Unaupate U—Thlarau Lamah Thehin, Hma La Rawh U!
Unaupate U—Thlarau Lamah Thehin, Hma La Rawh U!
“Thlarau lama thehtu . . . chuan thlarauva mi chatuana nunna a seng dâwn a ni.”—GAL. 6:8.
1, 2. Engtin nge Matthaia 9:37, 38 thu hi a thlen famkim mêk a, chu mi avâng chuan kohhranah eng mamawh nge lo awm?
TUNAH hian chatuana hriat reng tûr thilthleng chu i hmu a. Isua Krista’n hnathawh tûr a sawi kha nasa taka thawh mêk a ni. Isua chuan: “Buh seng tûr a tam hle si a, nimahsela a thawktute an tlêm; chutichuan, a buh seng tûra thawktu tûrte tîr tûrin buh Neitupa hnênah chuan ngên rawh u,” tiin a sawi. (Mt. 9:37, 38) Pathian Jehova chuan chutianga ngenna chu tûn hma zawng aia nasain a chhâng a ni. Kum 2009 rawngbâwl kum chhûng khân, khawvêl puma Jehova Thuhretute kohhran chu 2,031-in a pung a, 1,05,298 a tling tawh a ni. Chawhrualin, nî tin mi 757-in baptisma an chang ang a nih chu!
2 Chutianga pun chhohna avâng chuan zirtîr leh berâm enkawlna kawnga kohhrana hma hruaitu tûr unaupa tling takte chu mamawh zual a ni a. (Eph. 4:11-13) Kum sâwmbi kal taahte khân, Pathian Jehova chuan a berâmte mamawh ngaihsak tûrin mi tling tak takte chu a lo tung ding a, chutianga a tih zawm zêl chu kan ring tlat a ni. Mika 5:5-a chhinchhiah hrilh lâwkna chuan nî hnuhnûng chhûng hian, Pathian Jehova mite’n “berâmpu pasarih” leh “mi ropui pariat” te entîr an zînga hma hruaitu tûra tling mipa ṭhahnem tâwk tak an nei ang tih min tiam a ni.
3. ‘Thlarau lama theh’ tih awmzia hrilhfiah rawh.
3 Baptisma chang tawh Jehova Thuhretu mipa i nih chuan, rawngbâwlna chanvo chelh thei tûra hma lâk duhna nei tûrin engin nge ṭanpui thei che? A pawimawh ber chu ‘thlarau lama i theh’ hi a ni. (Gal. 6:8) Chutianga tihnaah chuan Pathian thlarau thianghlim kaihhruaina ang anga nun a tel a ni. ‘Tisa lama theh’ loh chu tum tlat la. Pathian rawngbâwlnaa inhman lehzual i duhna chu nun nuam tak neih duhna te, hun âwl neih tam duhna te, leh intihhlim duhna ang chi thilte’n a tihkiam chu phal suh. Kristian zawng zawngte chuan ‘thlarau lamah an theh’ tûr a ni a, a hnuah chuan chutianga thehtu mipate chu kohhrana chanvote chelh thei tûrin an tling thei dâwn a ni. Tûn laiah kohhranho rawngbâwltute leh upate mamawhna a nasat êm avângin, he thuziak hi Kristian mipate tâna ziah bîk a ni. Chuvângin, unaupate u, he thuziak hi ngun taka lo ngaihtuah ṭheuh tûrin kan ngên a che u.
Hnathawh Ṭha Chelh Tûrin Hma La Rawh
4, 5. (a) Baptisma chang tawh unaupate chu kohhrana eng chanvo atâna hma la tûrin nge fuih an nih? (b) Engtin nge mi chuan mawhphurhna chelh tûra hma a lâk theih?
4 Kristian mipa chu upaah a tling nghâl ngawt thei lo. “Hnathawh ṭha” a chelh theih nân hma a lâk a ngai a ni. (1 Tim. 3:1) Chutah chuan unaute mamawh tih tak zeta ngaihsakna hmanga an rawng bâwlsak a tel a. (Isaia 32:1, 2 chhiar rawh.) Miin rilru put hmang dik tak neia hma a lâk chuan, chu chu tum sânna a ni lo. Chutih ahnêkin, mahni hmasial lova mi dangte rawng bâwlsak duhna a nei a ni zâwk a ni.
