Thlarau Lam Thiltihah Chawlh Hahdamna Hmu Ang Che
Thlarau Lam Thiltihah Chawlh Hahdamna Hmu Ang Che
“Ka nghâwngkawl bât ula, . . . tichuan, in thlarau tân chawlhna in hmu ang.”—MT. 11:29.
1. Sinai Tlângah khân Pathianin eng ruahmanna nge a siam a, engvângin nge a siam?
SINAI Tlânga Dân thuthlung pêkah khân, chawlhkâr tina Sabbath serh tûr ruahmanna pawh a tel a. Pathian Jehova chuan a thusawitu Mosia kal tlangin Israel hnam hnênah chuan heti hian thu a pe a ni: “Ni ruk chhûngin i hna i thawk tûr a ni a, a ni sarih nî chuan i châwl rih tûr a ni: tichuan i sebâwngpa emaw i sabengtung emaw an lo châwl thei ang a, i bâwihnu fapate leh i hnam dangte pawh an lo hahdam ve thei dâwn nia,” tiin. (Ex. 23:12) Ni e, Dân thuthlung hnuaia awmte a ngaihsakna avângin Pathian Jehova chuan a mite chu “an lo hahdam” theih nân chawlhna nî a ruahmansak a ni.
2. Engtin nge Israelte khân Sabbath serh chu an hlâwkpui?
2 Sabbath chu chawlh hahdamna nî mai a ni em? Ni lo ve, Israelte’n Pathian Jehova an biakna pêng pawimawh tak a ni zâwk. Sabbath serhna chuan chhûngkaw lûte hnênah an chhûngkuain thil fel taka ti tûra “LALPA kawng an zawh theih nân” anmahni zirtîrna hun remchâng a pe a. (Gen. 18:19) Tin, chhûngkuate leh ṭhian ṭhate tân pawh Pathian Jehova thiltihte ngaihtuah tûra kal khâwmna hun leh inkawm khâwmna hun ṭha a pe bawk. (Is. 58:13, 14) A pawimawh zâwk chu Sabbath chuan Krista Kum Sâng Rorêlna hnuaia awm tûr chawlh hahdamna dik tak a entîr lâwk hi a ni. (Rom 8:21) Mahse, kan hunah hian chutiang chawlh hahdamna tûr a awm em? Pathian Jehova kawngte ngaihventu Kristian dikte chuan chutiang chawlh hahdamna chu khawiah nge an hmuh theih ang a, engtin nge an hmuh theih ang?
Kristian Inkawm Khâwmna Aṭangin Hahdamna Hmu Ang Che
3. Eng kawngin nge kum zabi khatnaa Kristiante chu an inṭanpui tawn a, chu chuan eng nge a rah chhuah?
3 Tirhkoh Paula chuan Kristian kohhran chu “thutak ban leh innghahna” tiin a sawi a. (1 Tim. 3:15) Kristian hmasate chuan hmangaihnaa infuih tawnna leh intihchak tawnna aṭangin ṭanpuina nasa tak an dawng a ni. (Eph. 4:11-13, 16) Ephesi khuaa a awm laiin, Korinth kohhrana unaute chuan Paula chu an va tlawh a. Paula ngeiin a rah chhuah a sawi hi lo chhinchhiah teh: “Stephana te, Phortunata te, Akaika te an lo kal hi ka lâwm a ni, . . . anni hian ka rilru . . . an tiharh si a,” tih hi. (1 Kor. 16:17, 18) Korinth khuaa unaute rawngbâwlsak tûra Tita a va kal pawh khân, Paula chuan kohhranho hnênah: “Nangni zawng zawngin a rilru in tihharhsak,” tiin a ziak a ni. (2 Kor. 7:13) Chutiang bawkin tûn laiah pawh, Jehova Thuhretute chuan Kristian unaute nêna inkawm khâwmna aṭangin thlarau lama hahdamna leh harhna dik tak an hmu a ni.
