Bible Hi Pathian Thu A Ni Em?

“Pathian Lehkha Thu zawng zawng hi Pathian thâwk khuma pêk a ni a, zirtîr kawngah te, thiam loh chantîr kawngah te, zilh kawngah te, felna zirtîr kawngah te a sâwt bawk a ni; Pathian mi chu hna ṭha tinrêng thawk tûra kim taka inthuamin a famkim theih nân.”—2 TIMOTHEA 3:16, 17.

HENG thute hi Bible hlutzia chungchânga tirhkoh Paula thusawi thiltithei tak a va ni êm! Ani chuan a hun laia Bible hmuh theih—Thuthlung Hlui tia koh ṭhin—chungchâng a sawina bîk a ni tih a chiang hle. Mahse, a nihna takah chuan a thusawite chu C.E. kum zabi khatnaa Isua zirtîr rinawmte ziah pawh tiamin Bible bu 66 tân pawh a dik vek a ni.

Paula ang bawkin Bible chu i hlut em? Bible ziaktute chu Pathianin a thâwk khum tak tak i ring em? Kum zabi khatnaa Kristiante chuan an ring a ni. Chu rinna chu kum zabi kal ta chhûng zawng khân a nghîng ngai lo. Entîr nân, kum zabi sâwm leh palinaa sakhaw hruaitu Sâp-pa John Wycliffe-a chuan Bible chu “thutak kal sual thei lo” niin a thlîr a ni. A chunga kan târ lan tâk Paula thute chungchângah, The New Bible Dictionary chuan Pathian “thâwk khum a nihna chuan Bible thusawite hi a dik vek tih a nemnghet a ni” a ti.

Bible Chunga Rilru Put Hmang Inthlâkna

Mahse, tûn hnai aṭang khân Bible thu neihna chu rin a ni lo tial tial a. The World’s Religions tih lehkhabu chuan: “Kristian zawng zawng chuan an thiltih kaihruaitu leh thurin ṭanchhan atân Bible thu neihna chu a thu mai chuan an la pawm tho,” a ti. Mahse, a tak takah chuan chutiang chu a ni tawh lo. Mi tam  tak chuan Bible chu “mihring thuro chhiah rin tlâk lo” ang maiin an thlîr tawh a ni. Anni chuan Bible ziaktute chu thlarau lama puitling tak an ni tih pawm mah se, tûn laia kan neih hriatna leh finna ang nei si lova thlarau lam thu ril takte hrilhfiah tum thil tisual thei mihring ve mai ang lekah an hmu a ni.

A nihna takah chuan, tûn laia mi tlêm tête chauhvin, Bible chu an ngaihtuahna leh thiltihte an kaihhruaitîr a ni. Entîr nân, mite’n nungchang lama Bible tehnate chu a tûn lai tawh lovin, a chhawr tlâk tawh lo tia an sawi chu i hre zing em? Mi tam tak chuan Bible dân leh thu bulte pawlh dal chu an hreh lo va—zawm a remchân loh hunah chuan ngaihthah mai pawh an hreh lo hial a ni. Kristiana inchhâl mi ṭhenkhat chuan inngaihna te, uirêna te, rinawm lohna te, leh zu ruihna te chungchâng Bible sawite chu alang apauvin an ngaihthah a ni.—1 Korinth 6:9, 10.

Engvângin nge chutianga an ngaihthah? Kum zabi 20-na tîr lam khân thil hlui lai chhuak mi, Sir Charles Marston-a chuan Bible dikzia a ziakna lehkhabu, The Bible Is True tihah chuan a chhan pakhat chu a târ lang a. Chutah chuan, mite hian Bible rin tlâkzia beitu “tûn lai ziakmite ngaih dân tam tak chu phunnawi miah lovin an pawm” nghâl mai ṭhîn tih a sawi. Chutiang chu tûn laiah pawh a ni thei ang em? Bible rin tlâkzia beitu mithiamte ngaih dân leh chhût dânte chu engtin nge i thlîr ang? A dawta thuziakin he mi chungchânga sawi tûr a neih chu lo en ang che. (w10-E 03/01)