Pathian Jehova Thlarau Thianghlim Chu Tilungngai Suh U
Pathian Jehova Thlarau Thianghlim Chu Tilungngai Suh U
“Pathian thlarau thianghlim chu tilungngai suh u, . . . amahah chhinchhiaha in awm kha.”—EPH. 4:30.
1. Pathian Jehova chuan mi tam takte tân eng nge a tih a, anni chuan eng nge an tih ve ngai?
PATHIAN Jehova chuan he khawvêl buai taka chêng mi tam takte tân thil engemaw danglam tak mai a ti a. An tân chuan a Fapa mal neih chhun, Isua Krista kal tlanga amah hnaih theih dân kawng a siam a ni. (Joh. 6:44) Pathian hnêna inpumpêk a, chu mi mila i nun chuan an zînga mi i ni tihna a ni a. Thlarau thianghlim hminga baptisma chang tawh i nih angin, chu thlarau nêna inmila i nun chu a ngai a ni.—Mt. 28:19.
2. Eng zawhnate nge kan ngaihtuah ang?
2 Keini ‘thlarau lama thehtute’ chu mihring tharin kan inthuam a. (Gal. 6:8; Eph. 4:17-24) Tirhkoh Paula chuan Pathian thlarau thianghlim tilungngai lo tûra min fuihin, min vaukhân bawk a ni. (Ephesi 4:25-32 chhiar rawh.) Chu a fuihna thute chu i lo bih chiang ang u. Paula’n Pathian thlarau tilungngai a tih awmzia chu eng nge ni? Engtin nge Pathian Jehova hnêna inpumpêk tawh chuan chutiang thil chu a tih theih ang? Engtin nge Pathian Jehova thlarau tihlungngaihna chu kan pumpelh theih ang?
Paula Sawi Tum Chu
3. Ephesi 4:30 thu awmzia hi engtin nge i hrilhfiah ang?
3 A hmasa berin, Ephesi 4:30-a Paula thute hi lo chhinchhiah ta ila. Heti hian a ziak a ni: “Pathian thlarau thianghlim chu tilungngai suh u, tlanna ni atân chuan amahah chhinchhiaha in awm kha,” tiin. Paula chuan a unau duh takte chu thlarau lam dinhmun hlauhawma an awm a duh lo. ‘Tlanna ni atâna anmahni chhinchhiahtu’ chu Pathian Jehova thlarau a ni si a. Pathian thlarau thianghlim chu tûn thlengin hriak thih mi rinawmte tân chhinchhiahna, a nih loh leh “zakhamna” petu a la ni reng a ni. (2 Kor. 1:22) Chu chhinchhiahna chuan anni chu Pathian tâ an nihzia leh vân lam nun chang tûr an nihzia a târ lang a. Chhinchhiah zât belhkhâwm chu 1,44,000 an ni.—Thup. 7:2-4.
4. Engvângin nge Pathian thlarau tihlungngaih loh chu thil pawimawh tak a nih?
4 Thlarau tihlungngaihna chu Kristian nuna Pathian thlarau thianghlim thununna hloh pumhlûmna thlen thei kawng zawh ṭanna a ni thei a. Pathian thlarau thununna hloh theih a nihzia chu Bat-sebi a mutpui hnua Davida thusawiah a lang a ni. Davida chuan inchhîr takin Pathian Jehova hnênah: “I hnên ata hi mi paih bo suh la; i thlarau thianghlim hi mi lâksak suh ang che,” tiin a ngên a ni. (Sâm 51:11) ‘Thih thlenga rinawm’ hriak thihte chauhvin “nunna lallukhum,” vâna thih theih lohna nun chu an dawng ang. (Thup. 2:10; 1 Kor. 15:53) Lei lam beiseina nei Kristiante pawhin Pathian laka rinawmna vawng tlat tûr leh Krista tlanna inthawina an rin avânga thilpêk nunna dawng tûr chuan Pathian thlarau an mamawh ve tho a ni. (Joh. 3:36; Rom 5:8; 6:23) Chuvângin, kan vai hian Pathian Jehova thlarau thianghlim tilungngai lo tûrin kan invêng tûr a ni.
