Thinurna Thununin “Ṭhatnain Sual Chu Ngam Zâwk Rawh”
Thinurna Thununin “Ṭhatnain Sual Chu Ngam Zâwk Rawh”
‘Duh takte u, in phuba la suh ula, . . . ṭhatnain sual chu ngam zâwk rawh u.’—ROM 12:19, 21.
1, 2. Thuhretu zinmi ṭhenkhatin entawn tûr ṭha eng nge an siam?
JEHOVA Thuhretu mi 34-te chu branch office hlanna hun hmang tûrin an zin a, an thlawhnaah chuan thil fel lo a awm avângin an thang khaw tlai a. Thlawhna tui thun nâna dârkâr khat lek châwl tûra an inngaih laiin, ei leh in tûr leh inthiarna tûr mumal pawh awm lohna hmun, ram hla taka thlawhna ṭumhmunah chuan dârkâr 44 chhûng zet an châwl a ni. Thlawhnaa chuang tam tak chu an thin a ur hle a, a thawktute chu an vau va. Mahse, kan unaute chuan buaina engmah siam lovin an nghâk mai a ni.
2 A tâwpah chuan Thuhretute chuan an tum ram chu thlengin, branch office hlanna hun tâwp lam chu an va nang hrâm a. Chau hlawm hle mah se, tualchhûng unaute nêna inkâwm tûrin an awm khaw tlai a ni. A hnuah chuan, dawhthei tak leh insûm thei taka an awmna chu hmuh hmaih a nih lohzia an hria a. Thlawhnaa chuang ve pa pakhat chuan thlawhna thuneitute hnênah, “Thlawhnaa chuang Kristian 34-te chu awm lo sela chuan, airport-ah khân intual vuakna a thleng ngei ang,” tiin a lo hrilh a ni.
Thinurna Khawvêlah Kan Awm
3, 4. (a) Nasa taka thinurnain engtin nge mihringte a tihbuai a, engtia rei nge a tihbuai tawh? (b) Kaina chuan a thinurna chu a thunun thei em? Hrilhfiah rawh.
3 He khawvêl nêksâwrnate hian mite a tithinur thei a. (Thur. 7:7) Chu thinurna chuan huatna leh tharum thawhna a thlen fo ṭhîn. Chhûngkaw lungngaihna chuan in chhûngkhur tam takah innghirnghona a thlen laiin, ram leh ram inkârah leh ram pakhat chhûngah ngei pawh indona a awm a ni. Chutiang thinurna leh tharum thawhna chu tûn hnai maia inṭan a ni lo. Adama leh Evi te fatîr Kaina chuan thîkna avânga thinurin, a unaupa Abela chu a that a. Pathian Jehova chuan Kaina chu a thinurna thunun tûra fuihin, malsâwm tiam mah se, chu thil sual tak chu a ti tho a ni.—Genesis 4:6-8 chhiar rawh.
4 Ṭha famkim a ni lo chung pawhin, chu mi chungchângah Kaina chuan duh a thlang thei a. A duh phawt chuan thinurna tilang lovin, a insûm thei reng a ni. Chuvâng tak chuan, a tharum thawhnaah mawh a phur liau liau a ni. Chutiang bawkin, kan ṭhat famkim lohna chuan thinurna leh thinur taka thiltih pumpelh chu a tiharsa zual a. Tin, buaina khirh tak dangte chuan hêng ‘hun khirh taka’ nun hrehawmna chu a belhchhah a ni. (2 Tim. 3:1) Entîr nân, ei leh bâr harsatna chuan kan rilru a tibuai thei hle a. Police leh chhûngkaw harsatna ṭanpuitu pâwlte chuan sum leh pai lama harsatna chu nasa taka thinurna leh in chhûngkhura tharum thawhna a pun chhan niin an sawi a ni.
5, 6. Thinurna lama khawvêl rilru put hmang eng hian nge min nghawng thei?
