Pathian Mite Zîngah Himna Hmu Ang Che
Pathian Mite Zîngah Himna Hmu Ang Che
“Inkhâwmna ropui takah chuan lâwmthu ka hrilh . . . ang che.”—SAM 35:18.
1-3. (a) Engin nge Kristian ṭhenkhat chu thlarau lam dinhmun hlauhawm taka awmtîr thei? (b) Pathian mite chuan khawiah nge vênhimna an hmuh theih?
CHAWLH hmanga an kalnaah, Joe-a leh a nupui chuan sangha chi hrang mawi tak takte leh tuipui mawnga lung mawi tak takte chu tui chunga lâng reng chunga en theihna tûra siam thâwkna dâwt nei hmanraw hmang chuan an en a. An hnuaia lung mawite en zêl tûrin tuipui thûk lam chu an pan telh telh a. Tuipui mawng hmuh theih loh khawpa thûk lam an va thlen chuan, Joe-a nupui chuan, “Kan kal thui ta mah mahin ka hria,” a ti a. Mahse, Joe-a chuan: “Lungngai mah ta che, ka thiltih chu ka hria alâwm,” tiin a chhâng a. Chu mi hnu lawkah chuan, ‘Sangha zawng zawngte kha khaw nge maw an awm tâk le?’ a ti rilru a. Sangha an bo duak chhan a han hriat chuan a râp ngei mai. Tui thûk tak lam aṭangin shark sangha hlauhawm tak chuan amah a rawn pan ta. Tih theih engmah a nei ta lo. A rawn seh pha ṭêp tawh tihah, sangha chu lêt thutin, a kal bo ta hlauh a ni.
2 Kristian pawh chuan Setana khawvêla mi hîp thei tak intihhlimna te, hnathawh te, leh thil neih ang chi tea nasa taka a inhman chuan, tuipui thûk lam pan telh telh ang maiin dinhmun hlauhawm lam chu a hriat lohvin a pan hnai telh telh thei a ni. Kristian upa Joe-a chuan: “Ka thiltawn hian ṭhian kawm chungchâng min ngaihtuahtîr a. Hmun him leh nuam lai—kohhran chhûngah—chauh hleuh rawh, a nih loh leh awm rawh, tih hi!” tiin a sawi. Thlarau lama inlâk hranna leh chhiatna thlen thei tui thûk lamah chuan hleuh suh ang che. Chutianga tui thûk lam i va thleng palh hlauh a nih chuan, ‘a him’ lamah kîr leh vat ang che. Chutilochuan, thlarau lam dinhmun hlauhawm takah i ding hlauh dah ang e.
3 Tûn lai khawvêl hi Kristiante tân hmun hlauhawm tak a ni a. (2 Tim. 3:1-5) Setana chuan hun a nei tlêm tawh hle tih a hria a, harhfîm taka awm lote ei tumin a vâk vêl reng a ni. (1 Pet. 5:8; Thup. 12:12, 17) Amaherawhchu, vênghimtu nei lo kan ni lo. Pathian Jehova chuan a mite chu thlarau lama râl tlânna hmun—Kristian kohhran—a pe a ni.
4, 5. Mi tam takin an nakin hun tûr chungchâng chu engtin nge an ngaih a, engvângin nge?
4 Tisa lam a ni emaw, rilru lam a ni emaw khawvêl pêk theih himna chu a beitham hle a. Mi tam tak chu dân bawhchhiatna te, tharum thawhna te, thil man sân lutukna te, leh chhehvêl boruak chhe takte avângin tisa lamah him lo niin an inhria a ni. Kan za hian kum upatna leh hrisêlna ṭhat loh avânga buaina chu kan hmachhawn ṭheuh va. Tin, hnathawh, in leh lo, sum leh pai, leh hrisêlna ṭha thawkhat nei mi dangte pawhin eng chen nge an neih zêl dâwn tih an lungkham bawk.
