Kohhran Tisâwt Zêl Rawh
Kohhran Tisâwt Zêl Rawh
“Infuih tawnin, intisâwt tawn ṭheuh rawh u.”—1 THES. 5:11.
1. Kristian kohhran chhûnga awmna chuan eng malsâwmna nge a thlen a, mahse eng ang harsatnate nge la awm thei tho?
KRISTIAN kohhran chhûnga mi nih chu malsâwmna ropui tak a ni ngei mai. Pathian Jehova nêna inlaichînna ṭha i nei a. Kaihruaitu anga a Thu i rinchhanna chuan Kristiante zui loh tûr nun phung sawhkhâwk ṭha lote ata a hum che a ni. I hlawhtlin duhsaktu che ṭhian ṭha tam tak i nei a. Ni e, malsâwmna i dawnte chu a tam hle. Amaherawhchu, Kristian zawng zawng deuhthaw chuan buaina eng engemaw an hmachhawn reng a. An zînga ṭhenkhat chuan Pathian Thu rilte hre thiam tûra ṭanpuina an mamawh a ni thei a. Mi dangte erawh chu an dam lo emaw, an lungngai emaw a; a nih loh leh anni chuan thu tlûkna ṭha lo an siamte rah chhuah chu an seng mêk pawh a ni thei bawk. Tin, Pathian laka inmihran khawvêlah hian kan awm ṭheuh bawk a ni.
2. Kan unaute harsatna tawh chu engtin nge kan chhân lêt ang a, engvângin nge?
2 A tu amah hian kan Kristian unaute’n hrehawmna emaw, harsatna emaw an tuar lai hmuh chu kan duh lo. Tirhkoh Paula chuan Kristian kohhran chu ‘pêng khatin a tuar huna pêng zawng zawngin an tawrhpui ṭhin’ taksa pum khat nên a tehkhin a. (1 Kor. 12:12, 26) Chutiang dinhmunah chuan, kan unaute chu ṭanpui kan tum hrâm hrâm tûr a ni a. Bible-ah hian kohhran chhûnga mite’n mi dangte chu an harsatna tawh hmachhawn thei tûr leh hneh thei tûra an ṭanpui dân târ langtu chanchin tam tak a chuang a ni. Chûng thuziakte kan bih chian lai hian, thuziaka kan hmuh ang zulzuia ṭanpuina i pêk theih dân kawngte chu ngaihtuah ang che. Engtin nge thlarau lama i unaute ṭanpuiin, Pathian Jehova kohhran chu i tihsâwt theih?
“An Inah An Hruai A”
3, 4. Eng kawngin nge Akuila leh Priskilli te chuan Apollova chu an ṭanpui?
3 Ephesi khuaa a awm lai chuan Apollova chu chanchin ṭha hriltu ṭhahnemngai tak a ni dêr tawh a. Thuziak chuan “rilrua ṭhahnemngai tak a nih avângin Isua chanchin chu ngun takin a hril a, a zirtîr ṭhîn a, Johana baptisma thu chauh a hre si a,” a ti. Apollova’n ‘Pa leh Fapa leh thlarau thianghlim hminga’ baptisma chan thu a la hriat loh chhan chu, C.E. 33 Pentikost hma lam khân, Baptistu Johana zirtîrte emaw, Isua hnungzuitute emaw thu hrilhna a dawn vâng a ni thei ang. Apollova chuan ṭhahnemngai hle mah se, thil pawimawh ṭhenkhat hriat loh a la nei a ni. Engtin nge unaute a kawmna chuan ani chu a ṭanpui?—Tirh. 1:4, 5; 18:25; Mt. 28:19.