5 Chu bâkah, kan mi kawm tam tak chu “mahni inhmangaihtu te,” “chapo te,” an nih bâkah, “mi kawlhsen te” an ni hial a. Chûng mize ṭha lote neih leh thinur duhna neih mai chu a awlsam hle. (2 Tim. 3:2-5) A nihna takah chuan, cinema leh TV-a thawnthu tihchhuahte hian phuba lâk chu fakawm tak leh tharum thawhna chu thil pângngai, buaina chinfelna thiamawm tak niin a lantîr a. A thawnthu chuan a tlângpui thuin thlîrtute chu mi sualin “a phu ang ngei a dawn hun”—changtupa kuta râwng taka a thih hun—chu a nghahhlelhtîr a ni.
6 Chutiang ngaih dân theh darhna chuan Pathian kawng ni lovin, “khawvêl thlarau” leh a rorêltu thinur tak, Setana kawng chu a chawilâr a ni. (1 Kor. 2:12; Eph. 2:2; Thup. 12:12) Chu thlarau chuan tisa ṭha famkim lo duh zâwng a phuhru a, chu chu Pathian thlarau thianghlim rah nên a inkalh chiah a ni. Dik takin, Kristian zirtîrna chu thinur hunah pawh phuba lâk loh hi a ni. (Matthaia 5:39, 44, 45 chhiar rawh.) Chuti chu, engtin nge Isua zirtîrna hi kan nunpui lehzual theih ang?
Entîrna Ṭha leh Ṭha Lote
7. Simeona leh Levia te’n an thinurna an thunun loh avângin eng thil nge thleng?
7 Bible-ah hian thinurna thunun chungchânga zilhna tam tak a chuang a, kan inthunun leh thunun loh huna thilthleng thei târ langtu entîrna ṭangkai tak takte pawh a chuang bawk. Entîr nân, Jakoba fapa Simeona leh Levia te’n an farnu Dinaii a mutpui avânga Sekema chunga phubâ an lâk laia thilthleng kha han ngaihtuah teh. Anni chu “an lungngai a, an thinur ta êm êm a.” (Gen. 34:7) Tichuan, Jakoba fa dangte chuan Sekema awmna khua chu an bei a, an suasam a, an nupui fanaute pawh salah an man ta vek a. Chûng zawng zawng chu Dinaii avâng mai ni lovin, an chapo vâng, an hmingchhiat phah vânga ti an nih hmêl hle. Sekema’n anmahni leh an pa Jakoba a timualpho niin an hria a ni. Mahse, Jakoba’n an thiltih chu eng angin nge a ngaih?
8. Simeona leh Levia te chanchin chuan phuba lâk chungchângah eng nge a târ lan?
8 Dinaii thiltawn râpthlâk tak chuan Jakoba chu a tilungngai hle a; chuti chung pawhin a fapate phuba lâkna thiltih chu a dem a ni. Mahse, Simeona leh Levia chuan: “Kan farnu hi nawhchizuar tih angin a ti tûr em ni ang?” tia sawiin thiam inchantîr an la tum hrâm a ni. (Gen. 34:31) An buaina chu chutah chuan a tâwp mai lo, Pathian Jehova chu an thiltiha a lâwm tlat loh avângin. Kum tam tak a vei hnuah, Jakoba chuan Simeona leh Levia te’n thinur taka tharum an thawh avângin an thlahte chu Israel hnamte zîngah an darh dâwn tih a sawi lâwk a ni. (Genesis 49:5-7 chhiar rawh.) Ni e, thinurna an thunun loh avângin Pathian leh an pa Jakoba duhsakna an chân a ni.
9. Engtik khân nge Davida chuan a thinurna a thunun zawh loh ṭhelh?
9 Lal Davida chu chutiang a ni ve lo. Ani chuan phuba lâk theihna hun remchâng a nei chung pawhin a la duh tlat lo. (1 Sam. 24:3-7) Nimahsela, ṭum khat chu a inthunun zo lo ṭhelh a ni. A ṭhuihhruaite chuan mi hausa Nabala berâmte an vênhimsak ṭhîn chung pawhin Nabala chuan anni chu a lo hau hrep mai a. A mite thlavâng hauhva a thinur avângin, Davida chuan phuba lâk a tum ta a ni. Nabala leh a chhûngkua bei tûra a mite nêna an thawh chhuah lai chuan, tlangvâl pakhat chuan Nabala nupui fing tak Abigaili hnênah thil awm dân hrilhin, hma la tûrin a tur a. Chu veleh, Abigaili chu thilpêk tam tak kengin Davida hmu tûrin a kal ta a. Davida hnênah chuan Pathian Jehova a ṭihna avânga Nabala thiltih huatthlala tak chu ngaidam tûrin a ngên a. Davida chuan a inhriat chhuah hnuah: “Nang thisen chhuah thiam loh channa laka mi humtu . . . chu malsâwmin awm . . . ang che,” tiin a sawi a ni.—1 Sam. 25:2-35.