4. Engtin nge kohhran inkhâwmte chuan thlarau lama hahdamna min pêk?
4 I thiltawn aṭangin kohhran inkhâwmte chu hlimna min petu a ni tih i hria a. Chûng inkhâwmahte chuan ‘rinnaa inthlamuan tawn theihna’ hun ṭha kan nei a ni. (Rom 1:12) Kan Kristian unaute chu a châng chânga kan hmuh ṭhin hmêlhriat satliah mai an ni lo. Kan hmangaih leh kan zah tak ṭhian dik takte an ni zâwk. Anni nêna inkhâwmnaa kan inkawm ṭhinna aṭangin hlimna leh thlamuanna nasa tak kan hmu a ni.—Philm. 7.
5. Engtin nge inkhâwmpuiahte hian thlarau lama kan intihhahdam tawn theih?
5 Thlarau lama hahdamna dang chu kum tina kan neih kan inkhâwmpui aṭangte hian kan dawng a. Hêng inkhâwmpuite hian Pathian Thu, Bible aṭanga thutak nunna tui min pêk bâkah, ṭhian kawm lama ‘in hawn’ lehzual theihna hun remchâng min pe bawk a ni. (2 Kor. 6:12, 13) A nih leh, mi zakzum thei tak leh mite hmaichhana biak harsa ti mi i nih chuan engtin nge ni ang? Kan unaute nêna inhmêlhriat theih dân kawng khat chu inkhâwmpuia tlâwmngai pâwla inpêk hi a ni. Unaunu pakhat chuan international inkhâwmpuia ṭanpuina a pêk hnu chuan heti hian a sawi a ni: “Kan chhûngkaw zînga mi leh ṭhian ṭhenkhat tih bâk chu hmêlhriat ka nei lo rêng rêng a. Mahse, hmun vêl tifai tûra ka inpêk hnu chuan unau tam tak ka hmêlhriat ta! Nuam ka ti khawp mai!” tiin.
6. Chawlh hmanga zin laia thlarau lama hahdamna hmuh theih dân kawng khat chu eng nge ni?
6 Israelte chu Pathian biakna kûtte hmang tûrin Jerusalem-ah kum tin vawi thum an zin ṭhîn a. (Ex. 34:23) Chutianga zin tûr chuan an in leh lo te, an dâwrte kalsanin, zin kawng hrehawm takah ni engemaw zât kea an kal a ngai fo ṭhîn. Chuti chung pawhin, biak ina va kalte chuan “LALPA chawimawia hla sain” hun chu “hlim takin” an hmang ṭhîn a ni. (2 Chro. 30:21) Tûn laia Pathian Jehova chhiahhlawh tam takte pawhin an chhûngte nêna an hnaih bera awm Jehova Thuhretute branch office, Bethel tlawh chu nuam an ti hle a ni. Chhûngkuaa chawlh hmanga in zin leh hunah chutiang chuan in tlawh thei ang em?
7. (a) Engtin nge intihhlimnate chu hlâwkpui theih a nih? (b) Engin nge intihhlimna chu hriat reng tlâk leh mi tichak thei tak nihtîr thei?
7 Chhûngkaw zînga mite leh ṭhiante nêna intihlim tûra kal khâwmna pawhin min tichak thei a. Lal fing Solomona chuan: “Mihring tân chuan ei leh in te leh a thawhrimnaa a rilru tihnawm te aliama ṭha a awm lo,” tiin a sawi a ni. (Thur. 2:24) Chutiang intihhlimna chuan min tihhahdam mai bâkah, kan Kristian unaute min hriat chiantîr lehzual avângin anmahni kan hmangaihna a tizual bawk. Intihhlimna chu hriat reng tlak leh mi tichak thei tak ni tûr chuan mi sâwm tam lutuk loh leh ṭha taka huaihawt chu a ṭha ber a, zu chhawp kan tum a nih phei chuan huaihawt ṭhat a ngai lehzual a ni.
Rawngbâwlnain Hahdamna A Thlen
8, 9. (a) Isua thuchah ken leh Pharisaite leh lehkhaziaktute thuchah ken inan lohna sawi rawh. (b) Bible thutak mi dangte hnêna hrilhna chu engtin nge kan hlâwkpui?