4 Kristian nupa, Akuila leh Priskilli chuan inkhâwmna ina huaisen taka Apollova thusawi chu an lo hria a, an inah hruaiin fel lehzualin an zirtîr a ni. (Tirhkohte 18:24-26 chhiar rawh.) Chu chu hmangaihna thiltih a ni. Akuila leh Priskilli chuan Apollova sawisêl anga an lan loh nân remhre tak leh ṭanpui duhna nên an pan ngei ang. Ani chuan Kristian kohhran din tirh lam chanchin a hre lo mai a ni a. A ṭhian thar chharte’n chûng thu pawimawhte chipchiar taka an hrilhfiah avângin, Apollova chu an chungah a lâwm ngei ang. Chu thu a han hriat belh tâkah chuan, Apollova chuan Akaia rama awm a unaute chu ‘nasa taka ṭanpuiin,’ thu hrilhna thiltithei tak a nei ta a ni.—Tirh. 18:27, 28.
5. Lalram thuchhuahtu tam tak chuan eng ang ṭanpuina duhawm tak nge an pêk a, chu chuan eng nge a rah chhuah?
5 Tûn lai Kristian kohhran chhûnga mi tam takte chu Bible hre thiam tûra anmahni ṭanpuitute chungah an lâwm hle a. Zirtîrtu leh zirlaite inkârah inṭhianna nghet tam tak a piang a ni. A tlângpui thuin, mi dangte thutak hre thiam tûra zirtîr tûr chuan thla engemaw zât chhûng hunbi neia inkawmna neih a ngai a. Mahse, Lalram thuchhuahtute chuan thihna leh nunna inkâr thil a ni tih an hriat thiam avângin chutianga tih chu an inhuam a ni. (Joh. 17:3) Mite’n thutak an hriat thiam a, an nunpui bawk a, an nun chu Pathian Jehova duh zâwng tih nâna an hmang hmuh chu a va hlimawm êm!
“Ani Chu An Fak Ṭhîn”
6, 7. (a) Engvângin nge Paula chuan Timothea chu zinpuia a sâwm? (b) Timothea chu eng ang khawpa hmasâwn tûra ṭanpui nge a nih?
6 Tirhkoh Paula leh Sila’n an missionary zin ṭum hnihnaa Lustra khua an va tlawh chuan Timothea tih hming pu ṭhalai pakhat, kum sawmhnih la tling lo deuh emaw, pêl âwrh chauh emaw chu an va hmu a. “Lustra leh Ikonion khuaa unau awmte chuan ani chu an fak ṭhîn a.” Timothea nu, Euniki leh a pi Loisii te chu Kristian inpumpêk tawh ni mah se, a pa erawh chu ringtu a ni ve lo. (2 Tim. 1:5) Paula chuan kum hnih vêl kal taa chu mi hmun a tlawh hmasak ṭum khân, Timothea te chhûngkua hi a lo hmêlhriat tawh pawh a ni thei a. Mahse, tûn ṭumah chuan Timothea chu tlangvâl danglam bîk tak nia a lan avângin a ngaihven ta riau mai a ni. Chuvângin, tualchhûng upahote phalnain, Timothea chu missionary rawngbâwlnaa Paula ṭanpuitu a lo ni ta a ni.—Tirhkohte 16:1-3 chhiar rawh.
7 Timothea chuan a aia upa zâwk Paula hnên aṭangin zir tûr tam tak a nei a. A hnuah chuan Paula’n a aiawha kohhrante tlawh tûra a tirh theih khawpin a zir ṭha a ni. Paula nêna an inkawm hun kum 15 vêl chhûngin ṭhalai thiltawn nei lo leh zakzum tak chuan kohhran upa ṭha tak ni thei tûr khawpin hma a sâwn a ni.—Phil. 2:19-22; 1 Tim. 1:3.
8, 9. Kohhrana mite chuan ṭhalaite fuih tûrin eng nge an tih theih? Entîrna pe rawh.
8 Tûn lai Kristian kohhranah pawh hian nasa taka hmasâwn tûra beiseiawm ṭhalai a hmei a pa tam tak an awm a. Thlarau lama puitling ṭhian ṭhate’n an fuih a, an enkawl chhoh chuan, chûng ṭhalaite chuan Pathian Jehova mite zînga mawhphurhna lian zâwk chelh thei tûrin ṭan an la thei a ni. I awmna kohhran chhûnga mite han thlîr kual teh! Timothea anga inpe thei tûr ṭhalai tuemaw i hmu em? I ṭanpuina leh fuihna zârah anni chu pioneerte, Bethel-a rawngbâwltute, missionary-te, a nih loh leh bial kantute an lo ni mai thei asin. Chutiang thiltumte thleng thei tûra ṭanpui tûrin eng nge i tih theih?