5 Mi tam tak chuan tisa lam ang bawkin rilru lamah pawh himna an nei thei lo va. Lungchhiatthlâk takin, inneihna leh chhûngkaw dinna aṭanga lungawina leh remna neih inbeisei mi tam tak chuan an beisei ang an thleng thei lo. Thlarau lam himna chungchângah pawh, biak ina inkhâwm ṭhîn mi tam takte chu mangang leh a ngaihna hre lovin an awm a, kaihhruaina an dawnte hlutna chu an ringhlel a. An sakhaw hruaitute nungchang ṭhat lohna leh Bible thu mil lo an zirtîrnate an ngaihtuah hian chutiang chuan an awm leh zual a ni. Chuvângin, mi tam tak chuan science lam leh mi fel leh ṭhate chunga beiseina nghat lo thei lo niin an inhria a ni. Kan chhehvêla mi tam takin him lo hle nia inhriatna an nei emaw, an nakin hun tûr an ngaihtuah tak tak duh lo emaw pawh hi a mak hran lo ve.
6, 7. (a) Pathian rawngbâwltu leh bâwl lotute thil thlîr dân inan loh chhan chu eng nge ni? (b) Eng nge kan ngaihtuah dâwn?
6 Kristian kohhran dika awmte leh awm lote thil thlîr dân chu a va inthlau tak êm! Keini Jehova mite hian mi dangte harsatna tawh ang tho tâwk ve ṭheuh mah ila, kan chhân lêt dân erawh a dang daih a ni. (Isaia 65:13, 14; Malakia 3:18 chhiar rawh.) Engvângin nge? Mihringte dinhmun chungchâng hrilhfiahna lungawithlâk tak Bible-a kan hmuh avâng leh buaina leh harsatna chingfel thei tûra thuam kan nih vâng a ni. Chuvângin, nakin hun tûr chu a lutukin kan lungkham lo. Pathian Jehova betu kan nihna chuan Pathian Thu nêna inrem lo ngaihtuah dân te, nungchang bawlhhlawhna te, leh chûngte rah chhuah ṭha lo te lakah min vênghim a. Kristian kohhran dik chhûnga mite chuan mi dangte hriat loh thlamuanna an nei a ni.—Is. 48:17, 18; Phil. 4:6, 7.
7 Entîrna ṭhenkhat chuan Pathian Jehova rawngbâwltute chauhvin an neih theih himna ngaihtuah tûrin min ṭanpui thei ang. Chûng entîrnate chuan kan ngaihtuahna leh thiltih ṭhinte bih chiang tûrin min chêttîr thei a; tin, min vênghim tûra pêk Pathian zilhna thute kan nunpui lehzual a ngaih leh ngaih loh pawh min ngaihtuahtîr thei bawk.—Is. 30:21.
“Ka Rap Pelh Ṭhelh Ṭhelh”
8. Pathian Jehova chhiahhlawhte chuan eng nge an tih reng ngai?
8 Mihring chanchin inṭan tirh lam aṭangin, Pathian Jehova rawng bâwl leh a thuâwih thlangtute chuan a bâwl lotute kawm loh chu an tum tlat ṭhîn. Pathian Jehova ngei pawhin amah betute leh Setana hnungzuitute inkârah inhmêlmâkna a awm dâwn tih a târ lang a ni. (Gen. 3:15) Pathian mite chuan Pathian pêk thu bulte an vawn tlat avângin an chhehvêla awm mite tih dân an zâwm ve lo. (Joh. 17:15, 16; 1 Joh. 2:15-17) Chutianga awm chu thil awlsam a ni reng ṭhîn lo. Pathian Jehova chhiahhlawh zînga mi ṭhenkhatte ngei pawhin mahni inpêkna nun a finthlâk tih rinhlelh châng an nei a ni.
9. Sâm 73-na ziaktu harsatna tawh chu sawifiah rawh.
9 Thu tlûkna ṭha a siam leh siam loh chungchâng ngaihtuahtu Pathian Jehova chhiahhlawh pakhat chu, Asapha thlah ni âwm taka lang Sâm 73-na ziaktu hi a ni. Fakna hla phuahtu chuan mi suaksualte an hlawhtlin a, an hlim a, an hmuingîl hle laia, Pathian rawngbâwl ṭâng ṭângtu ṭhenkhatin fiahna leh harsatna an tawh si chhan a zâwt a ni.—Sâm 73:1-13 chhiar rawh.