Kristian Rilru Put Hmang
10. Kristiante chuan phuba lâk chungchângah eng rilru put hmang nge an lantîr ang?
10 Simeona leh Levia chunga thilthleng te, Davida leh Abigaili inkâra thilthleng te chuan Pathian Jehova’n khuahkhirh loh thinurna leh tharum thawhna a dodâl bâkah, remna siam tûra ṭan lâkna chu mal a sâwm tih a târ lang. Tirhkoh Paula chuan: “A theih phawt chuan nangmahni lam tal, mi zawng zawng nên inremin awm rawh u. Duh takte u, in phuba la suh ula, Pathian thinurna kian zâwk rawh u, ‘Phuba rêng rêng keima lâk tûr a ni, keiman ka thungrûl ang,’ Lalpain a ti, tih ziak a ni si. Chuvângin i hmêlma a rilṭâm chuan ei tûr pe rawh, a tuihâl chuan in tûr pe rawh: chutiang i tih chuan a lu chungah meiling i chhêk khâwm a ni ang. Sual ngam chein awm suh la, ṭhatnain sual chu ngam zâwk rawh,” tiin a ziak a ni.—Rom 12:18-21. *
11. Engtin nge unaunu pakhat chuan thinurna thunun dân a zir?
11 Keini pawhin chu zilhna thu chu kan nunpui thei a ni. Entîr nân, unaunu pakhat chuan upa pakhat hnênah a hnathawhnaa an manager thar chanchin a thlen a. Ani chu hleih nei tak leh ngilnei lo tak niin a sawi a ni. A chunga a thinur avângin a hnathawh chu bânsan mai a tum a. Upa chuan thil ti thut thut lo tûrin a hrilh a. Unaunuin an manager-nu cheibâwl dân thinur taka a chhân lêtna chuan thil a tikhaw lo zâwk a ni tih a hria a ni. (Tit. 3:1-3) Unaunu hnênah chuan hna dang a hmu a nih pawhin, ngilneih lohna a chhân lêt dân a thlâk a ngai tih a hrilh a. Isua min zirtîr anga miin amah cheibâwl se a duh tûr ang taka an manager-nu cheibâwl ve tûrin thurâwn a pe a ni. (Luka 6:31 chhiar rawh.) Unaunu chuan chutianga tih chu a tum ta a. Eng nge a rah chhuah? Hun engemaw zât a liam hnu chuan, manager-nu rilru put hmang pawh a inthlâkthleng a, kan unaunu chu a hnathawh avângin a fak ta hial a ni.
12. Engvângin nge Kristiante inkâra harsatna chu tawrh a harsat bîk theih?
12 Kristian kohhran pâwna mite nêna chutiang buaina neih chu mak pawh kan ti lo mai thei. Setana khawvêlah hian hleihneihna a awm ṭhîn tih kan hria a, mi suaksualte avânga thinur loh chu kan tum tlat a ngai a ni. (Sâm 37:1-11; Thur. 8:12, 13; 12:13, 14) Amaherawhchu, kan thlarau lam unaute nêna buaina kan neih hian, tawrh a harsa bîk thei a ni. Thuhretu pakhat chuan, “Thutaka ka awm tirh lama harsa ka tih ber chu, Pathian Jehova mite hi ṭha famkim an ni lo tih pawm hi a ni,” tiin a sawi. Kohhran mi zawng zawngte chu Kristian ngilneihnaa an incheibâwl tawn ṭheuh beiseiin hmangaihna nei lo khawvêl ata kan kal chhuak a. Chuvângin, kan Kristian unau pakhat, a bîk takin kohhrana mawhphurhna nei tuemawin ngilnei lo tak emaw, Kristiante tiha mawi lo taka thil a tih hian, kan rilru a tinain min tithinur thei a ni. ‘Engtin nge maw hetiang thil hi Pathian Jehova mite zînga a thlen theih chu le?’ tiin i ngaihtuah mai thei. A nihna takah chuan, chutiang thil chu tirhkohte hun laia hriak thih Kristiante zîngah pawh a lo thleng tawh ṭhîn a ni. (Gal. 2:11-14; 5:15; Jak. 3:14, 15) Chutiang thil kan tawn hunah engtin nge kan chhân lêt ang?