9 Bethel-a kum 20 chhûng rawngbâwl tawh Martin-a chu kum 30 kal taa in tin an kal dun laia bial kantuin a chunga ngaihsakna a lantîr dân a hriat chhuah apiangin a lâwm hle ṭhîn a. Ani chuan tûn hmaa Bethel-a a rawngbâwl dân chanchin phûr takin a hrilh a ni. Martin-a chu chutiang bawka Pathian Jehova inawpna pâwl atâna inpe ve tûrin a fuih a. Martin-a chuan chu an inbiakna a theihnghilh ngai loh tûrin a hnua a duhthlanna siam chu nasa takin a thunun tih a hria a ni. Theocratic thiltumte chungchâng i sawipuina chuan ṭhalaite chungah nghawng ṭha tak a nei thei asin.
“Mi Beidawngte Chu Thlamuan Ula”
10. Epaphrodita chu engtin nge a awm a, engvângin nge?
10 Epaphrodita chuan Philippi aṭanga Rom khaw zinkawng hahthlâk taka zinin, rinna avânga Rom khuaa tâng tirhkoh Paula chu a va tlawh vang vang a. Ani hi Philippi khuaa Kristiante’n palai anga an tirh chhuah a ni. Tirhkoh Paula tâna an thilpêkte a kensak mai a ni lo; dinhmun khirh taka a din laia a theih ang anga Paula ṭanpui tûra châm rih pawh a tum a ni. Amaherawhchu, Rom khuaa a awm lai chuan Epaphrodita chu ‘thi chhâwngin’ a na ta tlat mai a. A thiltuma hlawhchham nia a inhriat avângin, rilru beidawng ngawih ngawihin a awm a ni.—Phil. 2:25-27.
11. (a) Kohhrana mi ṭhenkhat rilru beidawng ngawih ngawiha an awm hian engvângin nge mak kan tih loh vang? (b) Epaphrodita chungchângah Paula’n eng rawtna nge a siam?
11 Nêksâwrna chi hrang hrang avângin tûn laiah mite chu rilru beidawng ngawih ngawihin an awm a. World Health Organization chhût dân chuan mi 5 zêla 1 chu an dam chhûngin vawikhat tal rilru beidawng ngawih ngawihin an awm a ni. Pathian Jehova mite pawh chutiang laka hum an ni bîk lo. Chhûngkaw châwmna, hrisêl lohna, hlawhchham avânga lunghnualna, a nih loh leh thil dang dangte avânga harsatnate chuan rilru beidawnna a thlen thei a. Philippi khuaa Kristiante chuan Epaphrodita ṭanpui tûrin eng nge an tih theih? Paula chuan heti hian a ziak a ni: “Ani hi hlim takin Lalpaah chuan lo lâwm ulangin, hetiang mi hi ngaihlu rawh u; in mi chhawmdâwlna tlin bâk chu chhunzawm nân thih dâwn lova beiin, Krista hnathawhna avângin thi chhâwngin a lo awm ta si a,” tiin.—Phil. 2:29, 30.