5 Miin Bible-a târ chhuah tlin ngaite tlin tum hrâm hrâmin, kohhranho rawngbâwltu leh upa nih a tum thei a. (1 Tim. 3:1-10, 12, 13; Tit. 1:5-9) Pathian hnêna inpumpêk tawh mipa i nih chuan, heti hian inzâwt ang che: ‘Rawngbâwlnaah theih tâwp chhuaha inhmangin, mi dangte pawh chutianga inhmang ve tûrin ka ṭanpui em? Ka unaute ṭhatna tûr tih tak zeta ngaihtuahin, anni chu ka tichak em? Ṭha taka Bible zir ṭhîn niin mi’n min hria em? Chhânna pêk kawngah hma ka sâwn em? Upate’n mawhphurhna min pêkte chu taima takin ka hlen chhuak em?’ tiin. (2 Tim. 4:5) Chutiang zawhnate chuan ngun taka kan ngaihtuah a phu a ni.
6. Kohhrana mawhphurhnate chelh theih nâna thil mamawh ber chu eng nge ni?
6 Kohhrana mawhphurhnate chelh theih tûra tlin dân kawng dang leh chu Pathian ‘thlarau zâra mihring chhûngnung lama thiltihtheihnaa tihchaka awm’ hi a ni. (Eph. 3:14-19) Kristian kohhrana kohhranho rawngbâwltu emaw, upa emaw nihna chan chu chutiang ni tûra thlan tlin avânga chan a ni lo. Chutiang nihna chu thlarau lama hmasâwnna avâng chauhva chan theih a ni. A nih leh, engtin nge mi chuan thlarau lamah hma a sâwn theih? Kawng khat chu ‘thlarauva awm’ leh i nuna a rah lan chhuahtîr hi a ni. (Gal. 5:16, 22, 23) Mawhphurhna chelh belh theih nâna mamawh thlarau lam miziate i lantîr a, hmasâwnna tûra fuihnate i zawm chuan, ‘mi zawng zawng hnênah i sâwtna chu a lang ang.’—1 Tim. 4:15.
Mahni Inphatna Rilru Neih A Ngai
7. Mi dangte rawng bâwlsaknaah eng nge tel?
7 Mi dangte rawng bâwlsak tûr chuan thawh rim leh mahni inphatna rilru neih a ngai a. Kristian upate chu thlarau lam berâm vêngtute an nih avângin, berâmte harsatna tawh chu an ngaihtuah hle a ni. Berâmte enkawl tûra a mawhphurhnain tirhkoh Paula chunga nghawng a neih dân chu lo chhinchhiah teh. Korinth khuaa a unaute hnênah: “Mittui tam tak tla chungin thinlung hrehawm leh thlaphâng êm êma ka ziak a nih kha; chu chu tihlungngaiha in awmna tûr a ni lo va, in chunga hmangaihna nasa lehzual ka neih hi in hriat theih zâwkna tûrin a ni,” tiin a sawi. (2 Kor. 2:4) Paula chuan a rawngbâwlnaah a rilru a sêng a ni tih a lang chiang hle.
8, 9. Mipate’n mi dangte mamawh an ngaihsak dân târ langtu Bible entîrnate pe rawh.
8 Mahni inphatna rilru chu Pathian Jehova mite tâna thawk rim mipate chhinchhiahna ber a ni reng ṭhîn. Entîr nân, Nova’n a chhûngte hnênah: ‘Lawng in tuk zawhah min rawn hrilh ula, ka rawn lût ve ang,’ tia sawi tûra ngaih ruat chu harsa tak a ni a. Mosia pawhin Aigupta rama awm Israela fate hnênah: ‘Tuipui Sen-ah ka rawn hmu ang che u. In theih anga rangin va kal teh u,’ a ti lo va. Josua pawhin: ‘Jeriko kulh a chim hunah min rawn hriattîr rawh u,’ a ti hek lo. Tin, Isaia lahin mi dang kâwk chungin: ‘Tah sâwn a awm e! Ani saw tîr rawh,’ a ti lo bawk.—Is. 6:8.
