngaihven renga i awmna chuan, Bible thutak hriat thiamna thar zêl  rualin i kal tih leh thlarau thianghlim kaihhruaina chu i zui tih a târ lang a ni.—Mk. 13:37.

15. Chanchin ṭha puang tûra min thuam chaktu chu thlarau thianghlim a ni tih engin nge târ lang?

¹⁵ A palinaah chuan, thlarau thianghlim chuan chanchin ṭha hril tûrin min thuam chak. (Tirh. 1:8) Eng thil dangin nge chanchin ṭha khawvêl puma hrilh a nihzia târ lang? Han ngaihtuah teh. Zahzumna emaw, hlauhthâwnna emaw avânga, ‘In tina chanchin ṭha hrilh chu ka thei ngai lo vang’ titu zîngah i lo tel tawh pawh a ni mai thei. Mahse, tûnah chuan chu rawngbâwlnaah chuan taima takin i tel tawh a ni. * Jehova Thuhretu rinawm tam takte chuan dodâlna emaw, tihduhdahna emaw tâwk chung pawhin thu an hrilh chhunzawm zêl a. Harsatna nasa takte pal tlang thei tûr leh mahni chakna ringawta kan tih theih miah loh tûr thil tithei tûr chuan thlarau thianghlim chauhvin min ṭanpui thei a ni. (Mik. 3:8; Mt. 17:20) Thu hrilhnaa theih tâwp chhuahin, chu thlarau chu i thawhpui tih i târ lang a ni.

Nakina Thlarau Thianghlim Hnathawh Tûr

16. Hrehawm nasa tak chhûngin Pathian Jehova’n a mite a vênghim ang tih engvângin nge kan chian theih?

¹⁶ Nakinah Pathian Jehova chuan a thiltum thlen famkim nân a thlarau chu ropui takin a hmang ang. A hmasain vênhimna chungchâng hi lo ngaihtuah ta ila. Kan hriat tawh angin, Pathian Jehova chuan hun kal tawhah khân Israel mite chu a mi mal ang emaw, a hnam ang emawa vênhim nân a thlarau a lo hmang tawh ṭhîn a. Chuvângin, hrehawm nasa tak lo thleng tûrah pawh hian a mite vênhim nân chu thlarau thiltithei tak chu a hmang leh ang tih rinna tûr chhan ṭha tak kan nei a ni. Chutih huna Pathian Jehova’n min vênhim dân tûr chiah chu kan ngaihtuah buai chiam a ngai lo. Amah hmangaihtute chu a hmuh phak lohvah emaw, a thlarau thianghlim ṭanpui phâk lohvah emaw an awm lovang tih hre rengin, hma lam hun chu rin tlatna nên kan thlîr thei a ni.—2 Chro. 16:9; Sâm 139:7-12.

17. Engtin nge Pathian Jehova’n khawvêl tharah a thlarau thianghlim a hman ang?

¹⁷ Engtin nge khawvêl thar lo awm tûrah hian Pathian Jehova’n a thlarau thianghlim a hman ang? Chutih huna hawn tûr lehkhabu tharte ziahnaah chuan chu thlarau chu hman a ni ang. (Thup. 20:12) Chu lehkhabute chhûngah chuan eng nge chuang ang? Kum sângkhat chhûnga Pathian Jehova’n kan laka a thil phûtte a kimchangin a chuang ang. Chûng thute zir chian hun chu i nghâkhlel tawh em? Chu khawvêl thar lo thlen hun chu nghâkhlel takin kan thlîr a ni. Hun nuam tak, Pathianin he lei leh a chhûnga chêng mihringte tâna a thiltum hlen chhuah nâna a thlarau thianghlim a hman huna nun nawm dân tûr chu kan ngaihtuah thiam phâk lo.

18. I thil tum tlat chu eng nge ni?

¹⁸ Pathian Jehova chuan a thiltumte hlen chhuah nân a thlarau thianghlim—lei leh vâna thiltithei ber—chu a hman avângin, a thiltumte chu a hlawhtling ngei dâwn tih i theihnghilh ngai lo vang u. Chu thiltumah chuan nang pawh i tel ve a. Chuvângin, Pathian Jehova thlarau thianghlim dîl leh chu mi kaihhruaina mila thil tih chu i thil tum ni tlat rawh se. (Lk. 11:13) Tichuan, Pathian Jehova’n mihringte tâna a thiltum chu i beisei thei ang—lei Paradis-a chatuana nunna chu. (w10-E 04/15)

[Footnote-te]

Kan Hre Chhuak Thei Em?

• Bible hun lai khân, eng kawngin nge Pathian Jehova’n a thiltumte tihpuitlin nân a thlarau thianghlim a hman?

• Engtin nge Pathian Jehova’n tûn laiah a thlarau thianghlim a hman?

• Engtin nge Pathian Jehova’n a thiltumte tihpuitlin nân a thlarau thianghlim a la hman ang?

[Zirlai Atâna Zawhnate]

[Phêk 20-naa bâwm]

Thutak Êng Zual Zêl Rualin I Ke I Pên Ve Em?

Pathian Jehova chuan a mite hnênah Bible thutak êng chu a chhuah chhunzawm zêl a. Vênnainsâng-a chhuah inthlâkthlengna ṭhenkhat chu engte nge ni?

▪ Isua sawi dawidim tehkhin thu chuan thlarau lama ṭhan chhohna chungchângah a ṭha lama zir tûr eng nge a sawi pawimawh? (Mt. 13:33)—July 1, 2008, phêk 27-29.

▪ Engtikah nge vân lam beiseina nei tûr Kristiante kohna chu a tâwp?—May 1, 2007 (English), phêk 30-31.

▪ ‘Thlarauva’ Pathian Jehova chibai bûk tih awmzia chu eng nge ni? (Joh. 4:24)—July 1, 2002, phêk 23.

▪ Mipui tam takte’n khawi hung chhûngah nge rawng an bâwl? (Thup. 7:15)—May 1, 2002 (English), phêk 30, 31.

▪ Engtikah nge kêl leh berâm hlîrna chu neih a nih? (Mt. 25:31-33)—October 15, 1995 (English), phêk 18-28.