12. Rilru beidawng ngawih ngawihte chu engin nge thlamuan thei?
12 Keini pawhin lunghnual leh rilru beidawng ngawih ngawiha awm unaute chu kan fuih tûr a ni. Pathian Jehova rawng an bâwlna chungchângah anmahni fakna thu sawi tûr kan hre ngei ang. Kristian lo ni tûr emaw, hunbi kima rawngbâwltu lo ni tûr emawin an nunah inthlâkthlengna nasa tak an lo nei pawh a ni thei. Chutianga ṭan an lâkna chu kan hlutin, Pathian Jehova pawhin a hlut ve ngei a ni tih kan hriattîr thei a. Mi rinawm ṭhenkhat chuan an kum upat vâng emaw, an hrisêl loh vâng emawin tûn hma angin rawngbâwl thei tawh lo mah se, kum tam tak chhûng an lo bâwl tawh avângin kan zah an phu tho tho a ni. Eng pawh ni se, Pathian Jehova’n a mi rinawm zawng zawngte hnêna a thurâwn chu hei hi a ni: “Mi beidawngte chu thlamuan ula, mi chak lote ṭanpui ula, mi zawng zawng dawhthei rawh u,” tih hi.—1 Thes. 5:14, C.L. Re-edited.
‘Ngaidamin Thlamuan Rawh U’
13, 14. (a) Korinth kohhran chuan thil sual titu chu engtin nge a tih a, engvângin nge? (b) Hnawh chhuahna chuan eng nge a rah chhuah?
13 Kum zabi khatnaa Korinth kohhranah chuan inngaih hmang inchhîr duh lo mipa tuemaw a awm a. A nungchang chuan kohhran thianghlimna a tihchhiat a hlauhawmin, a thiltih chu ring lo mite tân pawh a râpthlâk hle a ni. Chuvângin, Paula chuan chu mi chu kohhran ata hnawt chhuak tûrin a hrilh a ni.—1 Kor. 5:1, 7, 11-13.
14 Chutianga zilhna pêk chuan rah ṭha a chhuah a. Kohhran thianghlimna a humhim bâkah, thil sual titu chu a inhriat chhuahtîrin, tih tak zeta inchhîrna a neihtîr bawk a ni. Sim hming pu tlâka a nun avângin, Paula chuan chu kohhran hnêna a lehkha thawn pahnihnaah, chu pa chu la lût leh tûrin a hriattîr a. Mahse, kohhrana lâk luh mai chu a tâwk lo. Paula chuan kohhrana mite hnênah chuan “[thil sualti inlamlêta chu] ngaidamin in thlamuan zâwk tûr a ni, chutilochuan eng emaw tiin mi chutiang chu a lungngaih lutuknain a lem zo dah ang e,” tiin a hrilh a ni.—2 Korinth 2:5-8 chhiar rawh.
15. Mi sual inlamlêt kohhrana lâk luh leh chu engtin nge kan thlîr ang?
15 He thu aṭang hian eng nge kan zir? Mi hnawh chhuah an ngaih hian kan lungngai ṭhîn a. Anni chuan Pathian hming an tichhiain, kohhran hming an tihliau bawk a ni. Tin, kan chungah pawh a mi mal takin thil sual an ti a ni thei bawk. Amaherawhchu, Pathian Jehova kaihhruaina anga an chungchâng ngaihtuah tûra ruat upate’n thil sual titu inlamlêta chu kohhran chhûnga an lâk luh leh hian, chu chuan Pathianin a ngaihdam tawhzia a târ lang a ni. (Mt. 18:17-20) He mi kawngah hian Pathian Jehova chu kan entawn ve tûr a ni lâwm ni? Dik takin, thil sual titu inlamlêt ta chu kan ngaihdam duh tlat loh chuan, Pathian Jehova do ang tluk kan ni thei ang. Pathian kohhranho zînga remna leh inpumkhatna awmtîr a, Pathian Jehova duhsakna dawng tûr chuan, mi sual inlamlêt kohhrana lâk luh leh chungah ‘kan hmangaihna kan tinghet,’ a nih loh leh kan tiam nawn zâwk tûr a ni lâwm ni?—Mt. 6:14, 15; Lk. 15:7.
