Mipate U, Krista Lû Nihna Hnuaiah In Intulût Em?
Mipate U, Krista Lû Nihna Hnuaiah In Intulût Em?
“Mipa tawh phawt lû chu Krista a ni.”—1 KOR. 11:3.
1. Engin nge Pathian Jehova chu buaina Pathian a ni lo tih târ lang?
“NANG, kan Lalpa leh kan Pathian, ropuina te, chawimawina te, thiltihtheihna te chu hmu tlâk i ni e; nangin engkim i siam a, i duh avânga awm leh siam a ni bawk si a,” tiin Thu Puan 4:10, 11 chuan a sawi a. Siamtu a nih avângin, Pathian Jehova chu lei leh vâna Lal Chungnungber leh a thil siam zawng zawng chunga thu neitu ber a ni. Pathian Jehova chu ‘buaina Pathian ni lo va, remna Pathian a nih zâwkzia’ chu vântirhkohte a ruahman dânah a lang a ni.—1 Kor. 14:33; Is. 6:1-3; Heb. 12:22, 23.
2, 3. (a) Pathian Jehova thil siam hmasak ber chu tunge ni? (b) Fapa piang hmasa ber leh a Pa dinhmun chu engtin nge a inkûngkaih?
2 Thil engmah a siam hmain, Pathian chu amahin kum chhiar sên loh khawpa rei a lo awm tawh a. A thil siam hmasak ber chu thlarau mi “Thu” tia hriat hi a ni a, Pathian Jehova tâna Thusawitu a nih vâng a ni. Chu Thu chu thil dang zawng zawng siamna pawh a ni bawk. A hnuah, mihring ṭha famkim anga he leia lo kalin, Isua Krista tia hriat a lo ni ta a ni.—Johana 1:1-3, 14 chhiar rawh.
3 Pathian leh a Fapa piang hmasa ber dinhmun inkûngkaih dân chungchângah Bible-in eng nge a sawi? Pathian thlarau thâwk khuma awm tirhkoh Paula chuan: “Mipa tawh phawt lû chu Krista a ni, hmeichhe lû chu mipa a ni, Krista lû chu Pathian a ni tih in hriat ka duh a ni,” tiin min hrilh a ni. (1 Kor. 11:3) Krista chu a Pa lû nihna hnuaiah a awm a. Finna nei thil siamte zînga remna leh ruahmanna fel awm tûr chuan lû nihna kenkawh leh intukluhna a pawimawh a. “Engkim siam” nâna hman bera pawh chu Pathian lû nihna hnuaia a intukluh ve a ngai a ni.—Kol. 1:16.
4, 5. Engtin nge Isua’n Pathian Jehova laka a dinhmun chu a thlîr?
4 Isua chuan Pathian Jehova lû nihna hnuaia intukluh leh he leia lo kal chu eng angin nge a ngaih? Bible chuan: “Krista Isua . . . zawngin Pathian anga awma Pathian tluka awm chu thil thlâkhlelh hleih theihah a ruat lo va, mihringte anga lo piangin, bâwih angah a insiam a, amah leh amah a intitlâwm ta zâwk a. Tin, mihring anga lo awmin, a inngaitlâwm a, thi khawp hiala thu zâwmin, a lo awm ta a,” tiin a sawi.—Phil. 2:5-8.
5 Isua chuan engtik lai pawhin a Pa duh zâwng chu inngaitlâwm takin a ti reng a. Ani chuan: “Keimahin engmah ka ti thei lo: . . . ka rorêl chu dik tak a ni, keima thu thuin awm ka tum lo va, mi tîrtu thu thu zâwka awm ka tum ṭhin avângin,” tiin a sawi a. (Joh. 5:30) Tin, ‘[Ka Pa] thil lâwmzâwng apiang ka ti fo’ tiin a sawi chhuak bawk a ni. (Joh. 8:29) Leia a nun tâwp dâwn lam khân, Isua chuan a Pa hnênah ṭawngṭaiin: “Nangin thil tihtûr mi pêk kha ka ti zo va, khawvêlah ka chawimawi tawh a che,” tiin a sawi a ni. (Joh. 17:4) Isua chuan a chunga Pathian lû nihna chu a hriain a pawm a ni tih a chiang hle.