9 Pathian thlarau chêttîra awm kawnga kan entawn tûr ṭha ber chu Isua Krista hi a ni a. Ani chuan mihringte Chhan Chhuaktu tûra a chanvo dawn chu inhuam takin a pawm a ni. (Joh. 3:16) Isua lantîr mahni hmasial lo hmangaihna chuan chutiang bawk mizia lantîr tûrin min chêttîr tûr a ni lâwm ni? Kum rei tak upa lo ni tawh pakhat chuan berâmte chunga a rilru put hmang chu: “Petera hnêna Isua thusawi—ka berâmte enkawl rawh, tih—chuan ka rilru a khawih hle. Kum tam tak chhûng rawng ka bâwlna aṭangin, hmangaihna ṭawngkam tlêm tê emaw, ngilneihna thiltih ho tê emaw pawhin mi dangte a tihchak theih dân chu ka hre thiam a. Berâmte enkawl chu nuam ka ti hle a ni,” tiin a sawi.—Joh. 21:16.
10. Kristian mipate chu mi dangte rawng bâwlsakna kawnga Isua entawn tûrin engin nge chêttîr thei?
10 Pathian berâmte chungah chuan kohhrana mipa inpumpêk tawhte chuan: “Keiman ka chawlhtîr ang che u,” titu Isua rilru put hmang ang lantîr chu an duh ve ngei ang. (Mt. 11:28) Pathian an rinna leh kohhran an hmangaihna chuan Kristian mipate chu he hna ṭha chelh hi nasa taka inpêk ngai emaw, hahthlâk lutuk emaw anga ngai lo va, tling thei tûra hma la zâwk tûrin a chêttîr a ni. Mahse, tuemaw chuan hma lâk duhna nei lo ta se engtin nge ni ang? Unaupa tân chuan kohhrana mite rawng bâwlsak châkna neih chu thil theih a ni em?
Mi Dangte Rawng Bâwlsak Châkna Nei Rawh
11. Engtin nge mi chuan mi dangte rawng bâwlsak châkna a neih theih?
11 Tling lo nia inhriatnain hma lâk hrehna a neihtîr che a nih chuan, thlarau thianghlim dîla i ṭawngṭai chu a âwm a ni. (Lk. 11:13) Pathian Jehova thlarau chuan chu mi chungchânga i rilru hahna engpawh chu hneh thei tûrin a ṭanpui ang che. Rawngbâwl châkna chu Pathian pêk ngei a ni; Pathian Jehova thlarau chu hma la tûra unaupa chêttîrtu leh rawngbâwl nâna a mamawh chakna petu a nih avângin. (Phil. 2:13; 4:13) Chuvângin, rawngbâwlna chanvo dawn châkna nei tûra Pathian Jehova ṭanpuina dîl chu thil inâwm tak a ni.—Sâm 25:4, 5 chhiar rawh.
12. Engtin nge mi chuan a mawhphurhna dawnte hlen chhuak tûra a mamawh finna chu a neih theih ang?
12 Kristian tuemaw chuan berâmte mamawh enkawl chu hahthlâk leh buaithlâk lutuk anga a lan vângin, hma a lâk loh phah thei a. A nih loh leh, mawhphurhnate chelh tûrin finna nei tâwk lovah a inhria pawh a ni thei. Chutiang a nih chuan, Pathian Thu leh Bible ṭanchhan thu leh hlate taima lehzuala zirna hmangin finna a nei thei a ni. Heti hian a inzâwt thei ang, ‘Pathian Thu zir nân hun ka insiamin, finna dîlin ka ṭawngṭai em?’ tiin. Zirtîr Jakoba chuan: “In zîngah tupawhin finna a tlâkchham chuan mi zawng zawng hnêna hau lo leh ui lova pe ṭhîntu Pathian chu dîl rawh se, chutichuan a hnênah pêk a ni ang,” tiin a ziak a ni. (Jak. 1:5) He thlarauva thâwk khum thu hi i ring em? Pathian chuan Solomona ṭawngṭaina chu chhângin, “finna leh hriatna thinglung” a pe a, chu chuan a rorêlnaah a chhia leh a ṭha a thliar hrantîr thei a ni. (1 Lal. 3:7-14) Solomona dinhmun chu a danglam bîk ngei mai. Mahse, Pathianin kohhrana mawhphurhna a pêk mipate chu a berâmte ṭha taka an enkawl theih nân finna a pe ang tih chu kan ring tlat thei a ni.—Thuf. 2:6.
