Bible Hi Pathian Thâwk Khum Thu A Ni Tak Zet

TIRHKOH Paula’n Bible hi ‘Pathian thâwk khum a ni’ a tih khân eng a tihna chiah nge ni? (1 Timothea 3:16) Pathian chuan a thlarau thianghlim hmangin Bible ziaktute chu A duh ang chauhva ziak tûrin a kaihruai a tihna a ni.

Chûng Bible ziaktute chuan “thlarau thianghlim tirhin Pathian hnên ata an sawi . . . ṭhîn,” tiin tirhkoh Petera chuan a sawi. (2 Petera 1:21) Chuvâng chuan, tirhkoh Paula pawhin Bible-a lehkhabu hrang hrang  awmte chu “Krista Isuaa rinna awm avâng chuan chhandamna hmu khawpa tifing thei che lehkha thianghlimte,” tiin a ko thei a ni.—2 Timothea 3:14, 15.

Mi tam tak chuan, ‘Bible hi Pathian ziak a ni lo,’ tiin nasa takin an hnial a. Mi thiamte chuan, Bible rin tlâkna chu nasa takin an bei fo va; chutianga beihna chu thil hlui lai chhuak mi, Sir Charles Marston-a chuan, “Bible-a chanchin ziakte zah lohna tenawm tak” tiin a ko va. Ṭhenkhat chuan “hmân lai thawnthu lâwrkhâwmna lehkhabu” ang leka ngaiin an hnâwl a ni.

A Finfiahna Ngaihtuah Phawt Rawh

Chuti a nih chuan, Bible chu a rin tlâk em? He mi chungchânga thu tlûkna dik siam chu a pawimawh hle. Engvângin nge? A chhan chu, Bible-ah hian Pathian min biak pawhna thute a lo chuang ngei a nih chuan, chu mi hnâwl chu nasa taka chhiatna tûr a nih loh vêk pawhin, thil âtthlâk tak a ni dâwn si. Bible chu Pathian Thu ang ni lova, mihring thu ang leka i thlîr chuan, i thiltih i thununtîr dân leh i thurin ṭanchhan atâna i hman dân chuan nasa takin a hniam phah dâwn a ni.—1 Thessalonika 2:13.

Engtin nge thu tlûkna i siam theih ang? Aw le, mi i rin dâwn leh dâwn loh chu eng ṭanchhanin nge thu tlûkna i siam ṭhin? Thil pakhat chiang tak a awm. I mi hriat chian loh rin chu thil harsa tak a ni, tih hi. Hun engemawti chhûng i hriat chian hle hnuah chauh mi chu mi rinawm leh rin tlâk tak an ni tih i hre thei a ni. Chutiang kawng hmang chuan, Bible rin tlâkna pawh i hre chiang thei a ni. Bible a rin tlâkna tihniamtu ngaih dân leh chhût dânte chu hre chiang lovin pawm nghâl mai suh la. Bible-in ‘Pathian thâwk khum’ nia a inchhâlna thlâwptu finfiahnate chhût ngun nân hun hmang zâwk ang che.

“Ṭhiante” Hnên Aṭanga Beihna

Bible “ṭhian” nia inchhâl ṭhenkhatte meuh pawhin, a dikna leh a rin tlâkna an beih avâng  maiin Bible hi Pathian thâwk khum ni lovah ngai mai suh. Tûn laiah, Bible chungchânga ngaih dân sawitu a tam zâwk chuan Kristian nia inchhâl chung pawhin, “Pathian Lehkha Thu chu mihringte thuziak ang maiin an sawi,” tih New Dictionary of Theology chuan a sawi.

Theologian tam tak chuan Bible bu ziaktute chungchângah rinhlelhna an chawk chhuak a. Entîr nân, ṭhenkhat chuan Isaia bu hi zâwlnei Isaia ziah a ni lo an ti a. An sawi dân chuan Isaia thih hnu kum rei taka ziah a ni. Lowther Clarke-a ziah, Concise Bible Commentary bu chuan Isaia bu chu “chhuan hrang hranga awm, mi tam takte ziah” angin a sawi a. Mahse, chûng thute chuan Isua Krista leh a zirtîrte’n Isaia ziak nia an sawi ṭhin chu a hnâwl thung a ni.—Matthaia 3:3; 15:7; Luka 4:17; Johana 12:38-41; Rom 9:27, 29.

Chu aia chhe zâwkin, J. R. Dummelow-a ang chi Bible thlifîmtu mi thiamte chuan Daniela bua hrilh lâwk thu chuangte hi “hmân lai thilthleng tawhte a ziaktuin hrilh lâwk thu anga a chantîr chawp mai mai” niin an sawi hial hi a ni. Chutianga an sawi hian, anni chuan Isua Krista thusawi ngei chu an hnâwl leh tihna a ni. Isua chuan: “Tiṭiautu tenawm, zâwlnei Daniela sawia kha, hmun thianghlima dinga in hmuh hunah chuan (a chhiar apiangin a awmzia hre rawh se),” tiin a vaukhân a. (Matthaia 24:15) Isua Krista ngei pawhin hmân lai thilthlengte hrilh lâwk thu anga chantîr chawpin, mite a bum ve ang tih rin chu Kristiante tân thil inâwm a ni em? Ni lo ve.