Pa Hnuaia Intukluh Chu Fapain A Hlâwkpui
6. Isua’n eng mize ṭha duhawm takte nge a lantîr?
6 Leia a awm lai khân, Isua chuan mize ṭha duhawm tak takte a lantîr a. Chûng zînga pakhat chu a Pa chunga hmangaihna a târ lan kha a ni a. “Pa ka hmangaih,” tiin a sawi chhuak a ni. (Joh. 14:31) Tin, mite hmangaihna nasa tak pawh a lantîr bawk. (Matthaia 22:35-40 chhiar rawh.) Isua chu ngilnei tak, mite ngaihtuah tak, mi tawh khirh lo leh inti lal lo a ni. Ani chuan: “Nangni thawk rim leh phurrit phur zawng zawngte u, ka hnênah lo kal ula, keiman ka chawlhtîr ang che u. Ka nghâwngkawl bât ula, ka hnênah zir rawh u: thuhnuairawlh leh rilrua inngaitlâwm tak ka nih hi: tichuan, in thlarau tân chawlhna in hmu ang. Ka nghâwngkawl chu a nuam a, ka phur pawh a zâng a ni,” tiin a sawi a ni. (Mt. 11:28-30) Berâm ang rilru ṭha pu a pui a pangte, a bîk takin phurrit phurte leh hnehchhiaha awmte chuan Isua mize ṭha duhawm tak leh a thuchah mi tihahdam thei takte aṭangin thlamuanna nasa tak an hmu a ni.
7, 8. Dân hnuaiah chuan, hmeichhe thi pût chuan eng nge a tih loh vang a, mahse, engtin nge Isua’n ani chu a cheibâwl?
7 Isua’n hmeichhiate a dâwr dân hi han ngaihtuah teh. Mihring chanchinah hian, mipa tam tak chuan hmeichhiate chu ṭha lo takin an cheibâwl a. Hmân lai Israel rama sakhaw hruaitute pawh chutiang chu an ni. Mahse, Isua chuan hmeichhiate chu zahawm takin a cheibâwl thung. Chu chu kum 12 lai thi pût hmeichhe pakhat a cheibâwl dânah a lang chiang a ni. Ani chuan doctor tam tak lakah “nasa takin a tuar tawh a,” ṭhat chhuah tumin a neih zawng zawng pawh a dekral zo vek a. Chuti chung pawhin, “a lo zual zâwk mah” a ni. Dân hnuaiah chuan, ani chu mi bawlhhlawh a ni a. Amah khawihtu apiang pawh an bawlhhlawh bawk a ni.—Lev. 15:19, 25.
8 Chu nu chuan Isua’n dam lote a tidam tih a lo hriat chuan, Isua hual vêltu mipui kâra kalin: “A puan chauh pawh dek ila, tihdamin ka awm mai ang,” a ti a. Isua chu a han deh chuan, a lo dam ta nghâl a ni. Isua chuan chu hmeichhiain a puan a dek tûr a ni lo tih chu a hria a. Mahse, a hau lo. Hauh ahnêkin, ngilneihna a lantîr zâwk a ni. Isua chuan kum chuti zozai a lo tawrh tawhna chu hre thiamin, ṭanpuina a mamawhzia pawh a hria a. Lainat takin: “Ka fanu, i rinna hi i dampui a ni e, thlamuang takin kal la, i natna ata chu lo dam hlen tawh ang che,” tiin a hrilh ta a ni.—Mk. 5:25-34.