10. Engvângin nge fakna hla phuahtu siam zawhnate chu i tân a pawimawh?
10 Sâm ziaktu siam zawhna ang hi i inzâwt ve tawh ngai em? I inzâwt tawh ngai a nih chuan, i inthiam loh lutuk emaw, rinna hloh ta anga i inngaih emaw a ngai lo. A nihna takah chuan, Pathian Jehova’n Bible ziak tûra a hman mi ṭhenkhat pawh tiamin, a chhiahhlawh tam takte chuan chutiang zawhna chu an lo inzâwt tawh ṭhîn a ni. (Job. 21:7-13; Sâm 37:1; Jer. 12:1; Hab. 1:1-4, 13) Dik takin, Pathian Jehova rawngbâwl duhtu zawng zawngte chuan: Pathian rawngbâwl leh a thu zawm hi thil ṭha ber a ni em? tih zawhna chu ngun taka ngaihtuahin, a chhânna pawh an pawm tûr a ni. Chu zawhna chu Eden huana Setana chawh chhuah thu buai nên a inkûngkaih a. Chu chu lei leh vâna Pathian lal chungnunna thu buaia a pawimawh ber chu a ni. (Gen. 3:4, 5) Chuvângin, fakna hla phuahtu siam zawhna chu kan ngaihtuah ṭheuh tûr a ni. Hmuingîl taka lang mi suaksual leh uangthuang takte chu kan awt tûr a ni em? Pathian Jehova rawngbâwlna chu “rap pelh,” a nih loh leh kalsanin, anni chu kan entawn mai tûr em ni ang? Chu tak chu a ni, Setana’n kan tih atâna a duh chu.
11, 12. (a) Engtin nge fakna hla phuahtu chuan rinhlelhna a neih chu a paih bo va, chu chuan eng nge min zirtîr? (b) Engin nge fakna hla phuahtu thu tlûkna siam ang siam ve tûra ṭanpui che?
11 Engin nge fakna hla phuahtu chu a rinhlelhna la kiang tûra ṭanpui? Felna kawng a pênsan lek lek tih pawm mah se, ‘Pathian hmun thianghlima’ a luh hnu—Pathian biak bûk, a nih loh leh biak ina thlarau lam mite nêna an inkawm a, Pathian thiltum a ngaihtuah hnu chuan a thil thlîr dân chu a inthlâk ta a. Thil sual titute dawn tûr hremna ṭâwmpui chu a duh lo a ni tih a inhre chiang ta a ni. An nun kawng leh an duhthlannate chuan anni chu “hmun nâl takahte” a dah tih a hmu thiam ta a. Pathian Jehova kalsantu nungchang bawlhhlawh taka nungte chu “thil râpthlâk taktea tihboral” an ni thuai ang a, Pathian Jehova rawngbâwltute erawh chu ani’n a chhawmdâwl ang. (Sâm 73:16-19, 27, 28 chhiar rawh.) He thu a dikzia hi i lo hmu tawh ngei ang a. Mahni tân maia nung a, Pathian dânte ngaihthah chu mi tam tak tân duhawm hlein lang mah se, a sawhkhâwk ṭha lo takte chu pumpelh theih rual a ni lo.—Gal. 6:7-9.
12 Fakna hla phuahtu thil tawn aṭangin eng dang nge kan zir belh theih? Ani chuan Pathian mite zîngah himna leh finna a hmu a. Pathian Jehova biakna hmuna a va kal chuan fîm tak leh fiah takin thil a ngaihtuah thei ta a ni. Chutiang bawkin, tûn laiah pawh kohhran inkhâwmna hmunah hian zilhna petu fing takte leh thlarau lam chaw ṭha takte kan hmu thei a. Chuvâng chuan a ni, Pathian Jehova’n a chhiahhlawhte chu Kristian inkhâwmnaa tel tûra a fuih ni. Chu mi hmunah chuan fuihnate an dawng ang a, fing taka thil ti tûra chawhthawhin an awm bawk ang.—Is. 32:1, 2; Heb. 10:24, 25.