Engtin Nge Kristianin Pathian Thlarau A Tihlungngaih Theih?
5, 6. Engtin nge Kristian chuan Pathian Jehova thlarau a tihlungngaih theih?
5 Kristian inpumpêk tawh kan nih angin, Pathian thlarau tihlungngaihna chu kan pumpelh thei a. Chu chu ‘thlarauva kan awm a, kan nun reng’ chuan kan ti thei a ni; chutianga kan tih chuan tisa lam châkna dik lote kan do hneh ang a, mize ṭhate kan lantîr bawk ang. (Gal. 5:16, 25, 26) Mahse, chu chu inthlâk danglam thei lo a ni lo. Pathian thlarauva thâwk khum Thuin a dem nungchangte lama zawi zawia—kan hriat lêm loh pawha—kan tawlh bo chuan, Pathian thlarau chu engemaw chenin kan tilungngai thei a ni.
6 Thlarau thianghlim kaihhruaina kalh zâwnga thil kan tihluih zêl chuan chu thlarau chu kan tilungngai dâwn a ni; chu mi awmzia chu, chu thlarau lo Chhuahna Pathian Jehova kan tilungngai dâwn tihna a ni. Ephesi 4:25-32 thu zir chianna chuan nun dân tûr min kawhhmuh ang a, Pathian thlarau tilungngai lo tûrin min ṭanpui bawk ang.
Thlarau Tihlungngaihna Pumpelh Dân
7, 8. Thudik kan sawi chhan tûr hrilhfiah rawh.
7 Thu dik tak kan sawi tûr a ni. Ephesi 4:25-ah Paula chuan: “Dâwt sawi bânin, mahni ṭhenawm hnênah thu dik tak sawi ṭheuh rawh u; inpêng tawn ṭheuh kan ni si a,” tiin a ziak a. ‘Inpêng tawn ṭheuh kan nih’ avângin, unaute laka kawhmawh bâwl emaw, duhrêng vânga anmahni hruai sual tum emaw chu kan duh lo; chutianga tih chu an hnêna dâwt thu hrilh nên a inan reng dâwn avângin. Chutianga ti zui zêltu chuan Pathian nêna an inlaichînna a hloh dâwn a ni.—Thufingte 3:32 chhiar rawh.
8 Bumna ṭawngkam leh thiltih chuan kohhran inpumkhatna a tichhe thei a. Chuvângin, mite’n a dik lohna rêng rêng an hmuh theih loh zâwlnei rin tlâk Daniela ang chu kan ni tûr a ni. (Dan. 6:4) Tin, Paula’n vân lam beiseina nei Kristiante a fuihna thu, “Krista taksa” zînga tel zawng zawngte chu inpêng tawn ṭheuh an ni tih leh thudik sawitu Isua hnungzuitu hriak thihte nên an inpumkhat zêl tûr a ni tih chu rilruah kan vawng reng tûr a ni bawk. (Eph. 4:11-13) Lei Paradis-a chatuana nun kan beisei a nih chuan, keini pawhin thudik kan sawi tûr a ni a, chutiang chuan khawvêl puma unaute inpumkhatna chu kan thuam nghet sauh vang.
9. Engvângin nge Ephesi 4:26, 27 thu zawm hi thil pawimawh tak a nih?
9 Diabola chu thlarau lama min tihnat theihna tûr hun remchâng pe lovin kan dodâl tûr a ni. (Jak. 4:7) Thlarau thianghlim chuan Setana dodâl tûrin min ṭanpui a ni. Entîr nân, nasa taka thinurna laka invêngin kan dodâl thei a. Paula chuan: “Thinrim ula, sual erawh chu sual suh u; in thinur chu niin tlâkpui suh se; Diabola chu hmun kian hek suh u,” tiin a ziak a ni. (Eph. 4:26, 27) Chhan ṭha tak avânga kan thin a ur pawhin, rilrua ṭawngṭai vatna chuan “rilru dam” nei tûr leh Pathian thlarau tilungngai zâwnga thil ti lova insûm theihna lantîr zâwk tûrin min ṭanpui thei a. (Thuf. 17:27) Chuvângin, thinur rengin awm lo ila, Setana chu thil sual engemaw min tihtîr tûrin hmun i kian hek lo vang u. (Sâm 37:8, 9) Setana kan do theih dân kawng khat chu Isua fuihna anga inrem lohnate chinfel vat hi a ni.—Mt. 5:23, 24; 18:15-17.