9. Isua zirtîrte chuan a hnêna naupang lo kal tûrte dan an lo tum khân, ani’n engtin nge a chhân lêt?
9 Naupangte pawhin Isua bula awm chu nuam an ti a. Ṭum khat chu mite’n an fate Isua hnêna an rawn hruai khân, a zirtîrte chuan naupangte tihbuaia awm a duh loh an rin avângin an lo hau va. Mahse, chu chu Isua thlîr dân a ni lo. Pathian Lehkha Thu chuan: “Isuan chu chu a hmuhin a lungni lo êm êm a, zirtîrteho hnênah chuan, ‘Naupang tête ka hnênah han kaltîr ula, hnâr suh u; Pathian ram chu hetiang mite ta a ni si a,” a ti tih min hrilh a. Tichuan, “anmahni chu a kuangkuah a, an chungah a kut nghatin mal a sâwmsak ta” bawk a ni.—Mk. 10:13-16.
10. Isua mize târ lante chu eng anga a neih nge ni?
10 Isua’n leia a awm chhûnga a târ lan a miziate chu eng anga a neih nge ni? Mihring anga a lo pian hmain, vâna a Pa hnathawh dân kum chhiarsên loh chhûng a lo hmu reng a, a kawngte chu a lo zir tawh a ni. (Thufingte 8:22, 23, 30 chhiar rawh.) Vânah chuan, Pathian Jehova’n A thil siam zawng zawngte chunga hmangaihna nêna lû nihna a hman dân chu a hmuin, chutiang chuan a hmang ve a ni. Lû nihna hnuaiah intulût lo ta se, Isua chuan chutiang chuan a hmang ve thei lo vang. Ani chuan a Pa hnuaia intukluh chu nuam a ti a, Pathian Jehova tân pawh chutiang Fapa neih chu a nuam hle bawk a ni. He leia a awm lai khân, Isua chuan a Pa vâna mi mize ṭha duhawm takte chu sawisêl bovin a târ lang a. Pathianin vân Rama Rorêl tûra a ruat, Krista hnuaia intukluh chu kan tân chanvo ropui a va ni êm!
Krista Miziate Entawn Rawh
11. (a) Ṭan laa kan entawn tûr chu tunge ni? (b) Engvângin nge kohhrana mipate’n Isua entawn chu an tum bîk ang?
11 Kristian kohhrana mi zawng zawng, a bîk takin mipate hian Krista miziate entawn tûrin ṭan an lâk reng a ngai a. Kan hriat tawh angin, Bible chuan: “Mipa tawh phawt lû chu Krista a ni,” tiin a sawi a. Krista’n a Lû, Pathian dik chu a entawn angin, Kristian mipate chuan an lû—Krista—entawn chu an tum tlat tûr a ni. Tirhkoh Paula chuan Kristian a lo nih khân chutiang chuan a ti a. A Kristian unaute chu: “Mi zirtute ni rawh u, kei pawh Krista zirtu ka ni ang bawk hian,” tiin a fuih a ni. (1 Kor. 11:1) Tin, tirhkoh Petera chuan: “Krista pawh khân a tuarsak che u avângin hetiang ti tûrin koh in ni asin; a hniaka in zuina tûrin entawn tûr a hnutchhiah che u kha,” tiin a sawi. (1 Pet. 2:21) Krista entawn tûra fuihna chu mipate tân ngaihven bîk tûr a nih chhan dang pawh a la awm. Anni chu upa leh kohhranho rawngbâwltu la ni tûrte an nih vâng a ni. Isua’n Pathian Jehova entawn nuam a ti ang bawkin, Kristian mipate pawhin Krista leh a miziate entawn chu nuam an ti ve tûr a ni.
12, 13. Engtin nge upate chuan an enkawl berâmte chu an dâwr ang?