Fing Takin Ṭhian Kawm Tûr Thlang Rawh
13-15. (a) Dinaii chuan eng thil nge a tawn a, chu chuan eng nge a târ lan? (b) Engvângin nge Kristian unaute kawm chu invênhimna a nih?
13 Jakoba fanu Dinaii chu khawvêl mite kawmnain buaina namai lo a thlen thei tih entîrna pakhat a ni a. Ani chuan an tualchhûng Kanaan nulate a kâwm ṭhîn tih Genesis chuan a târ lang a ni. Kanaan mite chuan Pathian Jehova betute neih ang nungchang tehna sâng an nei lo va. Neih ahnêkin, a hnuah Kanaan mite nun kawng chuan an ram chu milem biakna te, nungchang bawlhhlawhna te, mipat hmeichhiatna hmanga pathian biakna te, leh tharum thawhna tein a tikhat zâwk mah tih thil hlui lai chhuak mite thil hmuh chuan a târ lang a ni. (Ex. 23:23; Lev. 18:2-25; Deut. 18:9-12) Anmahni a kawm avânga Dinaii chunga thilthleng kha ngaihtuah chhuak ang che.
14 Tualchhûng tlangvâl Sekema, “a pa chhûngte zawng zawng zînga mite zah ber” nia sawi chuan Dinaii chu “a man a, a mutpui a, a tlâwm ta a.” (Gen. 34:1, 2, 19) A va lungchhiatthlâk tak êm! Dinaii chuan chutiang thil chu a chungah a thleng ang tih a ngaihtuah phâk i ring em? Ani chuan mi hlauhawm anga a ngaih loh tualchhûng ṭhalaite nêna inṭhian ṭhat a tum mai pawh a ni thei. Mahse, Dinaii chu bumin a awm chiang hle a ni.
15 He chanchin hian eng nge min zirtîr? A rah ṭha lo seng si lovin ring lotute kawm chu thil theih a ni lo, tih hi. Pathian Lehkha Thu chuan “ṭhian sualin nungchang ṭha a tikhawlo ṭhîn” a ti. (1 Kor. 15:33) Kawng lehlamah chuan i rinna te, i nungchang tehna sâng te, leh Pathian Jehova i hmangaihna ṭâwmpuitute kawm chu invênhimna a ni. Chutiang ṭhian ṭhate chuan fing taka thil ti tûrin an fuih ang che.—Thuf. 13:20.
“Tlenfai In Ni Tawh”
16. Tirhkoh Paula chuan Korinth kohhrana mi ṭhenkhatte chanchin eng nge a sawi?
16 Kristian kohhran chuan mi tam takte chu an thil chîn bawlhhlawh takte bânsan tûrin a ṭanpui a. Tirhkoh Paula’n Korinth khuaa Kristiante hnêna a lehkha thawn hmasa zâwk a ziah lai khân, Pathian tehnate mila nung tûra an inthlâkthlengna chu a fak a ni. Ṭhenkhat chu inngaih hmang, milem betu, uirê chîng, mawngkawhur, rûk hmang, zu ruih hmang, leh thil dang dangte ti ṭhîn an ni a. “Nimahsela, . . . tlenfai in ni tawh,” tiin Paula chuan a hrilh a ni.—1 Korinth 6:9-11 chhiar rawh.
17. Engtin nge Bible tehnate mila nunna chuan mi tam takte nun a tihdanglam?
17 Rinna nei lo mite chuan kaihruaitu thu bul ṭha an nei ṭhîn lo va. An duh ang angin an nung, a nih loh leh hmân lai Korinth khuaa mi ṭhenkhat ringtu an nih hmaa an awm dân ang khân, an chhehvêla mite nungchang chu an chhawm ve mai ṭhîn a ni. (Eph. 4:14) Mahse, Pathian Thu leh a thiltumte hriatna dik chuan a nunpuitute nun siam ṭha tûrin thiltihtheihna a nei a ni. (Kol. 3:5-10; Heb. 4:12) Tûn lai Kristian kohhran chhûnga mi tam takte chuan Pathian Jehova tehna felte an zir a, an nunpui hma chuan insûm miah lova an lo nun tawh ṭhinzia an hrilh thei ang che u. Mahse, chutih lai pawh chuan hlimna leh lungâwina an nei chuang lo. Pathian mite nêna an inkawm a, Bible tehnate mila an nun hnuah chauh thlamuanna an hmu a ni.