A Ziaktu Hriat Hian Awmzia A Nei Em?

“Bible bute ziaktu dik hriat leh hriat loh hian awmzia a nei tak zet em ni le?” i ti mai thei. Nei tehrêng e. A nih leh, i ṭhianpa thuchah leh thuro chhiah ziahna lehkha pawimawh nia sawi chu, ama ziak a ni lo tih i han hriat hnu chuan eng ang takin nge i ngaih pawimawh ang? Chutah, mi thiamte chuan chu thuziak chu phuahchawp mai mai—i ṭhianpa duhsaktute’n a thuchah sawi duh ni ngeia an rinte an ziah chawp mai—a ni tih hrilh ta che se la. Chu chuan lehkha hlutna chu a tibo vek dâwn lâwm ni? Chu lehkha chu i ṭhianpa thuchah leh thuro chhiah ziahna dik tak niin i pawm thei ang em?

Bible pawh chutiang chiah chu a ni. Kristiana inchhâlte ngei pawh tiamin, mi tam takin rinawmna te, nungchang bawlhhlawhna te, leh thil dang dangte chungchânga Bible zirtîrna an hnâwl hreh lo hi a mak hran lo. Mite’n ngainêp tak chunga, “A, . . . khângte chu Thuthlung Hlui bua mi alâwm a nih!” tia an sawi chu i hre zing em? Chutianga an ngaihnêp Thuthlung Hlui chu a ni, tirhkoh Paula’n ‘Pathian thâwk khum’ leh “Lehkha Thianghlimte” tia a koh zâwk mahte chu ni.

“Mahse, mithiamte leh scholar zawng zawngte finfiahna pêk chu ngaihthah ngawt theih a ni bîk hlei nêm,” i ti mai thei. Ni bîk lo ve! Entîr nân, tih tak zeta zirmite azârah, atîra ziakna ṭawnga Bible chângte kan lo hriat theih phah a ni. Kum zabi tam tak chhûngin Bible chu ziah chhâwn leh zêl a nih avângin, thuziakah sual neuh neuh chu a awm ngei mai. Mahse, hei hi hre reng rawh: Bible  thuziak ziah chhâwn leh zêlna avânga sual neuh neuh awm leh Bible pumpui hi mihringte phuahchawp anga ngaih chu a inang lo hle, tih chu.

“Lehkha Thianghlimte” I Rinna Chu Vawng Reng Rawh

Bible hi Pathian thâwk khum a ni tih a sawi hma lawk khân, Paula chuan Timothea hnênah chutiang thâwk khum thute a pawimawh chhan chu a hrilh a. Heti hian a sawi a ni: “Ni hnuhnûngahte chuan . . . mi sual leh tihdertute . . . chu mi bum leh buma awmin an sual zual deuh deuh ang,” tiin. (2 Timothea 3:1, 13) Paula hun aṭang tawh khân, ‘mi fing leh rem hria’ anga langte chuan mite chu ‘bumin,’ Isua Krista an rinna chu an tihchauhsak a ni. (1 Korinth 1:18, 19; Kolossa 2:4, 8) An thununna laka invênhim nân, tirhkoh Paula chuan Timothea chu Pathian pêk ‘Lehkha Thianghlim, a naupan têt ata a hriat chianahte chuan awm reng’ tûrin a fuih a ni.—2 Timothea 3:14, 15.

Hêng ‘ni hnuhnûng’ chhûng hian i tân pawh chutiang bawka tih chu a pawimawh a ni. Mi fing takte’n an hman ṭhin mi “bum” thei tak thute hruai suala awm chu thil hlauhawm vak lovah ngai suh. Chu ai mah chuan, kum zabi khatnaa Kristiante angin, Bible—thâwk khum Pathian Thu ngei—aṭanga i thu zirte rinchhan tlatin, invênghim zâwk ang che.

Jehova Thuhretute chuan Bible i rin theih nâna ṭanpui che chu an duh a. Entîr nân, anni chuan Bible thu bulte chu engtik lai pawha a rin tlâkzia te; science lam thil chungchâng a sawi huna science nêna a inrem dân te; a chhûng thu atîr aṭanga a tâwp thlenga a inmil dân te; a hrilh lâwknate a thlen famkim dik dân te—leh thil dang tam takte chu an hrilh thei ang che. Bible hi Pathian Lehkha Thu a nih tak zetzia hre tûra thinlung ṭha pu mi maktaduai tam takte ṭanpuitu thute i hriat duh chuan, he magazine chhuahtute hnênah hian lehkha ziak hreh suh ang che. (w10-E 03/01)

[Phêk 5-naa thu lâk chhuah]

Mi i rin dâwn leh dâwn loh chu eng ṭanchhanin nge thu tlûkna i siam ṭhin?

[Phêk 6-naa thu lâk chhuah]

Tih tak zeta zirmite azârah, atîra ziakna ṭawnga Bible chângte kan lo hriat theih phah