“Ani Chu . . . Ka Tân A Ṭangkai”
16. Engvângin nge Paula chu Marka chungah a lungnih loh?
16 Min tilungni lotute chungah huatna rilru kan pai reng tûr a ni lo tih Bible thuziak dang chuan a târ lang a. Entîr nân, Johana Marka chuan tirhkoh Paula chu nasa takin a tilungni lo va. Engtin nge a tihlungnih loh? Paula leh Barnaba missionary zin hmasak ṭum khân, Marka chuan anmahni ṭanpui tûrin a zui a. Mahse, zinkawng laklawh lai takah târ lan si loh chhan engemaw avângin Johana Marka chuan a hawsan daih a ni. Paula chu a lungnih loh êm avângin, missionary zin ṭum hnihna tûra ruahmanna a siam lai khân Marka hruai leh hruai loh chungchângah Barnaba nên an thu a inhmu ta lo va. An zin hmasak ṭuma a hawsan avângin, Paula chuan Marka chu a hruai duh lo a ni.—Tirhkohte 13:1-5, 13; 15:37, 38 chhiar rawh.
17, 18. Paula leh Marka chuan an inkâra buaina chu an chingfel tin engtin nge kan hriat theih a, chuta ṭang chuan eng nge kan zir theih?
17 Paula’n a hruai duh lo chu Marka chuan lunghnual phah nân a hmang lo niin a lang; Barnaba rualin hmun dangah missionary rawngbâwlna a chhunzawm avângin. (Tirh. 15:39) A rinawmzia leh a rin tlâkzia chu kum engemaw zât hnua Paula lehkha thawnah a lang a ni. Rom khuaa tâng Paula chuan Timothea chu lehkha thawnin a chah a. A lehkha thawnah: “Marka kha sâwm la, han hruai ve rawh, ani chu rawngbâwl lamah ka tân a ṭangkai si a,” tiin a sawi tel a ni. (2 Tim. 4:11) Ni e, Marka chuan Paula beisei ang takin hma a sâwn tawh a ni.
18 He mi chungchângah hian zir tûr kan nei a. Marka chuan missionary-te neih ngei tûr mize ṭha a nei a ni. Atîr lama Paula hnâwlna chu tlûk phah nân a hmang lo. Paula nên chuan thlarau lama puitling tak an ni ve ve a, an inkârah inhuatna a awm reng lo. Awm reng ahnêkin, Paula chuan a hnuah Marka chu ṭanpuitu ṭangkai tak a ni tih a pawm a ni. Chuvângin unaute inkâra buaina leh harsatnate a ven tawh hnu chuan, tih tûr dik tak chu thlarau lama hma sâwn tûra mi dangte ṭanpui zêl hi a ni a. Mi dangte ṭhatna hmuh thiamna chuan kohhran a tisâwt a ni.
Kohhran leh Nangmah
19. Kristian kohhran chhûnga mi tinte hian eng ang ṭanpuina nge an inpêk tawn theih?
19 Hêng “hun khirh takte” kârah hian kohhrana i unaute ṭanpuina i mamawh a, anni pawhin i ṭanpuina an mamawh ve bawk a. (2 Tim. 3:1) Kristian tam tak chuan an dinhmunte hlawhtling taka hmachhawn thei tûra an tih tûr chu an hre ṭhîn lo va; mahse, Pathian Jehova chuan a hria a ni. Tin, ani chuan nang ngei pawh tiamin kohhran chhûnga mi tupawh chu mi dangte kawng dik kawhhmuhtu atân a hmang thei a ni. (Is. 30:20, 21; 32:1, 2) Chuvângin, Paula fuihna thu hi i nunpui ṭheuh ang u! “Infuih tawnin, intisâwt tawn ṭheuh rawh u, in tih rêng ṭhîn ang hian,” tih hi.—1 Thes. 5:11. (w10-E 06/15)
Engtin Nge Kan Chhân Ang?
• Engvângin nge Kristian kohhranah mi dangte tihsâwt a ngaih?
• Eng ang harsatnaahte nge mi dangte i ṭanpui theih?
• Engvângin nge kohhrana mi dangte ṭanpuina kan mamawh?
[Zirlai Atâna Zawhnate]
[Phêk 15-naa milem]
Kristian unau tuemawin harsatna a tawh hunah ṭanpuina kan pe thei
[Phêk 16-naa milem]
Tûn lai Kristian kohhranah hian nasa taka hmasâwn tûra beiseiawm ṭhalai a hmei a pa tam tak an awm