8 Isua chuan rawngbâwlnaah ṭhahnem a ngai hle a, a zirtîrte pawh chutianga ṭhahnem ngai ve tûrin a fuih a ni. Chu chu a thusawi: “Buh seng tûr a tam hle si a, nimahsela a thawktute an tlêm; chutichuan, a buh seng tûra thawktu tûrte tîr tûrin buh Neitupa hnênah chuan ngên rawh u,” tihah hian a lang chiang a ni. (Mt. 9:37, 38) Isua thuchah ken chuan mi a tihahdam thei tak zet a; “chanchin ṭha” tia koh a ni. (Mt. 4:23; 24:14) Chu chu Pharisaite’n mipuite chunga dân rit tak tak an zamte nên chuan a inang lo hle.—Matthaia 23:4, 23, 24 chhiar rawh.
9 Lalram thuchah mi dangte hnêna kan hrilh hian thlarau lama hahdamna kan pe a, chutih rualin Bible thutak hlu êm êm maite chu kan thinlung leh rilruah kan nemnghet bawk a ni. Fakna hla phuahtu chuan: ‘LALPA chu fak rawh u; kan Pathian faka zai hi a ṭha si a; chu chu a nuam a ni,’ tiin dik takin a lo sawi a ni. (Sâm 147:1) I ṭhenawm hnêna Pathian Jehova fakna aṭanga i hmuh hlimna chu i tipung thei ang em?
10. Rawngbâwlnaa kan hlawhtlinna chu kan thuchah ken mite’n an chhân lêt dânah a innghat em? Hrilhfiah rawh.
10 Thu hrilhna bial ṭhenkhata mite chuan hmun danga mite aiin chanchin ṭha an pawm duh zâwk a. (Tirhkohte 18:1, 5-8 chhiar rawh.) Lalram thuchah an chhân lêt ṭhat lohna hmuna awm i nih chuan, rawngbâwlnaa i hlen chhuah thil ṭhate chu ngaihtuah tum tlat rawh. Pathian Jehova hming puan chhuah tuma i ṭan lâkna chu a thlâwn lo tih hre reng ang che. (1 Kor. 15:58) Chu bâkah, kan hlawhtlinna chu mite’n chanchin ṭha an chhân lêt dân ṭanchhana teh a ni lo. Pathian Jehova chuan mi rilru ṭhate hnênah Lalram thuchah chhân lêt theihna hun remchâng a pe ngei ang tih kan ring tlat thei a ni.—Joh. 6:44.
Chhûngkuaa Pathian Biakna Chuan Min Tihahdam
11. Pathian Jehova chuan nu leh pa te hnênah eng mawhphurhna nge a pêk a, chu chu engtin nge an hlen chhuah theih?
11 Pathian ṭih nu leh pate chuan an fate hnêna Pathian Jehova leh a kawng chanchinte zirtîr tûrin mawhphurhna an nei a. (Deut. 11:18, 19) Nu emaw, pa emaw i nih chuan hmangaihna ngah kan Pa vâna mi chanchin i fate zirtîr tûrin hun i insiam em? He mawhphurhna pawimawh tak hlen chhuak tûr leh chhûngkaw mamawhte enkawl tûr hian Pathian Jehova chuan lehkhabu te, magazine te, video te, leh ngaihthlâk theih thil dangte hmangin thlarau lam chaw hnianghnâr takin min pe a ni.
12, 13. (a) Engtin nge chhûngkuate chuan Chhûngkuaa Pathian Biakna neih zân chu an hlâwkpui theih? (b) Engtin nge nu leh pate chuan an chhûngkuaa Pathian biakna chu thlarau lama hahdamna thlentîrtu an nihtîr theih?
12 Chu bâkah, bâwih rinawm leh fing pâwl chuan Chhûngkuaa Pathian Biakna neih zân a ruahman bawk a. Chu chu chawlhkâr tina zan khat chhûngkuaa Bible zir nâna dah hran hi a ni. Mi tam tak chuan chu ruahmannain an chhûngkua a inpumkhattîr bâkah, Pathian Jehova nêna an inlaichînna pawh a tinghet sauh tih an sawi. Mahse, engtin nge nu leh pate chuan an chhûngkuaa Pathian biakna chu thlarau lama hahdamna thlentu an nihtîr theih ang?