10, 11. Engvângin nge thil rûk hmang leh mi rinawm lo kan nih loh vang?
10 Thil ru tûr emaw, rinawm lo tûr emawa thlêmna engpawh lakah kan tlâwm tûr a ni lo. Rûkrûk chungchângah Paula chuan: “Rûk hmang chuan ru tawh suh sela; tlachham hnênah chuan pêk tûr a neih theihna tûrin a kuta thil ṭha thawkin rim zâwk rawh se,” tiin a ziak a ni. (Eph. 4:28) Kristian inpumpêk tawhin thil a rûk chuan, ‘Pathian hming a tihliau’ dâwn a ni. (Thuf. 30:7-9) Retheih vâng pawh ni se, rûkrûk chu thiam chantîr theih a ni lo. Pathian leh ṭhenawm hmangaihtute chuan rûkrûk chu thiam chantîr a ni ngai lo tih an hria a ni.—Mk. 12:28-31.
11 Paula chuan kan tih loh tûr a sawi mai lo va, kan tih tûr pawh a sawi bawk a ni. Thlarau thianghlima kan awm a, kan nun bawk chuan, kan chhûngkua kan châwm theih nân leh ‘tlachham hnêna pêk tûr’ kan neih theih nân kan thawk rim ang. (1 Tim. 5:8) Isua leh a tirhkohte chuan mi retheite ṭanpui nân sum an dah hrang a; mahse, phatsantu Juda Iskariota chuan sum chu a ru ṭhîn a ni. (Joh. 12:4-6) Ani chu thlarau thianghlim kaihhruaiin a awm lo tih a chiang hle. Keini Pathian thlarau kaihhruaia awmte hian Paula angin “engkimah fel taka awm,” a nih loh leh rinawm taka awm kan tum a. (Heb. 13:18) Chutiang chuan Pathian Jehova thlarau thianghlim tihlungngaihna kan pumpelh a ni.
Thlarau Tihlungngaih Loh Dân Kawng Dangte
12, 13. (a) Ephesi 4:29-a târ lan angin, eng ang ṭawngkamte nge kan pumpelh ang? (b) Kan ṭawngkam chhuak chu eng ang nge a nih ang?
12 Kan ṭawngkam kan vêng ṭha tûr a ni. Paula chuan: “Thu ṭha lo rêng in kâan chhuak suh se, a ṭûlzia ang zêla siam ṭha tûrin thu ṭha apiang chhuak zâwk rawh se, a ngaithlatute tân khawngaihna a lo nih theih nân,” tiin a sawi a. (Eph. 4:29) Hetah pawh hian tirhkoh chuan kan tih loh tûr chauh ni lovin, kan tih tûr pawh a sawi tel leh a ni. Pathian thlarau thununna zârah, ‘a ngaithlatute tân khawngaihna a lo nih theih nân a ṭûlzia ang zêla siam ṭha tûr thu ṭha sawi tûra’ chêttîrin kan awm ang. Chu bâkah, kan kâ aṭangin “thu ṭha lo” rêng rêng kan chhuahtîr tûr a ni lo. Grik thu mal “ṭha lo” tia lehlin hi a nihna takah chuan thei ṭawih te, sangha uih te, a nih loh leh sa uih rimchhe takte sawi nâna hman a ni. Chutiang thilte kan ten ang chiahin, Pathian Jehova’n ṭha lova a ngaih ṭawngkamte chu ka ten tûr a ni.
13 Kan ṭawngkam chhuak chu mawi tak, ngilnei tak, leh “chia al” a ni tûr a ni a. (Kol. 3:8-10; 4:6) Mite chuan kan ṭawngkam chhuak aṭangin kan danglam bîkzia an hre thei tûr a ni. Chuvângin, mi dangte ‘siam ṭha tûra thu ṭha’ sawiin anni chu i ṭanpui ang u. Tin, “Aw LALPA, ka lungpui leh mi tlantu, ka kâa thu chhuakte leh ka thinlunga ngaihtuahnate hi i mithmuhah lawmtlâk takin awm rawh se,” titu fakna hla phuahtu rilru put hmang hi i pu ve ang u.—Sâm 19:14.
