Chhûngte Dam Lo Enkawl Laiin Thlarau Lamah Chak Reng Rawh

THUHRETU Kim-i hnungzâng ruha thil chawr awm chu cancer a ni tih hmuh chhuah a ni a. * A pasal Steve-a chuan: “Chu thil chawr chu zai a nih hnu chuan, radiotherapy (êng zung chak tak hmanga hem) leh chemotherapy damdawia enkawl a ni leh a. Chu enkawlna avâng chuan Kim-i chu a chau hle mai a. Chêt pawh a che hlei thei ta lo a ni,” tiin a sawi.

A nupui duh takin chu natna khirh tak a tuar lai a hmuha Steve-a lungngaih dân tûr chu i ngaihtuah thei em? Mi tichhe telh telh thei natna tuar, a nih loh leh tarnain a nghawng chhûng khat hnai tuemaw i nei pawh a ni thei a. (Thur. 12:1-7) I nei a nih chuan, ṭha taka i enkawl theih nân nangmah i inngaihsak a ngai tih i hre ngei ang. Thlarau lama i lo chauh chuan, rilru lam leh taksa lama i hrisêlna pawhin a lo tuar ṭan theiin, i chhûngkaw mamawh ṭanpuina i pe thei lo pawh a ni thei. In chhûngkaw zînga dam lo emaw, tar emaw i enkawl laiin engtin nge thlarau lamah i inbûk tâwk reng theih ang? Kristian kohhrana mite chuan chutiang dam lote ngaihsakna lantîr tûrin tih theih an nei em?

Engtin Nge I Inbûk Tâwk Reng Theih Ang?

Chhûngkaw zînga dam lo i enkawl laiin thlarau lama inbûk tâwkna leh taksa lama hrisêlna vawng reng tûr chuan i insiamrem a, i hun leh tha i hman thiam a ngai a ni. Thufingte 11:2 chuan: “Inngaitlâwmte hnênah chuan finna a awm,” tiin a sawi a. He mi chungchângah hian, ‘inngaitlâwm’ tih thu mal hian mahni tlin tâwk hriatna a kâwk a ni. Mahni tlin tâwk bâk thil i tih lo nân i hun duan leh i mawhphurhnate i bih chian a ngai mai thei bawk.

Steve-a chuan a hnathawh chu bih chiang lehin, finna leh inngaihtlâwmna a lantîr a. A hnathawh lai mai bâkah, Ireland rama Jehova Thuhretute tualchhûng kohhrana upahote râwnkhâwmtu leh rawngbâwlna enkawltu hna  a chelh bawk a. An bial chhûnga Hospital Liaison Committee zînga mi a ni bawk a ni. Steve-a chuan: “Kim-i chuan chûng mawhphurhnate ka ngaihsak êm avânga amah ngaihthah angin vawi khat tê mah a phunnawi ngai lo. Mahse, ka tlin tâwk bâkin ka thawkrim tih ka hria,” tiin a sawi. Engtin nge Steve-a chuan chu dinhmun chu a chinfel? “Ṭawngṭaina nêna ngun taka ka ngaihtuah hnuah chuan upahote râwnkhâwmtu nihna chu bânsan ka tum ta a. Upa ang chuan rawng ka la bâwl tho va; mahse, kohhrana ka mawhphurhna ṭhenkhat mi dangte hnêna ka hlan chhâwn avângin Kim-i mamawh hun leh ngaihsakna chu ka pêk theih phah a ni,” tiin a sawi a ni.

A tâwpah chuan Kim-i pawh a lo ṭha chho va. Steve-a leh Kim-i chuan an dinhmun chu an bih chiang leh a, a nupui thlâwpna avângin Steve-a chuan tûn hmaa kohhrana a mawhphurhnate chu a thawk chhunzawm leh thei ta a ni. Steve-a chuan: “Kan pahnihin natna avânga tlin tâwk kan neihte mila nun dân kan zir a. Pathian Jehova min ṭanpuina avâng leh ka nupuiin dam lo chung pawha phunnawi lova min thlâwpna avângin ka lâwm hle,” tiin a sawi a ni.

Bial kantu Jerry-a leh a nupui Maria-i te thiltawn pawh hi han ngaihtuah teh. An nu leh pa tar tawh enkawl tûrin an thiltumte an siamrem a ngai a. Maria-i chuan: “Kei leh ka pasal chuan  missionary anga ram danga rawngbâwl chu thiltumah kan nei a. Mahse, Jerry-a chu fa neihchhun a ni a, a nu leh pa chuan a enkawlna an mamawh a ni. Chuvâng chuan, Ireland-a awmin anmahni enkawl chu kan rêl thlu ta a. Chutianga tiin, Jerry-a pa chu a thih hmaa damdawi ina a awm chhûng zawng kan enkawl thei a ni. Tûnah pawh hian Jerry-a nu chu nî tin kan bia a, a mamawh huna kan ṭanpui theih nân kan awm hlatsan lutuk ngai lo. Jerry-a nu lawina kohhrana mite chu an ṭangkai hle a, an ṭawiâwm ṭhat êm avângin bial kantu hna kan thawh reng theih phah a ni,” tiin a sawi.