13 Chhûngkuaa Pathian Biakna neih zân chu ninawm tak leh thutak rûna neih tûr a ni lo. Amah kan biakna kawnga hlimna hmu tûra min duhtu, “Pathian hlim” betute kan ni si a. (1 Tim. 1:11, NW; Phil. 4:4) Bible aṭanga thlarau lam thu ṭha takte sawiho theihna tlai khat kan neih belh chu malsâwmna a ni chiang hle. Nu leh pate chuan ngaihruatna hmangin leh zirtîr dân tharte chher chhuakin an zirtîr tûr a ni. Entîr nân, chhûngkua pakhat chuan kum sâwm mi an fapa Brandon-a chu, “Engvângin Nge Bible-in Setana Chu Rûl Tia A Koh?” tih chungchânga report pe tûrin an ti a. Brandon-a chuan rûl a ngainat avângin chu chu pawi a ti a, Setana nêna thlunzawm a nih avângin a rilru a hrehawm a ni. Chhûngkaw ṭhenkhat chuan Bible thawnthute chu chan tûr ṭheuh insiamin Bible aṭangin an chhiar emaw, a lem an chang emaw ṭhîn a. Hetiang zirtîrna hi a hlimawm mai bâkah, naupangte chu a teltîr ve avângin Bible thu bulte chuan an thinlung a khawih phah a ni. *
Nangmah Tichau Theitu Thilte Chu Pumpelh Rawh
14, 15. (a) Engtin nge ni hnuhnûngahte hian rilru hahna leh him lo nia inhriatna chu a pun? (b) Mi dangte tawh loh rilru hahna eng nge kan tawrh belh theih?
14 He kalhmang suaksual tak tâna ni hnuhnûngahte hian rilru hahna leh him lo nia inhriatna a pung zêl a. Hna neih lohna leh ei leh bâr lama harsatna dangte chuan mi maktaduai tam tak a nghawng bawk. Hna nei laite pawhin an hlawh chu ip pawpa thlâk ang mai niin an hria a, chhûngkaw kham khawp pawh a tling lo fo a ni. (Hagaia 1:4-6 nên khaikhin rawh.) Politician te leh hruaitu dangte chuan firfiaka chêtna leh sualna lo chhuahna dang dangte tihbo an tumna kawngah tihtheih an nei tlêm hle. Mi tam takte chu mahni ṭhat famkim lohna hian nasa takin a tilungngai bawk.—Sâm 38:4.
15 Kristian dikte chu Setana khawvêl tihchhuah buaina leh nêksâwrna ata an fihlîm bîk lo. (1 Joh. 5:19) A châng chuan, Krista zirtîrte chuan Pathian Jehova laka rinawm an tum avângin mi dangte tawrh loh rilru hahna an tawrh belh thei a ni. Isua chuan: “Annin kei mi tihduhdah tawh chuan nangni pawh an tiduhdah ang che u,” a ti. (Joh. 15:20) Amaherawhchu, “tihduhdah” kan ni chung pawhin, “kalsanin kan awm . . . lo.” (2 Kor. 4:9) Engvângin nge?
16. Engin nge hlimna nei zêl tûra min ṭanpui thei?
16 Isua chuan: “Nangni thawkrim leh phurrit phur zawng zawngte u, ka hnênah lo kal ula, keiman ka chawlhtîr ang che u,” a ti a. (Mt. 11:28) Krista tlanna inthawina ring tlatin, Pathian Jehova kutah kan inkawltîr a tih theih a ni. Chutiang chuan, ‘thiltihtheihna nasa tak’ chu kan nei thei a ni. (2 Kor. 4:7) Fiahna leh tihduhdahnate kan tawrh theih mai bâkah, hlim taka kan awm zêl theih nân, “thlamuantu,” Pathian thlarau thianghlim chuan kan rinna chu nasa takin a tinghet a ni.—Joh. 14:26; Jak. 1:2-4.