13. Engvângin nge harsatna lo awmte hneh kan tum ang a, engtin nge kan hneh theih ang?
13 A chanchin kan sawi tâk unaunu chuan, “Rilru naa min siamtute tâna ṭawngṭaisak ka zir a. Chu chuan min ṭanpui hle a ni,” a ti. Kan lo chhiar tawh angin, Isua chuan min tiduhdahtute tâna ṭawngṭai tûrin min zirtîr a. (Mt. 5:44) Thlarau lama kan unaute tân kan ṭawngṭai lehzual tûr a va ni êm! Pa berin a fate inhmangaih dial dial tûra a duh ang bawkin, Pathian Jehova chuan leia a fate chu inhmangaih tûrin a duh a ni. Inrem tak leh hlim taka chatuana kan nun hun tûr chu kan nghâkhlel hle a, chutianga nung thei tûrin Pathian Jehova chuan min zirtîr mêk a ni. Ani chuan a hna ropui tak thawhnaa inṭawiâwm tlâng tûrin min duh a. Chuvângin, buainate chinfel emaw, bawhchhiatnate “haider” emaw chu tum tlatin, inpumkhatin i awm zêl ang u. (Thufingte 19:11 chhiar rawh.) Harsatna a lo thlen huna kan unaute kawm tawh loh mai ai chuan, Pathian mite zînga awm zêl—Pathian Jehova “chatuan bân” vênhima awm zêl—tûrin kan inṭanpui tawn zâwk tûr a ni.—Deut. 33:27.
Mi Zawng Zawng Chunga Zaidamna Chuan Rah Ṭha A Chhuah
14. Setana’n min ṭhen hran a tumna chu engtin nge kan do lêt ang?
14 Setana leh a ramhuaite chuan chanchin ṭha kan thehdarh theih loh nân chhûngkua leh kohhrana hlimna awm chu tihchhiat an tum char char a. Chhûng lama inrem lohna chu a hlauhawm hle tih an hriat avângin, inṭhenna awmtîr an tum a ni. (Mt. 12:25) Chu thununna ṭha lote kan do lai hian, Paula fuihna thu: “Lalpa bâwih chuan do tûr a ni si lo va, mi zawng zawng chungah zaidamin, . . . a zirtîr zâwk tûr a ni,” tih chu kan zâwm tûr a ni. (2 Tim. 2:24, 25) Kan dote hi “tisa leh thisen an ni si lo, . . . thlarau sualho awmte an ni zâwk” tih hre reng rawh u. He indonaa hnehna chang tûr hian, thlarau lam râlthuam kan hman a ngai a, chutah chuan “remna chanchin ṭha inbuatsaihna” a tel a ni.—Eph. 6:12-18.
15. Kohhran pâwn lam aṭanga beihna chu engtin nge kan chhân lêt ang?
15 Kohhran pâwn lam aṭangin, Jehova hmêlmate chuan a mi inrem takte chu nasa takin an bei a. Hmêlma ṭhenkhat chuan Jehova Thuhretute chungah kut an thlâk a. A dangte chuan chanchinbu mite hmaah emaw, thu buai remna court-ah emaw an sawichhe bawk. Isua chuan a hnungzuitute chu chutiang thil beisei tûrin a lo hrilh sa a ni. (Mt. 5:11, 12) Engtin nge chutiang thilte chu kan chhân lêt ang? Ṭawngkamin emaw, thiltihin emaw ‘sual chu sualin kan thungrûl’ ngai tûr a ni lo.—Rom 12:17; 1 Petera 3:16 chhiar rawh.
16, 17. Kohhran pakhat chuan eng dinhmun khirh tak nge a tawh?