12 Kristian Kohhrana upate chuan Krista ang nih chu an zir ngei ngei tûr a ni a. Petera chuan upate hnênah he fuihna hi a pe a ni: “In zînga Pathian pâwlho awm chu enkawl rawh u; tih tûr a nih vâng ni lovin, Pathian thu anga châk chung zâwkin, hlêpna bawlhhlawh duh vâng ni hek lovin, rilrua duh tak zâwkin, in chante chungah intilal hek lovin, pâwlho entawnan insiam zâwkin ho rawh u,” tiin. (1 Pet. 5:1-3) Kristian upate chu mite awhbeh chîng, chaldelh chîng, hnuaichhiah chîng, a nih loh leh hrâwk chîng mi an ni tûr a ni lo. Krista entawnin, berâmte an enkawlnaah hmangaihna nei tak, mite hriatthiamna nghah, inngaitlâwm, leh ngilnei tak nih chu an tum tlat zâwk a ni.
13 Kohhrana hmahruaitute chu ṭha famkim an ni lo va, anni chuan chu chu an hre reng tûr a ni. (Rom 3:23) Chuvângin, Isua chanchin zir leh a hmangaihna entawn chu an châk hle tûr a ni a. Pathian leh Krista’n mite an dâwr dân chu an chhût ngun a, entawn an tum tlat a ngai a ni. Petera chuan: “In zain . . . thuhnuairawlhnain inthuam rawh u; Pathianin chapote a dodâl a, inngaitlâwmte erawh chu khawngaihna a pe si ṭhîn,” tiin min fuih a ni.—1 Pet. 5:5.
14. Upate chuan eng chenin nge mi dangte an chawimawi ang?
14 Pathian berâmte an dâwrnaah, kohhrana rawngbâwl tûra ruatte chuan mize ṭhate an lantîr tûr a ni. Rom 12:10 chuan: “Unaute hmangaih kawngah chuan hmangaih takin inlainat tawn ṭheuh rawh u; chawimawi kawngah chuan induhsak tawn ṭheuh ula,” tiin a sawi a. Upate leh kohhranho rawngbâwltute chuan mi dangte an chawimawi a ni. An Kristianpuite ang bawkin, hêng mipate hian ‘elrel leh inngaihhlut avânga engmah ti lovin, inngaitlâwm takin anmahni aia mi dangte ṭha zâwkah an ruat’ tûr a ni. (Phil. 2:3) Chûng hmahruaitute chuan, mi dangte chu an aia ṭha zâwk leh chungnung zâwk angin an ruat tûr a ni. Chutianga an tih chuan, Paula fuihna: “Chutichuan keini mi chakte hian mahni lâwmna zawng lovin, mi chak lote chak lohna chu kan tuarpui zâwk tûr a ni. Mahni vêngte tihsâwt nân an ṭhatna tûrin tihlâwm i tum ṭheuh ang u; Krista pawh chuan mahni lâwmna a zawng si lo,” tih chu an zâwm a ni ang.—Rom 15:1-3.
‘Nupuite Chawimawiin’
15. Engtin nge pasalte’n an nupuite an chawimawi ang?
15 Tûnah chuan Petera’n nupui nei mipate a fuihna hi i lo ngaihtuah ang u. Ani chuan: “Nangni pasalte u, in nupuite nên inkhawsak dânah bêl keh awl zâwk an nih hre thiam ula, khawngaih thilpêk nunna chanpuitu che u an nih hriain chawimawi rawh u,” tiin a ziak a ni. (1 Pet. 3:7) Mi tuemaw chawimawi tih awmzia chu ngaihlu tihna a ni a. Chuvâng chuan, i mi ngaihhluta ngaih dân te, mamawh te, leh thil duh zâwng te chu i ngaihtuahin, tih lohna tûr chhan ṭha tak a awm a nih chauh loh chuan tihpuitlingsak chu i tum ngei ang. Chutiang chu a ni, pasalin a nupui a chawimawi dân tûr chu.