Mi Dangte’n An Ṭanpui Theih Dân

Tirhkoh Paula’n kohhrana hmeithaite hnêna thil pêk tûr chungchâng a sawi khân: “Tupawh mahni chhûngkhat lainate ngaihsak lo va, mahni chênpui chhûngte ngei pawh ngaihsak lo chuan rinna an phatsan a ni, ring lo mi aiin an sual zâwk,” tiin a ziak a. Paula chuan a Kristian unaute hnênah an nun kawng chu “Pathian lâwmzâwng” a nih theih nân an nu leh pa tar tawhte leh an pi leh pute chu sum leh pai lamah an enkawl tûr a ni tih a hrilh a ni. (1 Tim. 5:4, 8) Mahse, kohhrana mi dangte pawhin ṭanpuina ṭangkai tak an pe theiin, an pe ngei tûr a ni bawk.

Sweden rama chêng nupa tar tawh tak Hakan-a leh Inger-i te chungchâng pawh hi lo chhinchhiah teh. Hakan-a chuan: “Ka nupuin cancer a vei tih kan hriat chuan kan pahnihin min ṭhawng na hle a. Inger-i chu nu hrisêl leh chak tak a ni ṭhîn a. Tûnah erawh chuan inenkawl tûrin nî tin damdawi in kan pan a ngai a, a inenkawlna chuan a tichau hle a ni. Chûng hun chhûng chuan Inger-i chu ina a awm reng a ngai a, kei pawh amah enkawl tûrin a bula ka awm a ngai bawk a ni,” tiin a sawi. Engtin nge tualchhûng kohhrana mite chuan Hakan-a leh Inger-i chu an ṭanpui?

Kohhran upate chuan an nupaa inkhâwmnaa thusawite an ngaihthlâk theih nân telephone-a thlunzawm dân an ruahmansak a. Chu bâkah, unaute chuan an va tlawh ṭhînin, an phone reng bawk a. Lehkha leh card te pawh an thawn bawk a ni. Hakan-a chuan: “Unau zawng zawngte ṭawiâwmna leh Pathian Jehova ṭanpuina kan dawng tak meuh meuh va. Chutianga inngaihsak chu thlarau lama chak reng nân a pawimawh hle. Inger-i a han dam chhuak leh chu a lâwmawm hle a, tûnah chuan Kingdom Hall-a Kristian inkhâwmnaah kan tel ve leh thei ta a ni,” tiin a sawi. Kohhrana mite’n an zînga dam lote leh tarte ṭanpui tûra an theih ang ang an tih hian, ‘ṭhian englai pawha hmangaih reng, mangan nî atâna unauva piang’ an nihzia an lantîr a ni.—Thuf. 17:17.

Pathian Jehova chuan I Thawhrimna A Hlut

Chhûngkaw zînga dam lo enkawl chu a chauhthlâk thei ngei mai. Mahse, natna avânga ṭanpui ngai mi “retheite ngaihtuah mi chu a eng a thâwl e,” tiin Lal Davida chuan a ziak a ni.—Sâm 41:1.

Engtin nge dam lo emaw, hrehawm tuar emaw enkawltu chu a eng a thâwl, a nih loh leh a hlim theih? Bible chuan mi rethei, a nih loh leh ṭanpui ngaite ṭanpuitu chuan Pathian Jehova a pûktîr a, Pathianin a thiltih ṭhat chu a rûl ang tih a sawi a ni. (Thuf. 19:17) Pathian dik chuan a chhiahhlawh rinawm dam lote chu a ngaihsak bîk a, an chunga khawngaihna lantîrtute chu mal a sâwm ṭhîn. Fakna hla phuahtu Davida chuan: “LALPAN [chutiang mi chu] a chauhna mut hmunah chuan a tichak ang a: nangin a dam loh laiin a mutna i siamsak vek ṭhîn,” tiin hla a sa a ni. (Sâm 41:3) Hmangaih taka mi dangte enkawltu chuan harsatna emaw, chhiatna emaw tâwk ta se, Pathian Jehova’n a ṭanpui dâwn tih kan ring tlat thei a ni.

Chhûngkaw zînga dam lo enkawlnaa kan thiltih chu Pathian Jehova’n a hriain, a pawm tih hriat chu a va lâwmawm tak êm! Chutianga ṭanpuina pe tûrin keimahni lamah ṭan lâk hle ngai mah se, Bible chuan “chutiang inthawina [a nih loh leh, inpêkna] chungah chuan Pathian a lungni êm êm” tih min tiam nawn a ni.—Heb. 13:16. (w10-E 05/15)

[Footnote]

[Phêk 22-naa milemte]

Thlarau lama inbûk tâwk renga awmin, mi dangte ṭanpuina pawm rawh