16 Diabola chuan kan chungah eng pawh rawn thlentîr se, ‘ṭhatnaa sual ngamin’ thu hriattîrna ṭha tak kan nei thei a ni. Entîr nân, Pacific tuifinriata thliarkâr pakhata Jehova Thuhretute kohhran pakhat chuan Hriatrengna hun hman nân hall an hawh a. Chu thu an han hriat chuan, tualchhûng kohhran (church) hruaitute chuan an mi leh sate hnênah Thuhretute’n Hriatrengna an hmanna tûr hmun leh hunah an kohhranin inkhâwmna an nei dâwn tih an hriattîr a ni. Amaherawhchu, police lal chuan chûng kohhran hruaitute hnênah chuan hall chu Thuhretute hmantîr tûrin thu a pe a. Nimahsela, a hun a lo thlen chuan an mi leh sate chu hall khata lo kal khâwmin, an inkhâwm ta tho va.
17 Police-te’n hall tihruah luih an tum chuan, an church president chu kan kohhran upa pakhat hnêna lo kalin: “Zânin hian thil pawimawh tih tûr in nei elo?” a rawn ti a. Unaupain Hriatrengna hun an hman tûr thu a sawi chuan, chu pa chuan: “Aw, ka lo hre lo a nih chu mawle!” a ti a. Chutah, police pakhat chuan: “Tukin zîngah kan hrilh tawh che kha!” a ti a. Chutah an president chu vêrvêk taka nuiin: “Engtin nge i tih tâk ang? Kan khat vek si a. Police min hnawh chhuahtîr mai dâwn em ni?” tiin a sawi a. Thuhretute chu buaina siamtu zâwk anga an lan theih nân khermei takin thil a lo tikual vêl tawh hi a lo ni a! Kan unaute chuan eng nge an tih tâk ang?
18. Engtin nge unaute chuan an buaina tawh chu an chhân lêt a, chu chuan eng rah nge a chhuah?
18 Thuhretute chuan dârkâr chanve chhûng inkhawmna hun pe a, a hnua Hriatrengna an hman tûr thu an hrilh a. Dârkâr chanve aia rei an hman a, hall an chhuahsan hnuah Hriatrengna chu an hmang ta chauh a ni. A tûkah chuan, sawrkâr chuan thil awm dân hre fiah tûrin hma a la nghâl a. Thil awm dân an ngaihtuah hnu chuan, buaina siamtu chu Thuhretute ni lovin, church president a nih zâwkzia an puang chhuak ta a ni. Jehova Thuhretute hnênah pawh buaina chinfelna kawnga an dawhtheih avângin lâwmthu an hrilh bawk. Thuhretute’n ‘mi zawng zawng nêna inrema awm’ an tumna chuan rah ṭha a chhuah a ni.
19. Mi dangte nêna inremna awmtîr theitu kawng dang leh chu eng nge ni?
19 Mi dangte nêna inremna neih reng theih dân kawng dang leh chu khawngaihna tel ṭawngkam hman hi a ni a. A dawta thuziak chuan khawngaihna tel ṭawngkam tih awmzia leh chu mi kan neih theih dân leh kan hman theih dân a rawn sawifiah ang. (w10-E 06/15)
[Footnote]
^ par. 10 “Meiling” tih chu hmân lai huna thîr thlitfaina tûra a chung leh hnuai lama meiling daha chhuantui dân aṭanga lâk a ni a. Mi ngilnei lote chunga ngilneihna kan lantîrna chuan an rilru put hmang thlâkin, an mize ṭhate a phawrh chhuak thei a ni.
Kan Hrilhfiah Thei Em?
• Engvângin nge tûn lai khawvêla mite hi an thinur theih êm êm?
• Eng Bible entîrnain nge thinurna thunun leh thunun loh rah chhuahte târ lang?
• Kan Kristian unau tuemawin kan rilru a tihnat chuan engtin nge kan chhân lêt ang?
• Kohhran chhûng leh pâwn lam aṭanga beihnate chu engtin nge kan chhân lêt ang?
[Zirlai Atâna Zawhnate]
[Phêk 20-naa milem]
Simeona leh Levia chu an thinurna thunun zo lova an lantîr hnuah in lamah an hâwng
[Phêk 22-naa milemte]
Ngilneihna lantîrna chuan mi dangte rilru put hmang a thlâk danglam thei