16. Pathian Thuin pasalte hnênah nupuite chawimawi chungchâng eng nge a sawi?
16 Pasalte hnêna an nupuite chawimawi tûra a hrilh khân, Petera chuan: “In ṭawngṭainate dâl a ni dâwn lo nia,” tih a sawi belh a ni. (1 Pet. 3:7) Chu chuan Pathian Jehova’n mipain a nupui a cheibâwl dân a ngaih pawimawhzia a târ lang chiang hle. Mipain a nupui a chawimawi loh chuan, chu chuan a ṭawngṭaina a dâl thei a. Chu bâkah, nupuite chuan an pasalte’n ngaihlu taka an cheibâwlna chu an chhâng lêt ṭha zâwk ṭhîn a ni lâwm ni?
17. Eng ang khawpin nge pasal chuan a nupui chu a hmangaih ang?
17 Nupuite hmangaih chungchângah, Pathian Thu chuan: “Pasalte pawhin mahni taksate angin mahni nupuite chu an hmangaih tûr a ni. . . . Tuman mahni tisa an haw ngai si lo va, an châwmin an duat zâwk ṭhîn a ni. Kristan kohhranho a châwmin a duat ang hian. . . . Tupawhin mahni a inhmangaih angin mahni nupui hmangaih ṭheuh sela,” tiin a fuih a ni. (Eph. 5:28, 29, 33) Eng ang khawpin nge pasalte’n an nupuite an hmangaih ang? Paula chuan: “Pasalte u, in nupuite hmangaih rawh u, Kristian kohhranho a hmangaih a, an aia mahni a inpe ang khân,” tiin a ziak a ni. (Eph. 5:25) Ni e, Krista mi dangte tâna a thih ang chiahin, pasal chuan a nupui tân a nun pawh a pe huam tûr a ni. Kristian pasalin a nupui chu dimdâwi tak, hriat thiamna nei tak, ngaihsak tak, leh mahni hmasial lo taka a cheibâwl hian, a nupui tân a lû nihna hnuaia intukluh chu a awl sawt ṭhîn.
18. Pasalin an inneihnaa a mawhphurhnate a hlen theih nân ṭanpuitu eng nge a neih?
18 Chutianga an nupuite chawimawi tûra pasalte phût chu a lutuk em? Lutuk lo ve, Pathian Jehova chuan an tih theih tâwk bâk engmah a phût ngai dâwn si lo. Chu bâkah, Pathian Jehova betute chuan lei leh vâna thiltithei ber chu an nei bawk a ni—Pathian thlarau thianghlim chu. Isua chuan: “Nangni mi sual mahin in fate thil ṭha pêk nachâng in hriat chuan, in Pa vâna mi chuan a dîltute chu thlarau thianghlim a va pe dâwn em!,” tiin a sawi a. (Lk. 11:13) An ṭawngṭainaah, pasalte chuan an nupuite pawh tiamin, mi dangte an cheibâwlnaah Pathian Jehova’n a thlarau thianghlim hmanga ṭanpui tûrin an dîl thei a ni.—Tirhkohte 5:32 chhiar rawh.
19. A dawta thuziakah eng nge kan sawiho vang?
19 Dik takin, mipate chuan Krista hnuaia intukluh dân zir tûr leh a lû nihna entawn tûrin mawhphurhna sâng tak an nei a. Mahse, hmeichhiate, a bîk takin nupuite chungchâng hi eng nge ni ve le? A dawta thuziakah chuan Pathian Jehova ruahmannaa an chanvo dawn an thlîr dân tûr kan sawiho vang. (w10-E 05/15)
Kan Hre Chhuak Em?
• Isua mizia engte nge kan entawn ang?
• Engtin nge upate chuan berâmte an dâwr ang?
• Engtin nge pasal chuan a nupui a chawimawi ang?
[Zirlai Atâna Zawhnate]
[Phêk 14-naa milemte]
Mi dangte chawimawiin Isua entawn rawh