18. Ṭhalai pakhat chuan eng thil nge a tawn a, chu chuan eng nge a finfiah?
18 Chu mi nêna inkalh takin, tûn hmaa Kristian kohhran lo chhuahsan tate chu an inchhîr ngawih ngawih a. Tanya-i tia kan koh mai unaunu pakhat chuan “thutaka sei lian anga sawi theih” a nih thu leh kum 16 mi a niha kohhran kalsan a, “khawvêl lam thila a tlân” tâk thu a sawi a. A sawhkhâwk ṭha lo a tawhte zîngah chuan sâwn pai leh nau tihtlâk a tel a ni. Tûnah chuan heti hian a sawi thei tawh a ni: “Kum thum kohhran ka kalsan chhûnga rilru lama hliampui ka tawrh chu tihdam theih a ni ngai tawh lo vang. Ka theihnghilh ngai miah loh chu, ka fa la piang lo ka tihlum hi a ni a. . . . Rei lo tê pawh ni se khawvêl ‘tem’ châkna nei ṭhalai zawng zawngte hnênah chuan: ‘Tem suh u!’ tih ka hrilh duh a ni. Atîrah chuan a nuam pawh a ni thei e; mahse, a tâwpna chu râpthlâk tak a ni. Khawvêl hian lungngaih manganna bâk pêk tûr engmah a nei lo. Ka tem tawh a, ka hria alâwm. Pathian Jehova inawpna pâwl chhûngah awm reng rawh u! Hei chauh hi hlimna min pe thei nun kawng awmchhun a ni si a,” tiin.
19, 20. Kristian kohhran chuan vênhimna eng nge a pêk a, engtin nge a pêk?
19 Vênghimtu che Kristian kohhran i kalsan chuan i chungah eng nge lo thleng thei tih han ngaihtuah teh. Mi tam tak chuan thutak an pawm hmaa an nunin awmzia a neih lohzia hre chhuakin, ngaih pawh an ngaihtuah duh lo. (Joh. 6:68, 69) Kristian unaute bêl tlatin, Setana khawvêla kan hmuh fo lungngaihna leh manganna ata vênhimna chu i hmu zêl ang. Anmahni kawmna leh kohhran inkhâwm apianga telna chuan Pathian Jehova tehna felte zawm a finthlâkzia a hriattîr ṭhîn ang che a, chûngte mila nung zêl tûrin a fuih bawk ang che. Fakna hla phuahtu tih angin, ‘inkhâwmna ropui takah chuan Pathian Jehova hnêna lâwmthu hrilh’ chhan tûr i ngah hle a ni.—Sâm 35:18.
20 Chhan eng engemaw te avângin, Kristian zawng zawngte chuan an Kristian rinawmna vawn reng harsa tih châng an nei ngei mai a. An mamawh awmchhun chu kawng dik kawhhmuh a ni mai thei. Chutiang hunah chuan nang leh kohhran chhûnga mi dangte’n unaute ṭanpui tûrin eng nge in tih theih? A dawta thuziak chuan i unaute ‘fuih a, i tihsâwt reng’ theih dân a bih chiang ang.—1 Thes. 5:11. (w10-E 06/15)
Engtin Nge Kan Chhân Ang?
• Sâm 73-na ziaktu thiltawn aṭangin eng nge kan zir theih?
• Dinaii thiltawn chuan eng nge min zirtîr?
• Engvângin nge Kristian kohhran chhûngah himna kan hmuh theih?
[Zirlai Atâna Zawhnate]
[Phêk 11-naa milemte]
Hmun him laiah chauh hleuh rawh; kohhran chhûngah awm rawh!