14. Ephesi 4:30, 31 sawi angin, eng thilte nge kan bânsan ngai?
14 Khâkna te, tauhna te, sawichhiatna te, leh sualna zawng zawngte chu kan bânsan tûr a ni. Pathian thlarau tilungngai lo tûra vaukhânna a pêk hnuah Paula chuan: “Khâkna te, thinurna te, tauhna te, ânna te, sawichhiatna te zawng zawng chu bânsanin awm rawh se, sualna zawng zawng nên,” tiin a ziak a. (Eph. 4:30, 31) Mihring ṭha famkim lo kan nih avângin, kan ngaihtuahna leh thiltih te thunun tûra kan thawh rim ṭheuh a ngai a. “Khâkna te, thinurna te, tauhna te” laka kan insûm loh chuan Pathian thlarau kan tilungngai dâwn a ni. Miin kan chunga thil dik lo an tihte kan chhinchhiah reng a, thinurna rilru put hmang kan lan chhuahtîr a, inrem kan duh si loh chuan thlarau thianghlim chu kan tilungngai bawk ang. Bible fuihna kan ngaihthah ṭanna mai pawh chuan, thlarau thianghlim laka sual min tihtîr thei miziate neih ṭanna a thlen theiin, a nghawng chhuah ṭha lo tak kan tawng thei a ni.
15. Mi dangte’n kan chungah thil dik lo ti ta se, engtin nge kan tih ang?
15 Mi khawngaih thei, lainatna ngah, leh ngaihdam peih kan ni tûr a ni. Paula chuan: “Inkhawngaih tawna lainatna neiin awm ula, Pathianin Kristaa a ngaidam che u ang bawkin inngaidam tawn rawh u,” tiin a ziak a. (Eph. 4:32) Mi dangte’n kan chunga thil dik lo an tih avânga kan rilru a na hle a nih pawhin, Pathian tih angin i ngaidam ang u. (Lk. 11:4) Entîr nân, kan unau tuemawin kan chungchâng thu ṭha lo tak sawi ta se la. Chu mi chinfel nân amah chu kan pan a ni. Ani chuan pawi a tih tak zetzia sawiin, ngaihdam a rawn dîl che a. Amah chu kan ngaidam a; mahse, chu aia tam chu kan tih a ngai a ni. “Phuba i la tûr a ni lo va, i chipui thlahte huatna i pai tûr a ni hek lo, nangmah i inhmangaih angin i ṭhenawm i hmangaih tûr a ni zâwk: Kei hi LALPA chu ka ni,” tiin Leviticus 19:18 chuan a sawi si a.
Invên Reng A Ngai
16. Pathian Jehova thlarau tilungngai lo tûra insiam rem kan ngaih mai theihzia târ langtu entîrna sawi rawh.
16 Mahni chauhva kan awm lai pawhin, Pathian duh loh zâwng thil engemaw ti tûra thlêm kan ni thei a. Entîr nân, unaupa chuan Kristiante ngaihthlâk atâna ṭha lo hla chu a ngaithla a ni thei. A tâwpah chuan, “bawih rinawm, fing tak” chhuah thu leh hlaa Bible fuihna thu chu a ngaihthah avângin a chhia leh ṭha hriatna chuan a tibuai a. (Mt. 24:45) Ani chuan chu mi chungchângah ṭawngṭaiin, Ephesi 4:30-a Paula thute chu a hre chhuak pawh a ni thei. Pathian thlarau tilungngai thei thil engmah tih loh tum tlatin, tûn aṭang chuan chutiang chi hla rêng rêng chu ngaihthlâk loh a tum ta tlat a ni. Pathian Jehova chuan chu unaupa târ lan rilru put hmang chu mal a sâwm dâwn a ni. Chuvângin, Pathian thlarau tihlungngaihna lakah i invêng reng ang u.
