Chhiartute Zawhna Siam . . .

Lei hian nun châwmna tûra thil mamawhte a pe chhuak reng ang em?

▪ Kan awmna Leilung mawi tak hian hneh taka nun châwm theihna a nei a. Chuti chung pawhin, leia mihring pung chak tak leh leilung hausakna kan hman ral chak êm avângin, heti hian i ngaihtuah mai thei: ‘Kan ngaihruat phâk bâk thil a lo thleng mai ang em? Ei tûr leh leilung hausakna hman tûr a awm reng ang em?’ tiin.

He zawhna chungchâng i ngaihtuah hian, kum 4,000 aia tam kal taa mihringte hnêna Pathian thutiam: “Lei awm chhûng zawng buh tuh leh buh lâk te, khaw vâwt leh khaw lum te, nipui leh thlasik te, chhûn leh zân te chu a bo lo vang,” tih chu kan ring tlat thei a ni. (Genesis 8:22) Chutiang chuan, nî tin nî a lo chhuak ang tih kan hriat chian ang bawkin, leilung hian nun châwmna tûra thil mamawhte a pe chhuak reng ang tih kan ring tlat thei a ni.

“Lei Hian Min Châwm Thei Em?” tih thupui nei kum 2004-a report pêkah, chhehvêl boruak chanchin ziak mi Alex Kirby-a chuan: “Lei hian mi tin kham khawp tûr rah a chhuah ngei mai a. Mahse, ei leh in tûrte hi a hmun tûr lovah a awm emaw, a man a to lutuk emaw, a nih loh leh rei tak dah ṭhat theih lohvin a awm emaw ṭhîn. Chuvângin, mi tin tâna kham khawp neih chu science lam ai mahin politics lamah a innghat zâwk a ni,” a ti. Lei hi a nih tûr ang taka enkawl leh a hausaknate ṭha taka hman a nih chuan, min châwm theih loh palh hlauh nachhan tûr a awm lo vang. Entîr nân, hmân lai Israelte hun lai khân, Pathian chuan ram leilung hman dân tûr dik chungchângah kaihhruaina chiang tak a pe a. Leviticus 25:4-a chhinchhiah angin, Pathian chuan Israelte hnênah: “A kum sarih kum erawh chu ram chawlh dêrna . . . a ni ang a; i lovah buhbâl i chîng tûr a ni lo,” tiin a hrilh a ni. Kum sarih a thlen apiangin buhbâl chîng lo mah se, Pathian chuan a mite chu kham khawp neih loh palh hlauhna an neih loh nân thil ṭha hnianghnâr taka pêk a tiam a ni.—Leviticus 26:3-5.

Tûn lai hian, leilung leh a hausakna chhe tawh siam ṭha tûrin mi ṭhenkhat chuan tih tak zetin thawk mah se, mi tam tak chuan se bo hnua se kawng khâr ang lek a nih an hlau a ni. A chinfel hlen dân awmchhun chu Thu Puan 11:18-ah hian kan hmu a. Chutah chuan Pathian Jehova’n ‘lei tichhetute a tichhe ve thung’ dâwn tih a sawi a ni. Pathian Jehova chuan leilung leh a hausakna ṭha taka enkawl lohna leh hman dik lohna te a tibo dâwn mai ni lovin, lei hi a chhûnga chêngte tân rah ṭha tak a chhuahtîr dâwn a ni. Luhlul taka Pathian thiltum ngaihsak lohna leh mahni tâna leilung hausakna hman khaw lohnate chu tihtâwp a ni ang. Kawng lehlamah chuan, mahni duh thua Pathian Jehova rorêlna thlâwptute erawh chuan Sâm 72:16-a kan hmuh: “Leiah, tlâng chungahte hian, buh tam tak a awm ang,” tih hi an chên thung ang.

Pathian Jehova chuan a hmangaihna leh finna nasa tak avângin mihringte chu an in—lei paradis—enkawltîr a, chuta chêntîr chu a tum a ni. (Genesis 1:28) A rorêlna hnuaiah chuan, thuâwih mihringte chuan leilung hausakna nasa takte chu khawh ral lova fing taka hman ṭangkai dân an zir ang. Thil nung zawng zawngte châkna tihrehsaktu tûr, hmangaih taka Petu chungah chuan kan va lâwm tak êm!—Sâm 145:16. (w10-E 03/01)

[Phêk 12-naa thu lâk chhuah]

“Mi tin tâna kham khawp neih chu science lam ai mahin politics lamah a innghat zâwk”