Pathian Hnaih Rawh

Pathian A Inchhîr Thei Em?

RORELTUTE 2:11-18

MIHRING ṭha famkim lo kan nih angin, inchhîr châng kan nei vek a. Entîr nân, thil kan tisual tih kan inhriat chuan pawi kan ti hle ṭhîn. Ngaihvenawm takin, Bible chuan Pathian Jehova a inchhîr theih thu a sawi a ni. ‘Mahse, Pathian chu ṭha famkim a ni a, thil a tisual ngai hlei nêm!’ i ti pawh a ni thei. Chuti a nih chuan, eng kawngin nge Pathian chu a inchhîr? Chu mi chhânna chuan thil ropui tak eng emaw hre thiam tûrin min ṭanpui thei a ni: Pathian Jehova chuan thil ngaihtuah theihna a nei a, kan thiltihte hian a ngaihtuahna chu a nghawng thei a ni tih chu. Rorêltute 2:11-18-a chhinchhiah thute hi lo ngaihtuah ta ila.

Bible-a Rorêltute bu chuan Israelte chanchina hun hrehawm laite chu a indawt thlapin a chhinchhiah a. Tûnah chuan Israel hnam chu Pathianin Abrahama hnêna a tiam, Kanaan ramah an khawsa mêk a. A hnu kum zabi engemaw zât chhûnga Israelte nun kawng zawh chu: helna, inawpbehna, tih tak zeta dîlna, leh chhan chhuahna tia hmun lia ṭhen theih a ni ang a, chûng chu a thleng nawn fo a ni. *

Helna. Kanaan mite thununna hnuaiah, Israelte chuan “LALPA chu an hawisan” a, pathian dangte zuiin, a bîk takin “Baala leh Astarothi rawng an bâwl” a ni. * Chutianga helna chu kalpênna tluk a ni a. Chuvângin, Israelte’n Aigupta ram ata anmahni hruai chhuaktu “LALPA chu an tithinur” ṭhîn pawh hi a mak hran lo!—Châng 11-13; Rorêltute 2:1.

Inawpbehna. Pathian Jehova chuan a thinurna fel avângin amah hnuchhawntute chu a vênghim tawh lo va. Tichuan, Israelte chu an ram suasamtu “an hmêlma” kutah an tlâwm ta a ni.—Châng 14.

Tih tak zeta dîlna. Israelte chuan lungngaih manganna nasa tak an tawh hunah an thil sual tih chu pawi an ti a, Pathian ṭanpuina an dîl a. “Anmahni hnehchhiah leh timangangtute avângin an rûm” tih ṭawngkam hian tih tak zeta dîlna an neihzia a târ lang thei ang. (Châng 18) Pathian hnênah tih tak zeta dîlna neih chu an thil tih fote zînga mi a ni. (Rorêltute 3:9, 15; 4:3; 6:6, 7; 10:10) Pathianin engtin nge a chhân?

Chhan chhuahna. Pathian Jehova chuan Israelte rûm thâwm chu a lo hria a, a “inchhîr” a ni. “Inchhîr” tia lehlin Hebrai thu mal hi “rilru emaw, tum emaw thlâkthleng” tihna a ni thei a. Lehkhabu pakhat chuan: “An rûm thâwm a hriatin, Pathian Jehova chuan hrem a tumna chu chhan chhuahnaah a thlâk ta a ni,” tiin a sawi. A zahngaihna zârah, Pathian Jehova chuan a mite an hmêlmate kut ata chhan chhuaktu tûr “rorêltute a rawn siamsak” a ni.—Châng 18.

Pathian inchhîrtîrtu, a nih loh leh a rilru thlâktîrtu chu i lo hria em? A mite rilru put hmang inthlâkthlengna chu a ni. Heti hian han ngaihtuah teh: Hmangaihna nei pa ber chuan thil sual titu a fa chu thil engemaw a tih phalsak lovin, a thunun thei a. Mahse, an fa chuan pawi a tih tak zet chuan, pa ber chuan a hremna chu a titâwp thei a ni.

He thu aṭang hian Pathian Jehova chungchâng eng nge kan zir theih? Duhrêng vânga thil sual tihna chuan Pathian a tihthinur laiin, inlamlêtna thinlung erawh chuan zahngaihna lantîr tûrin a chêttîr ṭhîn. Kan thiltihin Pathian a nghawng thei tih hriatna chuan rilru a khawih hle mai. Engvângin nge Pathian Jehova ‘thinlung tihlâwm’ dân chu i zir loh vang? (Thufingte 27:11) Chutianga i zir chuan, i inchhîr ngai lo vang. (w10-E 02/01)

[Footnote-te]