17. Inring reng leh ṭawngṭai renga kan awm loh chuan, kan chungah eng nge lo thleng thei?
17 Invêng reng leh ṭawngṭai renga kan awm loh chuan, thlarau tilungngai thei thiltih thianghlim lo emaw, dik lo emaw kan ti thei a. Thlarau thianghlim chu kan Pa vâna mi’n a duh zâwng târ lan nâna a hman avângin, chu mi kan tihlungngaih chuan amah kan tilungngai tihna a ni a—chutianga tilungngaitu nih chu kan duh ngai hauh lo vang. (Eph. 4:30) Kum zabi khatnaa Juda sakhaw hruaitute chuan Isua thilmak tihte chu Setana ṭanpuina avânga tih niin suaksual takin an hmehbel tlat a. (Marka 3:22-30 chhiar rawh.) Chûng Krista hmêlmate chuan ‘thlarau thianghlim an sawi chhiat’ avângin, ngaihdam theih loh thil sual an ti a ni. Chutiang thil sual chu i ti ve ngai lo vang u!
18. Ngaihdam theih loh thil sual kan tih leh tih loh engtin nge kan hriat theih?
18 Ngaihdam theih loh thilsual a tiha tih chu sawi loh, a hnaih pawha kan hnaih duh loh avângin, thlarau tihlungngaih a hlauhawm chungchânga tirhkoh Paula thusawi chu kan hriat reng a ngai a ni. Mahse, thil sual nasa tak lo ti ta ila, engtin nge ni ang? Kan inchhir tak zet a, upate ṭanpuina kan dawn bawk chuan Pathianin min ngaidam tawh niin leh thlarau thianghlim laka thil tisual lo niin thu tlûkna kan siam thei a ni. Pathian ṭanpuina zârah, kawng engtin emaw taka thlarau tihlungngaih lehna chu kan pumpelh thei a ni.
19, 20. (a) Kan pumpelh tûr thil ṭhenkhat chu eng nge ni? (b) Eng nge tih kan tum tlat ang?
19 Pathian chuan a thlarau thianghlim hmangin a mite zîngah hmangaihna te, hlimna te, leh inlungrualna te a awmtîr a. (Sâm 133:1-3) Chuvângin, mi dangte kan rêl chhiat vâng emaw, thlarauva ruat berâm vêngtute zahna titlahniam thei tûr zâwnga thu kan sawi vâng emawa thlarau tihlungngaihna chu kan pumpelh tûr a ni. (Tirh. 20:28; Jud. 8) Chu ai mah chuan, kohhranah inlungrualna leh inzah tawnna kan awmtîr zâwk tûr a ni. Pathian mite zîngah ho bîk tê tê kan siam tûr a ni lo. Paula chuan: “Unaute u, in zain thu thuhmun in sawi a, in zînga inṭhenna rêng a awm lohna tûrin, rilru hmun khat leh ngaihtuahna hmun khata fel taka in inzawm tlat zâwkna tûrin kan Lalpa Isua Krista hmingin ka ngên a che u,” tiin a ziak a ni.—1 Kor. 1:10.
20 Pathian Jehova chuan a thlarau tilungngai lo tûra min ṭanpui chu a duhin, a thei bawk a ni. Chuvângin, thlarau thianghlim dîla ṭawngṭaiin, chu mi tihlungngaih loh chu i tum tlat ang u. ‘Thlarau lama theh’ rengin, a kaihhruaina chu tûnah leh chatuan thleng pawhin, tih tak zetin i zawng reng ang u. (w10-E 05/15)
Engtin Nge Kan Chhân Ang?
• Pathian thlarau tilungngai tih chu eng tihna nge ni?
• Engtin nge Pathian Jehova hnêna inpumpêk tawh chuan Pathian thlarau a tihlungngaih theih?
• Eng kawngin nge thlarau thianghlim tihlungngaihna chu kan pumpelh theih?
[Zirlai Atâna Zawhnate]
[Phêk 30-naa milem]
Buaina chu chingfel vat ṭhîn rawh
[Phêk 31-naa milem]
I ṭawngkam chhuak chu khawi hian nge entîr ṭha zâwk?