13, 14. (a) ‘Krista hmangaihnain’ Paula nun a thunun dân sawifiah rawh. (b) Engtin nge “Krista hmangaihna” chuan min thunun ang?
13 Mi dangte rawng bâwlsak châkna nei tûra ṭanpuitu dang leh chu Pathian Jehova leh a Fapain kan tâna thil an tih zawng zawngte ngun taka ngaihtuah hi a ni. Entîr nân, 2 Korinth 5:14, 15 thu hi han ngaihtuah ta ila. (Chhiar rawh.) Engtin nge ‘Krista hmangaihna chuan min tirh luih’? Krista’n Pathian duh zâwng anga kan tâna a nun pea a lantîr hmangaihna chu a ropui êm avângin, chu mi kan hriatthiamna leh chu mi avânga kan lâwmna chuan kan thinlung nasa takin a chêttîr a ni. Krista hmangaihna chuan Paula thiltih zawng zawng chu a thunun a. Chu chuan mahni hmasial taka thil ti lo tûra a vên bâkah, Pathian leh kohhran chhûng leh pâwna mite rawng bâwlsak chu tum tlat tûrin a ṭanpui bawk a ni.
14 Krista’n mite a hmangaihna ngun taka chhûtna chuan lâwmnain min tikhat a. Chuvâng chuan, mahni hmasialna thiltumte ûm leh mahni châk zâwng ringawt phuhrua nung a, ‘tisa lama theh’ zawm zêl chu thil âwm lo tak a ni tih kan hria a ni. Chutianga nun aiin, Pathian hna min pêk dah pawimawh ber tûrin kan nun kan siamrem zâwk a. Unaute kan hmangaihna chuan an ‘rawng bâwlsak’ tûrin min chêttîr a ni. (Galatia 5:13 chhiar rawh.) Pathian Jehova chhiahhlawh inpumpêkte tâna inngaitlâwm taka rawng bâwlsaktu anga kan inngaih chuan, unaute chu zahawm takin kan cheibâwl ang a. Setana chawi lâr mi dangte chunga rilru put hmang khirh tak chu neih kan duh hauh lo vang.—Thup. 12:10
Chhûngkuaa Ṭan Lâk Ngai Thil A Ni
15, 16. Mi chu kohhranho rawngbâwltu emaw, upa emawa ruat ni tûrin a chhûngte’n eng nge an tih ve ngai?
15 Unaupa chu nupui fanau nei a nih chuan, kohhranho rawngbâwltu emaw, upa emawa a tlin leh tlin loh chungchâng thu tlûkna siam a nih hunah a chhûngkaw dinhmun chu ngaihtuah tel a ni ṭhîn. Chutianga ruat a nih leh nih loh chu a chhûngkaw thlarau lam dinhmun leh hming neihah a innghat tlat a ni. Hei hian kohhranho rawngbâwltu emaw, upa emaw anga rawngbâwl tum pasal leh pa ber chu a chhûngkaw zînga mite’n an thlâwp ṭhat a pawimawhzia a târ lang chiang hle.—1 Timothea 3:4, 5, 12 chhiar rawh.
16 Kristian chhûngkaw zînga mite an inṭawiâwm tawn dial dial hian, Pathian Jehova chu a lâwm a. (Eph. 3:14-19) Chhûngkaw pa ber tân kohhrana mawhphurhna hlen tûr leh mahni inchhûng khawsak “rêl fel thiam mi” ni tûr chuan, inbûk tâwk tak nih a ngai a ni. Chuvângin, upa emaw, kohhranho rawngbâwltu emaw chuan a chhûngkuain chawlhkâr tin Chhûngkuaa Pathian Biakna neih hun an hlâwkpui ṭheuh theih nân, a nupui leh a fate Bible a zirpui ziah chu a pawimawh hle a. Thlawhhma rawngbâwlnaah pawh a thawhpui ziah ṭhîn tûr a ni. Chutianga a hlâwkna an têl theih nân, chhûngkaw zînga mite tân pawh pa ber ṭan lâkna thlâwp chu a pawimawh hle bawk.
Rawng I Bâwl Leh Ang Em?
17, 18. (a) Unaupa chu chanvo chelh tûra a tlin tawh loh chuan, eng nge a tih ngai? (b) Tûn hmaa upa emaw, kohhranho rawngbâwltu emaw anga rawng lo bâwl tawh ṭhîn unaupa chuan eng ang rilru put hmang nge a neih ang?