17, 18. (a) Eng thlarau lakah nge kan invên ang? (b) Hlimhlawp bâwlna thil ho mai maite ûmna chuan eng nge a rah chhuah theih?
17 Tûn laia Kristian dikte tân hlimhlawp bâwl âtchilh he khawvêl thlarau thununa awm lo tûra invên a ngai a ni. (Ephesi 2:2-5 chhiar rawh.) Chutilochuan, “tisa châkna te, mit châkna te, dam chhûng ropuina lem te” thlêmin kan awm hlauh dah ang e. (1 Joh. 2:16) A nih loh pawhin, tisa châkna lama inhmanna chuan hahdamna a thlen kan ring hlauh thei bawk. (Rom 8:6) Entîr nân, ṭhenkhat chuan rilru zauthau taka an awm theih nân ruihhlo leh zû te an hmang dik lo va, saruak lem leh thuziak bawlhhlawhte an enin an chhiar bawk a, nunna atâna hlauhawm thei intihsiaknaah te an tel bawk a; tin, dânin a phal loh thiltih dang dangte chu an ti bawk a ni. Setana “ngamthlêmnate” thiltum chu hahdamna suak pawm tûra mite bum hi a ni.—Eph. 6:11.
18 Ei leh in te, intihhlimna ṭhate chu a mawi tâwk chauhva neih a nih chuan a sual hran lo. Chuti chung pawhin, chûng thilte chu kan nunah kan dah pawimawh ber tûr a ni lo. Inbûk tâwkna leh insûm theihna neih a pawimawh hle a; a bîk takin kan chênna hun han thlîr hian a pawimawh lehzual a ni. Kan thil ûmte chuan ‘kan Lalpa Isua Krista hriatna kawngah chuan thatchhe tak leh rah chhuah thei lo’ khawpin min tichau thei a ni.—2 Pet. 1:8.
19, 20. Engtin nge chawlh hahdamna dik tak chu hmuh theih a nih?
19 Kan ngaihtuahna chu Pathian Jehova dânte mila kan herh rem chuan, he khawvêl min pêk theih nawmsakna eng pawh chuan rei a daih lo tih kan hria ang. Mosia chuan chu chu a hre thiam a, keini pawhin kan hre thiam thei bawk a ni. (Heb. 11:25) A nihna takah chuan hahdamna dik, hlimna leh lungawina tluantling chu kan Pa vâna mi duhzâwng tihna aṭangin kan nei thei a ni.—Mt. 5:6.
20 Thlarau lam thiltihah hian chawlh hahdamna i hmu chho zêl ang u. Chutianga kan awm chuan, “beiseina lâwmawm—kan Pathian ropui tak [leh] Chhandamtu Isua Krista ropuina inlârna chu—nghâkin, Pathian ngaihsak lohna leh khawvêl châknate bânsanin . . . kan awm” tihna a ni ang. (Tit. 2:12, 13) Chuvângin, Isua thu neihna leh kaihhruaina chu zâwmin a nghâwngkawl bah zêl chu i tum tlat ang u. Chutianga kan tih chuan, hlimna leh chawlh hahdamna dik kan hmu thei dâwn zu nia! (w10-E 06/15)
[Footnote]
^ par. 13 Chhûngkuaa Pathian thu zirna tuiawm tak leh bengvârthlâk tak neih theih dân tûr chungchâng hriat belh nân, December 1990 chhuak, Kan Lalram Rawngbâwlna, (English) phêk 1-2-na chu en ang che.
Engtin Nge Kan Chhân Ang?
• Engtin nge Pathian Jehova mite chuan tûn laiah thlarau lama hahdamna an hmuh?
• Eng kawngin nge rawngbâwlna chuan keimahni leh kan thu ngaithlatute chu thlarau lama a tihhahdam?
• Chhûngkaw lûte chuan an chhûngkuaa Pathian biaknain thlarau lama hahdamna a thlen nân eng nge an tih theih?
• Eng thilte’n nge thlarau lamah min tichau thei?
[Zirlai Atâna Zawhnate]
[Phêk 30-naa milemte]
Isua nghâwngkawl bâtin, chawlh hahdamna tam tak kan hmu