17 Upa emaw, kohhranho rawngbâwltu emaw i lo ni tawh ṭhînin, tûnah chuan i ni tawh rih lo pawh a ni thei a. Pathian Jehova chu i hmangaih reng a, ani pawhin a ngaihsak reng tho che tih i chiang thei a ni. (1 Pet. 5:6, 7) Insiam remna engemaw i neih a ngai tih hrilhhriat i ni em? I dik lohna chu pawm inhuam la, Pathian ṭanpuinain insiam ṭhat tum ang che. Thinur phah nâna hmang lo tûrin fîmkhur rawh. Fing takin awm la, rilru put hmang ṭha lantîr bawk rawh. Kum rei tak chhûng upa anga rawng a bâwl hnua a chanvo chân ta unaupa pakhat chuan upa a nih leh hnuah heti hian a sawi a ni: “Inkhâwmnaa tel te, thlawhhma rawngbâwlnaa tel te, leh Bible chhiar te chu upa ka nih laia ka tih ang thova tih zawm zêl ka tum tlat a, chu thiltum chu ka hlen thei a ni. Kum hnih khat chhûnga ka chanvo neih lêt leh ka inrin avângin dawhtheih ka zir a; mahse, kum sarih dâwn lai hnuah chauh upa nihna chu ka chelh leh thei a. Chu mi hun chhûng chuan inthlahdah lova hma la zêl tûra fuihna ka dawn chuan min ṭanpui nasa hle a ni,” tiin a sawi.
18 Kan sawi tâk ang dinhmuna ding unaupa i nih chuan lunghnual mai suh. Pathian Jehova’n i rawngbâwlna leh i chhûngkua mal a sâwm dân chu ngaihtuah la. I chhûngkua chu thlarau lamah tichak la, dam lote kan la, chak lote pawh fuih ang che. Eng dang zawng aiin, Jehova Thuhretute zînga pakhat anga Pathian i chawimawi theihna leh Ram chanchin ṭha i puan chhuah theihna chanvo chu hlut hle ang che. *—Sâm 145:1, 2; Is. 43:10-12.
Inenfiah Ṭha Leh Rawh
19, 20. (a) Baptisma chang tawh mipa zawng zawngte chu engti tûra fuih nge an nih? (b) A dawta thuziakah eng nge kan sawiho vang?
19 Upate leh kohhranho rawngbâwltute mamawhna chu tûn hma zawng aiin a nasa a. Chuvângin, baptisma chang tawh unaupa zawng zawngte chuan an dinhmun inenfiah ṭha leh a, ‘Kohhranho rawngbâwltu emaw, upa emaw ka nih loh chuan, ka nih loh chhan chu eng nge ni?’ tia inzâwt tûrin kan fuih a che u. Pathian thlarau chuan he thil pawimawh tak chungchânga thlîr dân dik nei tûrin ṭanpui che u rawh se.
20 Kohhrana mi zawng zawng chuan mahni hmasial lo taka an unaute thawhrimna chu an hlâwkpui ang. Ngilnei tak leh mahni hmasial lo taka thil kan tih hian, mi dangte rawng bâwlsakna leh thlarau lama thehna aṭanga lo awm hlimna chu kan seng ṭhîn. Mahse, a dawta thuziakin a târ lan tûr angin, Pathian thlarau thianghlim chu kan tilungngai tûr a ni lo. Engtin nge kan tihlungngaih loh theih ang? (w10-E 05/15)
[Footnote]
^ par. 18 August 1, 2009, chhuak Vênnainsâng, phêk 25-27 chu en rawh.
Engtin Nge Kan Chhân Ang?
• Mika 5:5-a chhinchhiah hrilh lâwkna chuan eng nge min tiam?
• Mahni inpêkna rilru put hmanga thil telte chu hrilhfiah rawh.
• Engtin nge mi chuan mi dangte rawng bâwlsak châkna a neih theih?
• Mi chu kohhranho rawngbâwltu emaw, upa emawa ruat a nih nân eng ang takin nge a chhûngte ṭawiâwmna a pawimawh?
[Zirlai Atâna Zawhnate]
[Phêk 25-naa milemte]
Rawngbâwlnaa hna ṭha chelh tûrin engtin nge hma i lâk theih?